Nonginya tũkwate mũthĩnzĩo wa Veva Mũtheu kwa kwilĩĩlwa moko.

Kĩlungu kya 16

Mũthĩnzĩo wa Veva Mũtheu

Veva Mũtheu nũtũtetheeasya kũmanya na kũelewa maũndũ ala maw’o. Tũtonya kũkwata mũthĩnzĩo wa Veva Mũtheu ata?

Veva Mũtheu Nũtonya Kũtũtongoesya Kũthi Ũw’onĩ

Veva Mũtheu nũtonya kũtetheesya andũ mbee wa kũvatiswa. Nũtonya kũtavya mũndũ maũmanyĩsyo ma Yesũ nĩ maw’o. Mavinda amwe nũtũtavasya vala twĩthĩa Ĩkanisa yaw’o ya Yesũ Klĩsto. Ĩndĩ Veva Mũtheu ndeĩkala naitũ mũvaka yĩla tũkavatiswa na kũnengwa mũthĩnzĩo wa Veva Mũtheu.

Nthĩnĩ wa Ũtianĩo Mweũ tũsomaa ĩũlũ wa mũndũ weetawa Kolinelio. Aĩ mũndũ ũtaĩ aavatiswa. Veva Mũtheu nĩwamũtavisye maũmanyĩsyo ma Yesũ nĩ maw’o. Kolinelio ĩtina nĩwavatisiwe na akwata mũthĩnzĩo wa Veva Mũtheu.

Asa Waitũ wa Ĩtunĩ Nũtũnengete Nzĩa ya Kũkwata Mũthĩnzĩo wa Veva Mũtheu

Yĩla tũendeee na kwĩĩmanyĩsya ĩũlũ wa walan’yo wa Asa waitũ wa Ĩtunĩ kwitũ, nĩtwendaa kũalyũla ngoo kwondũ wa naĩ sitũ na kwĩw’a ũndũ w’onthe Yesũ ũtwĩaa twĩke. Ĩndĩ tũtĩsa kwĩka ũũ vateũtethyo. Mũthĩnzĩo wa Veva Mũtheu nĩ ĩvuso ya kwĩthĩwa na ũtethyo wa Veva Mũtheu mavinda onthe. Tũkwataa mũthĩnzĩo wa Veva Mũtheu omĩtũkĩ twamina kũvatiswa.

Nonginya twĩĩyũmban’ye nĩkana tũkwate mũthĩnzĩo wa Veva Mũtheu. Nonginya tũĩkĩĩe nthĩnĩ wa Yesũ na tũitata mũno kwĩka ũndũ Ũtumĩsye mwĩao twĩke. Nonginya tũalyũle ngoo kwondũ wa naĩ sitũ na tũivatiswa.

Ĩtina wa kũvatiswa, ala mena ũkũmũ kuma kwa Asa waitũ wa Ĩtunĩ nĩmailĩĩlaa moko moo ĩũlũ wa mũtwe witũ, kũtũnenga mũthĩnzĩo wa Veva Mũtheu, na kũtũtw’ĩkĩthya athaithi maw’o ma Ĩkanisa ya Yesũ Klĩsto ya Atheu ma Mĩthenya ya Mũminũkĩlyo. Ĩngĩ nomatũathimaa.

Ũneenan’ya

Tũkwataa mũthĩnzĩo wa Veva Mũtheu ata?

Kwĩ nzĩa mbingĩ ila mũthĩnzĩo wa Veva Mũtheu ũtonya kũtũtetheesya. Nũtonya kũtũetea ũtũmane kuma kwa Yesũ. Nũtonya kũtũmanyĩsya maũndũ maingĩ ĩũlũ wa Yesũ na Asa waitũ wa Ĩtunĩ.

Nũtonya kũtũtetheesya kũmanya ũndũ wa kũtatũa mathĩna maitũ. Nũtonya kũtũkiakĩsya. Nũtonya kũtũtetheesya kũsinda naĩ sitũ. Nũtonya kũtũtetheesya kwĩka maũndũ ala maseo.

