Yezu wakaleja ditumikila kudi Tatuenda mu muikala mutambuishibua.
Shapita 22
Ditumikila
Tatu wetu wa mu Diûlu wakatuambila malu atudi ne bua kuenza mu mushindu wa kuikala ne disanka ne kupingana bua kusomba nenda. Mushindu kayi utudi mua kulonga malu â?
Tatu Wetu wa mu Diûlu Udi Utupesha Mikenji Bualu Mmutunanga
Tatu wetu wa mu Diûlu mmusua bua tuikala ne disanka apa pa buloba, bualu mmutunanga. Udi kabidi musua bua tupingana kudiye, bua ne tudi mua kuikala ne disanka didiye nadi. Tudi mua kuenza nunku, amu bituikala tuenza mudimu ne dikumbana didiye mutupesha bua kulua bu yeya.
Tatu wetu wa mu Diûlu mmumanya tshitudi ne bua kuenza bua kulua bu yeya. Wakatupesha mikenji idi ituambila tshidi tshimpa bua tuetu kuenza. Udi kabidi utuambila tshidi katshiyi tshimpa bua tuetu kuenza.
Mukenji yonsu udi Tatu wetu wa mu Diûlu mutupesha, udi bua bimpa bietu ne neutuambuluisha. Mikenji eyi idi mua kuikala maludiki buetu mu mioyo yetu, ne bituikala tuyitumikila, netuikala ne disanka.
Tuetu bonsu tudi babenga kutumikila mikenji ya Tatu wetu wa mu Diûlu. Bualu tudi babenga kutumikila mikenji ya Tatu wetu wa mu Diûlu, tudi benza bubi. Bualu tudi benza bubi, tudi batapuluka ne Tatu wetu wa mu Diûlu. Dinyoka dilulama bua mibi yetu didi ndia tuetu kutapuluka ne Tatu wetu wa mu Diûlu kashidi.
Kadi Tatu wetu wa mu Diûlu mmutunanga. Wakenza mushindu wa tuetu kufuta tshibawu tshia mibi yetu. Wakatuma Muanenda wa Baluma, Yezu, bua kufuta tshibawu tshia mibi yetu. Yezu wakafuta tshibawu, ne tudi mua kupingana kudi Tatu wetu wa mu Diûlu mu kuikala ne ditabuija mu Yezu. Kuikala ne ditabuija mu Yezu kudi kumvuija ne, kumueyemena ne kulua balondi benda batumikidi. Aba badi ne ditabuija mu Yezu, badi batumikila mikenji yenda. Tshitupa tshia kumpala bua kupingana kudi Tatu wetu wa mu Diûlu, tshidi kuikala ne ditabuija mu Yezu, kuidikija ne moyo mujima bua kumutumikila. Nunku, Bituatungutuka kuikala balamata Yezu, neatuambuluisha bua tuikala batumikidi ku mikenji yonsu ya Tatu wetu wa mu Diûlu, ne Tatu wetu wa mu Diûlu neatubuikidila mibi yetu.
Imua ya ku mikenji ya Yezu idi bua bidimba bionsu bia Ekelezia. Eyi idiye ufila mu mifundu ne kupitshila ku bambi. Imua mikenji udi utupeshaye pa muntu nkayenda, kupitshila ku Nyuma wa Tshijila. Bu tshilejilu, mifundu ne bambi badi batuambila ne, bidimba bionsu bia Ekelezia bidi ne bua kuambuluisha bua kuyisha lumu luimpa kudi bakuabu. Kadi Nyuma wa Tshijila neambila yonsu wa kutudi tshitudi ne bua kuenza pa muntu bua kulongesha lumu luimpa kudi bidimba bia mêku etu, balunda betu, ne bena mutumba betu. Bituikala tulonga mifundu, tuteleja mêyi a bambi, ne tulonda minunganyi ya Nyuma wa Tshijila, netumanya malu atudi ne bua kuenza diba dionsu.
Dilejangana
-
Mushindu kayi udi mikenji ya Tatu wetu wa mu Diûlu ne Yezu ileja dinanga diabu kutudi?
-
Mushindu kayi utudi mua kumanya tshivua Tatu wetu wa mu Diûlu ne Yezu batuambila bua kuenza?
Mukenji Yonsu wa Tatu Wetu wa mu Diûlu Udi ne Mushinga
Tudi ne bua kuikala ne disua dia kuenza bionsu bidi Yezu utuelela mukenji bua kuenza. Mikenji yenda yonsu idi ne mushinga, ne idi yambuluisha bua kutulongolola bua kusomba ne Tatu wetu wa mu Diûlu. Bibilia udi wakula muyuki wa muntu ubikidibua ne Nâmana. Uvua usâma bikola ne uvua musua bua muambi Elisha amôndopa. Wakashiya nzubu wenda ne wakaya ku ditunga divua Elisha musomba. Elisha wakatuma mutumibua bua ambila Nâmana bua adiowesha mâyi misangu muandamuteketa mu musulu ubikidibua ne Yadene, ne neôdapibua.
