Kĩlungu kya 3
Mũtangĩĩi Waitũ
Nĩ mũndũ wĩva ũla ũtonya kũtũtongoesya kũsyoka kwa Asa waitũ wa Ĩtunĩ? Nĩkĩ twaĩlĩte Kũmũatĩĩa?
Nĩtwendaa Ndongoi
Asa waitũ wa Ĩtunĩ nĩweesĩ kana yĩla twĩ kũũ ĩũlũ wa nthĩ tũikethĩwa tũtonya kũlilikana thayũ witũ Nake. Tũikatonya kũmanya maũndũ ala twaĩlĩte nĩ kwĩka nĩkana tũmũsyokee. Na ĩngĩ nĩweesĩ tũkeeka naĩ. Nũndũ wa naĩ sitũ, nĩtũkasilĩlwa kwa kũvetangwa kuma vala Ũĩ tene na tene. Na yĩla tũkakw’a, tũikethĩwa na mĩĩ yaitũ ya nyama na mavĩndĩ ĩngĩ.
Nĩtũkenda mũndũ atũtetheesye mathĩna aa. Mũndũ ũũ akatũmanyĩsya ũndũ twaĩlĩte nĩ kwĩka tũsyoke kwa Asa waitũ wa Ĩtunĩ. Nũkatũtetheesya kũsindana na mavĩtyo ala tũkeka. Na ĩngĩ nũkatũseũvĩsya nzĩa ya kwĩthĩwa na mĩĩ yaitũ ya nyama na mavĩndĩ ĩngĩ ĩtina wa twakw’a. Mũndũ ũũ akeetawa Mũtangĩĩi waitũ. Nowe ũkatonya kũtũtangĩĩa kuma kwa kũsilĩlwa kwondũ wa maũndũ ala tweeka mavĩtyo. Nowe ũkatonya kũtũtetheesya kwĩĩmanyĩsya kwĩthĩwa twĩ ewi kũla kwĩ Asa waitũ wa Ĩtunĩ. Nowe ũkatuma vatonyeka twĩthĩwe na mĩĩ yaitũ ya nyama na mavĩndĩ ĩngĩ ĩtina wa kũkw’a.
Ũneenan’ya
-
Nĩ mathĩna ta meva amwe Asa waitũ wa Ĩtunĩ weesĩ kana nĩtũkakomana namo ĩũlũ wa nthĩ?
-
Nĩkĩ tũkwenda Mũtangĩĩi atũtetheesye?
Asa Waitũ wa Ĩtunĩ Nĩwamũnyuvie Yesũ Ethĩwe e Mũtangĩĩi Waitũ
Asa waitũ wa Ĩtunĩ nũtwendete, na nĩweesĩ nĩtũkenda ũtethyo. Nĩweesĩ tũkathata ethĩwa tũikatonya kwĩthĩwa na mĩĩ ya nyama na mavĩndĩ na tũitonya kũsyoka kwĩkala Nake tene na tene. Nĩtwendaa mũndũ atũtetheesye. Asa waitũ wa Ĩtunĩ nĩwendaa mũndũ ũmwe ethĩwe e Mũtangĩĩi waitũ. Elĩ ma ana-a-asa maitũ nĩmeeyumisye kwĩthĩwa me Mũtangĩĩi waitũ.
Mwana-a-asa waitũ mũkũũ, Yesũ, nĩwamũkũlilye Asa waitũ wa Ĩtunĩ Amũtũme. Nĩwaisye nũkaatĩĩa walan’yo wa Asa waitũ wa ĩtunĩ. Nũkoka nthĩ na kũtũmanyĩsya maũndũ ala twaĩlĩte kwĩka nĩkana tũsyoke kwa Asa waitũ wa Ĩtunĩ. Nũkakw’a aĩvĩe maũndũ ala mathũku twaaĩka. Nũkatuma vatonyeka kwitũ kwĩkala ĩngĩ thayũ ĩngĩ ĩtina wa kũkw’a. Nũkatũeka twĩĩnyuvĩe kũmwĩw’a kana kũlea kũmwĩw’a Asa waitũ wa Ĩtunĩ.
Yesũ nĩweesĩ kana ũkeethĩwa wĩ ũndũ wa vata kwĩtũ kwĩĩnyuvĩa maũndũ ala tũkeka. Ethĩwa mũndũ akatũlasimĩthya kwĩw’a, tũikatonya kwĩĩmanyĩsya na kwĩkala ta Asa waitũ wa Ĩtunĩ. Yesũ nĩwendaa Asa waitũ wa Ĩtunĩ ose ngatho na ndaĩa.
