Ndeto sya Kũmanya

Ũthembi wa Aluni:Ũthembi ũla mũnini kwa maũthembi elĩ ala Asa waitũ wa Ĩtunĩ wanenganie kwĩ aũme ĩũlũ wa nthĩ wa kũthũkũma ĩsyĩtwanĩ Yake kwa ũtangĩĩo wa syana Syake. Ũthembi ũũ mũnini wakwatie ĩsyĩtwa yaw’o kuma kwa Aluni, mwana-a-inyia wa Mose, na wĩkĩvathũkan’yo na ũla mũnene kana Ũthembi wa Melikiseteki. Ũthembi wa Aluni wĩthĩawa na maovisi ma ndikoni, mũmanyĩsya, mũthembi na mũsyaĩĩsya.

Kũtia Ũw’o:(1) Nĩ kwĩthĩwa wĩvetangĩte kĩveva kwa Asa waitũ wa Ĩtunĩ. (2) Nĩ ĩvinda yĩla maũmanyĩsyo ma Asa waitũ wa Ĩtunĩ mataĩ ĩũlũ wa nthĩ na ũthembi Wake ũtaĩ ĩũlũ wa nthĩ.

Mũtũmwa:Nĩ ovisi nthĩnĩ wa Ũthembi wa Melikiseteki. Atũmwa nĩ ngũsĩ syĩmwanya sya Yesũ Klĩsto nthĩnĩ wa nthĩ yonthe.

Wĩw’anĩthyo:Ndĩvi ya Yesũ, kwa kũthĩna na kũkw’a, kwondũ wa naĩ sya andũ onthe ĩla ĩmetĩkĩlasya kũthaw’a kuma mathĩnanĩ ma kĩkw’ũ kya kĩmwĩĩ na kya kĩveva ala maetiwe nĩ ĩvĩtyo ya Atamu na kũtaanĩsya kwa mũndũ na Asa waitũ wa Ĩtunĩ.

Ũvatiso:Nĩ ũtw’ĩo wa vata wa ũvoo mũseo vala mũndũ ũtianĩaa na Asa waitũ wa Ĩtunĩ kũmwĩw’a na Asa waitũ wa Ĩtunĩ aimwatha kũmũekea na kũmũthesya ũmũndũ kuma naĩnĩ na kũmwĩtĩkĩlya kũtw’ĩka mũmemba wa Ĩkanisa Yake. Ũtw’ĩo ũũ wonanasya kũsyawa ĩngĩ kwa kũthikwa nthĩnĩ wa kĩw’ũ na kũkĩlw’a ĩũlũ ĩngĩ thayũnĩ mweũ. Ũtw’ĩo ũũ wĩkawa nĩ ala metĩkĩlĩtw’e kũkwata ũthembi na kũthũkũma vandũ va Asa waitũ wa Ĩtunĩ.

Ũvatiso kwa akw’ũ:Ũvatiso nthĩnĩ wa ĩkalũ ya Asa waitũ wa Ĩtunĩ ũla wĩkawa nĩ mũndũ ũla wĩthayũ vandũ va mũndũ ũla mũkw’ũ.

Kũvatisa:Kũthika mũndũ nthĩnĩ kĩw’ũnĩ na kũmũkĩlya mũndũ ũsu kuma kĩw’ũnĩ ekale thayũ mweũ. Sisya Ũvatiso.

Mũsyaĩĩsya:Nĩ ovisi nthĩnĩ wa Ũthembi wa Aluni ũla ũnengae mũndũũme ũkũmũ wa ũtethyo wa kĩveva na kĩmwĩĩ kwa kĩkundi kya athaithi ma Ĩkanisa.

Ĩvuku ya Momoni:Nĩ ĩvuku ya maandĩko matheu yĩthĩawa na maũmanyĩsyo ma Asa waitũ wa Ĩtunĩ kwa andũ ala mekalaa ĩlembetanĩ ya Amelika.

