Yesũ Klĩsto nĩwamatw’ĩĩe Atũmwa.
Kĩlungu kya 18
Ĩkanisa Yĩla Yesũ Waseũvisye
Yesũ nĩwaseũvisye Ĩkanisa yĩla waĩ ĩũlũ wa nthĩ. Yeetawa ata? Ũla watongoesye Ĩkanisa Yake Nũũ?
Yesũ Nĩwe Waĩ Mũtwe wa Ĩkanisa Yĩla Waseũvisye
Yĩla Yesũ waĩ ĩũlũ a nthĩ nĩwaseũvisye ĩkanisa. Ĩkanisa yĩĩ yeetawa Ĩkanisa ya Yesũ Klĩsto. Athaithi ma Ĩkanisa ya Yesũ meetawa atheu. Yesũ mwene nĩwe waĩ mũtwe wa Ĩkanisa. Nĩwaĩtongoesye. Nĩwanyuvie aũme ĩkũmi na elĩ kũmũtetheesya kũtongoesya Ĩkanisa. Meetawa Atũmwa. Atũmwa aa ĩngĩ maĩ athani. Yesũ nĩwailĩĩle moko Make ĩũlũ wa mĩtwe yoo na amanenga kĩla ũmwe ũthembi. Nĩwamatũmie kũthũkũma wĩa Wake. Atũmwa na athani aa maĩ atongoi ma Ĩkanisa ya Yesũ Klĩsto.
Ĩkanisanĩ ya Yesũ Klĩsto, aũme ala makwatĩte ũthembi nĩmailĩĩlaa moko moo ĩũlũ wa mĩtwe ya aũme angĩ aseo na kũmanenga ũthembi. Ĩno noyo nzĩa yoka ũthembi ũtonya kũnengeleanĩlwa kuma mũndũũme ũmwe kũthi ũla ũngĩ. Ũthembi ndũtonya kũthoowa.
Ũneenan’ya
-
Ũla waĩ mũtongoi wa Ĩkanisa ya Yesũ Klĩsto nũũ?
-
Aũme ala matetheeasya Yesũ meetawa ata?
Ĩkanisa ya Yesũ Klĩsto Nĩyaendeeie Ĩũlũ wa Nthĩ Ĩtina wa Asyoka Ĩtunĩ
Ĩtina wa Yesũ asyoka ĩtunĩ, Ĩkanisa Yake nĩyaendeeie ĩũlũ wa nthĩ. Yatongoew’e nĩ ala Atũmwa Ĩkũmi na Elĩ. Yĩla Mũtũmwa wakw’a, Yesũ nĩwanyuvaa mũndũũme ũngĩ vandũ vake. Kwĩsĩla Vevanĩ Mũtheu, Yesũ nĩwamanyĩthasya Atũmwa ala angĩ Mũtũmwa ũla mweũ aĩlĩte kwĩthĩwa e ũũ. Atũmwa Ĩkũmi na Elĩ nĩmanyuvie aũme angĩ aseo na mamanenga ũthembi kũtetheesya kũthũkũma wĩa wa Ĩkanisa ya Yesũ. Aũme aa meetawa A-Mĩongo Mũonza, athembi anene, atumĩa, asyaĩĩsya, athembi, amanyĩsya, na ndikoni. Mawĩa moo nĩmaeleetw’e nthĩnĩ wa kĩlungu kya 20.
Yesũ Atongoesye Ĩkanisa Kwĩsĩla Ũvuan’yo
Maũtũmane ala Yesũ ũnenganae kwĩsĩla nthĩnĩ wa Veva Mũtheu kũthi kwa andũ ĩũlũ wa nthĩ metawa maũvuan’yo. Yesũ atongoeasya Ĩkanisa Yake kwa kũvuanĩsya mwathani na atongoi angĩ maũndũ ala maĩlĩte kwĩka.
Mbee wa Yesũ atasyokete ĩtunĩ, nĩwamatavisye Atũmwa Make akeethĩawa namo ĩvinda yonthe. Yesũ aasya kana akaendeea na kũmatongoesya kwĩsĩla Vevanĩ Mũtheu.
Ũneenan’ya
-
Yesũ atongoeasya Ĩkanisa Yake ata ĩtina wa asyoka ĩtunĩ?
Ĩkanisa ya Yesũ Klĩsto Yaĩna Maũmanyĩsyo Make Maw’o
Atongoi ma Ĩkanisa ya Yesũ Klĩsto makwataa ũvuan’yo kuma kũla kwĩ Yesũ kwĩsĩla Vevanĩ Mũtheu. Kwa ngelekan’yo, Yesũ amwĩie Mũtũmwa Vetelo ũvoo mũseo waĩlĩte kũmanyĩw’a kwa andũ onthe na ti andũ ma Isilaeli moka. Yesũ nĩwamũtavisye Mũtũmwa Vaũlo maũndũ maingĩ waĩlĩte kũmanyĩsya andũ. Yesũ nĩwatavanisye maũndũ maingĩ ĩũlũ wa thayũ wa ĩvinda yũkĩte kũla kwĩ Mũtũmwa Yoana.
Yĩla wekalaa ĩũlũ wa nthĩ, Yesũ nĩwamanyĩisye andũ kũmũĩkĩĩa, kũalyũla ngoo, na kũvatiswa. Nĩwamamanyĩisye kũmwenda Asa waitũ wa Ĩtunĩ na kũmwĩw’a. Nĩwamamanyĩĩisye kwenda andũ angĩ na kũmatetheesya.
