Shapita 8
Kuakula ne Tatu wa mu Diûlu
Tatu wetu wa mu Diûlu mmutunanga bikola. Wakatuenzela mushindu wa kuakula nenda diba dionsu ditudi basua. Mushindu kayi utudi mua kuakula ne Tatu wetu wa mu Diûlu?
Tudi Mua Kuakula ne Tatu Wetu wa mu Diûlu
Kuakula ne Tatu wetu wa mu Diûlu kudi kubikidibua ne disambila. Nansha mudi Tatu wetu wa mu Diûlu musombela mu diûlu, tudi mua kuakula nenda, ne udi ututeleja. Mmusua bua kutuambuluisha. Udi utulomba bua tuakula nenda. Patudi tuakula nenda, neatuambuluisha bua kuenza malu adi mimpa a tuetu kuenza.
Tudi mua kuambila Tatu wetu wa mu Diûlu malu atudi nawu mu meji. Tudi mua kumuambila ne tudi bamunanga. Tudi mua kumuambila ne tudi ne kusakidila bua bintu biakatupeshaye. Tudi mua kumulomba bua atuambuluisha.
Tudi mua kuakula ne Tatu wetu wa mu Diûlu diba dionsu ditudi tujinga kuakula nenda. Tudi ne bua kuakula nenda patudi nkayetu. Patudi nkayetu, tudi mua kuakula nenda pa ngumvuilu ne malu etu a nkaya. Tudi ne bua kuakula nenda bu nansha mudinda ne dilolo dionsu.
Tudi kabidi ne bua kuakula nenda pamua ne dîku dietu. Tudi mua kuenza nunku mudinda ne dilolo dionsu. Tudi kabidi mua kuenza nunku kumpala kua didia patudi tumusakidila bua biakudia.
Tatu wetu wa mu Diûlu kakubenga kusua bua tuyukila nenda nansha. Neikala amu mutunanga ne musua bua kutuambuluisha. Nansha patudi tuenza malu mabi, udi amu mutunanga. Neatuteleja ne neatuambuluisha.
Dilejangana
-
Bua tshinyi tudi ne bua kuakula ne Tatu wetu wa mu Diûlu?
-
Ndiba kayi ditudi ne bua kuakula nenda?
Tudi ne bua kusambila nkayetu ne dîku mudinda ne butuku.
Tatu Wetu wa mu Diûlu Wakatuambila Mushindu wa Kuakula Nenda
Patudi tusambila, tudi ne bua kuambila Tatu wetu wa mu Diûlu bintu bitudi tumvua ne bitudi nabi dijinga. Katuena ne bua kuamba mêyi amua misangu yonsu itudi tuakula nenda to. Katuenza dijinga ne kuimba anyi kuela mbila to.
Wakatuambila mushindu wa kuakula nenda. Tudi ne bua kuakula buludi kudiye, tuamba ne: “Tatu wetu wa mu Diûlu,” anyi miaku mifuanangana. Tudi ne bua kuakula nenda mu dinanga ne mu kanemu.
Pashisha, tudi ne bua kumusakidila bua malu adiye mutuenzela.
Ebi bidi bimua bia ku bintu bitudi ne bua kumusakidila:
-
Tudi ne bua kumusakidila bua buloba buimpa ne bua biakudia, bilamba, ne bikuabu bintu bitudi nabi.
-
Tudi ne bua kumusakidila bua malongesha enda ne bua dikumbana dietu dia kulonga biabungi buenda.
-
Tudi ne bua kumusakidila bua dîku dietu ne balunda betu, bua bukola bua mubidi buetu buimpa, ne bua mudimu wetu.
Nunku tudi tumulomba bintu bitudi nabi dijinga. Ebi bidi bimua bia ku bintu bitudi ne bua kujinga kulomba:
-
Tudi mua kumulomba bua atuambuluisha bua kumanya malu adi malelela ne malu adi ka’ayi malelela.
