Ilungu sya Wambĩlĩlyo
Kĩlungu kya 1: Kwĩ Ngai

Kĩlungu kya 1

Kwĩ Ngai

Mavinda amwe andũ nĩmeekũlasya: Kwĩ Ngai? Ethĩwa kwĩ Ngai, ailye ata? Ndonya kũmanya ĩũlũ Wake ata?

Maũndũ Maingĩ Nĩmatwonasya Kana Kwĩ Ngai

Yĩla twasisya syĩndũ mbingĩ sya kũsen’ya ĩũlũ wa nthĩ ĩno, nĩtũmanyaa mũndũ mũĩ na mũseo, nĩwamyalanilye na amyũmba. Ũtukũ, yĩla twoona ndata mbingĩ na ila ingĩ nene ithyũũkĩte kũndũnĩ kwasyo kũla kwaĩlĩte, nĩtũmanyaa kana ũmwe wĩna vinya mũnene nĩwasyũmbie na nĩwe ũiũngamĩe. Ngai nĩwe woombie syĩndũ ii syonthe.

Kwĩ andũ aseo ala moonie na maneena na Ngai. Nĩmatũtavĩtye ũndũ Ngai ũilyĩ na ũndũ ũkwenda twĩke. Nĩmatũtavĩtye Nĩwe Asa waitũ wa Ĩtunĩ. Nĩmaandĩkĩte mavuku matheu no kenda tũsome ĩũlũ Wake.

Kĩla ũmwe waitũ no atonye kũmanya kana kwĩ Ngai na kana nĩ Asa waitũ wa Ĩtunĩ. Nũkũtũtetheesya kũmanya kana nĩ waw’o na kana nĩtũtonya kũmanya mũnango ĩũlũ Wake.

Ũneenan’ya

  • Nĩ maũndũ meva amwe monanasya kana kwĩ Ngai?

Asa Waitũ wa Ĩtunĩ nĩ Kyũmbe Kĩlũngalu

Andũ ala aseo mamwonete Asa waitũ wa Ĩtunĩ nĩmaĩtye kana nĩ Waw’o. Ethayũ. Ailye ta mũndũ.

Asa waitũ wa Ĩtunĩ ti mũvw’ano kana nyamũ. E mwĩĩ wa nyama na mavĩndĩ. Mwĩĩ wake ũilyĩ ta wa mũndũ, ĩndĩ wĩkĩvathũkan’yo.

Mwĩĩ Wake ndũkakw’a. Mwĩĩ Wake ndwĩw’aa woo na ndwĩsa kũwaa.

E mĩw’ĩle. Nũtonya kwĩw’a ũtanu kana ũthatu. Nĩwendete andũ onthe na nĩwendaa methĩwe me atanu. E tei na ndendeeasya. Ekaa maũndũ ala maseo moka, na Aneenaa ũw’o w’oka. Nĩwĩsĩ maũndũ onthe. Nũtonya kwĩka maũndũ onthe. Nĩvethĩawa kyeni ũthyũlũlũkonĩ Wake. Ũtisu na wanake Wake nĩ mũnene kũthonoka kĩndũ ona kĩva twaaona kũũ nthĩ.

Asa Waitũ wa Ĩtunĩ nowe kyũmbe kyoka twaĩle kũthaitha. Ekalaa vandũ vetawa ĩtunĩ. Nĩ vandũ vanake kũthonoka nthĩ.

Ũneenan’ya

  • Ngai nĩ kyũmbe kya mũthemba wĩva?

  • Ngai e kĩvathũkan’yo ata naitũ?

