Avalaamu nĩweekĩie ũtianĩo na Mwĩaĩi.
Kĩlungu kya 17
Aatĩĩi ma Yesũ Klĩsto
Aatĩĩi ma Yesũ Klĩsto me kĩvathũkan’yo na andũ ala angĩ. Aatĩĩi Make naaũ? Me kĩvathũkan’yo ata?
Aatĩĩi ma Yesũ Nĩmamwendete Asa Waitũ wa Ĩtunĩ
Aatĩĩi ma Yesũ nĩ andũ ala maĩkĩĩaa nthĩnĩ Wake na kũmwĩw’a. Nĩmeemanyĩasya walan’yo wa Asa waitũ wa Ĩtunĩ ũndũ mamanyĩaw’a nĩ Yesũ na mayenda kũatĩĩa. Nĩmamwendete Asa waitũ wa Ĩtunĩ na nĩmaĩkĩĩaa nũmendeaa thayũ mũseo ũndũ vatonyeka onthe. Nĩmaĩkĩĩaa kana Yesũ nĩ Mwana wa Asa waitũ wa Ĩtunĩ. Nĩmaĩkĩĩaa kana Yesũ nĩwe Mũtangĩĩi woo. Nĩmaĩkĩĩaa kana Yesũ nũtumĩte vatonyeka masyoke kwĩkala na Asa waitũ wa Ĩtunĩ. Nĩmaĩkĩĩaa kana no kũatĩĩa Yesũ kw’oka na kwĩw’a mĩao Yake matonya kũekewa naĩ syoo na kũsyoka kwa Asa waitũ wa Ĩtunĩ.
Ala mamũatĩĩaa Yesũ nĩmethĩawa na mũvea kwa Ngai na Yesũ kwa ũndũ Ngai na Yesũ mamekĩte. Nĩmendaa kũmwĩw’a Yesũ. Nĩmaalyũlaa ngoo kwondũ wa naĩ syoo. Nĩmavatisawa na kũkwata mũthĩnzĩo wa Veva Mũtheu. Nĩmaeleawa kana andũ onthe me vata kwa Ngai. Nĩmatataa kũtetheesya andũ angĩ kwa nzĩa syonthe ila itonyeka.
Aatĩĩi maw’o ma Yesũ nĩmekaa mawatho matheu. Nĩmathanaa kwa Asa waitũ wa Ĩtunĩ metanĩw’e na ĩsyĩtwa ya Yesũ Klĩsto. Kũũ nĩkwasya kũmanyĩka ta mũthaithi wa Ĩkanisa Yake, na kwĩtĩkĩla kũatĩĩa maũmanyĩsyo Make monthe, na kũmũlilikana kĩla ĩvinda. Ĩngĩ nĩmathanaa kwenda andũ ala angĩ na kũmatetheesya.
Asa waitũ wa Ĩtunĩ nĩwĩkaa mawatho matheu kwa aatĩĩi ma Yesũ. Maũndũ amwe ala wathanaa nĩ kana nũkũthĩ:
-
Kũmetĩkĩla ta athaithi ma Ĩkanisa ya Yesũ Klĩsto.
-
Kũmanenga mũthĩnzĩo wa Veva Mũtheu.
-
Kũmatetheesya kũkwata syĩndũ ila mena vata nasyo.
-
Kũmanenga vinya Wake nĩkana mathũkũme wĩa Wake.
-
Kũmanenga maũathĩmo manene yu na tene na tene.
-
Kũmaeka masyoke kwĩkala Nake ethĩwa makaendeea kũmwĩw’a Yesũ.
Ũneenan’ya
-
Aatĩĩi ma Yesũ me kĩvathũkan’yo ata na andũ angĩ?
-
Aatĩĩi ma Yesũ mathanaa kwĩka ata?
-
Asa waitũ wa ĩtunĩ na Yesũ mathanaa kyaũ kwa aatĩĩi ma Yesũ?
Mose anengie Aluni ũthembi kwa kũmwilĩĩla moko.
