Mĩsyĩ nĩtonya kwĩthĩwa vamwe tene na tene.
Kĩlungu kya 29
Mĩsyĩ Nĩyavata
Nĩkĩ Asa waitũ wa Ĩtunĩ wendie twĩkale ta mĩsyĩ vaa ĩũlũ wa nthĩ?
Asa Waitũ wa Ĩtunĩ Nĩwatũvangĩie Twĩkale ta Mĩsyĩ
Mũsyĩ witũ vaa ĩũlũ wa nthĩ ũilyĩ ta mũsyĩ witũ wa Ĩtunĩ. Twaĩ kĩlungu kya mũsyĩ wa ĩtunĩ mbee wa kũka nthĩ ĩno. Twaĩ syana sya kĩveva sya Ngai, ũla nĩ Asa waitũ wa Ĩtunĩ. Nũtwendete na nũtũsũvĩaa. Nũtwendeaa maũndũ maseo na nĩwendaa tũsyoke na kwĩkala Nake mũthenya ũmwe.
Asa waitũ wa Ĩtunĩ nĩwaseũvisye mũsyĩ wa mbee ĩla wanenganie Eva kwa Atamu nthĩnĩ wa mũtwaano. Nĩwameie methĩwe na syana. Ũũ weethĩiwe nĩkana syana sya kĩveva sya Asa waitũ wa Ĩtunĩ ikwate mĩĩ ya nyama na mavĩndĩ. Nĩwameie manenge syana syoo syĩndũ ila syaĩna vata nasyo. Ona nĩwamatavisye mamanyĩsye syana syoo ũvoo mũseo na kũitetheesya kũkwata maũtw’ĩo ma ũvoo mũseo.
Asa waitũ wa Ĩtunĩ nũtũiĩte ta mĩsyĩ kwa itumi mbingĩ.
Mbee, kuma kwa asyai maitũ nĩtũkwataa mĩĩ ya nyama na mavĩndĩ. Nĩtwendaa mĩĩ ya nyama na mavĩndĩ kwĩĩmanyĩsya maũndũ ala twaĩlĩte kwĩka nĩkana tũtonye kwĩkala na Asa waitũ wa Ĩtunĩ tene na tene.
Kelĩ, mĩsyĩ nĩtonya kũnengane syĩndũ ila tũkwenda ĩũlũ wa nthĩ ĩno. Asyai nĩmatonya kũnengane lĩu, ngũa, nyũmba, wendo, na syĩndũ ingĩ sya vata kwa syana syoo. Ĩtina, syana nitonya kũmasũvĩa asyai masyo yĩla asyai makũa mũno matatonya kwĩĩsũvĩa ene.
Katatũ, asyai nĩmatonya kũmanyĩsya syana syoo ũvoo mũseo wa Yesũ Klĩsto. Nĩmatonya kũimanyĩsya kwĩw’a mĩao ya Asa waitũ wa Ĩtunĩ. Na nĩmatonya kũĩkĩĩthya isyana nĩsyakwata maũtw’ĩo ala Yesũ waĩtye nomũvaka tũkwate.
Ũneenan’ya
-
Nĩkĩ Asa waitũ wa Ĩtunĩ watũmbanisye tũke kũũ nthĩ ta mĩsyĩ?
-
Nĩ mũsyĩ wĩva wambee kũka kũũ nthĩ?
-
Asa waitũ wa Ĩtunĩ avangĩie mĩsyĩ yaitũ ĩtwĩkae ata?
Asa Waitũ wa Ĩtunĩ Endaa Andũ ma Mũsyĩ Mendane
Mũsyĩ witũ vaa ĩũlũ wa nthĩ nũtonya kwĩthĩwa ta mũsyĩ witũ ũla waĩ ĩtunĩ. Andũ ma mũsyĩ nĩmatonya kwĩw’a wendo ũla ũtuma menda kũtethan’ya na kwĩka na kũneena syĩndũ nzeo kwoo ene.
Mũũme na mũka nthĩnĩ wa mũsyĩ nĩmaĩlĩte kwendana. Nĩmaĩlĩte kwĩthĩwa na ĩnee na kũtethan’ya. Mayaĩlĩte kũneena kana kwĩka ũndũ ona wĩva ũla ũtonya kũtuma ũla ũngĩ ew’a atemwĩanĩe.
Asyai maĩlĩte kwenda syana syoo. Maĩlĩte kũmanyĩsya syana syoo kwendana. Nĩmaĩlĩte kũimanyĩsya kũtetheanĩsya na kũsũvĩana.
Syana nĩsyaĩlĩte kwenda asyai masyo. Syaĩlĩte kũmanenga ndaĩa, kũmew’a, na kũmatetheesya asyai masyo.
Ũneenan’ya
-
Soma Aeveso 4:29–32.
-
Tũtonya kũtetheesya andũ ma mũsyĩ kwendana ata?
-
Nĩkĩ Asa waitũ wa Ĩtunĩ wendaa andũ ma mũsyĩ mendane?
