Kĩlungu kya 14
Ũalyũlo wa Ngoo
Kwĩka maũndũ mathũku nĩ kũtumaa tũthata. Tũtonya kwĩthĩwa na ũtanu ĩngĩ ata ĩtina wa tweeka ũndũ mũthũku?
Asa Waitũ wa Ĩtunĩ Nĩwatũvangĩie Nzĩa ya Kũsinda Naĩ
Asa waitũ wa Ĩtunĩ nĩweesĩ kana ithyonthe tũkeeka maũndũ mathũku ĩũlũ wa nthĩ ĩno. Maũndũ ala mathũku twĩkaa nĩ naĩ. Twĩkaa naĩ yĩla tweeka maũndũ ala Ngai ũtwĩĩte tũikeke. Ĩngĩ notwĩkaa naĩ yĩla twalea kwĩka maũndũ ala Ngai ũtwĩĩte twĩke.
Asa waitũ wa Ĩtunĩ ndekaa naĩ, na ndaekaa andũ ala mekaa naĩ mekale Nake. Kwĩkala Nake nonginya tũalyũle ngoo kwondũ wa naĩ sitũ. Kũalyũla ngoo nĩkwasya twĩĩlile kwondũ wa naĩ sitũ na tũyĩeka kũsyĩka.
Asa waitũ wa Ĩtunĩ nũtwendete. Ndendaa naĩ sitũ siĩtũsiĩa kũsyoka kũla ũĩ. Kwa ou nĩwaseũvisye nzĩa yakũtũtetheesya.
Asa waitũ wa Ĩtunĩ nĩwatũmie Yesũ atũtetheesye kũalyũla ngoo kwondũ wa naĩ sitũ. Yesũ nũtũmanyĩasya maũndũ ala twaĩlĩte kwĩka tũsiĩe naĩ. Ĩngĩ nũtũnengae vinya wa kwĩka maũndũ aa. Yĩla twaĩkĩĩa nthĩnĩ Wake na twamũatĩĩa, nũvĩndũaa ngoo sitũ twĩthĩwe tũtekwenda kwĩka naĩ, ĩndĩ twende o kwĩka ũseo w’oka. Ethĩwa tũtĩkwenda kũthĩnĩkĩa naĩ sitũ, nĩtwaĩlĩte kũĩkĩĩa nthĩnĩ wa Yesũ. Ala kwaw’o maĩkĩĩaa nthĩnĩ wa Yesũ nĩmaalyũlaa ngoo kwondũ wa naĩ syoo.
Yĩla twaĩkĩĩa nthĩnĩ wa Yesũ na twaalyũla ngoo, kũthĩnw’a kwa Yesũ nĩ kũĩvĩaa naĩ sitũ na tũtĩthĩwa twĩ athesye. Tũtonya kũsyoka kwĩkala na Asa waitũ wa Ĩtunĩ nĩkwĩthĩwa twĩ atheu.
Ũneenan’ya
-
Kũalyũla ngoo nĩkwasya ata?
-
Nĩkĩ Asa waitũ wa Ĩtunĩ e kwenda tũalyũle ngoo kwondũ wa naĩ sitũ?
-
Nĩkĩ ala mena mũĩkĩĩo waw’o nthĩnĩ wa Yesũ maalyũlaa ngoo kwondũ wa naĩ syoo?
Asa Waitũ wa Ĩtunĩ Nũtũtavĩtye Ũndũ Twaĩlĩte Kwĩka Tũalyũle Ngoo
Kũalyũla ngoo, nonginya tũĩkĩĩe nthĩnĩ wa Yesũ na maũndũ ala wamanyĩisye. Nonginya tũĩkĩĩe nĩwathĩnie kwondũ wa naĩ sitũ. Nonginya tũĩkĩĩe kana nowe weka waĩ atonya kũĩvĩa naĩ sitũ. Nonginya tũĩkĩĩe kana nĩwendaa tũsinde naĩ na kana nũkũtũtetheesya kwĩka ũũ. Nonginya twĩkĩe kĩthito kwĩka ũndũ ũtumĩsye mwĩao twĩke.
Yĩla twaalyũla ngoo, nĩtũekaa Yesũ atũvĩndũe twĩthĩwe tũilyĩ ũndũ e kwenda twĩthĩwe. Nĩtũekaa kwĩka maũndũ mathũku na tutambĩlĩlya kwĩka maũndũ ala maĩle. Ethĩwa nĩtũwetete maũndũ matemaw’o, nĩtũekaa na tũiweta o maũndũ ala maw’o moka. Ethĩwa nĩtũyĩte kĩndũ, nĩtũtũngaa kwa mwene na tũikaaũye ĩngĩ kĩndũ ona kĩva. Ethĩwa twĩthĩĩtwe tũtena ĩnee kwa ala angĩ, nĩtũekaa na tũtĩka maũndũ maseo kwoo.