Ũvonge:Nĩ ũtũmĩi wa ngelekan’yo wa mũthamba wa mũtĩ kwa kũũngamĩa ũaan’yo mũnini kana kĩlungu kyũmban’ye kya mũsyĩ ũla mũnene wa Ĩkanisa. Ũaan’yo ũatĩanĩe na mĩvaka nthĩnĩ wa vala athaithi mekalaa na kũkomana vamwe ungu wa silikalĩ ya athũkũmi etĩkĩlye ma Asa waitũ wa Ĩtunĩ.

Ũsumbĩ wa Selesitio:Ũsumbĩ ũla ala alũngalu mekalaa wĩthĩonĩ wa Asa waitũ wa Ĩtunĩ na kũkwata ũtiĩwa wa kyonthe wĩnakyo.

Ĩkanisa:Sisya Ĩkanisa ya Yesũ Klĩsto ya Atheu ma Mĩthenya ya Mũminũkĩlyo.

Maũtianĩo:Mawatho matheu mekawa katĩ katĩ wa Asa waitũ wa Ĩtunĩ na mũndũ.

Ndikoni:Ovisi wa mbee nthĩnĩ wa Ũthembi wa Aluni ũla ũtonya kũnenganwe kwa athaithi aĩlu ma aũme ma Ĩkanisa kwambĩlĩlya Mweinĩ wa Mbee wa mwaka ũla meanĩsya myaka 12. Ũmanengae ũkũmũ wa kwĩka mawĩa amwe ma kĩmwĩĩ.

Kĩvalo:Kĩsio kana kĩlungu kĩla kĩaanĩtw’e mbeange nthĩnĩ wa mbonge ungu wa miseni ya Ĩkanisa. Kĩũngamĩwe nĩ mũtongoi na atai make elĩ.

Ũmanyĩsyo na Maũtianĩo:Ĩvuku ya maandĩko matheu yĩla yĩna ndeto sya Asa waitũ wa Ĩtunĩ kwa andũ ma mavinda aa.

Mũtumĩa:Ovisi wa mbee nthĩnĩ wa Ũthembi wa Melikiseteki ũnengawe aũme aĩlu ala mena ũkũũ wa myaka 18. kana akũangu. Ũmanengae ũkũmũ wa kwĩka maũtw’ĩo amwe, ala nĩ maũathimo nthĩnĩ wa mathayũ ma andũ angĩ.

Ũvwĩko:Maũathimo ala manenganawe nĩ Asa waitũ wa Ĩtunĩ nthĩnĩ wa makalũ na nĩ mavata kwa kũkwata ũnenevyo.

Asa wa Tene na Tene:Ĩsyĩtwa yĩngĩ tũnengae Asa waitũ wa Ĩtunĩ.

Thayũ wa tene na tene:Ũũ ndwonanasya kwĩkala tene na tene kw’oka ĩndĩ oĩngĩ kwĩkala thayũ ũilyĩ ũla Asa waitũ wa Ĩtunĩ wĩkalaa na kwĩkala Take. Noũndũ ũmwe na ũnenevyo.

Mũtwaano wa tene na tene:Mũtwaano ũla ũminĩte kũsiĩlwa nthĩnĩ wa ĩkalũ na ũtĩendeea tene na tene ĩtina wa kũkw’a ethĩwa twĩ aĩlu kwĩkala na Asa waitũ wa Ĩtunĩ.

Ũnenevyo:Thayũ nthĩnĩ wa ĩũlũ vyũ wa ũsumbĩ wa selesitio. Ala makwataa ũnenevyo mekalaa ta Asa waitũ wa Ĩtunĩ.

Kũvalũka kwa Atamu:Ũalyũko ũla wookie kwa Atamu na Eva nũndũ wa kũya ĩtunda yĩla yaĩ ĩvatane. Asa waitũ wa Ĩtunĩ nĩwamaumisye kuma wĩthĩonĩ Wake, na meethĩwa matonya kũkw’a. Ũũ vethĩwa vatonyeka kwa andũ onthe kũsyawa na kũkw’a.

