Tudi ne bua kupeta dipa dia Nyuma wa Tshijila kupitshila ku ditenteka dia bianza.

Shapita 16

Dipa dia Nyuma wa Tshijila

Nyuma wa Tshijila udi utuambuluisha bua kumanya ne kumvua malu adi malelela. Mushindu kayi utudi mua kupeta dipa dia Nyuma wa Tshijila?

Nyuma wa Tshijila Udi Mua Kutulombola Ku Bulelela

Nyuma wa Tshijila udi mua kulombola bantu kumpala kua bobu kutambuishibua. Udi mua kuambila muntu ne, malongesha a Yezu adi malelela. Imua misangu udi utuambila muaba utudi mua kupeta Ekelezia mulelela wa Yezu Kilisto. Kadi Nyuma wa Tshijila kakushala netu to, tô ne patudi tutambuishibua ne tupeshibua dipa dia Nyuma wa Tshijila.

Mu Dipungila Dipia-Dipia tudi tubala bua muntu uvua ubikidibua ne Kônelio. Uvua muntu uvua kayi mutambuishibua to. Nyuma wa Tshijila wakamuambila ne, malongesha a Yezu avua malelela. Kônelio wakatambuishibua pashisha ne kupetaye dipa dia Nyuma wa Tshijila.

Tatu Wetu wa mu Diûlu Wakatupesha Mushindu Wa Kupeta Dipa dia Nyuma wa Tshijila

Patudi tulonga bitangila dilongolola dia Tatu wetu wa mu Diûlu buetu, tudi tusua kukudimuna mitshima ku mibi yetu ne kutumikila malu onsu adi Yezu utuambila bua kuenza. Kadi katuena bua ku’enza katuyi ne diambuluisha to. Dipa dia Nyuma wa Tshijila didi bunema bua kuikala ne diambuluisha dia kudi Nyuma wa Tshijila bikondu bionsu. Tudi tupeta dipa edi lukasa panyima pa kutambuishibua kuetu.

Tudi ne bua kudilongolola bua kupeta dipa dia Nyuma wa Tshijila. Tudi ne bua kuitabuija Yezu ne kutamba kutêta bua kuenza bidiye utuelela mukenji. Tudi ne bua kukudimuna mitshima ne kutambuishibua.

Panyima pa kutambuishibua kuetu, aba badi ne bukôkeshi bua kudi Tatu wetu wa mu Diûlu, badi bateka bianza biabu pa mutu petu, batupesha dipa dia Nyuma wa Tshijila, ne batuvuija bidimbia bia tshishiki bia Ekelezia wa Yezu Kilisto wa Bansantu ba Matuku a Ndekelu. Badi kabidi batubenesha.

Dilejangana

Mushindu kayi utudi tupeta dipa dia Nyuma wa Tshijila?

Kudi mishindu ya bungi idi dipa dia Nyuma wa Tshijila mua kutuambuluisha. Udi mua kututuadila mikenji ya kudi Yezu. Udi mua kutulongesha malu a bungi bitangila Yezu ne Tatu wetu wa mu Diûlu.

Udi mua kutuambuluisha bua kumanya mushindu wa kusolakaja ntatu yetu. Udi mua kutukolesha mutshima. Udi mua kutuambuluisha bua kutamba mibi yetu. Udi mua kutuambuluisha bua kuenza malu mimpa.

Nyuma wa Tshijila udi mua kutuambuluisha bua kumvua ne kunanga bakuabu. Udi mua kutuambuluisha bua kumanya mushindu utudi mua kubambuluisha. Udi mua kutuambuluisha bua kumvua malongesha a Yezu. Udi mua kutuambuluisha bua kumanya tshia kuamba bua kulongesha bakuabu bantu bitangila Tatu wetu wa mu Diûlu ne Yezu.

Dilejangana

Imua ya ku mishindu kayi idi dipa dia Nyuma wa Tshijila mua kuenzejibua mu mioyo yetu?

