Shapita 23
Mulambu
Kulekela tshintu bua kuambuluisha mukuabu muntu tshidi tshikala tshitupa tshia dilongolola dia Tatu wetu wa mu Diûlu bua kutuambuluisha tulua bu mudiye. Ukatu mupeta lumvu lua disanka ludi lulua pawudi ulekela tshintu bua kuambuluisha muntu mukuabu anyi?
Yezu Wakalambula Moyo Wenda Buetu
Bua kutumikila Tatu wetu wa mu Diûlu, tudi nangananga ne bua kulambula. Kulambula kudi kumvuija kulekela tshintu bua kuambuluisha muntu mukuabu. Yezu wakenza mulambu mupita bunena. Wakakenga bua mibi yetu. Nunku wakafila moyo wenda buetu.
Bu mudi Yezu mufila moyo wenda buetu, muntu yonsu neikala ne moyo kabidi panyima pa lufu. Netuikala ne mubidi mujima udi kawuyi ufua kabidi. Etshi tshidi tshibikidibua ne dibika dia ku lufu. Kabidi, aba badi ne ditabuija mu Yezu, bakudimuna mitshima ku mibi yabu yonsu, nebabuikidibua ku mibi yabu kupitshila ku tshidi Yezu muenza ne nebakumbana bua kupingana kudi Tatu wetu wa mu Diûlu.
Katshia ku tshikondu tshivua Adama ne moyo tô ne ku tshikondu tshivua Yezu Kilisto ne moyo, bantu bakalambula nyama kudi Tatu wetu wa mu Diûlu. Bantu bavua basungula nyama mimpa ya mu tshisumbu tshia nyama anyi mu bimuna biabu bua kulambula. Ivua mikala ya kumpala ya baluma. Panyima pa basungula nyama udi ukengela, bantu bavua bayishipa ne bôsha bitupa biayi bu milambu kudi Tatu wetu wa mu Diûlu.
Bantu bavua balambula nyama eyi bua kutumikila mikenji ya Tatu wetu wa mu Diûlu. Mu mushindu ewu, bakaleja disua diabu dia kutumikila Tatu wetu wa mu Diûlu nansha muvuabi biumvuija kulekela tshintu tshimpa tshivua ne mushinga buabu. Tatu wetu wa mu Diûlu wakabelela mukenji bua kulambula nyama bua kubavuluija ne, nealambula Muanenda wa Baluma buabu. Yezu, Muana’abuta wa Baluma wa Tatu wetu wa mu Diûlu, uvua ne bua kulua pa buloba ne kuikala mujalama mu njila yonsu. Neadianyishila nkayenda bua kulambudibua bua mibi yetu.
Panyima pa Yezu mufila moyo wenda, wakelela bantu mukenji bua kabalambudi nyama kabidi to. Wakatupesha biakudia bia tshijila bua kutuvuluija mulambu munena wakenzaye buetu. Diampa ne mâyi bia biakudia bia tshijila bidi bileja musunyi ne mashi bia Yezu, biakafilaye buetu pakafuaye.
Dilejangana
-
Ntshinyi tshivua mulambu wa nyama mu bikondu bia kala uleja?
Mulambu Udi Tshitupa tshia Dilongolola dia Tatu Wetu wa mu Diûlu Buetu
Tatu wetu wa mu Diûlu udi utulomba mpindiewu bua kulambula mu mushindu mushilangana. Udi utuelela mukenji bua tuenza mulambu wa mutshima mutshibuluka ne nyuma munyingalala. Etshi tshidi tshiumvuija kulekela mibi yetu ne diditambisha dietu. Tshidi tshiumvuija kuikala ne disua dia kuvuluka dituku dionsu Yezu ne kulama mikenji yenda, mu mishindu yonsu. Esthi tshidi tshiumvuija ne:
-
Tudi ne ditabuija mu Yezu, tudi tukudimuna mitshima ku mibi yetu, tudi tutambuishibua, ne tudi tulama mikenji ya Yezu.
-
Tudi tuambila bantu bakuabu bua kuitabuija kuetu kua Yezu bua balua balondi benda ne badisangisha ku Ekelezia wenda.
-
Tudi ne disua dia kuenza mudimu yonsu mu Ekelezia wa Yezu ne mmusua bua tuenza.
