Milulu ne Mamanyisha
Shapita 5: Yezu Wakafuka Buloba
dibulungu dia Buloba

Shapita 5

Yezu Wakafuka Buloba

Nganyi udi mufuka buloba? Buatshinyi wakabufuka?

Tuvua Dijinga ne Buloba

Tshitupa tshia dilongolola divua Tatu wetu wa mu Diûlu mutumvuija mu diûlu tshivua bua tuetu kushiya diûlu bua mutantshi. Tuvua dijinga ne muaba wa kuya, ntanta ne kumpala kuenda, bua tupeta mibidi ya misunyi ne mifuba ne bua tutêtshibua bua kuleja ne tudi mua kuenza masungula mimpa. Uvua dijinga ne muntu bua kutuenzela muaba ewu. Wakasungula Yezu bua kuwenzela.

Dilejangana

  • Bua tshinyi Nzambi uvua mulongolola bua kutuenzela buloba?

Yezu Wakafuka Buloba

Yezu wakafuka buloba. Wakafuka munya ne butuku. Yezu wakafuka diba, ngondu ne mitoto. Wakatapulula mâyi ne bulaba bûma ne wakafuka mbuwa, majiba ne misulu. Wakakuna bisosa, mitshi, bilongu ne mishindu yonsu ya bikunyibua pa buloba. Nanku wakatêka nyama, bikela, nyunyi ne tuishi pa buloba. Pakajikija Yezu bionsu ebi, buloba buakadi pabuipi bua bantu kusombapu.

Nanku Tatu wetu wa mu Diûlu wakafuka muntu muluma ne muntu mukaji. Muntu muluma uvua dîna ne Adama, ne muntu mukaji uvua dîna ne Eva. Bavua bonsu ne mubidi wa musunyi ne mifuba bu mubidi wa Tatu wetu wa mu Diûlu. Mudimu ewu yonsu wa kufuka buloba ne kuteka bintu bia moyo pamutu pabu, udi ubikidibua ne Bufuki. Tatu wetu wa mu Diûlu wakasanka ne buloba ne bintu bionsu bivuaye muludika Yezu bua kutekapu.

Dilejangana

  • Mushindu kayi uvua Adama ne Eva bashilangana ne bintu bikuabu bivua Nzambi mufuka?

Bifukibua bia Tatu wa mu Diûlu Bidi Bileja ne Mmutunanga

Tudi basombela mpidiewu mu buloba buimpa buvua Tatu wetu wa mu Diûlu muludika Yezu bua enza. Diba didi ditupesha luya ne butoka. Mvula udi wenza bua bikunyibua bikola ne udi utupesha mâyi a kunua. Bikunyibua ne nyama pa buloba bidi bitupesha biakudia ne bia kuluata.

Yezu wakenza bintu bionsu ebi buetu, ku buludiki bua Tatu wetu wa mu Diûlu. Patudi tumona ne wakatuenzela bintu bionsu ebi, tudi tumanya ne Tatu wetu wa mu Diûlu mmutunanga ne udi ututangila.

Dilejangana

  • Ela meji pa bimua bia ku bintu bivua Tatu wetu wa mu Diûlu mutuenzela.

  • Mushindu kayi utudi tumanya ne Tatu wetu wa mu Diûlu mmutunanga ne udi ututangila?

Tudi Mua Kuleja ne Tudi ne Kusakidila bua Buloba

Tudi ne bua kuikala tuvuluka ne Tatu wetu wa mu Diûlu wakenzela bintu bionsu bidi pa buloba buetu. Kena usanka patudi katuyi tuvuluka bualu ebu. Tudi mua kumuleja ne tudi ne kusakidila mu kuenza mudimu ne lungenyi bintu bidi pa buloba. Katuena ne bua kunyangakaja tshintu pa buloba to. Tudi ne bua kutangila buloba ne kubulama bimpa. Tudi ne bua kusakidila Tatu wetu wa mu Diûlu bua buloba bujima ebu buimpa patudi tusambila kudiye. Tudi kabidi tumuleja ne tudi ne kusakidila bua buloba, mu kuenza kua malu adiye musua bua tuenza apa.

Dilejangana

  • Mushindu kayi utudi mua kuleja Tatu wetu wa mu Diûlu ne tudi ne kusakidila bua buloba?