Shapita 24
Dituku dia Kukukuila
Tatu wetu wa mu Diûlu wakatuambila bua tuangata dituku dimua lumingu lonsu bua kumukukuila. Tudi tupeta mabenesha a bungi patudi tuenza dituku edi dia tshijila.
Tatu Wetu wa mu Diûlu Wakatupesha Dituku dia Kukukuila mu Mushindu wa Kutuambuluisha
Tatu wetu wa mu Diûlu mmumanya ne tudi ne ntantu ya bungi. Tudi ne bua kuenza malu a bungi dituku dionsu. Tudi ne bua kuenza mudimu bua kupeta biakudia ne bilamba. Tudi ne bua kulongolola biakudia bietu ne kuenza midimu yetu ya pa tshibilu dituku dionsu.
Ne bionsu bia kuenza ebi, bidi bipepela bua kupua moyo Tatu wetu wa mu Diûlu. Bidi kabidi bipepela bua kupua moyo malu adi Tatu wetu wa mu Diûlu musua bua tuenza. Tudi tuela meji ku majinga etu a ku dituku pibita a Tatu wetu wa mu Diûlu.
Tatu wetu wa mu Diûlu mmumanya ne tudi dijinga ne diba dia kuela meji buenda. Tudi dijinga ne diba dia kulonga tshidiye musua bua tuenza. Bualu bua etshi, wakatuambila bua tupitshisha dituku dimua mu matuku muandamuteketa onsu bua tuikisha ku midimu yetu ne tulonga buenda.
Tatu wetu wa mu Diûlu wakafuka buloba kupitshila ku Yezu Kilisto mu bitupa bisambombo bia diba. Wakabikila bituba bia diba ebi ne matuku. Mu dituku dia muandamuteketa, wakikisha ku mudimu wa difuka buloba ebu. Wakatuambila bua ne tudi ne bua kuikisha dituku dimua lumingu lonsu ku mudimu wetu wa dituku dionsu.
Tatu Wetu wa mu Diûlu Wakatuambila Dituku Didi Dikala Dia Kukukuila
Tatu wetu wa mu Diûlu wakambila bantu mu bikondu bia kala bua kuangata dituku dia muandamuteketa dia lumingu bua dikala dituku dia kukukuila. Dituku edi divua bua kuambuluisha bantu bua kuvuluka ne, pakafukaye buloba, yeya wakikisha mu dituku dia muandamuteketa.
Panyima pa lufu lua Yezu, wakabika ku lufu mu dituku dia kumpala dia lumingu. Balondi ba Yezu bakangata dituku dia kumpala dia lumingu bu dituku dia kukukuila bua kuambuluisha bantu bua kuvuluka ne kunemeka dituku dia dibika dia ku lufu dia Yezu. Tudi tudibikila ne, dituku dia Mukalenga. (Yezu udi ubikidibua misangu mikuabu Mukalenga.) Tudi kabidi tudibikila ne dituku dia Sabata.* Nansha mudidi dikala dituku dikuabu dia lumingu dishilangana ne divua diangata kala bua kukukuila, didi amu dituku dimua dia mu matuku muandamuteketa. Tutshidi amu tuenza mudimu wetu wa tshibidilu matuku asambombo ku lumingu. Nunku mu dituku dia muandamuteketa, tudi tukukuila Tatu wetu wa mu Diûlu.
Mu tshikondu tshietu, bantu ba bungi mbangata dituku dia kumpala dia lumingu, didi dikala Dialumingu. Mu malu makesa, Tatu wetu wa mu Diûlu wakambila muambi wenda ne, bantu benda mu amua matunga badi mua kuangata dituku dikuabu bu dituku dia kukukuila.
Dialumingu didi dituku dia kukukuila.
Tudi Mua Kulama Dituku dia Mukalenga dia Tshijila
Kudi malu a bungi atudi ne bua kuenza mu dituku dia Mukalenga. Bualu bua mushinga wa bungi butudi mua kuenza, budi bua kuela meji bitangila Tatu wetu wa mu Diûlu ne Yezu mu nkatshi mua dituku. Tudi ne bua kuela meji ku malu adibu basua bua tumanya ne tuenza. Amua a ku malu atudi mua kuenza mu dituku dia kukukuila adi mua kutuambuluisha bua kuvuluka ne kulonga bitangila Tatu wetu wa mu Diûlu adi:
-
Kulonga mifundu idi yakula bua Tatu wetu wa mu Diûlu ne Yezu.
