Ntuadijilu

Mukanda ewu neakuambuluisha bua kulonga ne kulongesha nshindamenu ya tshishikamenu tshia Lumu Luimpa lua Yezu Kilisto. Dimanya dia nshindamenu eyi nedikuambuluisha bua kumvua kipatshila ka moyo ne mushindu wa kuikala ne disanka bulelela. Nshindamenu idi miumvuija mu mukanda ewu idi milelela. Pawudi ulonga nshindamenu eyi ne wela meji ne usambila buayi, neudimanyina, ne Nyuma wa Tshijila neakujadikila ne idi milelela.

Udi mua kuenza mudimu ne mukanda ewu bua tuipatshila tua bungi. Udi mua kulonga nawu ne kudimanyina nkayeba. Udi mua kulongolola nawu malongesha anyi kuambuluisha bua kumvuija lumu luimpa kudi bakuabu.

Udi ne mua kuenza mudimu ne mukanda ewu bua kulonga kua mu dîku ne kua mu dilolo dia mu dîku. Dilongesha dionsu didi ne makonka awudi wewa bu muledi anyi mulongeshi mua kukonka bana bua kumona mushindu udibu bumvua.

Pawudi ulongesha malongesha a mu mukanda ewu, udi mua kulongesha shapita ya bungi mipita pa umua mu tshitupa tshia kalasa anyi kupitshisha bitupa bia bungi pa tshimua bia kalasa mu kulongesha shapita umua. Jadika ne balongi beba badi bumvua nshindamenu bimpa kumpala kua kuangata shapita mukuabu. Pawudi ne mifundu mikudimuna, tangila ku malu mamba a mifundu ne lejanganayi buawu.

Bu mulongeshi, manya ne newikala ne bitupa 21 anyi 25 bia kalasa bua kulongesha mu tshidimu tshijima. Etshi tshidi tshiumvuija ne udi dijinga ne kusangisha malongesha 10 anyi a bungi. Tangila majinga a kalasa keba ne pangadika malongesha a kusangisha ne malongesha awudi ne bua kupitshisha meba a bungi.

Pabuipi ne kundekelu kua tshidimu, Neujinga mua kupitshisha kalasa kamua anyi tubidi mu kulejangana Tunungu tua Ditabuija, tudi tuikala kabidi mu mukanda ewu. Udi kabidi mua kuenza mudimu ne Tunungu tua Ditabuija bua kumuenununa malongesha.

Baledi ne balongeshi, sambilayi bua buludiki panudi nulongolola ne nulongesha malongesha â. Lekelayi Nyuma wa Tshijila anuludika mu lumvu luenu ne mu malongesha enu. Tshidimba tshionsu tshidi tshikumbana, tshidi ne bua kubala shapita ne kulua tshidilongolola bua kuabanyangana ne bidimba bikuabu mu kalasa ka malejangana.

Pawudi umona muaku muela tshimanyinu tshia *, udi mua kupeta diumvuija diawu mu “Miaku ya Kumanya” tshitupa tshia ndekelu mu mukanda ewu. Miaku mikuabu adi kabidi miela koku bua kukuambuluisha bua kumvua diumvuija diawu.

Nzambi anubenesha mu dilonga ne disambila dia malelela adi mu mukanda ewu.