Shapita 26
Bululama
Tatu wetu wa mu Diûlu udi mululama mu bionsu bidiye wenza. Mmusua bua tuikala petu balulama anyi?
Tatu Wetu wa mu Diûlu Udi Utuambila bua Tuikala Balulama mu Bionsu Bitudi Tuenza
Kuikala mululama kudi kumvuija ne kuamba bulelela. Kuikala mululama kudi kumvuija ne kubenga kushima ne kuiba. Patudi tuamba malu adi ka’ayi malelela, tudi tushima. Patudi tuamba amu tshitupa tshia bulelela, tudi tushima. Patudi tulombola bantu bua bitabuija tshintu tshidi katshiyi tshilelela, katuena bikala balulama to.
Kuiba kudi kuangata tshintu tshia muntu mukuabu kakuyi ditaba dia muntu to. Kuangata tshintu mu tshisalu kuyi ufuta, kudi kuiba. Tatu wetu wa mu Diûlu wakatuambila bua katuibi to.
Bantu balulama badi benza mudimu bikola mu meba onsu adibu bafutshibua. Mfumu ya midimu idi milulama, idi ifuta aba badi bayenzela mudimu bilondeshela ku bidi bena mudimu bakumbanyina. Bantu balulama badi batua mishinga mijalama ku midimu ne bintu bidibu bapana. Tudi ne bua kuikala balulama bituikala basua kusomba ne Tatu wetu mu Diûlu.
Satana udi utêta kutusuisha bua katuikadi balulama to. Patudi katuyi balulama mu mushindu yonsu, tudi tulonda Satana. Satana mmunanga mafi. Satana mmusua bua tuela meji ne, bidi bia lungenyi bua kubenga kuikala mululama. Udi utêta bua kutuelesha meji ne netuikala ne disanka patudi katuyi balulama. Mmusua bua tuela meji ne, kubenga kuikala balulama katshiena bubi to. Satana mmusua bua katuikadi balulama to, bua katuikadi ne disanka.
Tatu wetu wa mu Diûlu wakatuambila bua tuikala balulama misangu yonsu. Udi ubungama patudi tushima. Mmusua bua tumanya ne, kushima kudi amu bubi. Kubenga kuikala balulama kudi amu kubi ne kakuena kutupesha disanka to.
Bamua bantu badi biba bintu bualu badi bela meji ne badi ne bunema bua kuikala nabi. Bamua bansonga badi biba mu kalasa bua kupeta bipeta bimpa anyi bualu balongi bakuabu badi benza nanku. Bamua bantu badi bashima bua bakuabu bela meji bimpa buabu. Kakuena nansha kamua ka ku tuipatshila etu kadi kavuija kuiba anyi kushima bimpa to. Patudi tudikankamika bua kushima, katuena balulama to.
Dilejangana
-
Bululama ntshinyi?
-
Nganyi utudi tulonda patudi balulama?
Tudi Mua Kuikala Balulama mu Bionsu Bitudi Tuenza
Tudi mua kuikala balulama mu kuikala ne moyo mukola bua kuamba bulelela, nansha biobi bikala bikola bua kuenza. Tatu wetu wa mu Diûlu neatuambuluisha bua tuikala balulama bituamulomba. Neatuma Nyuma wa Tshijila bua kutuambuluisha bua kusungula bua kuikala balulama. Nyuma wa Tshijila neatuambuluisha bua kumanya ne, kuikala mululama tshidi tshintu tshiakana tshia kuenza.
Patudi tumvua malongesha a Yezu, netujinga kuikala balulama mu bionsu bitudi tuenza. Yezu wakatulongesha ne, tudi bana ba Tatu wetu wa mu Diûlu ne tudi bonsu bana ba muntu umua baluma ne bakaji. Wakalongesha ne, tudi mua kuikala ne disanka bushuwa amu patuikala balulama. Katuakuikala ne disanka bituikala ne tshintu mu nzubu wetu tshidi katshiyi tshietu to. Wakatulongesha kabidi ne, bituikala ne ditabuija mu yeya, ne bikala balulama bushuwa, tudi mua kupingana bua kusomba ne Tatu wetu wa mu Diûlu bua tuikala ne disanka kashidi.
Patudi tumvua bintu bionsu ebi, tudi tujinga kuikala balulama. Katuena tusua kushima bakuabu to. Tudi basua kusankisha Tatu wetu wa mu Diûlu bua ne tudi mua kupingana bua kusomba nenda. Tudi tusua bua kuitaba bilema bietu ne kubiakaja bua Tatu wetu wa mu Diûlu atubuikidila.
Dilejangana
-
Bituikala tuvua bashima nansha kakesa, bua tshinyi tudi ne bua kukudimuna mutshima?
-
Mushindu kayi utudi mua kuikala balulama mu bionsu bitudi tuenza?
-
Mushindu kayi watuambuluisha Tatu wetu wa mu Diûlu bua kuikala balulama?
Kuikala Mululama Kudi Kufila Disanka
Patudi balulama, tudi tumvua bimpa. Tatu wetu wa mu Diûlu udi ne disanka netu. Katuena tumvua dipila to. Tudi tumvua bimpa bualu tudi bamanya ne katuena ne tshintu tshia kusokoka bakuabu to. Katuena ne bua kusumpakana bualu muntu neamanya ne tudi bashima.
Patudi balulama tudi tulua bafuanangana ne Tatu wetu wa mu Diûlu. Tudi bamanya ne tudi tudilongola kua kupingana bua kusomba nenda. Patudi balulama, bantu bakuabu badi batueyemena. Patudi balulama, Tatu wetu wa mu Diûlu neatuambuluisha bua tuenza malu atudi basua kuenza adi makana.
Dilejangana
-
Mushindu kayi utudi tumvua patudi balulama?
-
Mushindu kayi uvua buloba mua kuikala bikala bantu bonsu balulama?