Ilungu sya Wambĩlĩlyo
Kĩlungu kya 4: Twĩna Ũthasyo wa Kũnyuva

Kĩlungu kya 4

Twĩna Ũthasyo wa Kũnyuva

Ithyonthe nĩtũnyuvaa kĩla mũthenya. Asa waitũ wa Ĩtunĩ nũtũnengete ũw’o wa kwĩĩnyuvĩa ithyĩ ene. Nĩkĩ twaĩlĩte kũtata kũnyuva ũseo?

Asa Waitũ wa Ĩtunĩ Nũtũnengae Ĩvuso ya Kũnyuva

Ĩtunĩ twaĩathasye kũnyuva. Twaĩna ũthasyo wa kũmũatĩĩa Yesũ kana kũmũatĩĩa Satani. Mbingĩ sya syana sya Asa waitũ wa Ĩtunĩ nĩsyanyuvie kũmũatĩĩa Yesũ. Ala angĩ manyuvie kũmũatĩĩa Satani. Asa waitũ wa Ĩtunĩ nĩwaekie syana Syake syonthe syĩke ũnyuvi wasyo.

Asa waitũ wa Ĩtunĩ ona noũtũekaa twĩĩnyuvĩe ene kũũ ĩũlũ wa nthĩ. Yĩla twookie nthĩ, Nĩwatũlĩthisye thayũ witũ Nake. Vaĩ vata wa kwĩmanyĩsya kwĩnyuvĩa ithyĩ ene yĩla tũtenake.

Ũneenan’ya

  • Wĩw’aa ata yĩla wathing’ĩĩw’a kwĩka ũndũ?

  • Wĩw’aa ata yĩla mũndũ wakũeka ũnyuve maũndũ ala ũkwenda kwĩka?

Walan’yo wa Asa Waitũ wa Ĩtunĩ Ũtonya Kũthũkũma O Ethĩwa Twĩna Ũthasyo wa Kũnyuva

Kĩlungu kya walan’yo wa Asa waitũ wa Ĩtunĩ kyaĩ kũtũtũma kũũ nthĩ vala vakethĩwa maũndũ maseo na maũndũ mavuku. Nĩwendaa tũnyuve kĩla kĩseo. Satani nũtataa kũtũsesenga tũnyuve ũthũku. Twĩna ũthasyo wa kũnyuva katĩ wa ũseo na ũthũku.

Yĩla twanyuva ũla wa w’o, nĩtwĩthĩawa mũno tũtonya kwĩka maũndũ ala Asa waitũ wa Ĩtunĩ wendaa twĩke. Tũyĩka maũndũ ala Asa waitũ wa Ĩtunĩ wendaa twĩke, nĩtwĩkalaa Take. Nĩtwĩĩmanyĩaa ithyĩ ene maũnyuvi ala maseo makwĩka. Nĩtũeleawa nesa maũndũ ala matũtanĩthasya na maũndũ ala matũthatasya.

Kethĩwa tũitonya kwĩĩnyuvĩa ithyĩ ene, tũitonya kwĩthĩwa twĩkala ta Asa waitũ wa Ĩtunĩ. Tũikatonya kwĩĩmanyĩsya ithyĩ ene maũndũ ala maseo makũnyuva. Tũikatonya kũmwonia Asa waitũ wa Ĩtunĩ kana nĩtũmwendete na kana w’o ki nĩtũkwenda kũmũatĩĩa.

Ũneenan’ya

  • Nĩkĩ twaĩlĩte kwĩthĩwa na ĩvuso ya kũnyuva?

Kũnyuva Kũmwĩw’a Asa Waitũ wa Ĩtunĩ Nĩkũtũtanĩthasya

Maũnyuvi maw’o nĩmatũeteae maũsũngĩo maseo; maũnyuvi mathũku nĩmatũeteae maũsũngĩo mathũku. Ethĩwa tũkanyuva kũmwĩw’a Asa waitũ wa Ĩtunĩ, tũkeethĩwa twĩ andũ atanu na aseo. Ethĩwa tũikanyuva kũmwĩw’a, tũkeethĩwa twĩ athatu na tũikaseũva.

Yĩla twanyuva maũnyuvi ala maw’o, nĩmatũtanĩthasya. Nĩtwĩĩmanyĩasya kana nĩtwaĩlĩte kwĩka maũndũ maseo. Yĩla twoona kana kũnyuva maũndũ ala maw’o nĩkũtũtanĩthasya, nĩtwendaa kwĩka maũnyuvi maw’o mũno. Nĩtwendaa mũno kwĩthĩwa twĩ aseo. Nĩtũtonya kũnyuva maũnyuvi maw’o kwa mĩtũkĩ nĩkwĩthĩwa nĩtwĩsĩ maũsũngĩo meĩthĩwa me maseo kwitũ. Nĩtwĩĩmanyĩasya maũndũ ala twaĩlĩte kũmanya na kwĩka twĩkale ta Asa waitũ wa Ĩtunĩ.

Yĩla twanyuva maũnyuvi mathũku, nĩtwĩw’aa kĩmako na nthoni. Ethĩwa nĩtũkũendeea na kwĩka maũndũ mathũku, Satani nĩwambĩlĩlasya kwĩthĩwa na vinya kũla tũĩ. Vethĩawa ve vinya kũnyuva kwĩka ũla waw’o. Nĩtũekaa kũtata kũatĩĩa walan’yo wa Asa waitũ wa Ĩtunĩ.

Ũneenan’ya

  • Sũanĩa maũnyuvi amwe waaĩka. Nũsũngĩo mwaũ wa kĩla ũnyuvi?

  • Ũtonya kũnyuva kwĩthĩwa wĩ mũtanu na kũsyoka kwĩkala na Asa waitũ wa ĩtunĩ ata?

  • Ũnyuvi waw’o ũtonya kũũtetheesya ata kũnyuva maũnyuvi angĩ maseo?

  • Kũnyuva maũndũ mathũku kũtonya kũũsiĩa ata kwĩka maũnyuvi maseo ĩvinda yũkĩte?

Asa Waitũ wa Ĩtunĩ Nũkatũtetheesya Kũnyuva Maũnyuvi Maseo

Asa waitũ wa Ĩtunĩ nĩwendaa tũnyuve maũnyuvi maseo nĩkana tũtonye kwĩĩmanyĩsya maũndũ ala We wĩsĩ, kwĩka maũndũ ala We wĩkaa, na kwĩthĩwa na syĩndũ ila We wĩnasyo. Nĩwĩsĩ nĩtũkwĩthĩwa twĩ atanu na nĩtũkatonya kũsyoka kwĩkala Nake ethĩwa tũkanyuva kwĩka maũndũ ala maw’o.

Asa waitũ wa Ĩtunĩ nĩwendaa kũtũtetheesya kũnyuva maũnyuvi maseo. Ũtethyonĩ Wake, nĩtũtonya kũnyuva kwĩka ũndũ w’onthe ũtwĩĩte twĩke. Yĩla twamũkũlya, akatũtetheesya kwĩĩsianĩa na matatwa ma Satani. Akatũnenga vinya wa kũnyuva ũla waw’o. Akatũtetheesya kũatĩĩa walan’yo Wake na tũyĩkala Take.

Ũneenan’ya

  • Nĩkĩ Asa waitũ wa Ĩtunĩ wendaa tũnyuve maũnyuvi maseo?

  • Nũkatũthing’ĩĩsya ĩvinda yĩmwe kwĩka ũla waw’o? Nĩkĩ?