Shapita 12
Bupikudi bua Yezu Kilisto
Yezu wakakenga bikola bua mibi yetu. Bua tshinyi wakasungula bua kufua buetu?
Tatu Wetu wa mu Diûlu Wakatuma Yezu Kilisto pa Buloba bua Ikala Mupandishi Wetu
Tudi dijinga ne kuikala ne mibidi ya misunyi ne mifuba bua kulua bafuanangana ne Tatu wetu wa mu Diûlu, kadi Tatu wetu wa mu Diûlu uvua mumanya ne, netufua bonsu ne netujimija mibidi yetu bua bualu bua dibenga kutumikila dia Adama ne Eva kudi Tatu wetu wa mu Diûlu. Mu kudia tshimuma tshivua Tatu wetu wa mu Diûlu mubambila bua kabadi, biakenzeka ne bavua ne bua kufua, ne ki muvua muntu yonsu waledibua panyima pabu. Kabidi, Tatu wetu wa mu Diûlu uvua mumanya ne; bonsu buetu netuenza bubi pa buloba, ne bua bualu bua mibi yetu katuakukumbana bua kupingana kusomba nenda to. Netuikala dijinga ne diambuluisha bua kufuta tshibawu tshia mibi yetu ne bua kulua batumikidi, bua ne tudi mua kupingana kudi Tatu wetu wa mu Diûlu. Tuvua ne dijinga dia diambuluisha bua kupeta kabidi mibidi yetu ya misunyi ne mifuba panyima pa lufu. Yezu wakamba ne neatuambuluisha. Uvua ne bua kuikala Mupandishi wetu.
Tuvua dijinga ne muntu uvua kayi ne mibi to, bua kufuta bua mibi yetu. Yezu udi muntu umua uvua mua kuenza nunku. Yeya kakenza bubi to. Uvua ne bukola kumpala kua lufu, nunku uvua mua kutuambuluisha bua kupeta mibidi yetu kabidi panyima pa lufu. Uvua mutunanga bikola. Uvua mudisuile bua kukenga bua mibi yetu, nunku tudi mua kuikala basukudibua kudiye. Uvua mudisuila bua kufua buetu, nunku tudi mua kupeta moyo panyima pa Lufu. Mulambu wa Yezu buetu udi ubikidibua ne Bupikudi.
Dilejangana
-
Bua tshinyi bivua ne mushinga bua Tatu wetu wa mu Diûlu kutuma Yezu pa buloba apa?
Kukenga kua Yezu Kudi Kutuleja Mushindu Kayi Yeya ne Tatu Wetu wa mu Diûlu Batunanga
Tatu wetu wa mu Diûlu mmutunanga bikola ne wakatuma Muanenda wa Baluma, Yezu, pa buloba ne kumuanyishila bua kukenga ne kufua buetu. Yezu mmutunanga bikola ne wakakenga busâmi bunena ne lufu buetu. Yezu uvua mumanya ne kukenga nekuikala kupita bunena. Kuvua pabuipi ne kuikala kua bungi kupita kuvuaye mua kuambula. Kadi wakasua bua tuikala bakumbana bua kufuanangana ne Tatu wetu wa mu Diûlu.
Yezu wakaya ku muaba ubikidibua ne Budimi bua Getesemane. Kuakua wakatua binu ne kusambilaye Tatu wetu wa mu Diûlu bua diambuluisha. Wakalomba Tatu wetu wa mu Diûlu, bikalebi bikumbana, bua kakengeshibua to. Kadi wakamba ne naenza tshivua Tatu wetu wa mu Diûlu musua bua enza. Yezu kavua muenzejibua bua kukenga to. Wakasungula bua kukenga, bualu tshivua tshitupa tshia dilongolola dia Tatu wetu wa mu Diûlu bua tusukudibua ku mibi yetu.
Mu Getesemane, Yezu wakakenga bua mibi ya bukua bantu, bu ne ivua yenda nkayenda. Kukenga kuenda bua mibi yonsu eyi kuvua kunena kupita lumvu lua yonsu wa kutudi. Busâmi buvua bupita bungi, ne buakamuzakeja. Mashi akalopoka mu tusosu tonsu tua mubidi wenda.
