Kĩlungu kya 26
Ũĩkĩĩku
Asa waitũ wa Ĩtunĩ nĩ mũĩkĩĩku nthĩnĩ wa w’onthe wĩkaa. Nĩwendaa twĩthĩwe twĩ aĩkĩĩku Take?
Asa Waitũ wa Ĩtunĩ Atwĩaa Twĩthĩwe Twĩ Aĩkĩĩku Nthĩnĩ wa W’onthe Tũkwĩka
Kwĩthĩwa wĩ mũĩkĩĩku nĩ kũneena ũwo. Kwĩthĩwa wĩ mũĩkĩĩku nĩ kwasya kũlea kũkengana kana kũya. Yĩla tũtanaweta ũw’o w’onthe, twĩthĩawa tũikengana. Yĩla twaweta kĩlungu kya ũw’o, twĩthĩawa tũikengana. Yĩla twatongoesya andũ kũĩkĩĩa kĩndũ kĩte kya w’o, twĩthĩawa tũteaĩkĩĩku.
Kũya nĩ kwosa kĩndũ kya mũndũ ũngĩ vate mwanya wake. Kwosa kĩndũ kuma ndukanĩ ũte kũkĩĩvĩa nĩ kũya. Asa waitũ wa Ĩtunĩ nũtwĩĩte tũikoye.
Andũ aĩkĩĩku mathũkũmaa na kĩthito ĩvinda yonthe ya masaa ala maĩvawa. Aandĩkani ala aĩkĩĩku nĩmaĩvaa ala mamathũkũmĩaa kwĩanana na kĩla kyaĩlĩte athũkũmi. Andũ aĩkĩĩku maĩvĩthasya nesa kwa mawĩa moo na kwa syĩndũ ila meũthoosya. Nomũvaka twĩthĩwe twĩ aĩkĩĩku ethĩwa nĩtũkwenda kwĩkalan’ya na Asa waitũ wa Ĩtunĩ.
Satani nũtataa kũtũsesenga twĩthĩwe tũteaĩkĩĩku. Yĩla tweethĩwa tũteaĩkĩĩku kwa nzĩa yonthe, twĩthĩawa tũatĩĩe Satani. Satani nĩwendete maũvũngũ. Satani endaa tũsũanĩe nĩ ũĩ kwĩthĩwa tũteaĩkĩĩku. Nũtataa kũtuma tũsũanĩe tũkeethĩwa na ũtanu yĩla tweethĩwa tũteaĩkĩĩku. Nĩwendaa tũsũnĩe kwĩthĩwa tũteaĩkĩĩku ti naĩ. Satani endaa twĩthĩwe tũteaĩkĩĩku nĩ kana twĩthĩwe tũtena ũtanu.
Asa waitũ wa Ĩtunĩ nũtũmanyĩĩtye kwĩthĩwa twĩ aĩkĩĩku mavinda onthe. Nũthataa yĩla twakengana. Nĩwendaa tũmanye kana kũkengana nĩ kũthũku mavinda onthe. Kwĩthĩwa tũteaĩkĩĩku nũthũku na kũtumaa tũtethĩwa na ũtanu.
Andũ amwe moyaa syĩndũ nũndũ masũanĩaa mena ĩvuso ya kwĩthĩwa nasyo. Andũ amwe ma mũika makenganaa sukulu makwate maũsũngĩo maseo kana nũndũ amanyĩw’a angĩ nĩmekwĩka ũu. Andũ amwe makenganaa nĩ kana angĩ masũanĩe nesa ĩũlũ woo. Katĩ wa itumi ii vayĩ kĩmwe kĩtuma kũkengana kũtw’ĩka kũseo. Yĩla twaseũvya itumi sya kũkengana, twĩthĩawa tũteaĩkĩĩku.
Ũneenan’ya
-
Ũĩkĩĩku nĩ kyaũ?
-
Twĩthĩawa tũatĩĩe ũũ yĩla tweethĩwa twĩ aĩkĩĩku?