-
Bantu baluma badi ne disua dia kuitaba buakuidi ne kuambuluisha mêku abu ne bakuabu bua kusomba mu mushindu wa kudilongolola bua kupingana kudi Tatu wetu wa mu Diûlu mu moyo udi ulonda.
Bua kupingana kudi Tatu wetu wa mu Diûlu, tudi ne bua kuikala ne disua dia kufila bionsu bidi Yezu utulomba bua kufila. Mupostolo Paulo wakamba ne, tudi ne bua kuenza mudimu ne diba dietu pa buloba bua kuenza tshionsu tshitudi mua kuenza bua kuambuluisha mu mudimu wa Yezu.
Dilejangana
-
Mushindu kayi ûdi mua kuleja ne udi uvuluka mulambu wa Yezu lelu?
Muntu mubanji wakakonka Yezu tshivuaye ne bua kuenza mu mushindu wa kuikala ne Tatu wetu wa mu Diûlu kashidi. Yezu wakamuambila bua atumikila mikenji ya Tatu wetu wa mu Diûlu. Muntu mubanji ewu wakandamuna ne, uvua mutumikila mikenji yonsu kumbukila ku buana buenda. Yezu wakamuambila ne kuvua tshintu tshikuabu tshimua tshivuaye ne bua kuenza. Uvua ne bua kupana bionsu bivuaye nabi. Uvua ne bua kupesha bantu bapela makuta ne kulonda Yezu. Pakumvua muntu mubanji bualu ebu, wakabungama. Kavua musua kulekela bintu bionsu bivuaye nabi ne kulonda Yezu to.
Muntu mubanji uvua muntu muimpa. Uvua muidikija ne moyo mujima bua kutumikila mikenji. Kadi pakamulomba Yezu bua kulekela bionsu bivuaye nabi ne kumulonda, kavua musua kuenza to.
Babidi ba ku Bapostolo ba Yezu, Petelo ne Andele, bavua ne disua dia kulekela bionsu bivuabu nabi mu mushindu wa kulonda Yezu. Pakabalomba Yezu bua bamulonda, bakalekela mudimu wabu ne kumulondabu.
Abalahama uvua penda ne disua dia kulekela tshionsu tshivuaye natshi kudi Tatu wetu wa mu Diûlu. Abalahama uvua musomba pa buloba kumpala kua kuledibua kua Yezu. Mu tshikondu atshi, Tatu wetu wa mu Diûlu utshivua ulomba bantu bua kulambula nyama. Wakelela Abalahama mukenji bua alambula muanenda wa baluma, bu ditêta bua kumona neuvua mua kutumikila. Abalahama uvua ne disua dia kutumikila. Wakibaka tshioshelu ne kuteka muanenda popu. Abalahama uvua pabuipi bua kushipa muanenda wa baluma, ne pakamuimanyika muanjelu. Muanjelu wakambila Abalahama ne, kavua ne bua kulambula muanenda wa baluma to. Tatu wetu wa mu Diûlu uvua mumanya ne Abalahama uvua ne disua dia kufila tshionsu tshivua Tatu wetu wa mu Diûlu umuelela mukenji bua afila, nansha muanenda wa baluma. Abalahama uvua munanga Tatu wetu wa mu Diûlu bikola, ki bualu kayi uvua ne disua dia kuenza tshionsu tshivua Tatu wetu wa mu Diûlu umuelela mukenji. Tatu wetu wa mu Diûlu wakabenesha Abalahama bualu Abalahama uvua ne disua dia kulambula tshionsu tshivuaye natshi.
Dilejangana
-
Nganyi udi tshilejilu tshia muntu uvua kayi ne disua dia kufila bionsu bivua Yezu mumuelela mukenji bua kufila?
-
Nganyi udi tshilejilu tshia muntu uvua ne disua dia kufila bionsu bivua Tatu wetu wa mu Diûlu mumuelela mukenji bua kufila?
-
Ntshinyi tshiuvua mua kuenza pa muaba wabu?
Nsongaluma mubanji wakapangila ditabuija dia kulambula mabanji enda ne kulonda Yezu.
Tudi Ne Bua Kulambula Bintu bua Mudimu wa Yezu
Mêku etu adi mua kutulekela bitualonda Yezu. Bantu bakuabu badi mua kutuseka anyi kuidikija bua kutuenzela bibi patudi tutumikila mikenji yenda. Tudi mua kuikala ne bua kujimija midimu yetu bua kudisangisha kuetu mu Ekelezia wa Yezu Kilisto.