Yesũ Nũnenganae Ũthembi kwa Athaithi ma Ĩkanisa Aĩlu ma Aũme
Yesũ nũnengae athaithi ala ma aũme ma Ĩkanisa aĩlu ũkũmũ wa kũmũtetheesya kũthũkũma wĩa Wake. Ũkũmũ ũũ wĩtawa ũthembi. Asa waitũ wa Ĩtunĩ nĩwamũnengie Yesũ ũkũmũ ũũ.
Kwĩthĩwa na ũthembi nĩ ũathimo mũnene. Ũthembi nĩ ũkũmũ mũtheu. No athaithi asu ma aũme moka ala nĩ aatĩĩi maw’o ma Yesũ na nĩ mathũkũmĩte kwa ũkwatĩlĩĩlyo kũia mĩao Yake metĩkĩlaw’a kwĩthĩwa na ũthembi.
Yĩla mũndũũme wĩna ũthembi, nũtonya kwĩka maũndũ mana Yesũ wendaa eke. Nũtonya kũmanyĩsya andũ angĩ ĩũlũ wa Asa waitũ wa Ĩtunĩ na Yesũ, kũmavatisa, na kũmanenga mũthĩnzĩo wa Veva Mũtheu. Mũndũũme wĩna ũthembi nũtonya kũathima mũsyĩ wake yĩla awau na yĩla mena mathĩna angĩ. Ĩvinda yonthe andũ maĩkĩĩa nthĩnĩ wa Yesũ na meew’a mĩao Yake, Yesũ nũmanengae ũthembi na maũathimo angĩ.
Ũneenan’ya
-
Ũthembi nĩ kyaũ?
-
Nĩkĩ Yesũ ũnenganae ũthembi kwa athaithi Make aĩlu ma aũme ma Ĩkanisa?
Andũ Aingĩ Nĩmaĩkĩĩie Nthĩnĩ wa Yesũ na Maatĩĩa Mĩao Yake Mbee wa Atokĩte Kũũ Nthĩ
Atamu na Eva na Syana Imwe Syoo Nĩmamũĩkĩĩie Yesũ na Maatĩĩa Mĩao Yake Mbee wa Atokĩte Kũũ Nthĩ
Asa waitũ wa Ĩtunĩ atavisye Atamu na Eva maĩkĩĩe nthĩnĩ wa Yesũ Klĩsto na kwĩw’a mĩao Yake. Nĩmataviw’e akooka kũũ nthĩ ĩvinda yĩmwe. Atamu na Eva nĩmaathanie makeew’a. Nĩmaiie watho woo. Nĩmavatisiwe, na makwata mũthĩnzĩo wa Veva Mũtheu.
Mbee wa Yesũ atokĩte kũũ nthĩ, nĩwanenganie ũthembi kwa Atamu. Nĩwamũnengie Atamu mwanya wa kũnengane ũthembi kũla kwĩ syana syake sya aũme ila sya mwĩwie Yesũ. Atamu nĩwailĩĩle moko make mũtwenĩ wa kĩla kana kaũme kewi na akanenga ũthembi. Ĩtina, syana sya Atamu sya aũme nĩsyanengie syana syoo sya aũme ũthembi kwa nzĩa o ĩsu.
Ũneenan’ya
-
Atamu na Eva meekie ata maitw’ĩka aatĩĩi ma Yesũ?
-
Aatĩĩi ma Yesũ makwataa ũthembi ata?
Avalaamu Nĩwamũathimie Yesũ na Aatĩĩa Mĩao Yake
Avalaamu na mũsyĩ wake nĩmaĩkĩĩie nthĩnĩ wa Yesũ. Nĩmaĩkĩĩe Akooka kũũ nthĩ mũthenya ũmwe. Avalaamu nĩwamwathie Asa waitũ wa Ĩtunĩ kana akamwĩw’a Yesũ na kũthũkũma wĩa Wake. Asa waitũ wa Ĩtunĩ nĩwamwathie Avalaamu kana ethĩwa akeethĩwa e mwĩwi, Asa waitũ wa Ĩtunĩ akamũathima na maũsyaanĩo make. Aa nĩmo maũndũ amwe Asa waitũ wa Ĩtunĩ waathanie:
-
Akanenga Avalaamu na maũsyaanĩo make ũthembi.
