Kĩlungu kya 2
Thayũ Witũ Ĩtunĩ
Twekalaa va mbee wa kũsyawa kũũ ĩũlũ wanthĩ? Tweekaa ata ku?
Kĩla Ũmwe Waitũ Nĩ Mwana wa Asa Waitũ wa Ĩtunĩ
Mbee wa kũsyawa kũũ ĩũlũ wanthĩ, nĩtwekalaa ĩtunĩ. Mũsyĩ witũ wa ĩtunĩ waĩ wa ũseng’yo na mwanake kũthonoka kĩndũ ona kĩva twĩsĩ ĩũlũ wa nthĩ. Twaĩ ma nyũmba ya kũu. Nĩtwendanĩte ithyĩ ene na twaĩ atanu. Asa waitũ wa Ĩtunĩ nĩwe waĩ Asa wa maveva maitũ, na kwondũ wa ũũ nĩtũmwĩtaa Asa wa Ĩtunĩ. Nĩkwĩthĩwa nĩ Asa waitũ, Nũtwendete na nũtũsũvĩaa.
Kĩla mũndũ ũla wĩkalaa ĩũlũ wa nthĩ ĩno aĩ mwana-a-asa kana mwitũ asa ĩtunĩ. Mwana ũla waĩ mũkũũ nthĩnĩ wa mũsyĩ witũ wa ĩtunĩ aĩ Yesũ Klĩsto.* Nĩwe mwana-a-asa ũla mũkũũ.
Yĩla twekalaa ĩtunĩ tũyaĩna mĩĩ ya nyama na mavĩndĩ ta ĩla twĩnayo yu. Twaĩ maveva. Veva wĩ mũvw’ano wa mũndũ. Ta maveva, twaĩ tũtonya kũneenan’ya, kwanganga, kwĩthĩwa na ũnyuvi, na kũmanya kĩvathũkan’yo kya ũseo na ũthũku.
Ithyonthe tũyatuthanĩtye ĩtunĩ. Twaĩ kĩvathũkan’yo, o ta ũndũ tũilyĩ yu. Twaĩna mawendi na maũtonyi mekĩvathũkan’yo. Nĩtweemanyĩisye kũtũmĩa maũtonyi maitũ kwa nzĩa syĩ kĩvathũkan’yo.
Ũneenan’ya
-
Mũsyĩ witũ wa ĩtunĩ wailyĩ ata?
-
Asa waitũ aĩ ũũ?
-
Mwana-a-asa waitũ ũla waĩ mũkũũ aĩ ũũ?
Asa Waitũ wa Ĩtunĩ Nĩweesĩ Nĩtũtonya Kwĩkala Take
Nĩkwĩthĩwa Asa waitũ wa Ĩtunĩ nĩwe ĩthe wa maveva maitũ, Nĩwatwĩsĩ nesa vyũ. Nĩwatwendete. Nĩweesĩ nĩtwakwatĩte ũtonyi wa kwĩĩmanyĩsya kuma kũla ũĩ maũndũ ala Wĩsĩ na kwĩsa kwĩkala Take. Nĩwendaa twĩthĩwe twĩ aseo kĩla ĩvinda, o ta ũndũ ũilyĩ. Nĩwendaa kũtũtetheesya kwaĩlya ũtonyi witũ wa kwĩsa kwĩkala Take.
Ũneenan’ya
-
Asa waitũ wa Ĩtunĩ ew’aa ata ĩũlũ waitũ, na atwendeaa ata?
-
Kũmanya kana wĩna Asa wa Ĩtunĩ kũtuma wĩw’a ata?
Mbee wa kũka kũũ nthĩ, nĩtwekalaa ĩtunĩ.
Asa Waitũ wa Ĩtunĩ Nĩwaseũvisye Nzĩa Ya Kũtũtetheesya
Ĩtunĩ nĩtweemanyĩisye maũndũ maingĩ na tweeyaĩlya ithyĩ vyũ ũndũ twaĩ tũtonya, ĩndĩ ve maũndũ tũtaĩ tũtonya kwĩĩmanyĩĩsya na kũmeka vau. Asa waitũ wa Ĩtunĩ nĩwatũseũvĩsye nzĩa ya kwĩĩmanyĩsya mũno.