Tudi mua kuikala ne bua kuenza mudimu ne makuta etu ne diba dietu bua kuya ne kulongesha bakuabu bitangila Yezu. Tudi mua kuikala ne bua kuenza mudimu ne diba dietu bua kuambuluisha balombodi ba Ekelezia bua benza mudimu wenda. Tudi mua kuikala ne bua kuenza mudimu ne diba dietu ne makuta etu bua kuambuluisha bakuabu mu dîku dietu padibu benza mudimu wa Yezu. Tatu wetu wa mu Diûlu udi mua kusua bua tufila mioyo yetu pamutu pa kuvila bujadiki buetu.
Dilejangana
-
Mushindu kayi ûmvua biwikala mulombibua bua kulekela bubanji bueba buwudi munanga?
-
Mbungi kayi buwudi musua kulambula bua mudimu wa Yezu?
Abalahama uvua ne ditabuija edi dinena ne uvua mudilongolola bua kulambula Isaka muanenda wa baluma ku mukenji wa Mukalenga.
Mulambu Udi Utuala Mabenesha Adi Ka’ayi Mua Kulua mu Mushindu Mukuabu
Mulambu udi utuambuluisha bua kubenga kulua badinangi. Tudi tulonga bua kusadila Tatu wetu wa mu Diûlu ne kuambuluisha bantu bakuabu. Tudi tulonga ne, kuenzela bakuabu malu kudi kutupesha disanka. Tudi tulonga ne, kuenza tshidi Yezu utuelela mukenji bua kuenza bidi ne mushinga mupita tshintu tshia mubidi tshitudi mua kupeta pa buloba apa. Tudi tulonga ne, kusadila bakuabu kudi kuimpa kupita kudielela menji nkayetu. Patudi tulambula ne disua dionsu, tudi kabidi tupeta ne Tatu wetu wa mu Diûlu udi utupesha mabenesha adi mimpa matamba tshionsu tshitudi bafila.
Kudilambula bua bakuabu kudi kutuambuluisha bua kumvua bimpa tshivua Yezu muenza buetu. Uvua mutunanga bikola bua kufila moyo wenda buetu. Patudi tulambula bintu bua Tatu wetu wa mu Diûlu anyi bua bantu bakuabu, tudi tubananga bikola. Tudi tubanga kulua ne dinanga dia bungi bu Yezu ne Tatu wetu wa mu Diûlu.
Kuikala ne mabanji a bungi kabiena bibi to. Imua misangu Tatu wetu wa mu Diûlu udi utupesha bintu ebi bua tuambuluisha bakuabu. Kadi bidi bikola bua kubenga kunanga bintu bietu ne makuta etu. Tudi tuenza mudimu mukola bua kubipeta. Bimua bia ku bintu ebi bidi ne mushinga mu mushindu wa tuetu kuikala ne moyo. Kadi, katuena ne bua kutuma moyo yonsu ku bintu ebi bua katubilekedi bikala Tatu wetu wa mu Diûlu mujinga kuambuluisha bana benda bakuabu.
Bidimba bionsu bia Ekelezia wa Yezu Kilisto bidi ne bua kuteka disadila Tatu wetu wa mu Diûlu ne Yezu tshintu tshia mushinga mu mioyo yabu. Tudi tuleja ne tudi bananga Tatu wetu wa mu Diûlu ne Yezu bikola kupita dinanga dietu dia mabanji, diba ditudi tuenza tshidi balombodi ba Ekelezia wa Yezu Kilisto batulomba bua kuenza. Tudi ne bua kulambula diba dietu bua kubambuluisha bua kulongesha ne kusadila bakuabu. Bua tuetu kulua bakumbana bua kusomba ne Tatu wetu wa mu Diûlu, tudi ne bua kuikala ne disua dia kufila bionsu bitudi nabi bua kuambuluisha mudimu wa Yezu bikalabi ki bidiye mulomba buetu.
Yezu wakalaya mabenesha manena kudi aba badi bamutumikila ne bamusadila. Wakamba ne katuena mua kuela meji ku bintu bimpa bituapeta pashisha patudi tulambula bua mudimu wenda mpindiewu.