-
Akanenga Avalaamu na maũsyaanĩo make nthĩ yakwĩkala.
-
Akanenga Avalaamu maũsyaanĩo maingĩ.
-
Aingĩ ma maũsyaanĩo ma Avalaamu makeethĩwa me aatĩĩi ma Yesũ.
-
Aingĩ ma maũsyaanĩo ma Avalaamu makanyuva kũthũkũma wĩa wa Yesũ na kũmanyĩsya andũ angĩ ĩũlũ wa Asa waitũ wa Ĩtunĩ na Yesũ.
Avalaamu nĩwamanyĩisye syana syake kũĩkĩĩa nthĩnĩ wa Yesũ na kwĩw’a mĩao Yake. Avalaamu nĩwanenganie ũthembi kwa mwana wake weetawa Isaka. Isaka nĩwanenganie ũthembi kwa mwana wake weetawa Yakovo. Ĩtina, Asa waitũ wa Ĩtunĩ nĩwavĩndũie ĩsyĩtwa ya Yakovo amwĩta Isilaeli. Isilaeli aĩna syana ĩkũmi na ilĩ. Nĩwamanyĩisye kũĩkĩĩa nthĩnĩ wa Yesũ na kwĩw’a mĩao Yake. Maĩna ũthembi. Maũsyaanĩo ma syana sya Isilaeli sya aũme meetawa mbaĩ ĩkũmi na ilĩ sya Isilaeli.
Ũneenan’ya
-
Asa waitũ wa Ĩtunĩ aathanie kyaũ kwa Avalaamu?
-
Isilaeli nũũ?
Andũ ma Isilaeli Nĩmaĩkĩĩie Nthĩnĩ wa Yesũ na Meew’a Mĩao Yake
Nũndũ vayaĩ lĩu mwĩanu nthĩnĩ wa nthĩ yoo ene, Isileali na syana syake nĩmaendie kwĩkala nthĩ yeetawa Misili. Ĩvinda yĩendeee andũ ala mekalaa Misili nĩmatumie maũsyaanĩo ma Isilaeli mathũkũma mũno. Nĩmamathing’ĩĩisye kwĩkala Misili methĩwe me athũkũmi moo. Mayaĩ mamaeka masyoke nthĩ ĩla Yesũ wamathĩte kũmanenga.
Myaka mingĩ ĩtinanĩ, Asa waitũ wa Ĩtunĩ nĩwanyuvie mũndũ weetawa Mose kũtongoesya maũsyaanĩo ma Isileali kuma Misili. Mose nĩwatũmĩie vinya wa ũthembi kũmatetheesya kũvonoka kuma kwa andũ ma Misili. Nĩwamatongoesye kũthi nthĩ ĩla Yesũ wa mathĩte kũmanenga. Nthĩ ĩno yeetawa Kanaanĩ. Yaĩ ngalĩko ya ũthũĩlonĩ wa syũa ya Ũsĩ wa Yolotani na Ũkanga Mũkw’ũ.
Ũneenan’ya
-
Mose atũmĩie vinya wĩva kũtetheesya andũ ma Yesũ kũvonoka kuma Misili?
Andũ ma Isilaeli Nĩmaekie Kũmũĩkĩĩa Yesũ
Ĩtina wa andũ ma Isilaeli kwĩthĩwa mekalĩte nthĩ ya Kanaanĩ kwa myaka mingĩ, nĩmaekie kũmũĩkĩĩa Yesũ na kwĩw’a mĩao Yake. Yesũ nĩwatũmie athani mamatavye maalyũle ngoo na kwĩw’a mĩao Yake. Isaia, Eliya, na Yelemia maĩ amwe ma athani ala Yesũ watũmie. Vaĩ athani angĩ aingĩ.
Ĩndĩ andũ ma Isilaeli mayaalyũla ngoo. Kwa ũu Asa waitũ wa Ĩtunĩ nĩwamaekie andũ angĩ moke kũmasumbĩka na mayosa nthĩ yoo na mainyaĩĩsya aingĩ moo mathi nthĩ ingĩ. Ũu nĩwatumie andũ methĩwa me auu na watuma mamũlilikana Yesũ na kũmwĩw’a. Ĩndĩ myaka kauta mbee wa Yesũ kũsyawa Mbethelemu, andũ ma Isilaeli nĩmeethĩiwe me avuku ĩngĩ, na Asa waitũ wa Ĩtunĩ nĩwaekie andũ metawa Alomi kũmakwata andũ ma Isilaeli. Nĩmoosie kwa vinya nthĩ syoo na myako yoo mĩtheu.
