Kĩlungu kya 9
Athani
Ala maneenaa vandũ va Asa waitũ wa Ĩtunĩ ĩũlũ wa nthĩ ũmũnthĩ na nĩmatonya kũtũtavya kĩla Asa waitũ wa Ĩtunĩ e kwenda tũmanye na kwĩka naaũ?
Mwathani Nĩ Mũndũũme Ũla Ũneenaa vandũ va Asa Waitũ wa Ĩtunĩ
Asa waitũ wa Ĩtunĩ nũnyuvaa mũndũũme aneene vandũ Vake ĩũlũ wa nthĩ. Mũndũũme ũũ etawa mwathani. Mwathani nĩwendete Asa waitũ wa Ĩtunĩ na nĩwĩkaa maũndũ ala Asa waitũ wa Ĩtunĩ e kwenda eke. Asa waitũ wa Ĩtunĩ nũmũmanyĩasya mwathani maũndũ ala twaĩlĩte kũmanya na kwĩka. Mwathani ĩndĩ nũtũtavasya maũndũ asu. Yĩla mwathani waneena vandũ va Asa waitũ wa Ĩtunĩ, nũwetaa maũndũ ala Asa waitũ wa Ĩtunĩ we Mwene ũtonya kũweta kethĩwa Asa waitũ wa Ĩtunĩ eneenaa naitũ.
Aa nĩmo maũndũ amwe mwathani ũtũtavasya:
-
Nũtũtavasya kana Yesũ nĩ Mwana wa Asa waitũ wa Ĩtunĩ, kana Yesũ nĩ Mũtangĩĩi waitũ, na kana maũmanyĩsyo ma Yesũ nĩ maw’o.
-
Nũtũmanyĩasya maũndũ ala Asa waitũ wa Ĩtunĩ ũwetete twaĩlĩte kwĩka.
-
Nũtũtavasya tũeke kwĩka maũndũ mathũku.
-
Nũtũtavasya ĩũlũ wa maũndũ ala makekĩka ĩvinda yũkĩte.
No Asa waitũ wa Ĩtunĩ ũtonya kũnyuva mwathani. Andũ maitonya kũnyuva mwathani. Mũndũ ndatonya kwĩĩnyuva we mwene kwĩthĩwa mwathani. Asa waitũ wa Ĩtunĩ nũnengae mwathani ũkũmũ wa kwĩka wĩa Wake na Kũneena vandũ Vake. Mũndũũme ndatonya kũũngama vandũ va Asa waitũ wa Ĩtunĩ ethĩwa ndena ũkũmũ ũũ.
Ũneenan’ya
-
Mwathani aneenaa vandũ vaũ?
-
Nĩ maũndũ amwe meva ala mwathani ũtũtavasya?
Mavinda Onthe Asa Waitũ wa Ĩtunĩ Nĩwĩthĩĩtwe Aitũtũmĩa Athani Matũtetheesye
Asa waitũ wa Ĩtunĩ mavinda onthe nĩwĩthĩĩtwe aisũvĩa syana Syake ĩũlũ wa nthĩ. Kuma ĩvinda ya Atamu, nĩwĩthĩĩtwe aitũma athani kũtetheesya syana Syake. Nũtũmaa athani kũkan’ya andũ ĩũlũ wa mũisyo. Nũmatũmaa kũmatongoesya andũ kuma thĩnanĩ. Nũmatũmaa kũtetheesya andũ kwĩĩyũmbanĩsya maũndũ manene. Aa nĩ amwe ma athani ala Asa waitũ wa Ĩtunĩ waatũma:
-
Noa: Nĩwamakanisye andũ kana Asa waitũ wa Ĩtunĩ nũkausya mbua mbingĩ ĩla ĩkamananga ethĩwa maikaeka kwĩka maũndũ mathũku.
-
Avalaamu: Nĩwamwĩwie Asa waitũ wa Ĩtunĩ na amanyĩsya syana syake kũmwĩw’a Asa waitũ wa Ĩtunĩ. Asa waitũ wa Ĩtunĩ nĩwaathanie kũmũnenga Avalaamu syĩndũ mbingĩ na nzyawa syake.
-
Mose: Nĩwatongoeisye andũ ma Isilaeli kuma Misili kũlika nthĩ ĩla Asa waitũ wa Ĩtunĩ waseũvĩtye kwondũ woo.
Mĩthenyanĩ yaitũ, o ĩngĩ, Asa waitũ wa Ĩtunĩ nũtũmĩte athani. Ũmwe wa athani ala maĩ thayũ ĩvinda ĩteyĩasa ĩthelu aĩ mũndũũme weetawa Joseph Smith. Ekalaa nthĩnĩ wa Ngwatanĩo ya Nthĩ sya Amelika. Mwakanĩ wa 1820 Joseph Smith aĩna ũkũũ wa myaka 14. Ĩvindanĩ yĩu, andũ aingĩ nĩmalikanaa na makanisa mekĩvathũkan’yo, maimantha ĩkanisa yĩla yaw’o. Joseph nĩwendaa kwĩthĩwa e mũndũ mũseo na kũmantha ĩkanisa yaw’o ya Asa waitũ wa Ĩtunĩ.