Veva Mũtheu nũtonya kũtũtetheesya kũelewa na kwenda ala angĩ. Nũtonya kũtũtetheesya kũmanya ũndũ tũtonya kũmatetheesya. Nũtonya kũtũtetheesya kũelewa maũmanyĩsyo ma Yesũ. Nũtonya kũtũtetheesya kũmanya ũndũ tũkwasya kũmanyĩsya andũ ala angĩ ĩũlũ wa Asa waitũ wa Ĩtunĩ na Yesũ.

Ũneenan’ya

Nĩ nzĩa imwe ta syĩva mũthĩnzĩo wa Veva Mũtheu ũtonya kwelekelya mathayũ maitũ?

Nonginya Tũalyũle Ngoo kwondũ wa Naĩ Sitũ Nĩkana Tũkwate Mũthĩnzĩo Ũũ

Kwĩsĩla mũthĩnzĩonĩ wa Veva Mũtheu nĩtũtonya kũtw’ĩka andũ aseo na kwĩka maũndũ maseo. Nĩtũtonya kwĩkala ta Asa waitũ wa Ĩtunĩ. Ĩndĩ nonginya ĩvinda yonthe twĩke maũndũ maseo, kana Veva Mũtheu ndakekala naitũ. Nonginya tũtate kũsũanĩa masũanĩo maseo. Nonginya tũtate kũatĩĩa maũmanyĩsyo ma Yesũ. Yĩla tweeka ũndũ mũthũku, nonginya tũkalyũla ngoo. Tũitata kwĩka maũndũ aa onthe, Veva Mũtheu nũtũtetheeasya.

Mavinda amwe Veva Mũtheu nũtũtongoeasya kwa kũtuma twĩthĩwa na mwĩw’ĩle wa mũuo mũuu nthĩnĩ wa ngoo sitũ. Yĩla twambĩlĩlya kwĩka ũndũ mũthũku, mwĩw’ĩle ũũ wa ũtanu nũtũtiaa. Mavinda amwe nĩtũtonya kwĩw’a wasya ilĩkonĩ sitũ ũineena naitũ, ũitwĩa twĩke kana tũikeke. Nonginya twĩthĩawe twĩĩyũmbanĩtye kwĩĩthukĩĩsya na kwĩwa kĩla Veva Mũtheu eũtũtavya, nũndũ Veva Mũtheu ĩvinda yonthe atũtavasya kĩla Yesũ e kwenda twĩke, na no kwa kũmwĩw’a Yesũ tũtonya kũsyoka kwa Asa waitũ wa Ĩtunĩ.

Ethĩwa tũikew’a Veva Mũtheu na ethĩwa tũkambĩlĩlya kwĩka maũndũ mathũku, Veva Mũtheu nũtũtiaa. Ndakekala naitũ kana kũtũtetheesya ethĩwa tũikeka maũndũ ala maseo. Ĩndĩ ethĩwa tũkeethukĩĩsya welekelyo Wake, Veva Mũtheu akeethĩawa naitũ kĩla ĩvinda. Nũtũtetheeasya kũtw’ĩka andũ aseo na kwĩĩyũmbanĩsya thayũ witũ na Asa waitũ wa Ĩtunĩ.

Ũneenan’ya

Nonginya twĩke ata nĩkana Veva Mũtheu atonye kũtetheesya?

Nĩtũkwataa Maũathimo Angĩ me Mwanya kwĩsĩla Vevanĩ Mũtheu

Maũathimo amwe me mwanya tũkwataa kwĩsĩla Vevanĩ Mũtheu metawa mĩthĩnzĩo ya kĩveva. Yesũ anenganae mĩthĩnzĩo ĩno kwa athaithi ma Ĩkanisa Yake yaw’o kĩla ĩvinda Ĩkanisa Yake yĩ ĩũlũ wa nthĩ. Atũnengae mĩthĩnzĩo ĩno kwĩsĩla vinyanĩ wa Veva Mũtheu. Nĩtwaĩlĩte kũelewa mĩthĩnzĩo ĩno nĩkana tũmĩtũmĩe kwa ũĩ.