Satani, ũla weetawa Lusiva, onake nĩwamũkũlilye Asa waitũ wa Ĩtunĩ kũmũnyuva ethĩwe e Mũtangĩĩi waitũ. Nĩwaisye nũkoka kũũ nthĩ na kũtũlasimĩthya twĩke ũndũ twaĩlĩte kwĩka. Nĩwaisye vayĩ ũmwe waitũ ũkaa. Ndakatũeka twĩĩnyuvĩe ithyĩ ene. Ta mũthĩnzĩo wake, nĩwendaa ngatho na nguma ila Asa waitũ wa Ĩtunĩ waĩnasyo.
Nĩkwĩthĩwa Asa waitũ wa Ĩtunĩ nũtwendete, nĩwamũnyuvie Yesũ kwĩthĩwa e Mũtangĩĩi waitũ. Kwa kĩtumi kĩĩ, Yesũ nĩwĩtawa Yesũ Klĩsto. Klĩsto kwasya anyuvĩtwe nĩ Asa waitũ wa Ĩtunĩ kwĩthĩwa e Mũtangĩĩi waitũ. Asa waitũ wa Ĩtunĩ nĩwamũnyuvie Yesũ vandũ va Satani nĩkwĩthĩwa Asa waitũ wa Ĩtunĩ ndendaa tũyasya ũw’o witũ wa kwĩĩnyuvĩa ĩthyĩ ene. Nĩweesĩ nonginya twĩke maũndũ maseo nĩkwĩthĩwa nĩtũkwenda, ti kwondũ ve mũndũ ũtũthing’ĩĩasya.
Ũneenan’ya
-
Yesũ endaa kwĩka ata kwitũ?
-
Satani endaa kwĩka ata?
-
Nĩkĩ Asa waitũ wa Ĩtunĩ wamũnyuvie Yesũ kwĩthĩwa e Mũtangĩĩi waitũ?
Asa wa Ĩtunĩ nĩwamũnyuvie Yesũ kwĩthĩwa e Mũtangĩĩi
Yesũ Nĩ Mũtangĩĩi Waitũ na Ndongoi Yaitũ
Yĩla Asa waitũ wa Ĩtunĩ wamũnyuvie Yesũ, Satani nĩwathilĩkile. Nĩwasesengie kĩlungu kĩmwe ĩũlũ wa itatũ kya maveva ĩtunĩ kĩmũatĩĩe. Kwa vamwe nĩmokitie kũsindana na Yesũ na aatĩĩi Make. Nĩmendaa kũmũthing’ĩĩsya Asa waitũ wa Ĩtunĩ etĩkĩle wendi ũsu wa Satani. Asa waitũ wa Ĩtunĩ nĩwamwĩkisye Satani na aatĩĩi make kuma ĩtunĩ.
Satani na aatĩĩi make maĩkakwata mĩĩ ya nyama na mavĩndĩ. Maikethĩwa matonya kũsyoka na kwĩkala na Asa waitũ wa Ĩtunĩ. No ala oka mamwĩtĩkĩlile Yesũ kwĩthĩwa e Mũtangĩĩi matonya kwĩthĩwa na mĩĩ ya nyama na mavĩndĩ.
Nĩtwĩsĩ, nĩkwĩthĩwa twĩna mĩĩ ya nyama na mavĩndĩ, kana nĩtwamwĩtĩkĩlile Yesũ kwĩthĩwa e Mũtangĩĩi waitũ. Nĩtwanyuvie maũndũ ala maseo ĩtunĩ. Nĩtwaĩlĩte kũendeea na kũnyuva maũndũ ala maseo kũũ ĩũlũ wa nthĩ. Nĩtwaĩlĩte kũmũatĩĩa Yesũ. Nowe weka ũtonya kũtũmanyĩsya ũndũ wa kũsyoka kwa Asa waitũ wa Ĩtunĩ. Nũtonya kũtũtetheesya kũsinda maũndũ ala mathũku twĩkaa na kũtũtetheesya kwĩka maũndũ maseo mũvaka twĩĩkala ta Asa waitũ wa Ĩtunĩ.
Asa waitũ wa Ĩtunĩ nĩwendaa tũmũatĩĩe na kũmwĩw’a Yesũ. Nĩwĩsĩ kana Yesũ akatũmanyĩasya kĩla ĩvinda ũndũ Asa waitũ wa Ĩtunĩ wĩkaa maũndũ, kwa ũu yĩla twamwĩw’a Yesũ twĩmwĩw’a Asa waitũ wa Ĩtunĩ. Mwĩao kana ũtũmane kuma kwa Yesũ nĩ mwĩao kana ũtũmane kuma kwa Asa waitũ wa Ĩtunĩ.
Ũneenan’ya
-
Tũtonya kũmanya ata kana twanyuvie Yesũ kwĩthĩwa e Mũtangĩĩi waitũ?
-
Nĩ mũndũ wĩva ũla nowe weka ũtonya kũtwon’ya ũndũ wa kũsyoka kwa Asa waitũ wa Ĩtunĩ?
-
Nĩkĩ twaĩlĩte nĩ kũmũatĩĩa Yesũ?