Yĩla twaalyũla ngoo nĩtwĩkaa maũndũ aa maatĩĩe:
Nĩtwĩtĩkĩlaa ithyĩ ene kana nĩtwĩkĩte naĩ. Tũmanyaa kana nĩtũkwĩka naĩ yĩla tũtekwĩw’a Asa waitũ wa Ĩtunĩ. Yĩla twalyũla ngoo, tũyĩthĩawa na wĩĩlingyo wa kwĩka maũndũ mathũku. Nĩtwĩtĩkĩlaa kana nĩtũvĩtĩtye, na nĩtũkwenda kũvĩndũka.
Nĩtwĩĩlilaa kwondũ wa mavĩtyo ala twĩkĩte. Yĩla twalyũla ngoo, nĩtwĩw’aa ũthatu waw’o kwondũ wa kwĩka mavĩtyo. Tũtaasya kana nĩtũkwĩĩlila kwondũ wa naĩ sitũ. Nĩtwĩw’aa wĩĩlilo waw’o kwondũ wa kũsyĩka na tũyĩĩlila keka tũinasyĩka. Ĩngĩ nĩtwendaa kwĩka ũndũ Asa waitũ wa Ĩtunĩ ũtumĩsye mwĩao twĩke.
Nĩtũekaa kwĩka mavĩtyo. Ethĩwa tũkeeyĩtĩkĩla kana ithyĩ ene nĩtwĩkĩte naĩ w’oka, na ethĩwa tũkaasya kana nĩtũkwĩĩlila w’oka, tũinaalyũla ngoo kwa w’o. Kũalyũla ngoo kwaw’o, nonginya tũeke kwĩka maũndũ ala mathũku. Mavinda amwe nĩ vinya kũeka, ĩndĩ Yesũ ookie kũũ nthĩ kũtũnenga ũtethyo ũla tũkwenda. Asa waitũ wa Ĩtunĩ nĩwendaa tũeke Yesũ atũtetheesye nũndũ ĩsu noyo nzĩa yoka tũtonya kwĩthĩwa twĩ alũngalu na tũisyoka kwĩkala na Ngai.
Nĩtũumbũlaa naĩ sitũ. Nthĩnĩ wa Ĩkanisa ya Yesũ Klĩsto ya Atheu ma Mĩthenya ya Mũminũkĩlyo, kũumbũla nĩkwasya nĩ kũmũtavya Asa waitũ wa Ĩtunĩ na mũtongoi wa Ĩkanisa ũndũ twĩkie mũthũku. Naĩ imwe twĩkaa itũkwataa ithyĩ ene twĩithyoka. Yĩla tũũvoya kũla kwĩ Asa waitũ wa Ĩtunĩ, nĩtwaĩlĩte kũmũtavya ĩũlũ wa naĩ ii na tũimũkũlya atũekee na aitũtetheesya tũisinde. Ethĩwa naĩ yaitũ nĩkonetye mũndũ ũngĩ, nĩtwaĩlĩte kũmĩumbũla kũla kwĩ mũndũ ũsu na kwa Ngai. Nĩtwaĩlĩte kũumbũla naĩ ila nthũku vyũ, ta ũlalai, kwa mũtongoi wa Ĩkanisa, ũla nĩ mũsyaĩĩsya* kana mũtongoi wa ũvonge.*
Nĩtwĩkaa ũndũ tũtonya kũseũvya ũndũ twĩkite mũthũku. Yĩla twaalyũla ngoo, nĩtũseũvasya maũndũ ala mathũku twĩkĩte. Kwa ngelekan’yo, ethĩwa nĩtũyĩte kuma kwa mũtũi, nĩtũtũngaa kĩla twosete. Ethĩwa tũtĩna ikĩndũ kĩla twoosie, nĩtũkĩtũngĩĩaa kana tũkakĩĩvĩa.
Nĩtũekeaa naĩ sya ala angĩ. Asa waitũ wa Ĩtunĩ nũtũnengete mwĩao wa kũmaekea ala angĩ. Ethĩwa nĩtũkwenda Atũekee, nonginya tũekee ala angĩ. Ethĩwa tũkamena andũ ala angĩ nũndũ wa mavĩtyo mekĩte na tũikamaekea, Asa waitũ wa Ĩtunĩ ndakatũekea kwondũ wa naĩ sitũ.
Kwa w’o nĩtũtataa kwĩw’a mĩao ya Yesũ mavindanĩ ala twĩ thayũ onthe. Nĩtũendeeaa na kũvĩndũa maũndũ ala twĩkaa mavĩtyo mũvaka tũkeka maũndũ ala maseo. Nĩtwĩkaa ũndũ tũtonya kĩla mũthenya tũlũngalye maũndũ ala mathũku twĩkaa.
