Kĩlungu kya 24
Mũthenya wa Ũthaithi
Asa waitũ wa Ĩtunĩ nũtũtavĩtye tũtũmĩe mũthenya ũmwe kĩla kyumwa kũmũthaitha. Tũkwataa maũathimo maingĩ yĩla twaũthesya mũthenya ũsu.
Asa Waitũ wa Ĩtunĩ Atũnengie Mũthenya wa Kũthaitha Nĩkana Ũtũtethye
Asa waitũ wa Ĩtunĩ nĩwĩsĩ twĩna mathĩna maingĩ. Nonginya twĩke maũndũ maingĩ kĩla mũthenya. Nonginya tũthũkũme tũkwate lĩu na ngũa. Nonginya tũseuvye lĩu witũ na kwĩka maũndũ angĩ kĩla mũthenya.
Twĩna maũndũ aa onthe makwĩka, nomĩtũkĩ kũlwa nĩ Asa waitũ wa Ĩtunĩ. Ĩngĩ nomĩtũkĩ kũlwa nĩ maũndũ ala Asa waitũ wa Ĩtunĩ ũkwenda twĩke. Tũsũanĩaa mũno ĩũlũ wa mavata maitũ ma kĩla mũthenya kũte ĩũlũ wa Asa waitũ wa Ĩtunĩ.
Asa waitũ wa Ĩtunĩ nĩwĩsĩ nĩtwendaa ĩvinda ya kũsũanĩa ĩũlũ Wake. Nĩtwendaa ĩvinda ya kwĩĩmanyĩsya ũndũ E kwenda twĩke. Kwondũ wa ũũ, nũtwĩĩte tũtũmĩe mũthenya ũmwe nthĩnĩ wa kĩla mĩthenya mũonza kũthyũmũa kuma wĩanĩ witũ na kwĩĩmanyĩsya ĩũlũ Wake.
Asa waitũ wa Ĩtunĩ oombie nthĩ kwĩsĩla kwa Yesũ Klĩsto nthĩnĩ wa ilungu thanthatũ sya mavinda. Eetie ilungu ii sya mavinda mĩthenya. Mũthenyanĩ wa mũonza, nĩwathyũmũie kuma wĩanĩ wa kũmba nthĩ ĩno. Nũtwĩĩte tũthyũmũe mũthenya ũmwe kĩla kyumwa kuma mawĩanĩ maitũ ma kĩla mũthenya.
Asa Waitũ wa Ĩtunĩ Nũtũtavĩtye Nĩ Mũthenya Wĩva Ũla wa Kũthaitha
Asa waitũ wa Ĩtunĩ nĩwatavisye andũ ma mavinda ma tene kũtũmĩa mũthenya wa mũonza wa kyumwa kwa kũthaitha. Mũthenya ũũ waĩwakũtetheesya andũ kũlilikana kana ĩtina wa oomba nthĩ nĩwathyũmũie mũthenyanĩ wa mũonza.
Ĩtina wa Yesũ akw’a, nĩwathayũũkie mũthenya wa mbee wa kyumwa. Aatĩĩi ma Yesũ matũmĩaa mũthenya wa mbee wa kyumwa taw’o mũthenya wa kũthaitha kũtetheesya andũ kũlilikana na kũnenga ndaĩa mũthenya wa ũthayũũkyo wa Yesũ. Ũũ tũwĩtaa mũthenya wa Mwĩaĩi. (Yesũ mavinda angĩ etawa Mwĩaĩi.) Ĩngĩ nĩtũwĩtaa ũũ Mũthenya wa Savato.* Onavala nĩ mũthenya wĩ kĩvathũkan’yo wa kyumwa na ũla watũmĩawa tene kwa kũthaitha, ĩndĩ no mũthenya ũmwe wa ĩla mũonza. Notwĩkaa mawĩa maitũ ma kĩla ĩvinda mĩthenya thanthatũ ya kyumwa. Ĩndĩ mũthenyanĩ wa mũonza tũithaitha Asa waitũ wa Ĩtunĩ.
Ĩvindanĩ yitũ, andũ aingĩ matũmĩaa mũthenya wa mbee wa kyumwa, ũla nĩ Wakyumwa, taw’o mũthenya wa kũthaitha. Kũndũnĩ kũnini Asa waitũ wa Ĩtunĩ nũtavĩtye mwathani Wake kana andũ Make ma nthĩ imwe nomatũmĩe mũthenya ũngĩ ta mũthenya wa kũthaitha.
Wakyumwa nĩ mũthenya wa ũthaithi.
Nĩtũtonya Kwia Mũthenya wa Mwĩaĩi wĩ Mũtheu
Kwĩ maũndũ maingĩ twaĩlĩte kwĩka mũthenyanĩ wa Mwĩaĩi. Ũndũ ũla wa vata tũtonya kwĩka nĩ kũsũanĩa ĩũlũ wa Asa waitũ wa Ĩtunĩ na Yesũ mũthenya ũsu. Twaĩlĩte nĩ kũsũanĩa ĩũlũ wa maũndũ ala Mekwenda tũmanye na kũmeka. Maũndũ amwe ala tũtonya kwĩka mũthenya wa ũthaithi ala matonya kũtũtetheesya kũlilikana na kwĩĩmanyĩsya ĩũlũ wa Asa waitũ wa Ĩtunĩ nĩ:
-
Kũsoma maandĩko matheu ala matũmanyĩasya ĩũlũ wa Asa waitũ wa Ĩtunĩ na Yesũ.
-
Kũtetheesya andũ angĩ kwĩĩmanyĩsya ĩũlũ wa Ĩkanisa.