Nĩtũtonya Kwĩthĩwa Twĩ Aĩkĩĩku Nthĩnĩ wa Ũndũ W’onthe Tũkwĩka
Nĩtũtonya kwĩthĩwa twĩ aĩkĩĩku kwa kwĩthĩwa na ũkũmbaũ wa kũweta ũw’o, ona yĩla vena vinya kwĩka ũu. Asa waitũ wa Ĩtunĩ akatũtetheesya twĩthĩwe twĩ aĩkĩĩku ethĩwa tũkamũkũlya. Akatũma Veva Mũtheu atũtetheesye kũnyuva kwĩthĩwa twĩ aĩkĩĩku. Veva mũtheu akatũtetheesya kũmanya kana kwĩthĩwa twĩ aĩkĩĩku nĩ ũndũ ũla waĩle kwĩkwa.
Yĩla twaelewa nĩ maũmanyĩsyo ma Yesũ, twĩthĩawa tũtenda kwĩthĩwa twĩ aĩkĩĩku nthĩnĩ wa kĩla kyonthe tũkwĩka. Yesũ nũtũmanyĩĩtye kana twĩ syana sya Asa waitũ wa Ĩtunĩ na kana twĩ ana-a-asa na eĩtu asa. Nũtũmanyĩĩtye kana nĩtũtonya kwĩthĩwa twĩ atanu kwa ũw’o o yĩla twĩ aĩkĩĩku. Tũikethĩwa na mũuo ithyĩ ene ethĩwa tũkeethĩwa twĩna kĩndũ mũsyĩnĩ witũ kĩla kĩtekitũ. Nũtũmanyĩĩtye o ĩngĩ kana tweethĩwa na mũĩkĩĩo nthĩnĩ Wake, tũalyũle ngoo, na kwĩthĩwa twĩ aĩkĩĩku kwa ũw’o nĩtũtonya kũsyoka na kwĩkala na Asa waitũ wa Ĩtunĩ na kwĩthĩwa na ũtanu tene na tene.
Yĩla twaelewa nĩ maũndũ aa onthe, twambĩlĩlasya kwenda kwĩthĩwa twĩ aĩkĩĩku. Tũtĩkwenda kũkenga andũ angĩ. Twĩenda kũmwendeesya Asa waitũ wa Ĩtunĩ nĩkana tũsyoke kwĩkala Nake. Twĩenda kwĩtĩkĩla mavĩtyo maitũ na kũmaseũvya nĩ kana Asa waitũ wa Ĩtunĩ atũekee.
Ũneenan’ya
-
Ethĩwa nĩtwakengana o vanini, nĩkĩ twaĩlĩte kũalyũla ngoo?
-
Tũtonya kwĩthĩwa twĩ aĩkĩĩku nthĩnĩ wa ũndũ w’onthe tũkwĩka ata?
-
Asa waitũ wa Ĩtunĩ akatũtetheesya ata kwĩthĩwa twĩ aĩkĩĩku?
Kwĩthĩwa Twĩ Aĩkĩĩku Nĩkũtũtanĩthasya
Yĩla twĩ aĩkĩĩku, nĩtwĩw’aa nesa. Asa waitũ wa Ĩtunĩ nũtanaa nũndũ witũ. Tũtĩw’aa twĩna mavĩtyo. Twĩw’aa nesa nũndũ nĩtwĩsĩ tũtĩna kĩndũ kya kũvitha kũla kwĩ andũ. Tũyaĩlĩte kwĩthĩwa na kĩmako kana mũndũ nũkũmanya kana nĩtũkenganĩte.
Yĩla twĩaĩkĩĩku twĩkalaa ta Asa waitũ wa Ĩtunĩ. Nĩtwĩsĩ twĩĩyũmbanĩsya kũsyoka kwĩkala Nake. Yĩla twĩ aĩkĩĩku, andũ angĩ nĩmatũĩkĩĩaa. Yĩla twĩ aĩkĩĩku, Asa waitũ wa Ĩtunĩ akatũtetheesya kwĩka maũndũ ala tũkwenda kwĩka ala maĩlĩte.
Ũneenan’ya
-
Twĩw’aa ata yĩla twĩ aĩkĩĩku?
-
Nthĩ ĩkeethĩwa yĩilye ata ethĩwa kĩla ũmwe akeethĩwa e mũĩkĩĩku?