-
Kuambuluisha bakuabu bantu bua kulonga bitangila Ekelezia.
-
Kulongesha mêku etu bitangila Tatu wetu wa mu Diûlu ne Yezu ne bua bidibu basua bua tuenza.
-
Kuya mu bisangilu bia Ekelezia ne mu tulasa mutudi mua kulonga pamua bitangila lumu luimpa. Tudi mua kulonga miyuki ya kala idi itangila Yezu ne makuabu malongesha a lumu luimpa, ne tudi mua kuambilangana malu adi Tatu wetu wa mu Diûlu ne Yezu batuenzela.
-
Kuikisha ku mudimu utudi tuenza mu matuku makuabu a lumingu.
-
Kusambila.
-
Kusamba bantu badi basama ne kubambuluisha bua bumvua bimpa.
-
Kufunda amua a ku malu adi afika mu mêku etu bua tukumbana kuavuluka musangu udi ulua.
Bidimba bia Ekelezia wa Yezu Kilisto bidi ne bua kuabanyangana biakudia bia tshijila mu dituku dia kukukuila. Badi mua kudilongolola bua kubiabanyangana mu kuela meji bua Yezu ne bua malu adiye mutuenzela. Badi ne bua kulomba Tatu wetu wa mu Diûlu bua kubambuluisha bua kuvuluka Yezu. Padibu bangata biakudia bia tshijila, badi ne bua kuvuluka malaya adibu benza. Badi ne bua kuela meji bua malu avua Tatu wetu wa mu Diûlu mubalaya bikalabu batumikila Yezu.
Kudi malu a bungi atudi katuyi ne bua kuenza mu dituku dia kukukuila. Katuena bua kuenza mudimu to. Katuena bua kuenzeja mêku etu, basadidi betu, anyi bimuna bietu mudimu to. Katuena bua kubala bintu, kulonda ndongamu mu television, anyi kuteleja misambu idi itupangisha bua kuela meji bitangila Tatu wetu wa mu Diûlu ne Yezu to. Katuena bua kuya ku bibilu bia dipepeja dia mubidi to. Katuena mua kula anyi kupana bintu to. Bintu ebi bidi mua kuikala ne mushinga, kadi kabiena bituambuluisha bua kuela meji bitangila Tatu wetu wa mu Diûlu ne Yezu mu dituku edi dia tshijila to.
Kudi mua kuikala misangu itudi mua kuenza mudimu mu dituku dia kukukuila, kadi katuena ne bua kuidikija bua kuenza to. Padi kuenza mudimu kuikala ne mushinga menamena, tudi ne bua kuidikija bua kuela meji bitangila Tatu wetu wa mu Diûlu ne Yezu patudi tuenza mudimu.
Dilejangana
-
Ntshinyi tshitudi ne bua kuenza mu dituku dia Mukalenga?
-
Ntshinyi tshitudi katuyi mua kuenza mu dituku dia kukukuila?
Tatu Wetu wa mu Diûlu Udi Utubenesha bua Kulama Dituku dia Mukalenga dia Tshijila
Kipatshila ka dituku dia kukukuila kadi amu ka momumua. Didi dituku dia kuikisha ku mudimu utudi tuenza dituku dionsu. Didi dituku dia kulonga bitangila Tatu wetu wa mu Diûlu ne kulongolola bua moyo nenda. Didi dituku dia kuakaja moyo wetu mu kulonga bia bungi pa bidi Tatu wetu wa mu Diûlu musua bua tuenza.
Dituku edi didi dimpa buetu. Didi dituambuluisha bua kuvuluka Tatu wetu wa mu Diûlu ne kipatshila ka kuikala kuetu pa buloba apa. Patudi tuenza malu adi Tatu wetu wa mu Diûlu musua bua tuenza mu dituku dia Mukalenga, tudi tupeta mabenesha. Mêku etu adi ne disanka. Mubidi wetu udi utalajibua. Tudi tusemena pabuipi ne Tatu wetu wa mu Diûlu ne malongesha enda. Netukumbana bua kumvua bukola bua Nyuma wa Tshijila bikola menamena mu lubingu. Bualu tuvua batumikidi, Tatu wetu wa mu Diûlu neatuambuluisha bua kupeta biakudia, bilamba, ne bikuabu bintu bitudi tujinga. Neatuambuluisha bua kulonga bia bungi buenda ne kuikala ne disanka.
Dilejangana
-
Ntumua tua ku tuipatshila kayi tutudi ne bua kulamina dituku dia kukukuila bu dituku dia tshijila?