Kĩvoyo kya mũsyĩ kya wĩoo:Nĩ wũmbano wa mũsyĩ, mũno mũno kĩla wakwambĩlĩlya wĩoo, vala andũ ma mũsyĩ mainaa, kũsoma ũvoo mũseo, maineenan’ya ĩũlũ wa mathĩna ala menamo, kũthaũka mathaũ, na kwĩka maũndũ angĩ ta mũsyĩ.

Nthembo ya kũtĩĩa kũya:Umya wa mbesa ila isũvĩiwe kwa kũtĩĩa kũya lĩu kelĩ kiatĩanĩsyo mũthenya ũmwe. Inenganawe Ĩkanisanĩ kũtethya ngya.

Asa wa Ĩtunĩ:Nĩ mũndũ mũlũngalu ũla ũilyĩ ta mũndũ ũtonya kũkw’a ĩndĩ ena mwĩĩ mũthayũũku wa nyama na mavĩndĩ. Nĩ Asa wa maveva maitũ, ũla tũvoyaa. E ũtonyi wo’nthe na emwĩĩ ũtakw’a. Nũtwendete nũndũ twĩ syana Syake. Oĩngĩ tũmwĩtaa Asa wa Ĩtunĩ.

Mũthĩnzĩo wa Veva Mũtheu:Ũw’o wa kwĩthĩwa na welekelyo wa Veva Mũtheu kĩla ĩvinda. Mũthĩnzĩo ũũ ũnenganawe ĩtina wa ũvatiso.

Ngai:Mwene ũtonyi w’onthe na mũsumbĩ wa ĩtu na nthĩ. Ĩsyĩtwa Ngai kaingĩ ĩwetaa Asa waitũ wa Ĩtunĩ, ĩndĩ mavinda angĩ nthĩnĩ wa maandĩko matheu ĩwetaa Yesũ.

Ũvoo Mũseo:Maũmanyĩsyo ma Yesũ Klĩsto, ala, maatĩwa, nĩmetĩkĩlasya mũndũ kũsyoka kwĩkala na Asa waitũ wa Ĩtunĩ.

Ĩtu:Vandũ vala Asa waitũ wa Ĩtunĩ wĩkalaa. Mavinda amwe vonanasya ta vandũ vala maveva maitũ mekalaa mbee wa kũka kũũ nthĩ, na vala makathi ĩtina wa kũkw’a (nthĩ ya maveva). Oĩngĩ ĩsyĩtwa ya vandũ vala ala alũngalu makekala tene na tene ĩtina wa ũthayũũkyo (ũsumbĩnĩ wa selesitio).

Asa wa Ĩtunĩ:Sisya Asa ũla wĩ Ĩtunĩ.

Mũthembi Mũnene:Nĩ ovisi nthĩnĩ wa Ũthembi wa Melikiseteki ũla waĩlĩte kwa kwĩka maũndũ ma kĩveva.

Veva Mũtheu:Mũndũ wa veva ũla ũtethĩawa na mwĩĩ wa nyama na mavĩndĩ, wĩa wake nĩ kũkũsĩĩa kĩla Asa waitũ wa Ĩtunĩ na Yesũ mawetaa na kwĩka. Yĩla tũkwasya kana Veva wa Asa waitũ wa Ĩtunĩ wĩnaitũ, twĩthĩawa tũiweta Veva Mũtheu.

Nyũmba ya Isilaeli:Oũmwe wa nzyawa sya kũsyawa kana kwoswa ma ana ĩkũmi na elĩ ma Yakovo, ũla ĩsyĩtwa yake yavĩndũĩwe eetwa Isilaeli (sisya Mwambĩlĩlyo 32:28).