-
Kũmanyĩsya mĩsyĩ yaitũ ĩũlũ wa Asa waitũ wa Ĩtunĩ na Yesũ na ĩũlũ wa ũndũ mekwenda twĩke.
-
Kũthi mawũmbanonĩ ma Ĩkanisa na ilasi vala tũtonya kwĩĩmanyĩsya vamwe ĩũlũ wa ũvoo mũseo. Nĩtũtonya kwĩĩmanyĩsya ngewa ĩũlũ wa Yesũ na maũmanyĩsyo angĩ ma ũvoo mũseo, na tũiwetanĩa ithyĩ ĩũlũ wa maũndũ ala Asa waitũ wa Ĩtunĩ na Yesũ matwĩkĩte.
-
Kũthyũmũĩa wĩa ũla tũthũkũmaa mĩthenya ĩla ĩngĩ ya kyumwa.
-
Kũvoya.
-
Kũthokea andũ ala awau na kũmatetheesya kwĩw’a nesa.
-
Kũandĩka maũndũ ala mekĩkaa mĩsyĩnĩ yitũ nĩ kana twĩthĩwe tũtonya kũmalilikana ĩtina.
Athaithi ma Ĩkanisa ya Yesũ Klĩsto nĩmaĩlĩte kwosa sakalamendi mũthenya wa kũthaitha. Nomeeyũmbanĩsye kũmyosa kwa kũsũanĩa ĩũlũ wa Yesũ na maũndũ ala weekie kwondũ witũ. Nĩmaĩlĩte kũmũkũlya Asa waitũ wa Ĩtunĩ kũmatetheesya kũmũlilikana Yesũ. Ĩla moosa sakalamendi, maĩlĩte kũlilikana mawathano matheu ala meekie. Nĩmaĩlĩte kũsũanĩa ĩũlũ wa maũndũ ala Asa waitũ wa Ĩtunĩ wamathie ethĩwa nĩmekũmwĩw’a Yesũ.
Kwĩ maũndũ maingĩ tũtaĩlĩte kwĩka mũthenya wa kũthaitha. Tũtaĩlĩte kũthũkũma. Tũtaĩlĩte kũtuma andũ ma mĩsyĩ yaitũ, athũkũmi, kana nyamũ kũthũkũma. Tũyaĩlĩte kũsoma syĩndũ, kũsisya televiseni, kana kwĩĩthukĩĩsya mbathi ila itonya kũtuma tũtasũanĩa ĩũlũ wa Asa waitũ wa Ĩtunĩ na Yesũ. Tutaĩlĩte kũthi mathaũnĩ. Tũyaĩlĩte kũthooa kana kũthoosya syĩndũ. Maũndũ aa nĩmatonya kwoneka ta ma vata, ĩndĩ maitũtetheeasya kũsũanĩa ĩũlũ wa Asa waitũ wa Ĩtunĩ na Yesũ mũthenya ũũ mũtheu.
Nokwĩthĩwe na mavinda ala tũtonya kũthũkũma mũthenya ũla wa ũthaithi, ĩndĩ nĩtwaĩlĩte kũtata tũikathũkũme. Yĩla weethĩa kũthũkũma nĩkwavata vyũ, nĩtwaĩlĩte kũtata kũsũanĩa ĩũlũ wa Asa waitũ wa Ĩtunĩ na Yesũ tũendeee na kũthũkũma.
Ũneenan’ya
-
Twaĩlĩte kwĩka ata mũthenyanĩ wa Mwĩaĩi?
-
Nĩ kyaũ tũtaĩlĩte kwĩka mũthenyanĩ wa kũthaitha?
Asa Waitũ wa Ĩtunĩ Nũtũathimaa Kwondũ wa Kwia Mũthenya wa Mwĩaĩi Wĩ Mũtheu
Vata wa mũthenya wa ũthaithi wĩthĩawa ũmwe kĩla ĩvinda. Nĩ mũthenya wa kũthyũmũa kumana na wĩa ũla tũthũkũmaa kĩla mũthenya. Nĩ mũthenya wa kwĩĩmanyĩsya ĩũlũ wa Asa waitũ wa Ĩtunĩ na kwĩĩyũmbanĩsya thayũ wa kwĩkala Nake. Nĩ mũthenya wa kwaĩlya thayũ witũ kwa kwĩĩmanyĩsya mũno ĩũlũ wa ũndũ Asa waitũ wa Ĩtunĩ wendaa ithyĩ twĩke.
Mũthenya ũũ nĩ mũseo kwitũ. Ũtũtetheeasya kũlilikana Asa waitũ wa Ĩtunĩ na kĩtumi kĩla twĩ vaa ĩũlũ wa nthĩ. Yĩla tweeka maũndũ ala Asa waitũ wa Ĩtunĩ ũkwenda twĩke mũthenya wa Mwĩaĩi, nĩtũkwataa maũathimo. Mĩsyĩ yaitũ nĩyĩthĩawa na ũtanu. Mĩĩ yaitũ nĩthũmũaw’a. Nĩtũthengeeaa vakuvĩ na Asa waitũ wa Ĩtunĩ na maũmanyĩsyo Make. Tũkeethĩwa tũtonya kwĩw’a vinya wa Veva Mũtheu kwa ũlũmu mũno kyumwa kĩu. Nũndũ nĩtwĩthĩĩtwe twĩ ewi, Asa waitũ wa Ĩtunĩ akatũtetheesya kũkwata lĩu, ngũa, na syĩndũ ingĩ ila tũkwenda. Akatũtetheesya kũmanya mũno ĩũlũ Wake na kwĩthĩwa twĩ atanu.
Ũneenan’ya
-
Nĩ itumi imwe ta syĩva itumaa twia mũthenya wa ũthaithi wĩ mũthenya mũtheu?