Mupandishi, Yezu Kilisto, uvua muledibua mu tshikumbi tshidipuekesha.
Shapita 11
Moyo wa Yezu Kilisto
Yezu Kilisto udi muntu umua udi mua kutualuja kudi Tatu wetu wa mu Diûlu. Ntshinyi tshiwudi mumanya buenda?
Bantu ba Bungi Bakindila ne Dijinga Dinena Bua Kulua kua Yezu Kilisto
Yezu wakadilambula bua kuikala Mupandishi wetu. Wakamba ne, uvua ulua pa buloba bua kutuleja mushindu wa kupingana kudi Tatu wetu wa mu Diûlu. Bantu ba bungi bavua ne moyo kumpala kua diledibua dia Yezu bavua bitabuija ne uvua ne bua kulua bua kuikala Mupandishi wabu. Bakindila Kulua kuenda. Bavua bamanya ne uvua mua kubapandisha ku dinyoka dia kashidi bua mibi yabu.
Bambi bonsu bavua ne moyo kumpala kua diledibua dia Yezu bavua bambila bantu ne nealua. Tatu wetu wa mu Diûlu wakatuma muanjelu bua kuambila Adama ne, Yezu uvua ulua pa buloba.
Bidimu bia bungi kumpala kua diledibua dia Yezu, muambi ubikidibua ne Yeshaya wakamona mu tshimônyi ne, Yezu uvua ne bua kukenga bua kufuta bua mibi yetu. Yeshaya wakamba ne, bantu nebakina ne nebabenga Yezu ne Yezu neikala ne dibungama dia bungi.
Nefi, muambi utudi babala buenda mu Mukanda wa Molomo, wakamona malu avua Yezu ne bua kuenza. Nefi wakamona malu â bidimu bia bungi kumpala kua diledibua dia Yezu. Wakamona Yezu muana muteketa mu maboku a mamuenda. Muanjelu wakambila Nephi ne, muana muteketa uvua Muana wa Baluma wa Tatu wetu wa mu Diûlu.
Tudi tubala bua muambi ubikidibua ne Benyamina mu Mukanda wa Molomo. Wakambila bantu ne, Yezu uvua ne bua kulua mu tshitupa tshipi pa buloba. Benyamina wakabambila ne, Yezu neôndopa babêdi, neenza bua badi ne tuneka benda, neatabeja mpofu, ne naenza bua mpata batshi yumvua. Neipata kabidi nyuma mibi ne nealuja bantu bafua ku moyo. Benyamina wakamba ne, Yezu nealongesha bantu bua bananga Tatu wetu wa mu Diûlu ne banangangana.
Bambi bonsu bavua ne moyo panyima pa diledibua dia Yezu, bakatuambila ne uvua mulua. Bu kabuyi bua Yezu Kilisto, dilongolola dia Tatu wetu wa mu Diûlu divua dipangila.
Dilejangana
-
Bua tshinyi Yezu wakadilambula bua kulua pa buloba?
-
Bamua ba ku bambi kayi bavua bajadika ne uvua ne bua kulua?
Diledibua dia Yezu Diakatuala Disanka Dinena Mu Buloba Bujima
Yezu uvua muledibua mu tshimenga tshikesa tshibikidibua ne Beteleheme. Banjelu bakimba pakaledibuaye, bualu bavua ne disanka. Mutoto mupia-mupia wakapatuka mûlu. Balami ba mikoko ne bena meji bakaya kumumona ne kumukukuila. Bantu ba bungi mu buloba bujima batshidi basankidila diledibua dienda.
Yezu uvua mushilangana ne bana bakuabu bakaledibua. Tatuenda wa Yezu uvua Tatu wetu wa mu Diûlu. Tatu wetu wa mu Diûlu kavua amu Tatuenda wa nyuma wa Yezu to, kadi uvua kabidi Tatuenda wa mubidi wenda wa musunyi ne mifuba. Yezu wakapeta bukola bua kudi Tatuenda budi bantu bakuabu kabayi nabu. Bantu kabavua mua kuangata moyo wenda to, amu yeya wakabanyishila bua bua kuwangata. Pakafuaye, uvua ne bukola bua kupesha mubidi wenda moyo kabidi.