Ĩtina wa Yesũ asyoka ĩtunĩ, Atũmwa nĩmamanyĩisye o maũndũ ala Yesũ wamanyĩĩasya. Ala onthe mendaa kwĩthĩwa me athaithi ma Ĩkanisa ya Yesũ Klĩsto maĩlĩte kwĩthĩwa na mũĩkĩĩo nthĩnĩ wa Yesũ Klĩsto, kũalyũla ngoo kwondũ wa naĩ syoo, na kũvatiswa. Nĩmakwataa mũthĩnzĩo wa Veva Mũtheu, ota ũndũ Yesũ waathanie. Nĩmeemanyĩasya kũmwenda Asa waitũ wa Ĩtunĩ na kũmwĩw’a. Nĩmeemanyĩasya kwenda na kũthũkũma andũ angĩ.
Ũneenan’ya
-
Andũ maĩlĩte kwĩka ata kũlikana na Ĩkanisa ya Yesũ Klĩsto?
Ala Maĩ ma Ĩkanisa ya Yesũ Klĩsto Nĩmakwataa Mĩthĩnzĩo ya Kĩveva
Ala maĩ ma Ĩkanisa ya Yesũ Klĩsto nĩmakwataa mĩthĩnzĩo ya kĩveva. Ĩmwe ya mĩthĩnzĩo yaĩ mũĩkĩĩo wa kũtuma ala awau mavoa, ũtonyi wa kũtavan’ya maũndũ ma ĩvinda yũkĩte, na vinya wa kwona mawoni.
Ũneenan’ya
-
Mĩthĩnzĩo ya kĩveva ĩmwe nĩta myaũ?
Ĩkanisa ya Yesũ Ĩyaĩ Kũũ Ĩũlũ wa Nthĩ Ĩngĩ
Ĩtina wa Yesũ asyoka ĩtunĩ, Atũmwa Make nĩmatongoesye Ĩkanisa. Andũ aingĩ nĩmatw’ĩkie athaithi ma Ĩkanisa. Ĩndĩ amwe ma athaithi mambĩlĩlya kũmanyĩsya maũndũ ma ũvũngũ, vandũ va maũndũ ala Yesũ na Atũmwa mamanyĩisye. Kwa ngelekan’yo, andũ amwe mamanyĩasya kana Asa waitũ wa Ĩtunĩ ndethĩawa na mwĩĩ wa nyama na mavĩndĩ.
Andũ avuku nĩmambĩlĩlye kũmanyamasya atongoi na athaithi angĩ ma Ĩkanisa. Andũ asu avuku nĩmoowaie Atũmwa na atongoi angĩ ala maĩna ũthembi. Ĩngĩ nĩmoowaie athaithi angĩ aingĩ ma Ĩkanisa ya Yesũ Klĩsto.
Andũ nĩmamanyĩisye maũmanyĩsyo ma ũvũngũ kwa ĩvinda kũvikĩĩa vaa ũmwe waĩkĩĩaa maũmanyĩsyo ma Yesũ. Vayaĩ ũmwe waĩna ũthembi, kwa ũu vayaĩ ũmwe waĩ atonya kũthũkũma wĩa wa Yesũ ĩũlũ wa nthĩ kana kũkwata mawĩao kuma kwa Yesũ kwa syana syonthe sya Asa waitũ wa Ĩtunĩ. Ĩvinda yĩla vataĩ ũmwe waĩkĩĩa maũmanyĩsyo ala maw’o ma Yesũ na vataĩ ũmwe waĩna ũkũmũ Wake yeetawa Wangangan’ya.
Ĩvindanĩ yĩu ya Wangangan’ya, andũ nĩmaseũvisye makanisa ala maĩkĩvathũkan’yo na Ĩkanisa yĩla Yesũ waseũvisye. Mamanyĩasya syĩndũ ila ũtaamanyĩsya. Mayaĩna ũthembi. Meekaa syathĩ syaĩ kĩvathũkan’yo na syathĩ ila syeekawa Ĩkanisanĩ ya Yesũ. Mayaĩna ũvuan’yo kuma kwa Yesũ. Matamanyĩasya mĩao yonthe ya ũvoo mũseo ta ũndũ Yesũ na Atũmwa Make mamamanyĩĩtye. Athani nĩmaĩtye kana ũũ wonthe ũkeethĩwa.
Ũneenan’ya
-
Wangangan’ya weekĩkie ata?
Yesũ Nĩwaathanie Akatũngĩĩa Ĩkanisa Yake Kũũ Nthĩ
Yesũ nĩweesĩ andũ makaasya vinya na maũmanyĩsyo Make. Kwa ũu nĩwaseũvisye nzĩa ya Ĩkanisa yĩla yaw’o kũseũvw’a ĩngĩ ĩũlũ wa nthĩ.
Mũtũmwa Yoana nĩwoonie nthĩnĩ wa woni ĩvinda yĩla ũvoo mũseo ũkaetwe ĩngĩ kũũ nthĩ. Nĩwoonie kana Yesũ akatũma alaĩka kũmamanyĩsya andũ ũw’o ĩũlũ wa Asa waitũ wa Ĩtunĩ. Yesũ akatĩĩa amanye kĩla ũmwe wa syana sya Asa waitũ wa Ĩtunĩ nĩwakwata ũvoo mũseo, ũthembi, maũathimo, na syĩndũ syonthe sya vata kwake atonye kũsyoka kwa Asa waitũ wa Ĩtunĩ.
Ũneenan’ya
-
Nĩkĩ Yesũ waseũvisye nzĩa ya kũseũvya Ĩkanisa Yake ĩngĩ ĩũlũ wa nthĩ?