Mũthĩnzĩo wa Kũneena Ithyomo Ingĩ

Mũthĩnzĩo ũmwe nũtetheeasya andũ kũneena ithyomo ingĩ. Kĩtumi kĩmwe Yesũ ũnengae andũ mũthĩnzĩo ũũ nĩ kũmatetheesya kũmanyĩsya ũvoo mũseo andũnĩ ala maneenaa ithyomo ingĩ.

Mũthĩnzĩo wa kũalyũla Ithyomo Ingĩ

Mũthĩnzĩo ũngĩ nũtetheeasya andũ ala meũtavw’a ĩũlũ wa ũvoo mũseo. Mũthĩnzĩo wa kũalyũla ithyomo ingĩ nũmatetheeasya kũelewa ũtũmane kuma kwa Yesũ ũla ũneenetwe kwa kĩthyomo matakĩsĩ.

Mũthĩnzĩo wa Kũmanya Kana Yesũ Nĩwe Mwana wa Asa Waitũ wa Ĩtunĩ

Mũthĩnzĩo ũngĩ nũtetheeasya andũ kũmanya kana Yesũ nĩwe Mwana wa Asa waitũ wa Ĩtunĩ. Maandĩko matheu maasya kana andũ nĩmatonya kũmanya kana Yesũ nĩwe Mũtangĩĩi o ethĩwa Veva Mũtheu nũkũmatetheesya kũmanya. Mũthĩnzĩo ũũ nĩ ũkũsĩ kuma vala ve Veva Mũtheu kana Yesũ kwaw’o nĩwe Mwana wa Asa waitũ wa Ĩtunĩ na kana nĩwe Mũtangĩĩi wa nthĩ.

Mũthĩnzĩo wa Kũĩkĩĩa Ũkũsĩ wa Angĩ

Mũthĩnzĩo wa kũĩkĩĩa ũkũsĩ wa angĩ nũtetheeasya andũ kũmanya kana maũndũ ala mũndũ mũna ũkwasya ĩũlũ wa Yesũ nĩ maw’o. Veva Mũtheu nũtũtetheeasya kũmanya ũkũsĩ waw’o na kũĩkĩĩa.

Mũthĩnzĩo wa Mũĩkĩĩo

Mũthĩnzĩo wa mũĩkĩĩo nũtũtetheeasya kwĩw’a mĩao ya Yesũ. Tũtena mũĩkĩĩo tũitonya kũkwata mĩthĩnzĩo ĩngĩ ya kĩveva. Tũtena mũĩkĩĩo tũitonya kũsyoka na kwĩkala na Asa waitũ wa Ĩtunĩ. Andũ aingĩ methĩawa na mũĩkĩĩo mũlũmu nthĩnĩ wa Yesũ. Ũmwe wa athani nthĩnĩ wa Ĩvuku ya Momoni aĩna mũĩkĩĩo ta ũsu nthĩnĩ wa Yesũ mũvaka Yesũ amumĩlĩĩla. Mwathani Joseph Smith aĩna mũĩkĩĩo mũlũmu ta ũsu nthĩnĩ wa Yesũ Klĩsto mũvaka Asa waitũ wa Ĩtunĩ na Yesũ mamumĩlĩĩla.

Mũthĩnzĩo wa Walyũlo

Mũthĩnzĩo wa walyũlo nũtetheeasya andũ kũalyũla maandĩko ala maandĩke ma Asa waitũ wa Ĩtunĩ na ma Yesũ na aatĩĩi Make kuma kĩthyomonĩ kĩmwe kũthi kĩngĩ. Mwathani Joseph Smith aĩna mũthĩnzĩo ũũ yĩla walyũlaa Ĩvuku ya Momoni. Mũthĩnzĩo ũũ nũtetheeasya mwalyũli kũelewa ũtũmane wĩasya ata kwa ũw’o na ĩndĩ aiwalyũla kwa ũw’o.

Mũthĩnzĩo wa Ũmanyi

Mũthĩnzĩo wa ũmanyi nũtetheeasya andũ kũelewa wĩa wa Asa waitũ wa Ĩtunĩ na Yesũ. Asa waitũ wa Ĩtunĩ nĩwaĩtye tũitonya kũsyoka Kwake ethĩwa tũimanyĩte kana kũelewa nĩ maũndũ ala wendaa twĩke. Nonginya tũmanye walan’yo ũla Asa waitũ wa Ĩtunĩ ũtũnengete nĩkana tũtonye kũsyoka Kwake.