No nginya tũalyũle ngoo mavinda onthe tweeka mavĩtyo. Nĩtũtonya kũsũanĩa kũalyũla ngoo kwĩ vinya oyu. Nĩtũtonya kũsũanĩa kũalyũla ngoo kũkeethĩwa kũtevinya ĩvinda yũkĩte, ĩndĩ kũikethĩwa. Kũalyũla ngoo kwĩkaa vinya yĩla tweeteela kwĩka ũu. Kweteela kũalyũla ngoo ĩngĩ nĩkũtũtũngaa ĩtina kĩveva, nũndũ Yesũ ndatonya kũtũtetheesya kwĩĩmanyĩsya mũno ĩũlũ wa Asa waitũ wa Ĩtunĩ na kwĩyũmban’ya kwĩkala na Asa waitũ wa Ĩtunĩ ethĩwa tũikaalyũla ngoo kwondũ wa mavĩtyo ala twĩkaa. Yĩla twamanya kana nĩtũkwĩka mavĩtyo, nĩtwaĩlĩte kũalyũla ngoo mĩtũkĩ.
Ũneenan’ya
-
Twaĩlĩte kwĩka ata tũalyũle ngoo?
Kĩla Ũmwe Waitũ Nũtonya Kũalyũla Ngoo
Kĩla ũmwe waitũ nũtonya kũalyũla ngoo. Mavinda amwe ũalyũlo wa ngoo nũtonya kwoneka wĩvinya kũla tũĩ. Nĩtũtonya kwĩw’a tũikesa kũsinda mawonzu maitũ. Satani endaa tũĩkĩĩe ũũ nĩkana tũendeee na kwĩka maũndũ mathũku. Nonginya tũlilikane kana nĩtũtonya kũalyũla ngoo. Tũitonya kwĩka ũu kwa ithyĩ ene. Nĩtwendaa ũtethyo. Kĩla ũmwe waitũ nĩ kana ka Asa waitũ wa Ĩtunĩ, na nũtũmĩte Yesũ kũtũtetheesya. Twĩna ũtethyo wa Yesũ nĩtũtonya kwĩka maũndũ onthe ala Asa waitũ wa Ĩtunĩ ũtumĩsye mwĩao twĩke.
Yesũ nũkatũtetheeasya kũalyũla ngoo ethĩwa tũkavoya kwa Asa waitũ wa Ĩtunĩ ũtethyo Wake. We na Asa waitũ wa Ĩtunĩ mendaa twĩke maũndũ ala maseo. Matendeeaw’a nĩ maũndũ ala mathũku twĩkaa. Ĩndĩ nomatwendete, ona yĩla tweeka mavĩtyo. Nĩmendaa tũalyũle ngoo nĩkana Asa waitũ wa Ĩtunĩ atonye kũtũekea na tũyĩthĩwa twĩ atanu.
Ũneenan’ya
-
Nĩkĩ twaĩlĩte kũalyũla ngoo ona yĩla kũalyũla ngoo kũkwoneka kwĩ vinya?
-
Ũla e kũtũtetheesya kũalyũla ngoo nũũ?
Asa Waitũ wa Ĩtunĩ Nũtũtuvaa Yĩla Twaalyũla Ngoo
Yĩla twaia mũĩkĩĩo witũ nthĩnĩ wa Yesũ na tũyalyũla ngoo, Asa waitũ wa Ĩtunĩ nũtũekeaa vyũ. Vayĩ vata wa kũũya ĩũlũ wa kũsilĩlwa kwondũ wasyo. Eka Kũekea kw’oka; ĩngĩ nũtũnengae ũtethyo tũkethĩwa tũtekwenda kwĩka naĩ ĩngĩ ĩndĩ kwĩka maũndũ ala maseo moka. Yesũ nĩwe ũtũnengae ũtethyo ũũ.
Nĩtwaĩlĩte kũlilikana kana tũikekala ta Asa waitũ wa Ĩtunĩ kwa ĩmwe. Ĩndĩ otũendeee na kwĩthĩwa na mũĩkĩĩo nthĩnĩ wa Yesũ na kũalyũla ngoo kwondũ wa naĩ sitũ na kũthũkũmĩa kũmwĩw’a Yesũ, Asa waitũ wa Ĩtunĩ nĩ ũendeeaa na kũtũekea naĩ sitũ. Yesũ nĩ ũendeeaa kũtũtetheesya. Nĩtwĩkalaa mũno ta Asa waitũ wa Ĩtunĩ. Mũthya, nĩtũtonya kũsyoka na kwĩkala na Asa waitũ wa Ĩtunĩ.
Yĩla twaalyũla ngoo, nĩtwĩw’aa ũtanu. Tũtĩthĩawa na ũthatu nũndũ wa maũndũ ala mathũku twĩkĩte, ĩndĩ nĩtwĩw’aa ũtanu nũndũ nĩtũsindĩte mawonzu maitũ tũtetheew’e nĩ Yesũ. Nĩtũmanyaa ĩndĩ kana twĩna vinya wa kũsiĩa matatwa na kwĩka maũndũ ala maseo.
Ũneenan’ya
-
Tũkwataa ĩtuvi yaũ yĩla twaalyũla ngoo?