Shapita 4

Tudi Badikadila bua Kusungula

Tuetu bonsu tudi tuenza masungula matuku onsu. Tatu wetu wa mu Diûlu uvua mutupesha bunema bua kudisunguila. Bua tshinyi tudi ne bua kuidikija kuenza masungula mimpa?

Tatu Wetu wa mu Diûlu Udi Utupesha Bunema bua Kusungula

Mu diûlu tuvua badikadila bua kusungula. Tuvua badikadila bua kulonda Yezu anyi kulonda Satana. Babungi ba ku bana ba Tatu wetu wa mu Diûlu bakasungula bua kulonda Yezu. Bakuabu bakasungula bua kulonda Satana. Tatu wetu wa mu Diûlu wakanyishila bana benda bonsu bua benza disungula diabu nkayabu.

Tatu wetu wa mu Diûlu udi utuanyishila kabidi bua tudisunguila apa pa buloba. Patuakalua pa buloba, wakenza bua tupua moyo buikadianganyi buetu nenda. Tuvua ne bua kulonga bua kudisunguila patuvua katuyi nenda to.

Dilejangana

• Mushindu kayi uwudi udiumvua pawudi muenzeja bua kuenza tshintu?

• Mushindu kayi uwudi udiumvua padi muntu ukuanyishila bua kusungula bintu biwudi musua kuenza?

Dilongolola dia Tatu wetu wa mu Diûlu Didi Mua Kuenzeka Amu Bituikala Badikadila bua Kusungula

Tshitupa tshia dilongolola dia Tatu wetu wa mu Diûlu tshivua tshia kututuma pa buloba pavua pikala bionsu bibidi; malu mabi ne malu mimpa. Wakasua bua tusungula tshidi tshimpa. Satana wakatêta kutusuisha bua kusungula bubi. Tudi badikadila bua kusungula pankatshi pa buimpa ne bubi.

Patudi tuenza masungula mimpa, tudi tulua bakumbana bikola bua kuenza malu adi Tatu wetu wa mu Diûlu musua bua tuenza. Patudi tuenza malu adi Tatu wetu wa mu Diûlu musua bua tuenza, tudi tulua bikola bu yeya. Tudi tudipetela nkayetu masungula mimpa a kuenza. Tudi tumvua bimpa malu adi atupesha disanka ne malu adi atupesha dibungama.

Bituikala katuyi mua kudisunguila, katuakukumbana bua kulua menamena bu Tatu wetu wa mu Diûlu to. Katuvua mua kukumbana bua kudilongela malu malenga a kusungula to. Katuvua mua kukumbana bua kuleja Tatu wetu wa mu Diûlu ne tudi bamunanga ne basua kumulonda bulela to.

Dilejangana

• Bua tshinyi tudi ne bua kuikala ne bunema bua kusungula?

Disungula dia Kutumikila Tatu Wetu wa mu Diûlu Didi Ditupesha Disanka

Masungula mimpa adi atutuadila bipeta bimpa; masungula mabi adi atutuadila bipeta bibi. Bituikala tusungula bua kutumikila Tatu wetu wa mu Diûlu, netuikala bantu ba disanka ne bantu bimpa. Bituikala tusungula bua kubenga kumutumikila, netulua babungama ne katua kulua bimpa to.

Bituikala tuenza masungula makana, tudi tumona ne tudi ne disanka bualu buawu. Tudi tulonga ne tudi ne bua kuenza malu makuabu mimpa a bungi. Patudi tumona ne kusungula kua kuenza malu mimpa kudi kutupesha disanka, tudi tusua bua kuenza malu mimpa a bungi. Tudi tujinga bia bungi ne bia bungi bikala bimpa. Tudi mua kuenza masungula makana bipepela bualu tudi bamanya ne, bipeta ne bikala bimpa buetu. Tudi tulonga malu atudi ne bua kumanya ne kuenza bua tulua bu Tatu wetu wa mu Diûlu menamena.