Yesũ Klĩsto:Ũla mũkũũ wa syana sya kĩveva sya Asa waitũ wa Ĩtunĩ, Mũmbi wa nthĩ, na Mũtangĩĩi na Mwovosya waitũ. Ookie kũũ nthĩ kũĩva naĩ sitũ ithyonthe. (Sisya ilungu ta ii 3, 11, na 12.)

Mbungũo sya Ũthembi:Wĩtĩkĩlyo wa kũnengane ũkũmũ wa kwĩka maũtw’ĩo ma ũthembi.

Mwĩao wa mwĩkalĩle mũtheu:Mwĩao wa Asa waitũ wa Ĩtunĩ kana mũndũ amanyanaa kĩmwĩĩ na ũla matwaanĩte eweka.

Mwĩaĩi:Ĩsyĩtwa ya Ngai. Mavinda amwe ĩwetaa Asa waitũ wa Ĩtunĩ na mavinda angĩ ĩwetaa Yesũ Klĩsto.

Ũthembi wa Melikiseteki:Ũthembi ũla mũnene wa maũthembi elĩ, ũla wĩthĩawa na maovisi ma mũtumĩa, mũthembi mũnene, ĩthe wa kyambo, Mũ-mĩongo Mũonza, na Mũtũmwa.

Myaka Ngili:Myaka ngili ya mũuo ĩla ĩkambĩlĩlya yĩla Yesũ ũkoka kũũ ĩngĩ nthĩnĩ wa kũla tũkwĩtaa ta Kũka kwa Kelĩ.

Athũkũmi ana-a-asa:Aũme manengetwe wĩto wa kũsisya mavata ma kĩveva na ma kĩmwĩĩ ma athaithi ma wooti syoo. Wĩto ũũ ũnengawe aũme onthe nthĩnĩ wa Ĩkanisa. Manengawe wĩa ũsu kwa ngwatanĩo kũthũkũma andũ ene na mĩsyĩ mĩna.

Athũkũmi eĩtu-a-asa:Aka manengetwe wĩto wa kũsisya mavata ma kĩveva na ma kĩmwĩĩ ma athaithi ma wooti syoo. Wĩto ũũ ũnengawe aka onthe nthĩnĩ wa Ĩkanisa. Manengawe wĩa ũsu kwa ngwatanĩo kũthũkũma aka angĩ.

Miseni:(1) Kĩsio kya nthĩ vala Ĩkanisa nĩyĩendeee na kũthũkũma wĩa wa ũmiseni kana nĩvangĩte kwĩka ũu. Nĩkĩaanĩtw’e nthĩnĩ wa isio nini syĩtawa ivalo. (2) Wĩto wa ndongoi ya Ĩkanisa wa kũtavan’ya ũvoo mũseo nĩkana ũthũkũme kwa ĩvinda ĩtale.

Yelusaleme Nzaũ:Mũsyĩ ũla ũkakw’a nthĩnĩ wa Missouri, nthĩ ya Amelika, vakuvĩ na mwambĩlĩlyo wa Myaka Ngili. Yesũ akatongosya silikalĩ Yake, ũsumbĩ wa Asa waitũ wa Ĩtunĩ ĩũlũ wa nthĩ, kuma vandũ vaa ĩvindanĩ ya Myaka Ngili.

Ovisi:Kĩũngamo kya ũkũmũ nthĩnĩ wa ũthembi. (Sisya Ndikoni, Mũmanyĩsya, Mũthembi, na angĩ.)

Kũtw’ĩĩa:Kũnenga mũndũũme mũlũngalu ovisi nthĩnĩ wa ũthembi kwa kũmwilĩĩla moko.

Ũtw’ĩo:Wĩko kana kyathĩ kĩkawa kwĩsĩla ũkũmũ wa ũthembi.

Nza kĩvindunĩ:Vandũ vala Satani na ala manyuvie kũmũatĩĩa makekala. Ala makekala vau maikatanĩa ũtethyo wa Veva Mũtheu na kwoou makeethĩwa matena kyeni na ũw’o.