Ũneenan’ya
-
Kweekĩkie ata yĩla andũ moolilwe nĩ mawatho moo kwa Asa waitũ wa Ĩtunĩ na maeka kũmwĩw’a Yesũ?
Yesũ Nĩwookie Kũũ Nthĩ na Oomban’ya Aatĩĩi Make
Yĩla Yesũ wookie kũũ nthĩ, nĩwamanyĩisye andũ kana aĩ Mwana wa Ngai. Nĩwamanyĩisye kana maikathĩnĩkĩa naĩ syoo tene na tene ethĩwa makeew’a mĩao Yake. Nĩwameie maĩkĩĩe nthĩnĩ Wake na mayalyũla Ngoo. Aisye nonginya mavatiswe. Nĩwaathanie kũtũma Veva Mũtheu kũmatetheesya. Amamanyĩisye kũmwenda na kũmwĩw’a Ngai. Nĩwamamanyĩisye kwenda andũ angĩ na kũmatetheesya.
Andũ ala mamũĩkĩĩie Yesũ na mamwĩw’a matw’ĩkie aatĩĩi Make. Oombanisye andũ Make nguthu yeetawa Ĩkanisa ya Yesũ Klĩsto. Nĩwanenganie ũthembi kwa aũme ala maĩ atongoi na amanyĩsya nthĩnĩ wa Ĩkanisa Yake.
Ũneenan’ya
-
Yesũ atetheeisye andũ ata kũmũatĩĩa?
-
Andũ mevata wa kwĩka ata nĩkana methĩwe me aatĩĩi ma Yesũ?
Kwĩthĩwa wĩ Ũmwe wa Aatĩĩi ma Yesũ nĩ Ĩvuso Ĩnene
Ala mamũatĩĩaa Yesũ nĩatanu. Nĩmesi walan’yo wa Asa waitũ wa Ĩtunĩ kwoo. Nĩmesĩ kana Asa waitũ wa ĩtunĩ nũmendete. Nĩmesĩ nĩwendaa mamũatĩĩe Yesũ nĩkana Yesũ amatetheesya kũsyoka Kwake. Nĩmesi maũndũ ala maĩlĩte kwĩka nĩkana methĩwe me atanu. Methĩawa na mũthĩnzĩo wa Veva Mũtheu kũmatetheesya na kũmakiakĩsya. Yĩla mena mathĩna, nĩmesĩ kana Yesũ nũkũmatetheesya. Nĩmesĩ kana Ngai nũkũmaathĩma nũndũ wa kwĩthĩwa na mũĩkĩĩo wa kũatĩĩa Yesũ.
Ala mamũatĩĩaa Yesũ methĩawa na mũvea kwondũ wa maũathimo maingĩ ala Asa waitũ wa Ĩtunĩ ũmanengae. Nĩmatũngĩaa Asa waitũ wa Ĩtunĩ mũvea kwondũ wa maũathimo aa yĩla meũvoya.
Andũ ala mate aatĩĩi ma Yesũ nĩmatonya kũtw’ĩka aatĩĩi Make. Nĩmatonya kwĩĩmanyĩsya ĩũlũ Wake kwa kũsoma maandĩko matheu na kwa kwĩĩthukĩĩsya atongoi ma Ĩkanisa Yake. Nĩmatonya kũĩkĩĩa nthĩnĩ Wake, kũalyũla ngoo, na maivatiswa. Ethĩwa nĩmeũmwĩw’a Yesũ, nĩmatonya kũkwata syĩndũ ila Ngai wathanaa ĩvinda yonthe kwa aatĩĩi ma Yesũ.
Ũneenan’ya
-
Nĩkĩ ne ĩvuso ĩnene kwĩthĩwa wĩ ũmwe wa aatĩĩi ma Yesũ?