Nâmana wakadi ne tshiji pakambidibuaye bua kuenza nunku. Wakadikonka bua tshinyi uvua ne bua kuya ku Musulu wa Yadene, pina apu kuikala misulu minena ya bungi muaba uvuaye musomba. Kadi nansha muvuaye ne tshiji, Nâmana wakafika ku dipangadika bua kutumikila. Bu muvuaye mutumikila, wakôndopibua. Bu yeya kayi mutumikila, kavua ôndopibua to.
Bamua bantu badi bela meji ne, mikenji ya Yezu idi mitamba kukola bua kutumikila. Dimua kuvua nsongaluma ubikidibua ne Nefi, uvua, yeya ne bana babu, mulombibua bua kuenza tshintu tshikola menamena. Yezu wakabambila bua kupingana ku tshimenga tshia Yelushalema bua kuangata imua mifundu ya mushinga. Bana babu bakamba ne kabena bua kutshienza to. Tshivua tshikala tshitamba kukola. Kadi Nefi wakamba ne, ne’enza muvua Yezu mumuambila bua kuenza. Wakamba ne padi Yezu utuambila bua kuenza tshintu, nansha tshiotshi tshifuana kuikala tshikola kutudi, udi utuambuluisha bua kutshienza.
Yezu wakatuambila ne, tudi ne bua kuenza mudimu bua kulua bafuanangana nenda yeya ne Tatu wetu wa mu Diûlu. Yeya udi utuambila bua kutshienza amu padiye mumanya ne tudi mua kuenza.
Yezu mmufuanangana ne Tatu wetu wa mu Diûlu bualu kena muenza mibi to. Tudi bonsu benza bubi, kadi tudi mua kulua bu Tatu wetu wa mu Diûlu kupitshila ku ditabuija mu Yezu ne ku dikudimuna mutshima.
Imua misangu katuena mua kumvua kipatshila ka umua wa ku mikenji ya Yezu to. Kadi bituikala bananga Yezu ne bamueyemena, netuenza tshidiye utuambila bua kuenza. Netutumikila nansha bituikala katuyi tumvua bua tshinyi wakatuambila bua kuenza tshintu. Adama ne Eva bakenza nunku. Yezu wakambila Adama ne Eva bua kufila milambu* kudi Tatu wetu wa mu Diûlu. Dimua dituku muanjelu wakalua kudi Adama ne kumukonkaye bua tshinyi uvua ufila milambu. Adama wakamba ne, kavua mumanya bua tshinyi, unu bualu Yezu wakamuambila bua kutshienza. Nunku muanjelu wakambila Adama kipatshila ka mikenji ne wakalongesha Adama lumu luimpa. Yezu wakasanka ne Adama bualu Adama wakamutumikila nansha kumpala kua kumanya kipatshila ka mikenji.
Tudi ne bua kutumikila mikenji ya Yezu bualu tudi bamunanga ne tudi basua kumutumikila. Tatu wetu wa mu Diûlu wakamba ne udi usanka ne aba badi basua kutumikila Yezu. Udi ubungama padi bana benda kabayi batumikila Yezu, tô ne padi tshintu tshibafikila ne tshibenzeja bua kutumikila. Tatu wetu wa mu Diûlu mmusua bua bana benda bonsu balonga bua kunanga Yezu ne kumutumukila, bualu etshi tshidi mushindu umua wa bobu kupinganyina kudi Tatu wetu wa mu Diûlu.
Dilejangana
-
Bua tshinyi bidi ne mushinga bua kutumikila mikenji ya Yezu nansha pikalaye mifuana kuikala mikola bua kutumikila?
-
Bua tshinyi tudi ne bua kutumikila mikenji nansha bituikala katuyi tuyumvua?
-
Bua tshinyi bidi ne mushinga bua tuetu kutumikila bualu tudi basua kutumikila?
Patudi Bananga Tatu Wetu wa mu Diûlu, Tudi ne Disua dia Kutumikila Yezu
Yezu wakenza bionsu bivua Tatu wetu wa mu Diûlu mumuelela mukenji bua kuenza. Yezu wakatumikila Tatu wetu wa mu Diûlu bualu uvua munanga Tatu wetu wa mu Diûlu. Satana wakatêta Yezu bua katumikidi Tatu wetu wa mu Diûlu to. Yezu kakenza bintu bivua Satana umutêtshila bua kuenza to.