Mamuenda wa Yezu uvua Maliya. Uvua nsongakaji mukezuka uvua ne moyo mu bidimu pabuipi ne 2000 mu tshimenga tshibikidibua ne Nazaleta. Pavuaye nsonga kamama, kayi muanji kusedibua, muanjelu wa kudi Tatu wetu wa mu Diûlu wakalua kudiye. Muanjelu wakamuambila ne neikala mamuenda wa Yezu Kilisto. Muanjelu wakamuambila ne; Tatu wetu wa mu Diûlu neikala Tatuenda wa Yezu. Kakuena muntu pa buloba wikala Tatuenda to.
Muanjelu wakalua kabidi kudi muntu muluma uvua Maliya ne bua kusedibua nenda. Muntu muluma uvua ubikidibua ne Yosefe. Muanjelu wakambila Yosefe ne; muana waledibua neikala Muana wa Baluma wa Tatu wetu wa mu Diûlu ne kavua muana wa baluma wa muntu pa buloba to. Muanjelu wakamuambila ne; udi ne bua kusela Maliya. Nunku Yosefe ne Maliya bakaselangana. Panyima pa diledibua dia Yezu, Yosefe wakamutangila bu ne Yezu uvua muanenda wa baluma.
Bu muvua mamuenda muikala wa tshifuaka, Yezu uvua mua kumvua nzala, nyota, ne busâmi, ne uvua mua kufua.
Dilejangana
-
Mushindu kayi utudi tumanya ne, diledibua dia Yezu divua tshikuma tshia mushinga?
-
Makola kayi avua Yezu mupeta kudi Tatuenda?
-
Malu kayi avua Yezu mumvua bualu uvua ne mamu wa pa buloba?
Patshivuaye nsonga, Yezu wakalongesha bantu balonga mu ntempelo.
Yezu Wakalua Bua Kutulongesha Lumu Luimpa Luenda
Yezu Kavua ne Mibi To
Yezu kavua ne mibi to. Wakenza bionsu bivua Tatu wetu wa mu Diûlu musua bua enza. Yezu wakakola mu mushindu umua udi bana bakuabu bakola. Bu muvuaye ukola, wakapeta meji. Uvua ne bukola bua Tatu wetu wa mu Diûlu.
Mu tshikondu tshivua Yezu ne bidimu 12, uvua mumanya ne uvua mutumibua bua kuenza malu avua Tatu wetu wa mu Diûlu musua bua enza. Uvua mumanya ne udi ne mudimu musunguluka wa kuenza pa buloba.
Dimua dituku, wakaya ne Maliya ne Yosefe mu Yelushalema. Pavua Maliya ne Yosefe benda bapingana ku nzubu, bakamona ne Yezu kavua nabu to. Bakapingana ku Yelushalema bua kukeba Yezu. Panyima pa matuku asatu, bakamupeta mu ntempelo, wakula ne bantu ba meji ne ubandamuna nkonku yabu. Bonsu bavua bamuteleja bavua ne kukema, bualu uvua mumanya biabungi ne uvua mua kuandamuna nkonku yabu. Yosefe ne Maliya bavua ne disanka bua kumupeta, kadi kabakasanka bua muvuaye kayi mushala nabu. Yezu wakabandamuna ne bualu uvua ne bua kuenza mudimu wa Tatu wenda wa mu Diûlu.
Yezu Wakatambuishibua*
Pavua Yezu ne bidimu 30, wakaya kudi Yone Mutambuishi bua kutambuishibua. Yone wakela meji ne kavua mua kutambuisha Yezu, bualu Yezu kavua muenza mibi nansha. Kadi Yezu wakambila Yone bua amutambuisha. Yezu uvua musua kutumikila mikenji yonsu ya Tatu wetu wa mu Diûlu. Yone wakatambuisha Yezu, mu kumuela ne bujima bonsu muinshi mua mâyi ne kumujula kulu kabidi. Pakatambuishibua Yezu, Tatu wetu wa mu Diûlu wakakula mu diûlu ne kuamba ne; Yezu uvua Muanenda wa Baluma, ne Yeya Tatu wetu wa mu Diûlu, uvua ne disanka dia bungi buenda. Nyuma wa Tshijila wakalua penda kudi Yezu pakatambuishibuaye.
Satana Wakatêta Yezu
Pakatambula Yezu, wakaya mu tshipela bua kuikala nkayenda ne bua kujila biakudia ne kusambila. Pakajila Yezu biakudia matuku 40, Satana wakalua ne kumutêtaye. Satana uvua mumanya ne bikalaye mua kuenzeja Yezu bubi bumua, Yezu kakukumbana bua kuenza malu avuaye mutumibua bua kuenza to. Nunku dilongolola dia Tatu wetu wa mu Diûlu divua dipangila.