Ũseonĩ:Kĩlungu kya nthĩ ya maveva vala maveva ma ala alũngalu mekalaa.

Asa wa Kyambo:Nĩ ovisi wa nthĩnĩ wa Ũthembi wa Melikiseteki ũnengawe ũmwe ũla wĩthĩĩtwe e mũthembi mũnene, ũla ĩtina wa kũtw’ĩĩwa ovisi wa ĩthe wa kyambo ũnenganae maũathimo memwanya, metawa maũathimo ma ĩthe wa kyambo, kwa athaithi aĩlu ma Ĩkanisa.

Lũlũ wa Thooa Mũnene:Ĩvuku ya maandĩko matheu yĩna maandĩko ma Mose, Avalaamu, na Joseph Smith. Ĩsyĩtwa yĩu kwa ũw’o nũndũ ũmwe na ĩvia ya vata mũno, now’o ĩvuku yosawa nĩ athaithi ma Ĩkanisa.

Kĩkw’ũ kya kĩmwĩĩ:Kĩkw’ũ kĩla twĩthĩawa na kyo yĩla mĩĩ yitũ yavathũkanw’a na maveva maitũ.

Mũthembi:Ovisi nthĩnĩ wa Ũthembi wa Aluni ũla ũtonya kũnenganwe kwa athaithi aĩlu ma aũme ma Ĩkanisa kwambĩlĩlya Mweinĩ wa Mbee wa mwaka ũla meanĩĩsya myaka 16. Ovisi ũũ ũmanengae ũkũmũ wa kwĩka maũvatiso na maũtw’ĩo ma ũthembi wa Aluni, kũathima sakalamendi, na kwĩka mawĩa angĩ.

Ũthembi:Ũkũmũ ũla Asa waitũ wa Ĩtunĩ ũnengae aũme kwĩka wĩa Wake na kũmũneenea. Ũaanĩtw’e kelĩ, ũla mũnene kana Ũthembi wa Melikiseteki na ũla mũnini kana Ũthembi wa Aluni.

Wathani:Ndeto mbeveeye sya mwathani, mũno ĩũlũ wa maũndũ mokĩte.

Mwathani:Mũndũũme wĩtĩtwe nĩ Asa waitũ wa Ĩtunĩ ũla ũneenaa Nake na aineena vandũ Vake.

Nguthu:Kĩkundi kyũmban’ye kya aũme na anake ala mena ovisi ũmwe nthĩnĩ wa Ũthembi. Kĩla nguthu nĩyĩũngamĩawa nĩ mũtongoi na atai elĩ.

Ũalyũlo wa Ngoo:Ũatĩĩi ũla mũndũ ũla wĩkĩte naĩ nomũvaka aatĩĩe nĩkana aekewe. (Sisya kĩlungu kya 14.)

Ũthayũũkyo:Kũsyokeanĩa vamwe kwa mwĩĩ na veva, ĩtina wa kũkw’a, kũseũvya mwĩĩ ũtakw’a.

Ũvuan’yo:Ũmanyi ũnenganawe nĩ Asa waitũ wa Ĩtunĩ kwa mũndũũme, mũno mũno kwĩsĩla ũveveeo wa Veva Mũtheu, ũla ũtonya kũweta maũndũ mavĩtũku, mevo, kana mokĩte.

Mũthenya wa Savato:Mũthenya wa kũthyũmũa watengiwe nĩ Yesũ ta mũthenya wa kũthaitha Asa waitũ wa Ĩtunĩ na kũthũkũma angĩ. Nĩ wiawa Wakyumwa nthĩnĩ wa kũndũ kwingĩ ĩũlũ wa nthĩ.

Sakalamendi:Nĩ ũtw’ĩo ũla athaithi ma Ĩkanisa mosaa mũkate na kĩw’ũ itĩũngamĩa mwĩĩ na nthakame ya Yesũ kũtũlilikan’ya Wĩw’anĩthyo kwondũ wa naĩ sitũ.