Pashisha, bantu babi bakalua kumuangata ne kuya nenda kudi balombodi ba mu Yelushalema. Kuaka bakamutuila mata ne kumukumabu. Bakenza tshifulu tshia meba ne kutshielabu ku mutu wenda. Bakamuseka ne bakamunayila.
Balombodi bakambila basalayi bua kutshiamakaja Yezu. Bakamuambuisha mutshi mutshiamakana wa bujitu ku muaba uvuaye ne bua kufua. Bakamukudika ku mutshi mutshiamakana mu kumupopela misonsu mu bienza ne mu makasa bienda. Pa mutshi mutshiamakana, wakajikija kukenga tshibawu tshia dibenga kutumikila dia Adama, ne tshia mibi yetu.
Bakamushiya mukudika muabawu bua meba a bungi. Nansha muvuaye ukenga, ne nansha muvua bantu batungunuka kumunayila, uvua mupuwa ne lutulu. Ku ndekelu, wakambila Tatu wetu wa mu Diûlu ne, uvua upingaja nyuma wenda kudiye, ne wakafua.
Yezu uvua ne bukola bua kudipandisha ku lufu. Uvua mua kutungunuka kuikala ne moyo, kadi wakasungula kufua bua tuetu tuikala ne moyo kabidi ne Tatu wetu wa mu Diûlu.
Pakafua Yezu, Nyuma wenda wakumbuka mu mubidi wenda. Mu dituku disatu panyima pa lufu luenda, nyuma wenda wakapingana mu mubidi wenda, ne uvua ne moyo kabidi. Kupingana kua nyuma mu mubidi kudi kubikidibua ne dibika dia ku lufu.
Yezu wakamuenekela Bapostolo benda ne bantu bakuabu pakabikaye ku lufu. Wakaleja Bapostolo benda bibangu bishiya kudi misonsu mu bianza ne mu makasa. Bobu bakamulenga ne kumanyabu ne; ewu uvua mulombodi wabu, Yezu, mupingana ne moyo. Wakakula nabu ne kudia nabu.
Dilejangana
-
Mushindu kayi uvua Tatu wetu wa mu Diûlu muleja dinanga dienda buetu?
-
Mushindu kayi uvua Yezu muleja dinanga dienda buetu?
Mu Budimi bua Getesemane ne ku mutshi mutshiamakana, Yezu wakambula mibi ya bantu bonsu.
Yezu Wakatupepejela bua Tusukudibua ku Bubi
Amu Yezu ki uvua mua kufuta bua mibi yetu. Tudi tupeta manema onsu a mulambu wenda patudi tuitabuija ne udi ne moyo ne tulama mikenji yenda. Tudi ne bua kuikala ne dibungama bua mibi yetu. Katuena ne bua kuyenza kabidi to. Tudi ne bua kulonda malongesha a Yezu Kilisto. Nunku Tatu wetu wa mu Diûlu udi utubuikidila mibi yetu.
Dilejangana
-
Bua tshinyi udi dijinga ne Yezu bua akuambuluisha utamba mibi yeba?
-
Tshiudi ne bua kuenza ntshinyi bua ne Bupikudi bua Yezu budi mua kufuta bua mibi yeba?
Yezu wakafua pa mutshi mutshiamakana bua mibi ya bantu bonsu.
Yezu Wakatupepejela Bonsu bua Tupeta Kabidi Mibidi Yetu
Yezu wakafua mudisuila ne uvua muntu wakumpala bua kubika ku lufu. Udi muntu umua uvua ne bukola bua kudibisha ku lufu. Wakatupepejela petu bua tubika ku lufu.
Nansha bituafua, netuikala ne moyo kabidi. Patudi tufua, nyuma yetu idi yumbuka mu mibidi yetu. Kadi katshia Yezu watamba lufu, nyuma yetu ne mibidi yetu neisangishibua pamua kabidi bua kashidi. Katuakufua kabidi nansha. Etshi tshidi dipa divua Yezu mupesha yonsu udi uledibua pa buloba.
Dilejangana
-
Mushindu kayi udi Yezu mutupepejela bua tupeta kabidi mibidi yetu?
-
Nganyi wabishibua ku lufu?