-
Tudi mua kumulomba bua atukuba tuetu ne mêku etu ne bena mutumba betu.
-
Tudi mua kumulomba bua atuambuluisha bua kuenza malu adiye musua bua tuenza.
-
Tudi mua kumulomba bua atuambuluisha bua kusungula bua kuenza malu mimpa.
-
Tudi mua kumulomba bua atuambuluisha bua tukudimuna mutshima ku mibi yetu.
-
Tudi mua kumulomba bua atuambuluisha bua tupeta biakudia bipita bungi bua dituku.
-
Tudi mua kumulomba bua atuambuluisha bua kusolakaja malu etu.
-
Tudi mua kumulomba bua ambuluisha dîku dietu anyi balunda betu bua basolakaja malu adibu nawu.
Tudi ne bua kujikija disambila dietu mu kuamba ne, “Mu dîna dia Yezu Kilisto, amena.” Etshi tshidi tshituambuluisha bua kuvuluka ne Yezu udi Mupandishi wetu. Yezu udi wenza mudimu ku buludiki bua Tatu wetu wa mu Diûlu bua kutuambuluisha ne bintu bionsu bitudi tujinga. Tudi ne bua kutela dîna dia Yezu ne kanemu.
Dilejangana
-
Patudi tuakula ne Tatu wetu wa mu Diûlu, mushindu kayi utudi tubangisha?
-
Bimua bia ku bintu kayi bitudi mua kumusakidila?
-
Bimua bia ku bintu kayi bitudi mua kumulomba?
-
Ntshinyi tshitudi tuamba patudi tujikija kuakula ne Tatu wetu wa mu Diûlu?
Tatu Wetu wa mu Diûlu Utu Utuandamuna
Tudi mua kuikala bajadikibua ne Tatu wetu wa mu Diûlu udi ututeleja. Mmumanya bintu bidi bimpa bitudi mua kuikala nabi. Utuanu pabuipi bua kutuambuluisha.
Ku misangu, Tatu wetu wa mu Diûlu udi utuma diandamuna kupitshila ku Nyuma wa Tshijila. Nyuma wa Tshijila udi utuambuluisha bua kumvua malu atudi dijinga ne kumanya ne kuenza. Misangu mikuabu Nyuma wa Tshijila udi usaka muntu mukuabu bua kutuambuluisha.
Tudi ne bua kuikala ne disua bua kuitaba mandamuna adi Tatu wetu wa mu Diûlu utupesha. Udi mua kuikala kayi utupesha bintu bituvua bamulomba to. Udi mua kuikala kayi utuandamuna mu mushindu utuvua bindila to. Kadi mmumanya tshidi tshimpa buetu.
Dilejangana
-
Mushindu kayi udi Tatu wetu wa mu Diûlu utuandamuna?
-
Bua tshinyi katu utupesha bintu bitudi tulomba?
Tudi Tulua Bantu Bimpa ku Disambila
Tudi mua kuikala katuyi bamanya malu mimpa a kuenza to. Tudi mua kuikala ne bôwa. Tudi mua kuikala katuyi bamanya mua kusolakaja malu etu. Tudi mua kuikala katuyi bamanya malu adi malelela ne malu adi ka’ayi malelela. Tudi mua kuikala bamanya malu mimpa a kuenza kadi katuyi ne bukola bua bungi bua ku’enza to.
Patudi tuakula ne Tatu wetu wa mu Diûlu ku misangu, udi utuambuluisha ne malu etu. Udi utuambuluisha bua kumanya ne kuenza malu mimpa. Patudi tumanya ne tuenza malu mimpa, tudi tulua bantu bimpa. Tudi tulua bafuanangana ne Tatu wetu wa mu Diûlu.
Dilejangana
-
Mushindu kayi utudi tulua bantu bimpa patudi tuakula ne Tatu wetu wa mu Diûlu?