Mukenji wa Kumpala ne wa Mushinga wa Bungi Udi wa Kunanga Tatu Wetu wa mu Diûlu
Patudi tunanga Tatu wetu wa mu Diûlu, netusua kumutumikila bu muvua Yezu muenza. Tudi mua kunanga Tatu wetu wa mu Diûlu bikola patuikala tulonga bia bungi buenda. Tudi ne bua kulonga buenda ne bidiye muenza buetu. Tudi tulonga mu kubala mifundu ne kuteleja balombodi ba Ekelezia wa Yezu Kilisto. Patudi tunanga Tatu wetu wa mu Diûlu, netunanga kabidi Yezu bua bivua Yezu muenza bua kutuambuluisha bua tupingana kudi Tatu wetu wa mu Diûlu. Tudi tulonga bitangila Yezu mu kuenza malu adiye mutuelela mukenji bua kuenza. Padi dinanga dietu bua Tatu wetu wa mu Diûlu ne Yezu didiunda, kutumikila mikenji yabu kudi kulua kupepela.
Mukenji Muibidi Munena Udi wa Kunanga Bantu Bonsu
Yezu wakatuambila bua tunanga ne tuambuluisha bakuabu bantu. Wakatuambila bua tubenzela bu mutudi basua bua batuenzela. Wakamba ne katuena ne bua kuamba malu mabi buabu to. Tudi ne bua kubabuikidila bua bilema biabu. Tudi ne bua kuambuluisha bakuabu mu mushindu wetu yonsu.
Patudi tunanga Tatu wetu wa mu Diûlu ne Yezu, tudi tunanga ne tuambuluisha bakuabu. Patudi tunanga ne tusadila Yezu ne bantu bakuabu, kutumikila kua mikenji yonsu ya Tatu wetu wa mu Diûlu ne Yezu, kudi kulua kupepela.
Dilejangana
-
Mikenji kayi ibidi minena?
-
Mushindu kayi udi tshilejilu tshia Yezu mua kutuambuluisha bua kutumikila mikenji ya Tatu wetu wa mu Diûlu?
-
Mushindu kayi utudi mua kunanga Tatu wetu wa mu Diûlu ne Yezu ne kusua bua kutumikila mikenji yabu?
Dibenesha Dionsu Ditudi Tupeta Didi Dilua ku Ditumikila
Tatu wetu wa mu Diûlu udi utubenesha patudi tunemeka mikenji yenda. Udi ulaya dibenesha bua mukenji yonsu utudi tutumikila. Diba dionsu ditudi tutumikila mukenji, tudi tupeta dibenesha bua ditumikila diawu. Patudi katuyi tutumikila mukenji, katuena mua kutekemena bua kupeta dibenesha dilaya.
Amua a ku mabenesha adi alua ku ditumikila mikenji ya Tatu wetu wa mu Diûlu adi: disanka, budishikaminyi ku bôwa, bukola bua mubidi, ne dimanya ne dikumbana bia bungi. Dibenesha ditamba bunena didi Tatu wetu wa mu Diûlu utulaya didi ne, tudi mua kulua bu yeya ne kuikala ne moyo kashidi nenda. Tudi mua kupeta dibenesha edi mu kutumikila kua mikenji yenda yonsu.
Patudi tuidikija ne moyo mujima bua kutumikila mikenji ya Tatu wetu wa mu Diûlu, bidi bikala ne mushinga bua kuvuluka ne, tudi mua kuenza amu ne diambuluisha dia Yezu. Tudi kabidi ne bua kuvuluka ne, patudi tubenga kutumikila, Tatu wetu wa mu Diûlu neatubuikidila bituikala bateka ditabuija dietu mu Yezu Kilisto ne bakudimuna mitshima. Bu mutuvua benza bonsu bubi, tudi ne bua kuikala ne disanka bua Bupikudi bua Yezu Kilisto. Kupitshila ku Bupikudi buenda, Tatu wetu wa mu Diûlu udi mua kutubuikidila ne kutubenesha ne kutuambuluisha bua kulua batumikidi. Katuakulua bakumbana bua mabenesha a Tatu wetu wa mu Diûlu nkayetu to.
Dilejangana
-
Mabenesha kayi adi mua kulua kupitshila ku ditumikila kudi Tatu wetu wa mu Diûlu?
-
Mushindu kayi udi Yezu utuambuluisha bua kupeta mabenesha â?
-
Mushindu kayi utudi mua kupeta dipa ditamba bunena dia Tatu wetu wa mu Diûlu?