Milulu ne Mamanyisha
Shapita 33: Dilua Dibidi dia Yezu Kilisto
Christ in a Red Robe [Kilisto mu Muzabi Mukunza], kudi Minerva K. Teichert

Kudi bimanyinu bia bungi bidi bileja ne Dilua Dibidi dia Yezu Kilisto didi pabuipi.

Shapita 33

Dilua Dibidi dia Yezu Kilisto

Yezu Kilisto nealua kabidi pa buloba. Mbinganyi bikala bimanyinu bia kulua kuenda, ne mushindu kayi utudi mua kudilongolola bua kututakena nenda?

Yezu Wakalaya ne Nealua pa Buloba Kabidi

Matuku makumi anayi panyima pa Yezu mubika ku lufu, yeya ne Bapostolo benda bakatutakena ku mukuna ubikidibua ne Mukuna wa Olive. Tshikondu tshiakalua bua Yezu kupingana ku diûlu. Wakenza malu onsu avua Tatu wetu wa mu Diûlu mumutuma bua kuenza. Bapostolo benda bakamubandila muvuaye uya mu diûlu. Pavua Bapostolo munkatshi mua kubandila, banjelu babidi bakalua ne kubambila ne Yezu nealukila kabidi pa buloba. Kumbukila ku tshikondu atshi tô ne lelu, aba bakitabuija Yezu bakindila dipingana dienda. Dipingana dienda didi dibikidibua ne Dilua Dibidi dia Kilisto.

Diba dia Dilua Dibidi, Yezu neapueka ufuma mu diûlu ne bukola bunena. Neasukula buloba ku malu mabi onsu, ne Satana kakuikala kabidi ne bukola pa mutu pa bantu to. Yezu nealombola mu bidimu tshinunu ku mutu kua bantu bavua bikala balamata kudiye.

Dilejangana

  • Mushindu kayi utudi tumanya ne Yezu neapingana pa buloba kabidi?

Yezu Wakatuambila Tshiafika Kumpala kua Yeya Kualukila

Yezu wakatuambila malu a bungi afika kumpala kua yeya kulua kabidi. Malu â adi abikidibua ne bimanyinu bia Dilua Diibidi dienda. Wakatuambila bua tutangila ku bimanyinu ebi ne tuikala pabuipi bua kulua kuenda. Wakamba ne patudi tumona malu â afika, netumanya ne udi ulua mpidiewu. Kadi katua kumanya diba dijalama dia kulua kuenda to.

Bitualonga mifundu ne kuikala balamata kudi Yezu, netumanya muikala bimanyinu bia kulua kua Yezu. Malu a bungi neafika kumpala kua Yezu kulua pa buloba kabidi. Amua akadi mamana kufika, makuabu adi enda afika mpindiewu, ne adi mashala neafika mu matuku alualua.

Kumpala kua Dilua Dibidi dia Yezu, lumu luimpa neluyishibua kudi bisamba bionsu. Etshi netshisankisha bantu ba bungi ne netshibatuadila mabenesha. Makuabu malu alua kufika neatêta ditabuija dietu. Nekuikala malu mabi a bungi, manyungana a buloba, ne mishindu mikuabu ya dibutuka.

Nekuikala Ndululu Munena pa Buloba

Yezu wakamba ne netumanya ne kulua kuenda kudi pabuipi, patudi tumona malu mabi a bungi, mvita, ne makenga pa buloba. Etshi netshikala tshikondu tshia ndululu munena. Nekuikala manyungana a buloba, mpepela minena, masama, ne biyola. Mvula ya mabua neinyanga bikunyibua bia bantu pa buloba.

Bantu ba bungi nebalekela kunanga Tatu wetu wa mu Diûlu ne nebaya kudi Satana. Nebalekela kabidi kunanga ne kusadila bakuabu bantu ne nebabangisha kubakengesha. Nekuikala mvita ya bungi pa buloba. Matunga nealuangishangana. Mvita eyi neitungunuka tô ne mudi mvita minena ne ya ndekelu yenzeka, neikala mvita yabutula bantu bikola itu kayiyi mianji kuluanganyibua pa buloba. Nunku Yezu nealua.

Lumu Luimpa Luakapingulujibua

Bambi bakamba ne lumu luimpa nelupingulujibua pa buloba kumpala kua Yezu kulua kabidi. Lumu luimpa luakapingulujibua kupitshila ku Muambi Joseph Smith. Malongesha onsu a lumu luimpa atudi tukengela kumanya ne kuenza bua ne tudi mua kupingana kudi Tatu wetu wa mu Diûlu, akapingulujibua pa buloba.

Yezu wakamba ne netumanya ne uvua ulua mpidiewu pikala Mukanda wa Molomo mupatudibua ne mufidibua kudi buloba bujima. Kukadi mutantshi mula, muambi Yeshaya ne muambi Yehezekele bakamba bua Mukanda wa Molomo. Mukanda wa Molomo uvua mukudimunyibua kudi Muambi Joseph Smith mu muakulu wa Angele. Wakakudimunyibua nunku mu miakulu ya bungi. Neufidibua kudi bisamba bionsu bia pa buloba kumpala kua Yezu kulua.

Nzubu wa Isalele Udi ne Bua Kukunguijibua Kabidi

Tatu wetu wa mu Diûlu wakamba ne ndelanganyi ya nzubu wa Isalele* idi ne bua kuteleja ne kuitaba lumu luimpa ne kudilongolola bua kututakena ne Yezu padiye ulua kabidi. Aba badi bitaba lumu luimpa badi ne bua kululongesha bantu bonsu, kuibaka ntempelo, ne kuenza milulu ya bantu badi bafua.

