Ĩkalũ ya Portland, Oregon, USA.
Kĩlungu kya 32
Kwĩkala ta Mĩsyĩ Tene na Tene
Mĩsyĩ ĩtonya kwĩthĩwa vamwe tene na tene ata, ona ĩtina wa thayũ ĩũlũ wa nthĩ?
Ngai Nĩwavangĩie Mĩsyĩ Yĩthĩwe Vamwe Tene na Tene
Mũsyĩ nĩ nguthu ya vata mũno ya andũ ĩũlũ wa nthĩ. Mũsyĩ witũ wa kũũ nthĩ nũseũvĩtw’e ta mũsyĩ witũ wa ĩtunĩ. Ithyonthe twaĩ ana-a-asa na eĩtũ-a-ia ĩtunĩ. Twaĩ syana sya Ngai. Ngai nĩwe waĩ mũtongoi wa mũsyĩ witũ wa Ĩtunĩ. Nĩtwakwatie ũsũvĩo wĩna wendo na ũtongoesyo kuma kwa asyai maitũ ma ĩtunĩ.
Ngai nĩwatũmie kĩla ũmwe waitũ mũsyĩnĩ kũũ ĩũlũ wa nthĩ. Nĩwanengie asyai wĩa wa kũsũvĩa kĩla kana Kake yĩla mevaa ĩũlũ wa nthĩ. Asyai maĩlĩte kwenda syana syoo na kũinenga lĩu, ngũa, na vandũ va kwĩkala. Maĩlĩte kũmanyĩsya syana syoo ĩũlũ wa Ngai na ũndũ itonya kwĩkala Take.
Ngai nĩwatumie vethĩwa vatonyeka kwa mĩsyĩ kwĩthĩwa vamwe tene na tene. Nũnengete atongoi ma Ĩkanisa Yake ũkũmũ wa kwovan’ya mĩsyĩ vamwe tene na tene. Kwovan’ya kũũ kwa vamwe kwĩtawa kũsiĩla. Kũsiĩla kũũ kũtonya kwĩkĩwa ĩkalũnĩ vevoka. Makalũ nĩ myako mĩtheu vala athaithi aĩkĩĩku ma Ĩkanisa moka maendaa. Yĩla mũndũũme na mũndũ mũka masiĩlwa nthĩnĩ wa ĩkalũ nĩ ũla wĩna ũthembi na ena ũtonyi wĩ mwanya wa kũsiĩla, mũtwaano woo ndũkathela yĩla makakw’a. Mũtwaano woo ũkekala tene na tene ethĩwa makaia mawatho ala meekie nthĩnĩ wa ĩkalũ. Ũũ wĩtawa mũtwaano wa tene na tene.
Ethĩwa mũndũũme na mũndũ mũka ti asiĩle nthĩnĩ wa ĩkalũ, mũtwaano woo ũthelaa yĩla ũmwe woo wakw’a. Ethĩwa nĩtũsiĩlĩtwe nthĩnĩ wa ĩkalũ, na ethĩwa kwa ũĩkĩĩku nĩtũkũatĩĩaa Yesũ Klĩsto mũvaka mũminũkĩlyo wa mathayũ maitũ, mĩsyĩ yitũ nĩtonya kwĩthĩwa vamwe tene na tene.
Ala matwaanĩte nĩmatonya kũthi ĩkalũnĩ kũsiĩlwa ethĩwa nĩ aatĩĩi aĩkĩĩku ma Yesũ. Vau, ũmwe wĩna ũthembi wĩna ũkũmũ wĩ mwanya nũtonya kũmasiĩla. Nũtonya ĩngĩ kũsiĩla syana syoo kũla maĩ. Ĩtina wa masiĩlwa, nĩmatonya kwĩthĩwa vamwe tene na tene, ota matwaanĩie nthĩnĩ wa ĩkalũ kuma mbee.
Ngai endaa syana Syake syonthe syĩkĩe walan’yo wa kũsiĩlwa nthĩnĩ wa ĩkalũ na kũea mũsyĩ mwĩwi. Asyai maĩlĩte kũtongoesya syana syoo nĩkana syĩthĩwe syĩyũmbanĩtye kũthi ĩkalũnĩ kũsiĩlwa yĩla ikatwaana. Ethĩwa mũndũũme na mũndũ mũka nĩmasiĩlĩtwe nthĩnĩ wa ĩkalũ, syana syonthe ikasyawa kwoo ĩtina wa kũsiĩlwa kwoo ikeethĩwa isiĩlwe kwoo vate kũsyokea.