Yesũ nĩwaĩtye ũmanyi ũla tũkwataa thayũnĩ ũũ nũkatũtetheesya nthĩnĩ wa nthĩ ya kĩveva ĩtina wa twakw’a. Nĩwendaa tũmanye ĩũlũ wa maũmanyĩsyo Make na mĩao Yake, ĩũlũ wa ĩtu na nthĩ, ĩũlũ wa maũndũ ala maaĩkĩka, na ĩũlũ wa maũndũ ala me nthĩnĩ wa nthĩ sitũ ene na nthĩ ila ingĩ. Nĩwaĩtye nonginya tũtũmĩe ũmanyi ũũ kwa ũĩ. Nĩtwaĩlĩte kũkũlya ũtethyo wa Veva Mũtheu nthĩnĩ wa kũmantha ũĩ.

Mũthĩnzĩo wa Ũĩ

Mũthĩnzĩo ũũ nũtetheeasya andũ kũtũmĩa ũĩ ũla Asa waitũ wa Ĩtunĩ ũmanengete kwa nzĩa ĩla yaĩlĩte. Nĩtwaĩlĩte kũtũmĩa mũthĩnzĩo ũũ kwa kwaĩlya mathayũ maitũ na kũmanyĩsya na kũnengane ũtaĩ wa ũĩ kwa angĩ.

Mũthĩnzĩo wa Kũmanyĩsya

Mũthĩnzĩo wa kũmanyĩsya nũtetheeasya andũ kũmanyĩsya ũvoo mũseo kwa angĩ kwa nzĩa matonya kũelawa. Tũtonya kwĩthĩwa na mũthĩnzĩo ũũ kwa kwĩthĩwa na mũĩkĩĩo nthĩnĩ wa Yesũ na kwĩsĩla kũsoma na mboya.

Mũthĩnzĩo wa Wathani

Mũthĩnzĩo wa wathani nũtetheeasya andũ kũmanya na kũelewa maũndũ ala mekĩkĩte ĩvinda ĩvĩtũku, maũndũ ala me kwĩkĩka yu, na maũndũ ala makekĩka ĩvinda yũkĩte. Athani nĩmanengawe mũthĩnzĩo ũũ, ĩndĩ onaithyĩ nĩtũtonya kwĩthĩwa na naw’o kũtũtongoesya mathayũnĩ maitũ.

Mũthĩnzĩo wa Ũvuan’yo*

Veva Mũtheu nũvuanĩasya andũ maũndũ ala meũmatetheesya. Kĩla ũmwe waitũ nũtonya kũkwata ũvuan’yo kwondũ wa ũseo witũ ene. Ĩndĩ maũvuan’yo ma Ĩkanisa yonthe manengawa mwathani eweka. Tũtĩtonya kũkwata ũvuan’yo vandũ va mũtongoi waitũ nthĩnĩ wa Ĩkanisa. Kĩla kyonthe Veva Mũtheu ũtũvuanĩasya nĩkĩtĩkĩlanaa na mĩao ĩla ingĩ na maũmanyĩsyo ma Asa waitũ wa Ĩtunĩ na Yesũ.

Mũthĩnzĩo wa Kũvosya

Mũthinzĩo wa kũvosya nũtetheeasya andũ ala awau kwĩw’a nesa. Amwe me mũĩkĩĩo wa kũvow’a na angĩ mena mũĩkĩĩo wa kũvosya andũ angĩ.

Mũthĩnzĩo wa Kwĩka Syama

Mũthĩnzĩo wa kwĩka syama ũnenganawe kũtetheeasya andũ. Kyama nĩ kĩndũ Asa waitũ wa Ĩtunĩ ũtwĩkĩaa kĩla nĩ kĩnene kũthonoka ũndũ ĩthyĩ ene twĩna vinya wa kwĩka. Yesũ nĩwaisye nthĩnĩ wa Ũtianĩo Mweũ na nthĩnĩ wa Ĩvuku ya Momoni kana kũkeethĩwa syama nene katĩ wa ala makaĩkĩĩa nthĩnĩ Wake.