Patudi tuenza masungula mabi, tudi tumvua tshinyongapelu ne bundu. Bituikala tutungunuka kuenza malu mabi, Satana udi ubanga kupeta bukola pamutu petu. Bidi bilua bikola ne bikola bua kusungula bua kuenza tshidi tshimpa. Tudi tuimanyika bua kuidikija kulonda dilongolola dia Tatu wetu wa mu Diûlu.

Dilejangana

• Ela meji ku amua masungula awuvua muenza. Ntshinyi tshivua tshipeta tshia disungula dionsu?

• Mushindu kayi ûdi mua kusungula bua kuikala ne disanka ne kupingana bua kusomba ne Tatu wetu wa mu Diûlu?

• Mushindu kayi udi kuenza kua disungula diakana kukuambuluisha bua kuenza masungula makana?

• Mushindu kayi udi kusungula kua malu mabi kukupangisha bua kuenza masungula mimpa mu matuku alualua?

Tatu Wetu wa mu Diûlu Neatuambuluisha bua Kuenza Masungula Mimpa

Tatu wetu wa mu Diûlu mmusua bua tuenza masungula mimpa, nunku tudi mua kulonga malu adiye mumanya, kuenza malu adiye wenza, ne kuikala ne bintu bidiye nabi. Mmumanya ne netuikala ne disanka ne netuikala bakumbana bua kupingana bua kusomba nenda bituikala tusungula bua kuenza malu adi mimpa.

Tatu wetu wa mu Diûlu mmusua bua kutuambuluisha bua tuenza masungula mimpa. Ne diambuluisha dienda, tudi mua kusungula bua kuenza malu onsu akatuambilaye bua kuenza. Patudi tumulomba, neatuambuluisha bua kukandamena matêta a Satana. Neatupesha makanda a kusungula tshidi tshimpa. Neatuambuluisha bua kulonda dilongolola dienda ne kulua bu yeya menamena.

Dilejangana

• Bua tshinyi Tatu wetu wa mu Diûlu mmusua bua tuenza masungula mimpa?

• Neatuenzejaku bua kuenza tshidi tshimpa anyi? Bua tshinyi?

Malu Mambibua

Tatu Wetu wa mu Diûlu Udi Utupesha Bunema bua Kusungula

• Yone 14:15 (Bituikala bananga Yezu, tudi tutumikila mikenji yenda.)

• 2 Nefi 2:27–29 (Tudi badikadila bua kusungula bua kulonda Yezu Kilisto.)

• Helamana 14:30–31 (Tatu wetu wa mu Diûlu wakatupesha budikadidi bua kusungula buimpa anyi bubi.)

Dilongolola dia Tatu wetu wa mu Diûlu Didi Mua Kuenzeka Amu Bituikala Badikadila bua Kusungula

• 2 Nefi 2:11 (Bua bualu buimpa bonsu, kudi bualu bubi budi bubuluisha.)

• Alama 41:3–5 (Bituenza buimpa, netupingana bua kusomba ne Tatu wetu mu Diûlu. Bituenza bubi, netuikala ne dibungama kashidi.)

• 3 Nefi 27:14–15 (Netulumbuluishibua bilondeshila bitudi tusungula bua kuenza.)

Disungula dia Kutumikila Tatu Wetu wa mu Diûlu Didi Ditupesha Disanka

• 2 Nefi 9:18 (Aba bavua bitaba mu Yezu nebapeta disanka dinena.)

• Mosiya 2:41 (Aba badi batumikila mikenji ya Tatu wetu wa mu Diûlu badi ne disanka bualu mbabeneshibua.)

Tatu Wetu wa mu Diûlu Neatuambuluisha bua Kuenza Masungula Mimpa

• Misambu 5:12 (Tatu wetu wa mu Diûlu neabenesha aba badi bimpa.)

• Misambu 25:9 (Tatu wetu wa mu Diûlu udi wambuluisha aba badi basungula bua kuenza bimpa.)

• Lomo 12:9 (Tudi ne bua kuenza malu mimpa.)

• 1 Kolinto 10:13 (Tatu wetu wa mu Diûlu kakuanyishila matêta bua ikala makola bikola bua katukandamanyi to.)

• Moloni 7:28 (Aba badi bitaba mu Yezu mbasua kuenza bimpa.)