Mũthenya ũmwe Joseph nĩwasomaa ĩvuku ĩtheu yĩtawa Mbivilia. Nĩwasomie kana ethĩwa nũkwenda kũmanya ũndũ, nĩwaĩlĩte kũmũkũlya Asa wa Ĩtunĩ, na Asa waitũ wa Ĩtunĩ akaũtavya. Nĩwaĩkĩĩie kana Asa waitũ wa Ĩtunĩ w’o nũkamũtavya maũndũ ala waĩlĩte kwĩka. Nĩwatwie kũvoya mboya yĩ mwanya kwa Asa waitũ wa Ĩtunĩ.
Kĩoko kĩmwe, Joseph nĩwaendie kathekanĩ kanini kũvoya. Yĩla wavoyaa, kyeni kyaĩna ũtisu kũthonoka wa syũa nĩkyatheeie kuma yayayanĩ. Nthĩnĩ wa kyeni kĩu nĩwamwonie Asa waitũ wa Ĩtunĩ na Yesũ Klĩsto. Asa waitũ wa Ĩtunĩ nĩwamwolootile Yesũ na asya, “Ũũ nĩwe Mwana Wakwa Nĩmwendete. Mwĩw’e!”
Joseph nĩweethukĩĩisye kĩla kyonthe Yesũ wamũtavisye, na eew’a mawĩaĩo ala Yesũ wamũnengie.
Joseph aendeee na kwĩana, Asa waitũ wa Ĩtunĩ nĩwamũnyuvie kwĩthĩwa e mwathani Wake. Aĩ mwathani mũnene. Nĩwamanyĩisye andũ maũndũ ala Asa waitũ wa Ĩtunĩ wendaa meke.
Joseph Smith akwie mwaka wa 1844. Ĩtina wa kũkw’a, Asa waitũ wa Ĩtunĩ nĩwanyuvie mũndũũme ũngĩ ethĩwe e mwathani. Ũmũnthĩ, Yĩla mwathani wakw’a, Asa waitũ wa Ĩtunĩ nũnyuvaa mũndũũme ũngĩ kũneena vandũ Vake ĩũlũ wa nthĩ.
Asa waitũ wa Ĩtunĩ nũtũmĩte athani mĩthenyanĩ yaitũ.
Joseph Smith
Brigham Young
John Taylor
Wilford Woodruff
Lorenzo Snow
Joseph F. Smith
Heber J. Grant
George Albert Smith
David O. McKay
Joseph Fielding Smith
Harold B. Lee
Spencer W. Kimball
Ezra Taft Benson
Howard W. Hunter
Gordon B. Hinckley
Thomas S. Monson
Russell M. Nelson
Ũneenan’ya
-
Nĩ athani meva amwe ala Asa waitũ wa Ĩtunĩ ũnyuvĩte?
-
Joseph Smith eekie ata?
Kwĩ Mwathani Ĩũlũ wa Nthĩ Ũmũnthĩ
Asa waitũ wa Ĩtunĩ nĩwendete syana syake ila syĩ ĩũlũ wa nthĩ ũmũnthĩ. Nĩwĩsĩ kana twĩthĩawa na mathĩna maingĩ. Nũtũmĩte mwathani atũtetheesye. Nũneenaa na mwathani ũmũnthĩ ota ũndũ waneenaa na athani tene. Asa waitũ wa Ĩtunĩ anengae mwathani ũũ mawĩaĩo ma andũ ma nthĩ yonthe. Mwathani nowe mũndũ ũla ũtonya kũkwata mawĩao kuma kũla kwĩ Asa waitũ wa Ĩtunĩ ma nthĩ yonthe eweka.
Mwathani ũla wĩ thayũ ũmũnthĩ nĩ mũndũ mũseo. Nũmwendete Asa waitũ wa Ĩtunĩ na nĩwendaa kũmwĩw’a. Asa waitũ wa Ĩtunĩ nũmũtavasya mwathani maũndũ ala wendaa tũmanye na tũimeka.
Ũneenan’ya
-
Nĩkĩ Asa waitũ wa Ĩtunĩ ũtũmĩte mwathani ũmũnthĩ?
-
Mwathani akwataa mawĩaĩo kuma kwaũ?
-
Nĩkĩ tũtonya kũĩkĩĩa kĩla kyonthe mwathani ũtũtavasya?
Asa Waitũ wa Ĩtunĩ Nũtũtetheeasya Yĩla Tweew’a Mawĩaĩo Ala Ũmũnengae Mwathani
Asa waitũ wa Ĩtunĩ nũtumĩsye mwĩao wa kũmwĩw’a mwathani Wake yĩla ũkũneena vandũ Vake. Yĩla tweew’a mawĩao ala Asa waitũ wa Ĩtunĩ ũnengae mwathani, nĩtwĩĩmanyĩasya ũndũ wa kwĩkala ta Asa waitũ wa Ĩtunĩ. Nĩtwĩĩmanyĩasya maũndũ ala twaĩlĩte kwĩka. Nĩtwĩĩmanyĩasya ũndũ wa kũmina mathĩna yĩla twĩnamo. Asa waitũ wa Ĩtunĩ nũkũtũtetheesya, na nĩtũkwĩthĩwa na mũuo ngoonĩ sitũ.
Ũneenan’ya
-
Nĩkĩ twaĩlĩte kwĩĩthukĩĩsya maũndũ ala mwathani ũtwĩaa twĩke?
-
Asa waitũ wa Ĩtunĩ akatũtetheesya ata yĩla tweew’a maũndũ ala Ũmwĩyĩaĩaa mwathani atũtavye?