Bantu bonsu ba ku nzubu wa Isalele, nansha ba mu mashi anyi ba bakolesha, badi bakudimuka ku Ekelezia padibu bitaba lumu luimpa lua Yezu Kilisto. Bulaba Bulaya buakabeneshibua bua dikunguijibua dia babungi ba ku ndelanganyi ya Abalahama. Ndelanganyi ya Abalahama idi yangata bantu bamanyika bu Bena Alaba ne Bena Yuda, ne bakuabu. Ndelanganyi ya bantu ba mu Mukanda wa Molomo mu Amelika, badi kabidi ndelanganyi ya Abalahama, badi bitaba lumu luimpa ne badi balua bantu bakola ne bakana.

Lumu Luimpa Neluyishibua mu Buloba Bujima

Yezu wakamba ne netumanya ne ukadi ulua mpindiewu, padi balondi benda bayisha lumu luimpa mu buloba bujima. Kumbukila ku tshikondu tshivua Ekelezia mupingulujibua, bena bukenji bavua batumibua bua kuyisha lumu luimpa mu matunga mashilangana. Bena bukenji ba bungi badi bayisha lumu luimpa mpidiewu bu mu miaba yonsu pa buloba. Tshidimba tshionsu tshia Ekelezia tshidi tshilombibua bua kuambila malela atshi ne balunda lumu luimpa, ne babungi badi baya mu matunga makuabu bua kuyisha lumu luimpa, bua bantu bonsu bapeta mushindu wa kuluteleja.

Eliya Wakalua

Muambi Malaki mu Bibilia wakamba ne, kumpala kua Yezu kulua musangu muibidi, muambi Eliya neakumbula buloba. Nealuja bukôkeshi bua kusuika mêku pamua bua kashidi. Neenza bua bantu bikala ne disua dia kulonga pa bankambua babu ne ndelanganyi yabu, ne nebabambuluisha bua bapandishibua. Mu Ngondu Muinayi 1836, Eliya wakalua ne wakapinguluja bukôkeshi ebu kudi Muambi Joseph Smith. Bu muvua Eliya mulua, mêku adi mua kusuikibua pamua mpidiewu mu ntempelo pa buloba lelu.

Tshimenga Tshipia-tshipia tshia Yelushalema Netshibakibua

Yezu wakamba ne, netumanya ne ukadi ulua mpidiewu pibaka Ekelezia wenda tshimenga tshibikidibua Yelushalema Mupia-Mupia. Yezu wakamba ne nealombola tshimenga atshi, bantu bakana nebikalamu. Wakatuambila muaba wibakibua tshimenga etshi. Nebikala mu musoku wa Missouri, mu Etats Unis.

Ebi bidi amu bimanyinu bikesa biatuleja ne Yezu ukadi ulua mpindiewu. Mifundu idi ituambila bua bikuabu bimanyinu. Nansha mudi bimanyinu bikuabu bia bungi bimana kumonyibua, katuena bamanya diba dijalama dialua Yezu kabidi to.

Dilejangana

  • Mushindu kayi utudi tumanya ne Dilua Dibidi dia Yezu dikadi pabuipi?

  • Mbimanyinu kayi bia Dilua Dibidi dia Yezu?

Tudi Mua Kuikala ne Ditalala ne Ditekemena Nansha Pikala Malu Mabi ne Ndululu Bitunyunguluka

Tudi ne bua kuikala badilongolola bua Dilua Dibidi dia Yezu. Mushindu muimpa wa tuetu kudilongolola bua kulua kuenda udi ngua kutumikila malongesha enda dituku dionsu. Tudi kabidi ne bua kutumikila mikenji ne maludiki adiye ufila buetu kudi Mulombodi Mukulu wa Ekelezia lelu. Tudi ne bua kuikala bakumbana bua kuikala ne Nyuma wa Tshijila netu meba onsu bua aludika meji etu ne bienzedi bietu. Yezu wakamba ne, bituikala pabuipi padiye ulua, katuakuikala ne bôwa to. Netuikala ne disanka ne netujinga kuikala nenda. Bantu bimpa kabakubutudibua paluaye to. Nebikala ne moyo pa buloba, ne bana babu nebakola kabayi ne bubi. Yezu neikala nabu ne neababenesha ne neabalombola.

Padi Yezu ulua kabidi ufuma mu diûlu, bantu babi nebabutudibua. Bantu bimpa bavua bafua, nebajuka mu nkita yabu bua kututakena nenda padiye ufuma mu diûlu. Bantu babi kabakujuka mu nkita yabu to tô ne panyima pa bidimu 1000. Tshitupa etshi tshia bidimu 1000 tshidi tshimanyika bu Tshikondu tshia Bidimu Tshinunu.*

Pavua Yezu ne moyo pa buloba, bantu bakesa bikola bavua bamanya ne yeya, Mupandishi wa buloba bujima, uvua mulua. Padi Yezu ulua kabidi, bantu bonsu nebamanya ne, udi Yezu Kilisto, Muana wa Baluma wa Nzambi, Mupandishi wa buloba bujima.

Dilejangana

  • Mushindu kayi udi kumanya kua bimanyinu bia Dilua Dibidi kutuambuluisha?

  • Ntshinyi tshiafikila bantu bimpa pa buloba padi Yezu upingana?

  • Ntshinyi tshiafikila bantu babi bikala ne moyo pa buloba?