Yezu wakakandamena matêta onsu a Satana. Ku ndekelu, wakambila Satana bua aya. Pakaya Satana, banjelu bakalua ne kukumbulabu Yezu.
Yezu Wakatulongesha Bua Kunanga Tatu Wetu wa mu Diûlu ne Kunangangana
Pakakandamenaye Satana, Yezu wakabangisha kulongesha bantu. Kipatshila kamua kavuaye muluila pa buloba kavua ka kutulongesha mushindu wa tuetu kusomba.
Yezu wakalongesha ne tudi ne bua kunanga Tatu wetu wa mu Diûlu ne mutshima wetu yonsu, meji etu onsu, ne bukola buetu bonsu. Wakalongesha ne, tudi ne bua kunanga bakuabu bantu bu mutudi badinanga. Tudi kabidi ne bua kubuikidila ne kusadila bakuabu bantu. Yezu wakatuleja mushindu wa kuenza malu â. Wakaleja dinanga dienda bua Tatu wetu wa mu Diûlu mu kuenza kua malu onsu avua Tatu wetu wa mu Diûlu mumulomba bua kuenza.
Yezu Uvua Munanga Bantu Bonsu
Yezu uvua ne dinanga bua muntu yonsu. Wakôndopa babedi. Wakatabeja mpofu ne kuendesha bena tuneka. Wakambula bana bakesa mu maboku enda ne kubabeneshaye.
Yezu wakaleja dinanga kudi aba bavua benza bubi. Wakabalongesha bua bikala ne dibungama bua mibi yabu ne bua kabenji bubi kabidi to. Yezu uvua munanga bavua bamushipa kabidi. Wakasambila buabu kudi Tatu wetu wa mu Diûlu. Yezu wakalongesha ne; tudi ne bua kunangangana bu mudiye mutunanga.
Dilejangana
-
Amua a ku malu kayi atudi mua kuenza bua kuleja Tatu wetu wa mu Diûlu ne tudi bamunanga?
-
Amua a ku malu kayi atudi mua kuenzela bakuabu bua kubaleja dinanga dietu buabu?
Yezu Wakalongolola Ekelezia
Yezu uvua musua bua bantu bonsu bamanya njila wa kupingana kudi Tatu wetu wa mu Diûlu. Njila wenda udi ubikidibua ne lumu luimpa. Yezu wakalongolola ekelezia bua ne bantu bonsu badi mua kulonga lumu luimpa.
Wakasungula bantu baluma dikumi ne ibidi, babikidibua ne Bapostolo, bua kulombola Ekelezia. Bavua ne bua kulongesha bantu lumu luimpa panyima pa Yezu mualukila ku diûlu. Yezu wakapesha Bapostolo Dikumi ne Ibidi bukôkeshi bua kumuimanyina. Bavua mua kulongesha lumu luimpa kudi bantu bonsu ne kubatambuisha. Bavua mua kusungula bakuabu bua kuambuluisha kulongesha ne kuenza malu onsu avuaye musua bua akumbana.
Dilejangana
-
Bua tshinyi Yezu wakasungula Bapostolo Dikumi ne Ibidi?
Patudi Tulonga bua Yezu, Tudi Tumvua Bunena bua Muntu Kayi Buvuaye
Yezu wakambuluisha yonsu wa kutudi mu kutuleja mushindu wa kusomba. Patudi tulonga bua kuikala mudiye, tudi tulonga bua kuenza malu adi atupesha disanka. Tudi kabidi mua kulonga malu atuambuluisha bua kupingana ku diûlu bua kusomba ne Tatu wetu wa mu Diûlu.
Patudi tumanya ne, Yezu mmutunanga, tudi tumvua ditalala. Tudi tudiumvua bakubibua ne katuyi bôwa. Tudi bamanya ne tudi bua kumueyemena bua kuikalaye mulombodi wetu. Tudi bamanya ne udi umvua ntatu yetu. Malongesha enda adi atuambuluisha bua kutamba ntatu yetu. Patudi tumvua bionsu bivua Yezu mutuenzela, dinanga dietu buenda didi didiunda. Dinanga dietu buenda didi dienza bua tuikala ne disua dia kumutumikila. Tudi bindila tshikondu tshitudi mua kuikala nenda.
Dilejangana
-
Mushindu kayi udi kulonga bitangila Yezu kutuambuluisha?
-
Mushindu kayi uwudi udiumvua pawudi ulonga bitangila Yezu?