Kĩlungu kya 8
Kũneena na Asa wa Ĩtunĩ
Asa waitũ wa Ĩtunĩ nũtwendete mũno. Nũtũseũvĩsye nzĩa ya kũneena Nake yĩla twenda. Tũtonya kũneena na Asa waitũ wa ĩtunĩ ata?
Nĩtũtonya Kũneena na Asa Waitũ wa Ĩtunĩ
Kũneena na Asa waitũ wa Ĩtunĩ kwĩtawa kũvoya. Ona kwĩthĩwa Asa waitũ wa Ĩtunĩ ekalaa ĩtunĩ, nĩtũtonya kũneena Nake, na nũtwĩĩthukĩĩasya. Nũkwenda kũtũtetheesya. Nũtũkũlĩtye tũneene Nake. Yĩla twaneena Nake, Nũkatũtetheesya kwĩka maũndũ ala maseo.
Nĩtũtonya kũmũtavya Asa waitũ wa Ĩtunĩ maũndũ ala tũũsũanĩa. Nĩtũtonya kũmwĩa nĩtũmwendete. Nĩtũtonya Kũmwĩa twĩna mũvea kwondũ wa syĩndũ ila Ũtũnengete. Nĩtũtonya Kũmũkũlya atũtetheesye.
Nĩtũtonya kũneena na Asa waitũ wa Ĩtunĩ mavinda onthe yĩla twenda kũneena Nake. Nĩtwaĩlĩte kũneena Nake yĩla twĩithyoka. Yĩla twĩithyoka nĩtũtonya kũneena Nake ĩũlũ wa mĩw’ĩle yaitũ ene na mathĩna. Nĩtwaĩlĩte kũneena Nake vatonyeka kĩla kwakya na kĩla wĩoo.
Nĩtwaĩlĩte kũneena Nake vamwe na mũsyĩ witũ. Nĩtũtonya kwĩka ũũ kĩla kwakya na wĩoo. Ĩngĩ nĩtũtonya kwĩka ũũ mbee wa kũya lĩu yĩla tũũmũtũngĩa mũvea kwa lĩu witũ.
Asa waitũ wa Ĩtunĩ ndakaeka kwenda tũneene Nake ona ĩndĩĩ. Ĩvinda yonthe nũkatwendaa na kwenda kũtũtetheesya. Ona yĩla tweeka maũndũ matemaseo, no ũtwendaa. Nũkũtwĩĩthukĩĩsya na kũtũtetheesya.
Ũneenan’ya
-
Nĩkĩ twaĩlĩte kũneena na Asa waitũ wa Ĩtunĩ?
-
Twaĩlĩte kũneena Nake ĩndĩĩ?
Nĩtwaĩlĩte kũvoyaa ithyĩ ene na ta mĩsyĩ kwakya na wĩoo.
Asa waitũ wa Ĩtunĩ Nũtũtavĩtye Ũndũ Twaĩlĩte Kũneena Nake
Yĩla tũũvoya, nĩtwaĩlĩte kũmũtavya Asa waitũ wa Ĩtunĩ maũndũ ala tũkwĩw’a kwaw’o na ala tũkwenda. Tũtaĩlĩte kũneena o ndeto imwe kĩla ĩvinda tũũneena Nake. Tũyaĩlĩte kũsyokea ilungu kana kũneena na wasya mũtũlu.
Nũtũtavĩtye nzĩa ya kũneena Nake. Nĩtwaĩlĩte kũneena ĩmwe kwa ĩmwe kũla Ũĩ, tũyasya: “Asa waitũ wa Ĩtunĩ,” kana ndeto siilye ta isu. Nĩtwaĩlĩte kũneena Nake kwa wendo na ndaĩa.
Kĩngĩ, nĩtwaĩlĩte kũmũtũngĩa mũvea kwa maũndũ ala ũtwĩkĩte.
Ii nĩsyo syĩndũ imwe ila twaĩlĩte Kũmũtũngĩa mũvea:
-
Nĩtwaĩlĩte kũmũtũngĩa mũvea kwondũ wa nthĩ mbanake na kwa lĩu witũ, ngũa, na syĩndũ ingĩ twĩnasyo.
-
Nĩtwaĩlĩte kũmũtũngĩa mũvea kwondũ wa maũmanyĩsyo Make na kwa ũtonyi witũ wa kwĩĩmanyĩsya mũno ĩũlũ Wake.
-
Nĩtwaĩlĩte kũmũtũngĩa mũvea kwondũ wa mũsyĩ witũ na anyanyae maitũ, ũima witũ wa mwĩĩ, na wĩa witũ.
Na ĩndĩ tũimũkũlya syĩndũ ila tũkwenda. Aa nĩ maũndũ amwe ala tũtonya kwenda kũkũlya kũla Ũĩ:
-
Nĩtũtonya Kũmũkũlya atũtetheesye kũmanya nĩ maũndũ meva ala ma w’o na ala mate ma w’o.