Ũneenan’ya
-
Ngai atumĩte vatonyeka ata kwitũ twĩthĩwe na mĩsyĩ yitũ tene na tene?
-
Nĩkĩ ve vata twĩthĩwe tũsiĩlĩtwe nthĩnĩ wa ĩkalũ?
No Athaithi Ala Aĩkĩĩku ma Ĩkanisa Matonya Kũlika Ĩkalũnĩ
Makalũ nĩ kũndũ kũtheu. No athaithi ma Ĩkanisa ya Yesũ Klĩsto ya Atheu ma Mĩthenya ya Mũminũkĩlyo ala monanĩtye mũĩkĩĩo woo nthĩnĩ wa Yesũ klĩsto kwa kwĩw’a mĩao Yake metĩkĩlaw’a kũmalika. Andũ aa nĩ aĩlu kũlika nthĩnĩ wa ĩkalũ. Mbee wa mũndũ kwĩthĩwa atonya kũlika ĩkalũnĩ, nĩwaĩlĩte kwĩthĩwa e mũthaithi wa Ĩkanisa vandũ va mwaka ũmwe. Aũme maĩlĩte kwĩthĩwa mena Ũthembi wa Melikiseteki.
Kũmanya kana nĩ aĩlu kũthi ĩkalũnĩ, aũme na aka nomũvaka maneene na mũsyaĩĩsya kana mũtongoi wa ũvonge. Ethĩwa mũsyaĩĩsya kana mũtongoi wa ũvonge eethĩa mũndũ ũsu nĩ mwaĩlu, nũnengae mũndũ ũsu ĩthangũ yĩkĩe saii yĩtawa wĩtĩkĩlyo wa ĩkalũnĩ. Na ĩndĩ mũmemba wa ũtongoi wa kyambo kana mũtongoi wa miseni aĩlĩte kũmũkunĩkĩla ĩngĩ. Na atĩkĩa saii ĩngĩ nthĩnĩ wa wĩtĩkĩlyo wa ĩkalũnĩ ethĩwa akeethĩa mũndũ ũsu nĩ mwaĩlu. Mũndũ ũsu nĩwaĩlĩte kũkua wĩtĩkĩlyo wa ĩkalũnĩ nĩkana alike vo.
Aa nĩ makũlyo mailyĩ ta ala mũsyaĩĩsya kana mũtongoi wa ũvonge ũkũlasya nĩkana amanye ethĩwa mũthaithi wa Ĩkanisa nĩ mwaĩlu kũthi ĩkalũnĩ:
-
Nĩũĩkĩĩaa nthĩnĩ wa Ngai; nthĩnĩ wa Mwana Wake, Yesũ Klĩsto; na nthĩnĩ wa Veva Mũtheu?
-
Nũkwĩtĩkĩla Mũtongoi wa Ĩkanisa ya Yesũ Klĩsto ya Atheu ma Mĩthenya ya Mũminũkĩlyo ta mwathani, mwoni, na mũvuan’ya? Nũũmwĩtĩkĩla we eweka ta mũndũ ũla ĩũlũ wa nthĩ wĩna ũkũmũ wa kũtũmĩa mbungũo syonthe sya ũthembi?
-
Nĩumasya kĩlungu kya ĩkũmi kya ũkwati waku kwa Ĩkanisa?
-
Nĩũatĩĩaa Ndeto ya Ũĩ?
-
Nũtataa kwĩthĩwa wĩmũĩkĩĩku kwa andũ ala angĩ?
-
Nũtataa na vinya kwĩka wĩa waku nthĩnĩ wa Ĩkanisa kwa kũthi mbũmbanonĩ syaku na kwĩw’a mĩao?
-
Nĩũatĩĩaa mwĩao wa mwĩkalĩle mũtheu?
-
Waaĩka naĩ nthũku na ndwaaumbũla kwa atongoi ma ũthembi ala maĩlĩte?