Kĩndũ Kĩla Kyavata Vyũ Tũtonya Kwĩka Nĩ Kũthũkũma Twĩthĩwe na Mũsyĩ Mũtanu na Mũlũngalu
Kũthũkũma tũeye mũsyĩ mũlũngalu nĩw’o wĩa ũla wa vata vyũ tũtonya kwĩka. Ona ethĩwa twĩkĩte nesa ata maũndũnĩ angĩ, ethĩwa tũyĩũmanyĩsya mũsyĩ witũ kwenda na kwĩw’a Asa waitũ wa Ĩtunĩ, nĩtũvalũkĩte nthĩnĩ wa wĩto wa vata vyũ. Mavinda amwe, syana sitũ nitonya kũnyuva kũlea kũmwenda na kũmwĩw’a Asa waitũ wa Ĩtunĩ, ĩndĩ twaĩlĩte kwĩka ũndũ w’onthe tũtonya kũimanyĩsya nzĩa Syake. Ethĩwa asyai makeeka ũndũ w’onthe matonya kũmanyĩsya syana syoo nesa, Asa waitũ wa Ĩtunĩ ndakamatw’ĩĩa mavĩtyo kwondũ mavĩtyo ma syana syoo. Asyai mavalũkaa oyĩla maeka kũtata kwĩthĩwa me asyai aseo.
Mĩsyĩ yitũ nĩtonya kũtũnenga ũtanu ũla mũnene thayũnĩ witũ. Twĩkaa nesa mũno yĩla twathũkũma na kĩthito kũea syana itw’ĩke athaithi aseo ma Ĩkanisa na kũtw’ĩka ene nthĩ aseo nthĩnĩ wa nthĩ ĩla mekalaa.
Mũsyĩ nĩw’o kĩlungu kĩla kya vata vyũ kya Ĩkanisa. Asa waitũ wa Ĩtunĩ nĩwaseũvisye Ĩkanisa Yake kũtetheesya mĩsyĩ kwĩka kyonthe maĩlĩte kwĩka masyoke Kwake. Ĩkanisa nĩyendaa kũtethya kĩla mũsyĩ wĩthĩwe vamwe tene na tene.
Satani nĩwĩsĩ ũndũ mĩsyĩ yĩ vata nthĩnĩ wa walan’yo wa Asa waitũ wa Ĩtunĩ. Nũtataa kũtuma twĩka maũndũ ala manangaa mĩsyĩ yitũ na kũmĩtaanĩsya.
Ũneenan’ya
-
Mũsyĩ waku nĩ wa vata ata kwaku?
Asa Waitũ wa Ĩtunĩ Nũtũtavĩtye Ũndũ wa Kwĩthĩwa na Mũsyĩ Mũseo
Ithyonthe nĩtwendaa kwĩthĩwa na mũsyĩ mũseo na mũtanu. Vaa ve maũndũ amwe ma kũtetheesya mũsyĩ:
-
Mũsyĩ waĩlĩte kũvoya vamwe kwakya na wĩoo.
-
Asyai maĩlĩte kũvoya vamwe kĩla mũthenya.
-
Asyai maĩlĩte kũmanyĩsya syana ũvoo mũseo.
-
Mũsyĩ waĩlĩte kũsoma maandĩko matheu vamwe kĩla mũthenya.
-
Mũsyĩ waĩlĩte kũthi mawũmbanonĩ ma Ĩkanisa vamwe kĩla Wakyumwa.
-
Mũsyĩ waĩlĩte kũtĩĩa kũya vamwe ĩmwe kwa mwei yĩla syana sya neneva na kwĩanĩĩa kũtĩĩa kũya na kũelewa kĩtumi kya kũtĩĩa kũya.
-
Mũsyĩ nĩwaĩlĩte kũmbana vamwe kĩla kyumwa kwa wũmbano wĩtawa kĩvoyo kya wĩoo* kũneena ĩũlũ wa maũndũ ala maseo mũsyĩ wĩkĩte. Maĩlĩte kũneenan’ya ũndũ wa kũmina mathĩna ala mũndũ ona wĩva wĩthĩwa namo. Nthĩnĩ wa wũmbano ũũ nĩmatonya kwina, kwĩthĩwa na ĩsomo, kwĩĩmanyĩsya mĩsoa nthĩnĩ wa maandĩko matheu, kũthaũka mathaũ, na kwĩthĩwa na kĩndũ kĩmwanya kyaũya na kũnywa.
-
Mũsyĩ waĩlĩte kũthũkũma na kũsoma vamwe.
-
Andũ ma mũsyĩ maĩlĩte kwĩthĩwa me alau na kũmĩanĩsya.
-
Mũsyĩ waĩlĩte kwia maũvoo ma maũndũ ala mekaa.
Ethĩwa tũkalilikana kũvoya ithyĩ ene na ta mũsyĩ, Asa waitũ wa Ĩtunĩ akeethĩwa evakuvĩ naitũ. Akeew’a mboya sitũ na kũisũngĩa kwa nzĩa ĩla nzeo vyũ kwitũ.
Ũneenan’ya
-
Nĩ maũndũ ta meva amwe tũtonya kwĩka twĩthĩwe na mũsyĩ mũseo?