Kilisto wakatupepejela bua tuikala ne moyo panyima pa lufu luetu.
Shapita 35
Moyo Panyima pa Lufu
Mushindu kayi utudi mua kudilongolola bua moyo udi ulua?
Nyuma Yetu Idi ne Moyo Panyima pa Lufu Luetu
Tudi bana ba nyuma ba Tatu wetu wa mu Diûlu. Patuvua nenda mu diûlu bu nyuma, katuvua ne mibidi ya misunyi to. Tshivua tshitupa tshia dilongolola dienda bua tuledibua pa buloba ne nyuma yetu ipeta mibidi ya misunyi ne mifuba. Nyuma yetu ki idi ifila moyo mu mibidi yetu ya misunyi patudi ne moyo pa buloba.
Amu bu muvua kuledibua kuikala tshitupa tshia dilongolola dia Tatu wetu wa mu Diûlu buetu, tshikuabu tshitupa tshia dilongolola dienda tshidi bua tufua. Patudi tufua, nyuma yetu idi yumbuka mu mibidi yetu. Kakuyi Nyuma, mubidi kena ne moyo to ne udi utekibua mu lukita.
Kadi nyuma yetu ivua ne moyo kumpala kua kuledibua kuetu, ne neitungunuka kuikala ne moyo panyima pa lufu. Patudi tufua, nyuma yetu idi iya mu muaba wa nyuma bua kuindila dibika dia ku lufu, patshidi mubidi mushala mu lukita.
Mu muaba wa nyuma, nyuma yetu neikala ne mushindu umua bu mutuvua ne moyo pa buloba ne mibidi ya misunyi ne mifuba. Netuikala bu mutudi mpidiewu apa. Netuela meji mu ngikadilu umua ne netuitabuija malu amua bu mutuvua panu. Aba badi bakana mu moyo ewu, nebikala amu bakana. Aba bavua kabayi bakana nebikala amu kabayi bakana. Netuikala amu ne majinga a momumua panyima pa lufu luetu amu bu mutuvua nawu pa buloba.
Dilejangana
-
Mmuaba kayi udi mibidi yetu ya nyuma ifuma?
-
Ntshinyi tshidi tshiyifikila patudi tufua?
-
Mushindu kayi udi mibidi ya nyuma?
Muaba wa Nyuma udi Muaba wa Kuenza Mudimu, Kulonga, ne Kuindila
Bambi ba Tatu wetu wa mu Diûlu bakatuambila malu a bungi adi atangila muaba wa nyuma. Muaba umua udi ubikidibua ne mpaladizu. Padi muntu ufua uvua muitaba lumu luimpa ne muikala mulondi wa Yezu wa lulamatu, nyuma wa muntu awu udi uya mu mpaladiso. Ewu udi muaba udi bantu ne disanka ne ditalala. Emu kabena ne ndululu, dibungama, ne busâmi to. Badi mua kuenza malu a mushinga a bungi, bu mudi kulongesha bakuabu lumu luimpa anyi kulonga biabungi bualu.
Muaba mukuabu udi ubikidibua ne nzubu wa lukanu wa nyuma. Mishindu ya bantu isatu neikalamu. Nemuikala aba bavua bantu babi mu moyo ewu, aba bavua bikala ne mioyo mimpa kadi kabayi bitaba lumu luimpa to, ne aba bavua kabayi bapeta mushindu wa kuteleja lumu luimpa.
Bambi ba Tatu wetu wa mu Diûlu bakatuambila ne, bena bukenji ba munkatshi mua bakana mu muaba wa nyuma, nebatumibua bua kulongesha lumu luimpa kudi nyuma yonsu ya bantu bafua. Babungi nebitaba lumu luimpa ne nebakudimuna mitshima. Milulu ya lupandu idi ikengela neyenjibua buabu kudi bantu badi ne moyo mu ntempelo ya Tatu wetu wa mu Diûlu. Malela anyi bidimba bikuabu bia Ekelezia nebienza milulu eyi buabu. Nunku nebakumbana bua kupatuka mu nzubu wa lukanu wa nyuma. Mu mushindu ewu, Tatu wetu wa mu Diûlu udi ufila mushindu wa bana benda bonsu kupeta mabenesha a lumu luimpa mu diba dionsu didibu ne moyo pa buloba.
Ku ndekelu aba bonsu badi mu muaba wa nyuma nebabika ku lufu. Mu dibika dia ku lufu, nyuma ne mubidi nebisangishibua pamua kabidi. Nansha pikala mubidi uvua mubola ne mulua lupuishi pavuayi mu lukita, neulua mubidi udi kawuyi ufua ne mujima. Mifundu idi yamba ne, nansha lusuki lua ku mutu kuetu kaluakujimina to, ne kabidi bintu bionsu nebipingulujibua mu ngikadilu wabi wa mukumbana ne mujima.
Mu dibika dia ku lufu, mubidi ne nyuma nebisangishibua, kabiakutukakana kabidi nansha. Kupitshila ku dinanga dienda ne mulambu wa bupikudi munena wenda buetu, Yezu wakatupesha dipa dia kukema edi dia dibika dia kulufu bua muntu yonsu udi ne moyo pa buloba ebu.
Dilejangana
-
Mbitupa kayi bibidi bidi mu muaba wa nyuma?
-
Nganyi wikala mu mpaladizu? Ntshinyi tshidi nyuma idi mu mpaladizu yenza?
-
Nganyi wikala mu nzubu wa lukanu wa nyuma? Ntshinyi tshidi tshifikaku?