Kũlika ĩkalũnĩ nĩ ĩvuso ĩtheu. Nomũvaka twĩthĩwe twĩ aĩlu na kwĩthĩwa na wendi wa kwĩw’a kĩla watho mũtheu ũla twĩkaa na Ngai nthĩnĩ wa ĩkalũ. Nonginya tũlilikane kana kũsiĩlwa kwa tene na tene kũla kwĩkawa nthĩnĩ wa makalũ nĩ kũtheu. Noyo nzĩa yoka ĩla tũtonya kwĩthĩwa vamwe ta mĩsyĩ tene na tene. Noyo nzĩa yoka ya kũkwata maũathimo onthe ala Ngai wĩnamo kwitũ. Nĩ ũndũ wa vata kwa ũtanu witũ wa tene na tene nĩkyo kĩtumi tũtataa kũthi ĩkalũnĩ kũsiĩlwa.
Ũneenan’ya
-
Nũũ ũla ũtonya kũlika ĩkalũnĩ?
-
Nĩ maũndũ meva ala mũndũ waĩlĩte kwĩka ethĩwe e mwaĩlu kũlika ĩkalũnĩ?
-
Nĩkĩ ve vata kwitũ kũthi ĩkalũnĩ na kũsiĩlwa?
Kũmban’ya Mũsyĩ Waku Kwĩkala Vamwe Tene na Tene
Kwĩthĩwa twĩasiĩle nthĩnĩ wa ĩkalũ kũtumaa vatonyeka kwĩkala vamwe tene na tene ta mũsyĩ, ĩndĩ ve maũndũ angĩ twaĩlĩte kwĩka ethĩwa tũkenda kũkwata maũathimo aa manene. Nomũvaka tũendeee kũmũatĩĩa Yesũ kwa ũĩkĩĩku. Nomũvaka twie mawatho ala twĩkaa nthĩnĩ wa ĩkalũ. Nomũvaka twĩĩmanyĩsye kwĩthĩwa twĩ andũ aseo ma mũsyĩ ala mendanaa na kũtethan’ya ene kwa ene. Nomũvaka tũvoye Ngai nĩkana Veva Mũtheu atũtetheeasye kwĩka ũnyuvi waĩlĩte kwa kĩla ũndũ w’onthe tũkwĩka. Nĩtwaĩlĩte ĩvinda yonthe kũtata kũtethya mĩsyĩ yitũ yĩthĩwe yĩ myaĩlu kwĩkala na Ngai.
Ũneenan’ya
-
Vamwe na kũsiĩlwa nthĩnĩ wa ĩkalũ, mũsyĩ waĩlĩte kwĩka ata nĩkana wĩkale vamwe tene na tene?
Ngai Nĩwatumie Vethĩwa Vatonyeka Kwitũ Kũtangĩĩa Ala Maitũ Makwie
Mamilioni ma syana sya Ngai nĩsyakwie itaaĩw’a ũvoo mũseo Wake. Mayaakwata maũtw’ĩo ala maĩlĩte nĩkana maekewe naĩ syoo na kwĩthĩwa vatonyeka mekale ĩngĩ na Ngai. Ngai nĩwendete syana Syake syonthe na nĩwendaa syonthe isyoke Kwake, kwoou nũseũvĩtye nzĩa ya maũtw’ĩo ma ũvoo mũseo mekwe kwondũ wasyo. Wĩa ũũ nomũvaka wĩkĩwe ĩkalũnĩ.
Amwe ma maũtw’ĩo ala mekawa nthĩnĩ wa ĩkalũ kwondũ wa ala akw’ũ nĩ ũvatiso, kenengane kwa mũthĩnzĩo wa Veva Mũtheu, na kũsiĩlwa kwa mĩsyĩ tene na tene. Nũndũ maũtw’ĩo aa nĩmaĩlĩte kwa onthe ala mendaa kwĩkala na Ngai ĩngĩ, nĩtũtonya kwĩka wĩa ũũ kwa akw’ũ maitũ.
Ũneenan’ya
-
Nata ala makwie mataaĩw’a ũvoo mũseo matonya kũkwata maũtw’ĩo ala mamaĩlĩte maisyoka kwa Ngai?
-
Nũũ ũla waĩlĩte kwona kana maũtw’ĩo ala maĩlĩte nĩmeekwa kwa ala makwie?
Ala Methayũ Nĩmekaa Maũtw’ĩo Kwondũ wa Akw’ũ
Ve maũndũ amwe tũtonya kwĩka nĩkana maũtw’ĩo matonye kwĩkwa kwa ala tũtaen’ye makwie. Nĩtwaĩlĩte kũmamanya kwa masyĩtwa moo na matukũ na vandũ vala masyaĩwe na kũkw’a. Ethĩwa tũitonya kũkwata ũvoo ũũ, nĩtũtonya kũmamanya kwa kũandĩka kwa wingĩ ũndũ twĩsĩ ĩũlũ wamũkonyo woo (ĩthe, nyinyia, na syana syoo).
