Ilungu sya Wambĩlĩlyo
Kĩlungu kya 34: Myaka Ngili

Kĩlungu kya 34

Myaka Ngili

Myaka Ngili Nĩ Kyaũ? Thayũ kũũ ĩũlũ wa nthĩ ũkeethĩwa ũilyĩ ata ĩvindanĩ ya Myaka Ngili?

Andũ ala Atheu Makekala Ĩũlũ wa Nthĩ Ĩvindanĩ ya Myaka Ngili

Yĩla Yesũ wĩũka ĩngĩ, akasumbĩka nthĩ vandũ va myaka 1,000. Ĩvinda yĩĩ ĩkeethĩwa yĩsĩkĩe ta Myaka Ngili.

Myaka Ngili ĩkeethĩwa ĩvinda ya mũuo na ũlũngalu. Yesũ akathesya nthĩ kuma naĩnĩ mbee wa Myaka Ngili kwambĩĩa. Andũ onthe athũku makaanangwa. Andũ ala alũngalu nomo makatangĩĩwa mekale ĩũlũ wa nthĩ ĩvindanĩ yĩĩ. Satani ndakethĩwa na vinya ĩũlũ wa andũ ĩngĩ kũvikĩĩa kũthengeea na mũminũkĩlyo wa Myaka Ngili.

Mwathani Joseph Smith aisye kana andũ kuma ĩtunĩ makathoka kũũ nthĩ kwa mavinda ĩvindanĩ yĩu ya Myaka Ngili. Makatetheesya wĩanĩ ũla wĩkawa nthĩnĩ wa makalũ na wĩa wa ũmiseni.

Ũneenan’ya

  • Myaka Ngili Nĩ Kyaũ?

  • Nũũ ũkekala ĩũlũ wa nthĩ ĩvindanĩ ya Myaka Ngili?

  • Kwa tata kũsũanĩa kũkeethĩwa kũilyĩ ata kwĩkala vandũ vala vatena maũvuku.

Mawĩa Elĩ Manene Makeekwa Ĩvindanĩ ya Myaka Ngili

Wĩa wa mbee mũnene kwĩkwa nĩ kwĩka maũtw’ĩo ĩkalũnĩ kwa andũ ala methayũ na andũ ala akw’ũ. Andũ ala makethĩwa mathayũũkĩte makatetheesya andũ ala methayũ ĩũlũ wa nthĩ kũmantha masyĩtwa ma akw’ũ moo ala mataen’ye na kũlũnga mavĩtyo ala matonya kwĩthĩwa nthĩnĩ wa maũlilikan’yo.

Maũtw’ĩo onthe ala mavata kũsiĩla mĩsyĩ vamwe makeekĩwa makalũnĩ. Mĩsyĩ ĩkakwatanw’a kuma nzyawa ĩmwe kũthi ĩngĩ kũvikĩĩa kũla kwĩ Atamu.

Wĩa ũla ũngĩ mũnene nĩ kũtavan’ya kwa ũvoo mũseo. Kĩla ũmwe akeethĩwa atonya kwĩw’a ũvoo mũseo na kũwĩtĩkĩla. Andũ angĩ aseo ala mate athaithi ma Ĩkanisa ya Yesũ makekala ĩũlũ wa nthĩ yĩla Myaka Ngili ĩkambĩĩa. Mũthya, ona vamwe na ũu, andũ onthe makamanya na kwasya kana Yesũ nĩwe Mũtangĩĩi wa nthĩ.

Ũneenan’ya

  • Nĩ mawĩa meva elĩ manene makekwa ĩvindanĩ ya Myaka Ngili?

Thayũ Ũkeethĩwa Ũilyĩ Ata Ĩvindanĩ ya Myaka Ngili

Ĩvindanĩ ya Myaka Ngili, nthĩ ĩkeethĩwa yĩilye ota ũndũ yailyĩ ĩvinda yĩla Atamu na Eva mekalaa Mũũndanĩ wa Eteni. Kũikethĩwa na kaũ. Yesũ akasumbĩka Ĩkanisa na silikalĩ. Mĩao yonthe ĩkaiwa kwa moũmanyĩsyo ma ũw’o na ma ũlũngalu. Kũkeethĩwa na mĩsyĩ ĩlĩ mĩnene. Ũmwe ũkeethĩwa Yelusaleme. Mũsyĩ ũla ũngĩ ũkeethĩwa Yelusaleme Nzaũ, nthĩnĩ wa Amelika ya Ĩũlũ.

Andũ makekalan’ya vamwe kwa mũuo na wendo. Nyamũ syonthe, ona ila yu nĩ amaitha, ikekalan’ya vamwe kwa mũuo. Iikethĩwa iyũkita ĩngĩ.

Kũikethĩwa na maũwau, na kũikethĩwa na kĩkw’ũ. Yĩla andũ makũa, maikakw’a ota ũndũ twĩkaa yu. Makavĩndũka kwa mĩtũkĩ kuma ũndũ tũilyĩ yu methĩwe na mwĩĩ ũtewaũkw’a, kwasya kana maikakw’a ĩngĩ.

Ĩkeethĩwa yĩ ĩvuso ĩnene kwĩkala ĩvindanĩ ya Myaka Ngili. Maũndũ ala kwa oyu matatũeleaa makatũelea. Thayũ ũkeethĩwa ota ũndũ ũilyĩ yu, ateo kana kĩla kĩndũ kĩkeekwa nthĩnĩ wa wendo na mũuo. Andũ makaendeea na kwĩthĩwa na kũea syana, kũvanda na kũketha malĩu, na kwaka nyũmba.

Ũneenan’ya

  • Nthĩ ĩkeethĩwa yĩilye ata ĩvindanĩ ya Myaka Ngili?

Thĩna Ũmwe wa Mũthya Ũkeethĩwa Myaka Ngili Yĩvakuvĩ Kũthela

Vakuvĩ na mũthya wa Myaka Ngili, Satani akambĩĩa kwĩthĩwa na vinya ĩngĩ ĩũlũ wa nthĩ. Andũ amwe makamũĩkĩĩa. Satani na ala makamũatĩĩa makokita ala mamũatĩĩe Yesũ. Kaũnĩ ũũ, Satani na ala mamũatĩĩie makasindwa tene na tene. Ĩtina wa kaũ ũũ, andũ makasilĩlwa, na onthe makoonw’a vala makekala nthĩnĩ wa maũsumbĩ ala meeyũmbanĩsye.

Ũneenan’ya

  • Nĩ kyaũ kĩkekĩka mũthyanĩ wa Myaka Ngili?

Print