Ndeto sya Mbee

Ĩvuku yĩĩ nĩyĩũkũtetheesya kwĩĩmanyĩsya na kũmanyĩsya maũmanyĩsyo ma mũsingi ma ũvoo mũseo wa Yesũ Klĩsto. Kũmanya maũmanyĩsyo aa kwĩũtetheesya kũelewa vata wa thayũ na ũndũ ũtonya kwĩthĩwa wĩna ũtanu wa w’o. Maũmanyĩsyo ala maeleetw’e nthĩnĩ wa ĩvuku yĩĩ nĩ maw’o. Ũisoma maũmanyĩsyo aa na kũmasũanĩa na kũvoya ĩũlũ wamo, nũũthi kwĩĩmanyĩa we mwene na Veva Mũtheu nũkũthi kũkũsĩĩa kũla uĩ, kana nĩ maw’o.

Noũtũmĩe ĩvuku yĩĩ mavatanĩ maingĩ me kĩvathũkan’yo. Noũĩtũmĩe kũsoma na kwĩĩmanyĩsya we mwene. Noũĩtũmĩe kũseũvya maũneeni kana kũtetheesya kũelesya ũvoo mũseo kwa angĩ.

Noũtũmĩe ĩvuku yĩĩ kwa kũsoma na mũsyĩ waku na ivoyo sya mũsyĩ sya wĩoo. Kĩla ĩsomo yĩna makũlyo ala we ta mũsyai kana mũmanyĩsya ũtonya ũkũlya syana nini kũmanya maeleetwe ata.

Yĩla ũũmanyĩsya masomo kuma ĩvukunĩ yĩĩ, noũsomethye mbee wa kĩlungu kĩmwe nthĩnĩ wa ĩvinda yĩmwe ya kĩlasi kana ũtũmĩe mbee wa ĩvinda yĩmwe ya kĩlasi kĩlungunĩ kĩmwe. Ĩthĩwa wĩna ũw’o kana amanyĩw’a maku nĩmaelewa ũmanyĩsyo ũmwe nesa mbee wa kũthi ĩsomonĩ yĩngĩ. Ethĩwa wĩna maandĩko matheu me maalyũle, sianĩsya maandĩko matheu ala mawetetwe na mũimaneenanĩsya.

Ta wĩ mũmanyĩsya, manya kĩlĩkonĩ kana nũtonya kwĩthĩwa wĩna ta mavinda 21 kũvika 25 ma kĩlasi nthĩnĩ wa mwaka kũmanyĩsya kĩlasi. Kũũ nĩ kwasya nũtonya kwenda kũkwatan’ya masomo ta 10 kana mbeange. Sisya mavata ma kĩlasi kyaku na ũitw’a nĩ masomo meva ma kũkwatan’ya na masomo ala ũtonya kwenda kũtũmĩa ĩvinda yingĩ kwa mo.

Vakuvĩ na mũthya wa mwaka no wende kũtũmĩa kĩlasi kĩmwe kana ilĩ kũneenanĩsya Ilungu sya Mũĩkĩĩo, ila syĩ nthĩnĩ wa ĩvuku yĩĩ. O ĩngĩ no ũtũmĩe Ilungu sya Mũĩkĩĩo kũtũngĩlĩla masomo.

Asyai na amanyĩsya, voyai kwondũ wa kũtongoew’a mũtĩĩyũmbanĩsya na kũmanyĩsya masomo aa. Eka Veva Mũtheu akaũtongoesye nthĩnĩ wa kũelewa kwaku na nthĩnĩ wa kũmanyĩsya. Kĩla mũthaithi ũla ũtonya nĩwaĩle kũsoma ilungu isu na kũka eeyũmbanĩtye kũtavya athaithi ala angĩ nthĩnĩ wa kĩlasi maũneenan’yanĩ ma kĩlasi.

Woona ndeto ĩvanĩtwe na *, no wĩthĩe ũelesyo wayo nthĩnĩ wa “Ndeto sya Kũmanya” mũthyanĩ wa ĩvuku. Ndeto ingĩ no syĩkĩĩtwe vau kũũtetheesya kũelewa maũelesyo masyo.

Ngai nakũathime yĩla wĩmboyanĩ ũisoma maũw’o ala me nthĩnĩ wa ĩvuku yĩĩ.