Kũthemba:(1) Tene, kũwaa nyamũ kwa kwĩw’a mĩao ya Asa waitũ wa Ĩtunĩ. (2) Ũmũnthĩ, nĩ kũnengane kĩndũ kĩla kya vata kwitũ, ta ĩvinda yitũ na syĩndũ, kũtethya angĩ.

Mũtheu:Ndeto ĩtũmĩawa kũmanyĩthan’ya mũmemba wa Ĩkanisa yaw’o ya Yesũ.

Mũtangĩĩi:Ũmwe ũla ũtangĩĩaa ũngĩ kuma kĩndũnĩ kĩmũũmĩsya. Yesũ nĩ Mũtangĩĩi waitũ nũndũ nĩwatũtangĩĩie kuma kĩkw’ũnĩ kya mwĩĩ na kĩkw’ũ kya kĩveva.

Ũsiĩlo:Nĩ ũtw’ĩo wĩkawa nthĩnĩ wa ĩkalũ ũla tene na tene ũkwatanasya mũũme na mũka, kana syana na asyai masyo.

Kũka kwa Kelĩ:Kũsyoka kwa Mũtangĩĩi waitũ, Yesũ Klĩsto, kwambĩlĩlya Myaka Ngili, kana ĩvinda ya myaka ngili ya mũuo.

Mwoni:Ũmwe ũla ũtonya kwona maũndũ mokĩte nũndũ nĩwonetw’e nĩ Asa waitũ wa Ĩtunĩ. Mwoni noũndũ ũmwe na mwathani.

Mũ-mĩongo mũonza:Nĩ ovisi nthĩnĩ wa Ũthembi wa Melikiseteki. Mũndũũme wĩna ovisi ũũ nĩ ngũsĩ yĩmwanya ya Yesũ Klĩsto na atetheeasya Atũmwa kũũngamĩa Ĩkanisa.

Thayũ:Noũndũ ũmwe na mũndũ (mwĩĩ na veva vamwe). Onakau, mavinda amwe, ndeto ĩno nĩtũmĩawa kũweta veva wa mũndũ.

Veva:Kĩla kĩnengae mwĩĩ thayũ. Nĩ kĩlungu kya mwĩĩ kĩla kyaĩvo mbee wa thayũ ũũ na kĩla ũendeeaa na kwĩkala ĩtina wa twakw’a. Veva ũkasyokeanĩa na mwĩĩ ũthayũũkyonĩ, itĩkataanĩw’a ĩngĩ.

Kolokolo wa maveva:Kĩlungu kya nthĩ ya maveva vala maveva ma andũ ma mĩthemba ĩtatũ maendaa ĩtina wa kũkw’a: ala maĩ avuku nthĩnĩ wa thayũ ũũ, ala mekalaa mathayũ maseo ĩndĩ mayaa ĩtĩkĩla kana kwĩka kwĩanana na ũvoo mũseo, na ala mataaĩthĩwa na ĩvuso ya kwĩw’a ũvoo mũseo. Mũminũkĩlyonĩ andũ asu onthe makathayũũkw’a.

Nthĩ ya maveva:Vandũ vala maveva ma andũ onthe maendaa ĩtina wa kũkw’a kũvikĩĩa ũthayũũkyo.

Kĩkw’ũ kya kĩveva :Kwĩthĩwa twĩataanĩsye na Asa waitũ wa Ĩtunĩ.

Kyambo:Athaithi nthĩnĩ wa kĩsio kĩna kya mũvaka wa nthĩ vala Ĩkanisa yĩanu vyũ na kũũngamĩwa nĩ ndongoi sya ũthembi mboloote. Nĩkĩaanĩtw’e nthĩnĩ wa tũlungu tũnini twĩtawa wooti na mbonge.