Netulumbuluishibua Bonsu ku Tshilumbuluilu tshia Ndekelu
Tudi tulumbuluishibua njila ya bungi mu mioyo yetu ya tshiendelela. Tuakalumbuluishibua patuvua bikala ne moyo kudi Tatu wetu wa mu Diûlu bua kumona bituikala tuvua bakumbana bua kulua pa buloba apa ne kupeta mibidi. Tudi tulumbuluishibua patudi apa bua kumona bituikala bakumbana bua kutambuishibua. Bantu baluma badi balumbuluishibua bua kumona bikalabu bakumba bua kupeshibua buakuidi. Tudi tulumbuluishibua bua kumona bituikala bakumbana bua kubuela mu ntempelo bua kupeta mabenesha masunguluka. Panyima pa lufu luetu, tudi tulumbuluishibua, ne difutu ditudi tupeta didi dilondeshela mushindu utuvua bikala pa buloba.
Panyima pa dibika dia ku lufu dietu, netutuadibua kumpala kua Tatu wetu wa mu Diûlu bua kulumbululuishibua bua musangu wa ndekelu. Etshi tshidi tshibikidibua ne Tshilumbuluilu tshia Ndekelu. Tshilumbuluilu tshia ndekelu etshi netshijadika muaba utuaya bua kusomba kashidi. Netulumbuluishibua bua malu atudi bakula ne benza ne belela meji mu moyo ewu. Netulumbuluishibua bua mushindu muimpa utudi balonda malongesha a Yezu. Netulumbuluishibua kupitshila ku miandiku ivua milamibua pa buloba ebu ne mu diûlu. Tatu wetu wa mu Diûlu nealomba Yezu bua atulumbuluisha.
Yezu mmutunanga bikola, kadi udi mulumbuluishi mululama ne udi utulumbuluisha bilondeshela munshindu uvua moyo wetu muikala. Bionsu bitudi belela meji anyi bamba bidi bifundibua, mu meji etu ne mu miandiku bivua bilamibua. Yezu mmumanya bienzedi bietu bionsu, ne patudi tuimana kumpala kuenda, netubivuluka kabidi.
Dilejangana
-
Tela imua misangu itudi tulumbuluishibua.
-
Amua malu kayi atuikala ne bua kulumbuluishibua?
Tudi Tujadika Kupitshila ku Bienzedi Bietu bia ku Dituku Tshiatufikila Panyima pa Lufu Luetu
Bituenza malu mimpa mu moyo ewu, netudilongolola bua kusomba kashidi ne Tatu wetu wa mu Diûlu ne bantu bimpa ba pa buloba. Bituikala katuvua balonda mikenji ya Tatu wetu wa mu Diûlu, netudiumvua bibi diba dituimana kumpala kua Yezu bua kulumbuluishibua.
Bambi bakamba ne, mêyi etu, meji etu, ne midimu yetu yonsu neitupîsha pikalabi bivua bibi. Bakamba ne, bantu babi nebimana kumpala kua Yezu ne bundu ne dipila dinena, ne nebajinga bua kusokoma kumpala kuenda.
Nunku, bua muntu yonsu uvua ne moyo pa buloba ebu, dituku dia Tshilumbuluilu tshia Ndekelu nedikala dituku dimpa anyi dituku dia dibungama. Tudi ne bua kudilongolola bua tshikondu etshi tshilualua, bua tshietu tshikala dituku dia disanka. Tudi basua kukumbana bua kuimana kumpala kua Tatu wetu wa mu Diûlu katuyi ne bundu ne kumuteleja wamba ne, witabi bituvua benza mu moyo wetu.
Tudi ne bua kuela meji bua tshilumbuluilu tshia ndekelu. Tudi ne bua kuikala ne lulamatu kudi Yezu Kilisto ne kukudimuna mitshima ku mibi yetu tô ne ku ndekelu kua mioyo yetu bua tuikala pabuipi buatshi. Atshi tshidi mushindu umua utudi mua kuikala bakupudibua ku bubi bonsu padi tshikondu atshi tshilua. Bituikala ne ditabuija mu Yezu Kilisto ne bakudimuna mitshima ku mibi yonsu, Tatu wetu wa mu Diûlu neatubuikidila mibi yetu ne neatuambuluisha bua tulua katuyi ne bubi to. Bituikala balamata Yezu Kilisto, netupitshisha mioyo yetu mu kuenza malu mimpa, mu kuela meji mimpa, ne mu kuakula mêyi mimpa. Netuepuka bantu, mikanda, ne miaba bidi bienza bua tuela meji mabi anyi katuikadi bakana mu mushindu yonsu.
Tatu wetu wa mu Diûlu mmunanga umua yonsu wa kutudi ne mmusua bua tuikala ne moyo udi mukumbana bua kupingana kumpala kuenda. Bituikala ne dijinga dia kusomba nenda ne bantu bimpa batudi bananga, tudi ne bua kuikala ne ditabuija mu Yezu Kilisto ne kuenza malu adiye mutuelela mukenji bua kuenza. Tudi kabidi ne bua kuambuluisha mêku etu bua ikala ne mioyo mimpa. Tatu wetu wa mu Diûlu neatuambuluisha. Wakatupesha lumu luimpa bua kutuleja njila ne wakatuambila bua ne tuikala dituku dionsu tumusambila bua diambuluisha dienda.
Dilejangana
-
Bua tshinyi meji ne bienzedi bietu bia ku dituku bidi ne mushinga?
-
Ntshinyi tshiudi mua kuenza bua kuakaja meji, mêyi, ne bienzedi bieba?
-
Bua tshinyi tudi dijinga ne diambuluisha dia Tatu wetu wa mu Diûlu bua kulua bajalama?
-
Bua tshinyi bidi amu kupitshila ku ditabuija mu Yezu Kilisto kutudi mua kulumbuluishibua bakumbana bua kusomba ne Tatu wetu wa mu Diûlu?