Nĩwatwĩtie wũmbanonĩ ku ĩtunĩ. Twaĩvau ithyonthe. Nĩwatũeleisye walan’yo Wake wa kũtũtetheesya kwĩĩmanyĩsya na atwĩa kana ethĩwa tũkaũatĩĩa walan’yo ũsu Wake tũkavikĩĩa kwĩkala Take.
Asa waitũ wa Ĩtunĩ nĩwaisye nthĩ nĩkũmbwa, ĩla tũkekala vo kwa ĩvinda. Ĩũlũ wa nthĩ, tũyĩsa kũlilikana thayũ witũ Nake ku ĩtunĩ. Nĩtũtonya kũnyuva maũndũ mathũku kana maũndũ maseo. Ũũ waĩ ũtato kwitũ one kana nĩtũtonya kũmwĩw’a Asa waitũ wa Ĩtunĩ yĩla tũtenake.
Kwĩanana na walan’yo wa Asa waitũ wa Ĩtunĩ, twaĩ kĩla ũmwe akwate mwĩĩ wa nyama na mavĩndĩ. Nĩtwendaa mwĩĩ wa mũthemba ũũ tũtonye kwĩĩmanyĩsya maũndũ ala wĩsĩ na maũndũ ala Wĩkaa. Ĩtina, nĩtũkakw’a, na maveva maitũ maĩtia mĩĩ yaitũ ya nyama na mavĩndĩ. Ĩndĩ maveva maitũ nĩmakakwatanw’a ĩngĩ na mĩĩ, na tũtĩkakw’a ĩngĩ. Ala makeka maũndũ ala Asa waitũ wa Ĩtunĩ watũtavisye twĩke makasyoka na kwĩkala Nake tene na tene.
Nĩtwamanyĩiw’e kana kĩla ũmwe nũkethĩwa na mathĩna ĩũlũ wa nthĩ, ta maũwau, woo, kĩmako, na kĩkw’ũ. Ĩndĩ nĩtwaeleiwe kana tũkeemanyĩsya kumana na maũndũ aa. Mathĩna aa maĩ matonya kũtũmanyĩsya kwendana na kũtethan’ya ithyĩ kwa ithyĩ.
Asa waitũ wa Ĩtunĩ akanyuvĩa kĩla ũmwe ĩvinda na vandũ vala ũkasyaĩwa ĩũlũ wa nthĩ. Nĩweesĩ nĩva ĩũlũ wa nthĩ ũkatũma kĩla ũmwe waitũ kwĩĩmanyĩsya maũndũ ala twaĩlĩte nĩ kũmanya. Kĩla ũmwe nũkethĩwa na ĩvuso ya kwĩka maũndũ me kĩvathũkan’yo. Asa waitũ wa Ĩtunĩ nĩwendaa twĩke maũndũ maseo na kũtonya kũsyoka Kwake. Ona vala, ndakatũtũmĩĩa vinya kwĩka ũndũ ona wĩva.
Amwe maitũ nĩmakanyuva Kũmũatĩĩa. Ethĩwa Nĩtũkamwĩw’a, nĩtũkekala Take na kũsyoka kwĩkala Nake. Amwe maitũ nĩmakanyuva kũlea Kũmwĩw’a. Ethĩwa tũikamwĩw’a, tũikethĩwa tũtonya kwĩkala Take na tũikethĩwa tũtonya kũsyoka na kwĩkala na Nake.
Yĩla tweewie wendi wa Asa waitũ wa Ĩtunĩ kwitũ, nĩtwatanie mũno. Nĩtwendaa kwĩthĩwa tũtonya kwĩĩmanyĩsya na kwĩana. Kĩla ũmwe waaĩkala ĩũlũ wa nthĩ ĩno nĩweetĩkĩlile kwĩkala wendinĩ ũsu Wake.
Ũneenan’ya
-
Asa waitũ wa Ĩtunĩ aĩna wendi mwaũ kwitũ?
-
Nĩkĩ twaaĩlĩte kũtia mũsyĩ witũ wa ĩtunĩ?
-
Asa waitũ wa Ĩtunĩ eenda twĩke ata ĩũlũ wa nthĩ?