-
Nĩtũtonya kũmũkũlya atũsũvĩe ithyĩ na mũsyĩ witũ na atũi.
-
Nĩtũtonya kũmũkũlya atũtetheesye kwĩka maũndũ ala Wendaa twĩke.
-
Nĩtũtonya kũmũkũlya atũtetheesye kũnyuva kwĩka maũndũ ala maĩlĩte.
-
Nĩtũtonya kũmũkũlya atũtetheesye kũalyũla ngoo kwondũ wa naĩ sitũ.
-
Nĩtũtonya kũmũkũlya atũtetheesye kũkwata lĩu mwĩanu wa mũthenya.
-
Nĩtũtonya kũmũkũlya atũtetheesye kũmina mathĩna maitũ.
-
Nĩtũtonya kũmũkũlya kũtetheesya mũsyĩ witũ kana anyanyae kũmina mathĩna ona meva ala menamo.
Twaĩlĩte kũmina mboya yaitũ kwa kwasya, “Ĩsyĩtwanĩ ya Yesũ Klĩsto, ameni.” Kĩĩ kĩtũtetheeasya kũlilikana kana Yesũ nĩwe Mũtangĩĩi waitũ. Yesũ athũkũmaa ungu wa welekelyo wa Asa waitũ wa Ĩtunĩ kũtũtetheesya na syĩndũ syonthe ila tũkwenda. Twaĩlĩte kũwetaa ĩsyĩtwa ya Yesũ kwa ndaĩa.
Ũneenan’ya
-
Yĩla tũũneena na Asa waitũ wa Ĩtunĩ, twambĩlĩlasya ata?
-
Nĩ maũndũ ta meva amwe ala tũtonya Kũmũtũngĩa mũvea kwondũ wamo?
-
Nĩ maũndũ amwe ta meva ala tũtonya Kũmũkũlya?
-
Twaasya ata yĩla twamina kũneena na Asa waitũ wa Ĩtunĩ?
Asa Waitũ wa Ĩtunĩ Nũtũsũngĩaa Mavinda Onthe
Nĩtwaĩlĩte kũmanya kana Asa waitũ wa Ĩtunĩ nũtwĩĩthukĩĩasya. Nĩwĩsĩ syĩndũ ila nzeo kwitũ kwĩthĩwa nasyo. Mavinda onthe nĩwĩthĩawa eeyũmbanĩtye kũtũtetheesya.
Kwa mavinda Asa waitũ wa Ĩtunĩ nũsũngĩaa kwĩsĩla Vevanĩ Mũtheu. Veva Mũtheu nũtũtetheeasya kũelewa maũndũ ala twaĩlĩte kũmanya na kwĩka. Mavinda amwe Veva Mũtheu nũmũtũmĩaa mũndũ ũngĩ atũtetheesye.
Nĩtwaĩlĩte kwĩthĩwa twĩĩyũmbanĩtye kwĩtĩkĩla maũsũngĩo ala Asa waitũ wa Ĩtunĩ ũtũnengae. Nũtonya kwĩthĩwa atatũnenga syĩndũ ila twavoya. Nũtonya kwĩthĩwa atatũsũngĩa kwa nzĩa ĩla tũkwĩĩsilasya. Ĩndĩ Nĩwĩsĩ kĩla kĩseo kwitũ.
Ũneenan’ya
-
Asa waitũ wa Ĩtunĩ atũsũngĩĩaa ata?
-
Nĩkĩ ĩvinda yonthe Ũtatũnengaa syĩndũ ila twamũvoya?
Tũtw’ĩkaa Andũ Aseo kwa Kũvoya
Nĩtũtonya kwĩthĩwa tũtesĩ maũndũ ala maw’o ma kwĩka. Nĩtũtonya kwĩthĩwa na w’ia. Nĩtũtonya kwĩthĩwa tũtesĩ ũndũ wa kũmina mathĩna maitũ. Nĩtũtonya kwĩthĩwa tũtesĩ maũndũ ala maw’o na ala matemaw’o. Nĩtũtonya kwĩthĩwa twĩsĩ maũndũ ala maw’o makwĩka ĩndĩ tũkethĩwa tũtenavinya mwĩanu wa kũmeka.
Yĩla twaneena na Asa waitũ wa Ĩtunĩ kwa mavinda, nũtũtetheeasya mathĩnanĩ maitũ. Nũtũtetheeasya kũmanya na kwĩka maũndũ ala maw’o. Yĩla twamanya na kwĩka maũndũ ala maw’o, nĩtũtw’ĩkaa andũ aseango. Nĩtwĩkalaa ta Asa waitũ wa Ĩtunĩ.
Ũneenan’ya
-
Tũtw’ĩkaa andũ aseo ata kwĩsĩla kũneenan’ya na Asa waitũ wa Ĩtunĩ?