Mũmanyĩsya:Ovisi nthĩnĩ wa Ũthembi wa Aluni ũla ũtonya kũnenganwe kwa athaithi aĩlu ma aũme ma Ĩkanisa kwambĩlĩlya Mweinĩ wa Mbee wa mwaka ũla meanĩsya myaka 14. Ĩsyĩtwa yumanĩte na ũmwe wa wĩa wa ovisi ũũ, ũla nĩ kũmanyĩsya athaithi ma Ĩkanisa.

Ũsumbĩ wa Telesitio:Ũsumbĩ wa nthĩ vyũ katĩ wa maũsumbĩ atatũ ma ũtheu vala andũ makekala ĩtina wa ũthayũũkyo. Ũsumbĩ ũũ wiĩtwe kwondũ wa akengani, oaani, ala moyaa, na andũ angĩ avuku.

Ĩkalũ:Mwako mũtheu, mũno mũno wĩtawa nyũmba ya mwĩaĩi, vala maũtw’ĩo matheu mekĩawa, vamwe na ũtw’ĩo wa mũtwaano wa tene na tene.

Wĩtĩkĩlyo wa ĩkalũnĩ:Ĩthangũ yĩkĩe saii yĩla yĩtĩkĩlasya mũndũ kũlika nthĩnĩ wa ĩkalũ ona yĩva ya Ĩkanisa. Kũkwata ĩthangũ yĩĩ, mũndũ nomũvaka ethĩwe emũmemba mũlũngalu wa ĩkanisa. Wĩtĩkĩlyo ũũ nĩwĩkĩawa saii nĩ ndongoi sya ũthembi ila syaĩlĩte, ala makũsĩĩaa waĩlu wa ũmũndũ.

Mbaĩ ĩkũmi:Nzyawa ĩkũmi sya ana ĩkũmi na elĩ ma Isilaeli (Yakovo) ala moosiwe ũkombo na ala kĩsio wĩkalo woo nĩwaaie ũmanyinĩ wa andũ.

Ũsumbĩ wa Tĩlesĩtio:Ũsumbĩ wa ũtheu ũla kĩwango kyaw’o kĩ ĩtheo wa ũsumbĩ wa selesitio ĩndĩ ĩũlũ wa ũla ũsumbĩ wa telesitio. Wiĩtwe kwondũ wa andũ ala aseo ma nthĩ ala mataaĩka w’onthe ũla Asa waitũ wa Ĩtunĩ wendaa meke.

Ĩkanisa ya Yesũ Klĩsto ya Atheu ma Mĩthenya ya Mũminũkĩlyo:Ĩsyĩtwa yĩtĩkĩlye ya Ĩkanisa ya Yesũ Klĩsto, yĩla watũngĩĩie kwĩsĩla kwa mwathani Joseph Smith ĩvindanĩ yĩĩ yitũ. Ĩkanisa yĩĩ mavinda angĩ yĩtawa na ĩsyĩtwa ya kũiĩwa ya Ĩkanisa ya Momoni.

Kĩlungu kya Ĩkũmi:Ĩmwe ĩũlũ wa ĩkũmi kya kyonthe kĩla tũkwataa, kĩla kĩnenganawe kwa Ĩkanisa.

Wooti:Kĩkundi kya athaithi ma Ĩkanisa mombanĩtw’e nthĩnĩ wa kyambo, ala matongoew’e nĩ Mũsyaĩĩsya na atai make elĩ.

Ndeto ya Ũĩ:Mwĩao kuma kwa Asa waitũ wa Ĩtunĩ ũla ũtũtavasya kĩla twaĩlĩte kũya kana tũtaĩlĩte kũya kana kũnywa. Wasyaa mũno, mũno kana tũyaĩlĩte kũtũmĩa ũkĩ, mbakĩ, maianĩ, na kaawa. (Sisya kĩlungu kya 27.)

Saioni:Ĩsyĩtwa yĩngĩ ya Yelusaleme Nzaũ, mũsyĩ ũla Yesũ ũkasumbĩkĩa nthĩ ĩvindanĩ ya Myaka Ngili.