Tudi Ne Bua Kukudimuna Mitshima Ku Mibi Yetu Bua Kupeta Dipa Edi

Kupitshila ku dipa dia Nyuma wa Tshijila tudi mua kulua bantu bimpa ne kuenza malu mimpa. Tudi mua kulua bafuanangana ne Tatu wetu wa mu Diûlu menamena. Kadi tudi ne bua kuidikija bua kuenza malu mimpa dituku dionsu, anyi Nyuma wa Tshijila kakushala netu to. Tudi ne bua kuidikija kuikala ne meji mimpa. Tudi ne bua kuidikija bua kulonda malongesha a Yezu. Patudi tuenza bualu bubi, tudi ne bua kukudimuna mitshima. Bituikala tuidikija bua kuenza malu onsu â, Nyuma wa Tshijila udi utuambuluisha.

Imua misangu Nyuma wa Tshijila udi utuludika mu kuenza bua tuikala ne lumvu lua luya ne ditalala mu mitshima. Patudi tubanga kuenza bualu bubi, lumvu lua disanka elu ludi lutulekela. Imua misangu tudi mua kuteleja dîyi diakula mu meji etu, dituambila tshia kuenza ne tshia kubenga kuenza. Tudi ne bua kuikala pabuipi bua kumvuila ne kutumikila tshidi Nyuma wa Tshijila utuambila, bualu Nyuma wa Tshijila udi utuambila matuku onsu tshidi Yezu musua bua tuenza, ne amu bituikala tutumikila Yezu tudi mua kupingana kudi Tatu wetu wa mu Diûlu.

Bituikala tubenga bua kutumikila Nyuma wa Tshijila ne bituikala tubanga kuenza malu mabi, Nyuma wa Tshijila udi utulekela. Kakuikala netu anyi kakutuambuluisha to, bituikala katuyi tuenza malu mimpa. Kadi bituikala tumvuila ku bulombodi buenda, Nyuma wa Tshijila neikala netu misangu yonsu. Udi utuambuluisha bua kulua bantu bimpa ne kudilongolola bua moyo wetu ne Tatu wetu wa mu Diûlu.

Dilejangana

Ntshinyi tshitudi ne bua kuenza bua ne Nyuma wa Tshijila udi mua kutuambuluisha?

Tudi Tupeta Mabenesha Makuabu Masunguluka Kupitshila ku Nyuma wa Tshijila

Amua mabenesha masunguluka atudi tupeta kupitshila ku Nyuma wa Tshijila adi abikidibua ne mapa a nyuma. Yezu udi ufila mabenesha â kudi bidimba bia Ekelezia wenda mulelela diba dionsu didi Ekelezia wenda muikala pa buloba. Udi utupesha mapa â kupitshila ku bukola bua Nyuma wa Tshijila. Tudi ne bua kumvua mapa â bua ne tudi mua kuenza nawu mudimu ne lungenyi.

Dipa Dia Kuakula Miakulu Mikuabu

Dimua dipa didi diambuluisha bantu bua kuakula miakulu mikuabu. Kamua ka ku tuipatshila kadi Yezu upesha bantu dipa edi kadi ka kubambuluisha bua kulongesha lumu luimpa kudi bantu badi bakula miakulu mikuabu.

Dipa Dia Kuandamuna Muakulu Mukuabu

Dipa dikuabu didi diambuluisha bantu badi bikala bambidibua bitangila lumu luimpa. Dipa dia diandamuna miakulu mikuabu, didi dibambuluisha bua kumvua mukenji wa kudi Yezu udi wambibua mu muakulu udibu kabayi bamanya.

Dipa Dia Kumanya Ne Yezu Udi Muana wa Baluma wa Tatu Wetu wa mu Diûlu

Dipa dikuabu didi diambuluisha bantu bua kumanya ne Yezu udi Muana wa Baluma wa Tatu wetu wa mu Diûlu. Mifundu idi yamba ne, bantu badi mua kumanya ne Yezu udi Mupandishi amu bikala Nyuma wa Tshijila mubambuluisha bua kubumanya. Dipa edi didi bujadiki bua kudi Nyuma wa Tshijila ne, Yezu udi menamena Muana wa Baluma wa Tatu wetu wa mu Diûlu ne kabidi ne, udi Mupandishi wa buloba bujima.