Asa Waitũ wa Ĩtunĩ Nĩwonanasya Wendo Wake Kwitũ Kwa Nzĩa Mbingĩ

Asa Waitũ wa Ĩtunĩ nũtũmĩaa ũtonyi Wake kũtũtethya. Nĩwamwĩie Mwana Wake, Yesũ, aseũvye yayaya na nthĩ. Nĩwamwĩie Yesũ aseũvye syũa, mwei, na ndata. Nĩwamwĩĩyĩaĩe Yesũ ekĩe mĩtĩ na nyamũ ĩũlũ wa nthĩ. Asa Waitũ wa Ĩtunĩ nĩweekie maũndũ aa onthe kwitũ nũndũ Nũtwendete. Nĩwendaa kũtũtetheesya twĩthĩwe twĩ aseo na twĩ atanu.

Asa Waitũ wa Ĩtunĩ nũtũmĩaa ũmanyi Wake kũtũtetheesya. Nĩwĩsĩ kĩla ũndũ w’onthe ũla weekĩkie ĩtina. Nĩwĩsĩ ũndũ w’onthe ũla ũkwĩkĩka yu. Na nĩwĩsĩ kĩla kĩkwĩkĩka ĩvinda yũkĩte. Nĩwĩsĩ masũanĩo maitũ ithyonthe. Nĩkwĩthĩwa nĩwĩsĩ maũndũ onthe, Nĩwĩsĩ ũndũ tũkwenda nĩkana twĩthĩwe na ũtanu. Nĩwĩsĩ nĩkana twĩthĩwe na ũtanu waw’o nonginya twĩthĩwe twĩ aseo. Eenda kũtũtetheesya kwĩthĩwa twĩ aseo nĩkwĩthĩwa nũtwendete.

Ũneenan’ya

  • Asa waitũ wa Ĩtunĩ onanasya wendo Wake kũla tũĩ ata?

Asa Waitũ wa Ĩtunĩ Nĩwendaa Tũmũmanye

Nĩkwĩthĩwa Asa waitũ wa Ĩtunĩ nũtwendete, nũtũnengete thayũ na nthĩ mbanake ĩla twĩkalaa. Nĩwendaa tũmanye maũndũ ala twaĩlĩte kwĩka. Nũtwathĩte kana nĩtũtonya Kũmũmanya.

Kwĩka maũndũ aa nĩkũtonya kũtũtetheesya kwĩĩmanyĩsya mũno ĩũlũ wa Asa waitũ wa Ĩtunĩ:

  1. Nĩtũtonya kũsisya nthĩ ĩla ũtũmbĩe na tũitũnga mũvea.

  2. Nĩtũtonya kũĩkĩĩa kana Asa waitũ wa Ĩtunĩ evo na kana Nũtwendete.

  3. Nĩtũtonya kũsoma maũndũ ala andũ aseo maandĩkĩte ĩũlũ wa Asa waitũ wa Ĩtunĩ.

  4. Nĩtũtonya kwĩĩmanyĩsya na kwĩka maũndũ ala E kwenda twĩĩmanyĩsye na kũmeka.

  5. Nĩtũtonya kũneena na Asa waitũ wa Ĩtunĩ na kũmũkũlya atũtetheesye kũmũmanya.

Kũmanya ĩũlũ wa Asa waitũ wa Ĩtunĩ nĩkũtonya kũtũtetheesya mathayũnĩ maitũ. Kũmanya ĩũlũ Wake nĩkũtonya kũtũtetheesya kwĩw’a twĩ atanu na twĩ asũvĩĩku. Nĩ mũseo na ndakeka maũndũ ala mathũku kwitũ. Nĩtũtonya kwĩĩmanyĩsya maũndũ ala E kwenda twĩke. Nĩtũtonya kwĩĩmanyĩsya ũndũ waũkũlya ũtethyo Wake. Nĩtũtonya kũtw’ĩka andũ aseo na mena ũtanu mwingĩ.

Ũneenan’ya

  • Tũtonya kwĩka ata kũmũmanya na kũmũelewa Asa waitũ wa Ĩtunĩ?

  • Kũmũmanya Asa waitũ wa Ĩtunĩ kwitũ kũtũtethya ata?