Satani Nũtonya Kũelekan’ya Mavinya aa Makĩveva

Satani nũtonya kũtuma maũndũ methĩwa ala me kũelekan’ya mĩthĩnzĩo ĩla ya w’o ya kĩveva. Nũtonya kwĩĩyĩkalya ta mũlaĩka. Nũtonya kwĩkalya maũndũ mavuku mekale maseo na maw’o. Nũtonya kwĩkalya mwathani wa ũvũngũ akekala ta waw’o. Nũtonya kwĩka syama akenge andũ. Aoi, ala maasya nĩmatonya kũneena na maveva ma akw’ũ, ala maasya nĩmatonya kũtavya mũndũ ĩũlũ wa thayũ wake ũla ũkĩte, na angĩ tamo makwataa vinya ũla menaw’o kuma kwa Satani na ti aatĩĩi ma Yesũ. Nĩtwaĩlĩte kwĩkala vaasa namo.

Satani nũtonya kwĩkalya maũndũ kwoneka ta maw’o mũno ũkethĩwa nzĩa yoka ya kũmanya kana ti maw’o no kũmũkũlya Asa waitũ wa Ĩtunĩ. Nĩtwĩthĩawa na mwĩw’ĩle wĩna nzika, ũte mwĩw’ĩle wa mũuo, yĩla Satani kana aatĩĩi make maelekan’ya ĩla mĩthĩnzĩo ya kĩveva. Mũthĩnzĩo wa kũmanya yĩla mĩthĩnzĩo ya kĩveva yaw’o na yĩla ne mĩĩyĩelekan’yo ya Satani wĩtawa mũthĩnzĩo wa kũvathũkan’ya.

Ũneenan’ya

Mĩthĩnzĩo ya kĩveva nĩ myaũ?
Tũtonya kũvathũkan’ya ata katĩ wa mĩthĩnzĩo yaw’o ya kĩveva na mĩĩyĩelekan’yo ya Satani?

Nĩtwaĩlĩte Kũthũkũma Twĩan’ye na Kũtũmĩa Mĩthĩnzĩo Ĩla Twĩnayo

Nĩtũtonya kũmanya nĩ mĩthĩnzĩo yĩva ĩla twĩnayo ethĩwa tũkasoma, kũtĩĩa kũya na kũvoya. Tũtonya kũtũmĩa mĩthĩnzĩo yaitũ o yĩla tweew’a mĩao ya Yesũ. Ĩndĩ tũyenda kũmĩtũmĩa kũtetheesya angĩ na kũtetheesya kwaka Ĩkanisa ya Yesũ Klĩsto ya Atheu ma Mĩthenya ya Mũminũkĩlyo. Ethĩwa tũikean’ya na kũtũmĩa mĩthĩnzĩo yaitũ, tũkamyasya.

Yesũ nĩwaĩtye kana tũtaĩlĩte kwĩĩyona na mĩthĩnzĩo ya kĩveva ĩla tũathimĩtwe nayo. Tũtaĩlĩte kũneena ĩũlũ wayo kwa andũ matemyosa ta mĩtheu. Mĩthĩnzĩo ĩno ĩnenganawe kwĩtũ kwondũ wa ũseo witũ ene na kũathima andũ angĩ. Nonginya tũlilikane kana mĩthĩnzĩo ino nĩ mitheu. Yesũ atũnengae mĩthĩnzĩo ĩno kwĩsĩla nthĩnĩ wa Veva Mũtheu. Atũkũlasya tũmũtũngĩe mũvea w’oka na tũitũmĩa mĩthĩnzĩo ĩno ũndũ e kwenda ĩtũmĩwe.

Ũneenan’ya

Tũtonya kũmanya ata nĩ mĩthĩnzĩo yĩva twĩnayo?
Tũiaa mĩthĩnzĩo ĩno ya kĩveva yĩ mĩtheu ata?