Wĩa wa kũmantha masyĩtwa ma akw’ũ maitũ ala makwie na ũvoo ũngĩ w’onthe ũla ũmakonetye wĩtawa ũsyaanĩo, kana ũatĩanio wa mũsyĩ.
Kwĩ mĩthemba ĩlĩ ya mathangũ, yĩtawa ũsyaanĩo na ũlilikan’yo wa kĩkundi kya mũsyĩ, vala ũtonya kũandĩka ũvoo ũũ. Nũtonya kũkwata ũtumbĩthyo wa mathangũ aa makusũsya kuma kwa ndongoi ya ũthembi. Akeethĩwa na mũndũ wa kũũtetheesya kũandĩka ũvoo ũũ. Nũtonya ĩndĩ kũtwaa kana kũtũma ũvoo ũũ ĩkalũnĩ, vala maũtw’ĩo makekĩwa.
Ethĩwa vayĩĩ ũmwe wa ala tũtaen’ye wĩthayũ wĩna ũvoo ũla tũkwenda, nĩtũtonya kũũkwata kuma kwa maũlilikan’yo ma silikalĩ, kuma kwa maũlilikan’yo ma makanisa kũla akw’ũ maitũ matonya kwĩthĩwa maĩmakw’o, kwa tũvulĩ, kana vandũ vangĩ vonthe vala ũvoo woneka.
Ethĩwa twĩ aĩlu, nĩtũtonya kũthi ĩkalũnĩ kwĩka maũtw’ĩo kwa ala tũtaen’ye. Ethĩwa tũitonya kũthi ĩkalũnĩ, angĩ makeeka maũtw’ĩo asu vandũ voo. Twaĩlĩte kũendaa ĩkalũnĩ kwa mavinda kwĩka maũtw’ĩo kwa ala akw’ũ.
Ũneenan’ya
-
Twaĩlĩte kwĩka ata mbee wa kwĩthĩwa tũtonya kwĩka maũtw’ĩo nthĩnĩ wa ĩkalũ kwa ala maitũ makwie?
-
Nĩ ũvoo wĩva wendekaa nĩkana maũtw’ĩo aa matonye kwĩkwa?
-
Nũũ ũtonya kwĩka maũtw’ĩo kwa ala maitũ makwie?
Isitolia Sya Mũndũ Mwene Nĩ Sya Vata
Yĩla twasoma ũndũ mũndũ wa mũsyĩ witũ waandĩkĩe ĩũlũ wake, nĩtũmũmanyaa na kũmwenda mũndũ ũsu mũno. Vamwe na kũmanya ĩũlũ wa akw’ũ maitũ ala tũtaen’ye na kwĩka maũtw’ĩo kwondũ woo, nĩtwaĩlĩte kwia ũlilikan’yo wa mathayũ maitũ ene. Twaĩlĩte kũandĩka ĩũlũ wa asyai maitũ, yĩla twasyaiwe na maũndũ ala meekĩkie kwitũ ĩvindanĩ ya mathayũ maitũ. Nĩtwaĩlĩte oĩngĩ kũandĩka masũanĩo maitũ nĩkana syana sitũ na esũkũũe maitũ matonye kũmanya mũno ĩũlũ witũ na kwendeew’a kwĩka maũndũ maseo ota asu tweekie.
Ngai amwĩie Atamu aandĩke ũlilikan’yo wa thayũ wake kwa syana syake. Athani onamo nĩmaandĩkie maũlilikan’yo ta asu, na nĩtwaĩlĩte kwĩka ũu onaitũ. Kwa kũsoma ũlilikan’yo ũla Atamu na athani angĩ maandĩkie, nĩtwĩĩmanyĩasya ũndũ wa maũathimo na mĩao ĩla makwatie kuma kwa Ngai. Ũũ ũtũtetheeasya kwĩka ũla waĩlu. Twaĩlĩte kũtetheesya syana sitũ kwa kwia ũlilikan’yo wa mathayũ maitũ.
Ũneenan’ya
-
Nĩkĩ Ngai wĩĩte andũ Make maie ũlilikan’yo wa mathayũ moo?
-
Nĩ maũathimo meva matonya kũka kwa syana syaku na esũkũũu kumana na ũlilikan’yo waku mwene?