Dipa Dia Kuitabuija Bujadiki Bua Bakuabu

Dipa dia kuitabuija bujadiki bua bakuabu didi diambuluisha bantu bua kumanya pikala malu adi muntu wamba bitangila Yezu ne adi malelela. Nyuma wa Tshijila udi utuambuluisha bua kumanya bujadiki bulelela ne kubuitabuija.

Dipa Dia Ditabuija

Dipa dia ditabuija didi dituambuluisha bua kutumikila mikenji ya Yezu. Kakuyi ditabuija, katuena mua kupeta amua mapa a nyuma makuabu to. Kakuyi ditabuija, katuena mua kupingana kudi Tatu wetu wa mu Diûlu to. Bantu ba bungi badi ne ditabuija dikola mu Yezu. Umua wa ku bambi ba mu Mukanda wa Molomo uvua ne ditabuija mu Yezu bu edi, ne Yezu wakamueneka kudiye. Muambi Joseph Smith uvua ne ditabuija dikola mu Yezu Kilisto bu edi, ne Tatu wetu wa mu Diûlu ne Yezu bakamueneka kudiye.

Dipa Dia Dikudimuna

Dipa dia dikudimuna didi diambuluisha bantu bua kukudimuna miaku mifunda ya Tatu wetu wa mu Diûlu ne Yezu ne Balondi benda mu muakulu umua ku mukuabu. Muambi Joseph Smith uvua ne dipa edi pakakudimunaye Mukanda wa Molomo. Dipa edi didi diambuluisha mukudimunyi bua kumvua diumvuija diakana dia mukenji ne pashisha, kudikudimuna biakana.

Dipa Dia Dimanya

Dipa dia dimanya didi diambuluisha bantu bua kumvua mudimu wa Tatu wetu wa mu Diûlu ne Yezu. Tatu wetu wa mu Diûlu wakamba ne, katuena mua kupingana kudiye bituikala katuyi bamanya anyi bumvua malu adiye musua bua tuenza to. Tudi ne bua kumanya dilongolola divua Tatu wetu wa mu Diûlu mutupesha, nunku tudi mua kupingana kudiye.

Yezu wakamba ne, dimanya ditudi tupeta mu moyo ewu, nedituambuluisha mu muaba wa nyuma panyima pa lufu luetu. Mmusua bua tumanya bitangila malongesha ne mikenji bienda, diûlu ne buloba, malu avua menzeka, ne bua malu adi mu matunga etu ne mu makuabu matunga. Wakamba ne, tudi ne bua kuenza mudimu ne dimanya ne lungenyi. Tudi ne bua kulomba diambuluisha dia Nyuma wa Tshijila mu kukeba kua dimanya.

Dipa Dia Meji

Dipa edi didi diambuluisha bantu kua kuenza mu mushindu mukumbana mudimu ne dimanya didi Tatu wetu wa mu Diûlu ubapesha. Tudi ne bua kuenza mudimu ne dipa edi bua kuakaja mioyo yetu, kulongesha ne kufila mubelu wa meji kudi bakuabu.

Dipa Dia Kulongesha

Dipa dia kulongesha didi diambuluisha bantu bua kulongesha bakuabu lumu luimpa mu mushindu umvuabu. Tudi mua kupeta dipa edi amu mu kuikala ne ditabuija mu Yezu ne kupitshila ku dilonga ne disambila.

Dipa Dia Buambi

Dipa dia buambi didi diambuluisha bantu bua kumanya ne kumvua malu avua menzeka kala, malu adi enzeka mpindiewu, ne malu alua kuenzeka mu matuka alualua. Bambi badi bapeshibua dipa edi, kadi tuetu petu tudi mua kuikala nadi bua dituludika mu mioyo yetu.

