Tunungu tua Ditabuija

Mu printemps wa tshidimu tshia 1842, Muambi Joseph Smith wakatuma mukanda kudi John Wentworth, uvua mufundi wa tshibejibeji tshibikidibua ne Chicago Democrat. Mukanda ewu uvua ne mulubu wa malu a bungi a muyuki wa Ekelezia kala. Mukanda uvua ne mamanyisha 13 akula bua ditabuija dia Bansantu ba Matuku a Ndekelu. Mamanyisha â akafika ku dimanyika bu Tunungu tua Ditabuija, tudi tufidibua kuinshi eku.

Tunungu tua Ditabuija tudi dilongesha dimanyika dia Ekelezia ne tuvua tukumbajibua bu tshitupa tshia mifundu ya matuku a ndekelu. Adi mamanyisha matoka a ditabuija didi diambuluisha bidimba bua kumvua matabuija mashindama a Ekelezia ne kumvuija matabuija â kudi bakuabu. Kadi, ka’ena tshikosu tshijima tshia dilongesha dia Ekelezia to. Kupitshila ku bambi badi ne moyo, Ekelezia udi uludikibua ku dibuluila ne ngeyi ya nyuma bitungunuka.

1. Tudi tuitabuija Nzambi, Tatu wa Tshiendelela, ne Muanenda, Yezu Kilisto, ne Nyuma wa Tshijila.

2. Tudi tuitabuija ne bantu nebanyokibua bua mibi yabu nkayabu, kadi bua disambuka dia mikenji dia Adama to.

3. Tudi tuitabuija ne kupitshila ku Bupikudi bua Kilisto, bukua bantu bonsu budi mua kupandishibua, ku ditumikila dia mikenji ne milulu ya Lumu Luimpa.

4. Tudi tuitabuija ne mayisha ne milulu ya kumpala ya Lumu Luimpa bidi: diambedi, Ditabuija Mukalenga Yezu Kilisto; dibidi, Dikudimuna dia mutshima; disâtu, Ditambula ku dinyishibua bua dilekedibua dia mibi; dinâyi, Ditenteka dia bianza bua dipa dia Nyuma wa Tshijila.

5. Tudi tuitabuija ne muntu udi ne tshia kubikidibua kudi Nzambi, ku buambi, ne ku ditenteka dia bianza kudi badi ne bukôkeshi, bua kuyisha Lumu Luimpa ne kuenzeja milulu yalu.

6. Tudi tuitabuija bulongolodi bua momumua buvua mu Ekelezia wa Bangabanga, tutela, bapostolo, bambi, balami, balongeshi, batangadiki, ne bakuabu.

7. Tudi tuitabuija dipa dia miakulu, buambi, dibuluila, bimônyi, lôndopu, diandamuna dia miakulu, ne bikuabu biabungi.

8. Tudi tuitabuija ne Bibiliya udi dîyi dia Nzambi padiyi diandamunyibua bilengela; tudi kabidi tuitabuija ne Mukanda wa Molomo udi dîyi dia Nzambi.

9. Tudi tuitabuija bionsu bidi Nzambi mubuluila, bionsu bidiye ubuluila mpindiewu, ne tudi tuitabuija ne neatshiakubuluila malu a bungi manena ne a mushinga bitangila Bukalenga bua Nzambi.

10. Tudi tuitabuija disangishibua menamena dia Isalele ne dipinguluja dia Bisa Dikumi; ne Siona (Yelushalema Mupia-mupia) neashibua mu bulaba bua Amelika; ne Kilisto neakôkesha nkayenda pa buloba; ne, buloba nebupingajibua bupia-bupia ne nebupeta butumbi buabu bua mu mpaladiso.

11. Tudi tulombolola bunema bua kutendelela Nzambi wa Bukitu Bonsu bilondeshila bulombodi bua meji etu, ne tudi tulekelela bantu bonsu bunema bua momumua, batendelela munyi, penyi, anyi tshidibu basua.

12. Tudi tuitabuija kuikala bakôkedi kudi bamfumu, balombodi ba matunga, bakôkeshi, ne ba magistrat, mu ditumikila, dinemeka, ne dibandisha dia mikenji.

13. Tudi tuitabuija kuikala katuyi mashimi, kuikala balelela, banonoka, bambuluishanganyi, bena nsombelu mulenga, ne mu dienza bimpa kudi bantu bonsu; bulelela, tudi mua kuamba ne tudi tulonda didimuisha dia Paulo—Tudi tuitabuija bintu bionsu, tudi tutekemena bintu bionsu, tudi bananuka mu bintu bia bungi, ne tudi ne ditekemena dia kunanuka mu bintu bionsu. Bikalaku tshintu tshimpa, tshilengela, anyi tshia lumu luimpa, anyi tshidi ne ditumbishibua, tudi tukeba bintu ebi.