Dipa Dia Dibuluila*

Nyuma wa Tshijila udi ubuluila bantu malu adi alua kubambuluisha. Tudi bonsu mua kupeta dibuluila bua buimpa buetu nkayetu. Kadi mabuluila a Ekelezia mujima adi apeshibua amu kudi muambi. Katuena mua kupeta dibuluila bua muntu udi muikala mulombodi wetu mu Ekelezia to. Malu onsu adi Nyuma wa Tshijila utubuluila neikala makumbanangana ne mikenji ne malongesha a Tatu wetu wa mu Diûlu ne Yezu.

Dipa dia Lôndopu

Dipa dia lôndopu didi diambuluisha bantu badi basama bua bumvua bimpa. Bamua badi ne ditabuija dia kôndopibua ne bakuabu badi ne ditabuija dia kôndopa bakuabu bantu.

Dipa Dia Kuenza Bishima

Dipa dia kuenza bishima didi difidibua bua kuambuluisha bantu. Tshishima ntshintu tshidi Tatu wetu wa mu Diûlu wenza buetu tshidi tshikala tshinena tshipita tshitudi mua kudienzela ku bukola buetu. Yezu wakamba mu Dipungila Dipia-Dipia ne mu Mukanda wa Molomo ne; nekuikala bishima munkatshi mua aba badi bamuitabuija.

Satana Udi Mua Kuidikija Makola a Nyuma â

Satana udi mua kuenzeja bua malu enzeka adi idikija mapa a nyuma malelela. Udi mua kudienza mufuanangana pipi ne muanjelu. Udi mua kuenza bua malu mabi amueka bu mimpa ne makana. Udi mua kuenza bua muambi wa mafi amueka bu muambi mulelela. Udi mua kuenza bishima bua kushima bantu. Bena buloji, bena lubuku, bambidianganyi ba malu, ne bakuabu badi bafuanangana nabu, badi bapeta bukola budibu nabu kudi Satana ne kabena balondi ba Yezu to. Tudi ne bua kuikala ntanta nabu.

Satana udi mua kuenza malu amueka bu malelela, ne mushindu umua wa tuetu kumanya ne adi a mafi, udi ngua kulomba Tatu wetu wa mu Diûlu. Padi Satana widikija mapa a nyuma, netuikala ne ngumvuilu wa mpata, kayi ngumvuilu wa ditalala to. Dipa dia kumanya pikala mapa a nyuma adi malelela ne kumanya padiwu ngidikijilu ya Satana, didi dibikidibua ne dipa dia dijingulula.

Dilejangana

Mapa a nyuma ntshinyi?
Mushindu kayi utudi mua kujingulula pankatshi pa mapa a nyuma malelela ne ngidikijilu ya Satana?

Tudi Ne Bua Kutantshisha ne Kuenza Mudimu ne Mapa Atudi Nawu

Tudi mua kulonga bua kumanya mapa atudi nawu bituikala tulonga, tujila biakudia, ne tusambila. Tudi mua kuenza mudimu ne mapa etu amu patudi tutumikila mikenji ya Yezu. Nunku, netusua kuenza nawu mudimu bua kuambuluisha bakuabu ne kuambuluisha bua kuibaka Ekelezia wa Yezu Kilisto wa Bansantu ba Matuku a Ndekelu. Bituikala katuyi tutantshisha ne tuenza mudimu ne mapa etu to, netu’ajimija.

Yezu wakamba ne, katuena ne bua kuditambisha ne mapa a nyuma atudi babeneshibua nawu to. Katuena ne bua kuakula buawu kudi bantu badi kabayi ba’amona bu a tshijila to. Mapa â adi mafidibua kutudi bua bimpa bietu ne bua kubenesha bakuabu bantu. Tudi ne bua kuvuluka ne, mapa â adi a tshijila. Yezu udi utupesha mapa â kupitshila ku Nyuma wa Tshijila. Udi ulomba amu bua tumusakidila ne tuenza mudimu ne mapa â bu mudiye musua bua enza mudimu.

Dilejangana

Mushindu kayi utudi mua kujandula mapa atudi nawu?
Mushindu kayi utudi tulama ne tshijila mapa a nyuma?