Shapita 34
Tshikondu tshia Bidimu Tshinunu
Ntshinyi tshidi Tshikondu tshia Bidimu Tshinunu tshiumvuija? Mushindu kayi wikala moyo wa pa buloba mu Tshikondu tshia Bidimu Tshinunu?
Bantu Bakana Nebikala ne Moyo pa Buloba mu Tshikondu tshia Bidimu Tshinunu
Padi Yezu ulua kabidi, nealombola buloba bujima bua bidimu 1000. Tshitupa etshi tshia diba netshimanyika bu Tshikondu tshia Bidimu Tshinunu.
Tshikondu tshia Bidimu Tshinunu netshikala tshikondu tshia ditalala ne buakana. Yezu neasukula buloba ku bubi kumpala kua Tshikondu tshia Bidimu Tshinunu kubangisha. Bantu babi bonsu nebabutudibua. Amu bantu bakana nebapandishibua bua bikala ne moyo pa buloba mu tshikondu etshi. Satana kakuikala ne bukola pa mutu pa bantu kabidi to tô ne pabuipi ne kundekelu kua Tshikondu tshia Bidimu Tshinunu.
Muambi Joseph Smith wakamba ne bantu ba mu diûlu nebakumbula buloba misangu ya bungi mu Tshikondu tshia Bidimu Tshinunu. Nebambuluisha ne midimu muenza mu ntempelo ne mudimu wa bukenji.
Dilejangana
-
Ntshinyi tshidi Tshikondu tshia Bidimu Tshinunu tshiumvuija?
-
Nganyi wikala ne moyo pa buloba mu Tshikondu tshia Bidimu Tshinunu?
-
Idikija kuela meji mushindu wikalabi bua kusomba mu muaba udi kawuyi malu mabi.
Midimu Minena Ibidi Neyenjibua mu Tshikondu tshia Bidimu Tshinunu
Mudimu wa kumpala munena udi wenzeka udi wa kukumbaja milulu mu ntempelo bua bantu badi ne moyo ne bantu badi bafua. Bantu bikala babika ku lufu nebambuluisha bantu badi ne moyo pa buloba bua kupeta mena a malela abu adi mafua, ne nebakaja bilema bia bungi mu miandiku.
Milulu yonsu idi ikengedibua bua kusuika mêku pamua neyenjibua mu ntempelo. Mêku ne atuangajibua ku ndelanganyi ne ku mikuabu tô ne ku Adama.
Mukuabu mudimu munena udi kuyisha kua lumu luimpa. Muntu yonsu neikala mukumbana bua kuteleja lumu luimpa ne kuluitaba. Bamua bantu bimpa badi kabayi bidimba bia Ekelezia wa Yezu nebikala ne moyo pa buloba padi Tshikondu tshia Bidimu Tshinunu tshibangisha. Ku ndekelu, bantu bonsu nebamanya ne nebamba ne, Yezu udi Mupandishi wa buloba bujima.
Dilejangana
-
Midimu minena kayi ibidi yenjibua mu Tshikondu tshia Bidimu Tshinunu?
Mushindu Wikala Moyo mu Tshikondu tshia Bidimu Tshinunu
Mu Tshikondu tshia Bidimu Tshinunu, buloba nebuikala muvuabu diba divua Adama ne Eva basomba mu Budimi bua Edene. Kakua kuikala mvita to. Yezu nealombola Ekelezia ne bukalenga. Mikenji yonsu neikala mishindamena pa malongesha malelela ne makana. Nekuikala bimenga binena bibidi. Tshimua netshikala mu Yelushalema. Tshikuabu tshimenga netshikala Yelushalema Mupia-Mupia, mu Amelika wa ku Node.
Bantu nebasomba pamua mu ditalala ne dinanga. Nyama yonsu, nansha eyi idi mikala mpindiewu miluishi, neisomba pamua mu ditalala. Kayakuluangishangana kabidi to.
Kakua kuikala masama to, ne lufu kalua kuikalaku to. Padi bantu bakulakaja, kabakufua bu mutudi tufua mpidiewu to. Nebakudimuka mu musangu umua mu mushindu utudi nawu mpidiewu ku ngikadilu wa kubenga kufua, tshidi tshiumvuija ne kabakufua kabidi nansha.
Netshikala dianyisha dinena dia kuikala ne moyo mu Tshikondu tshia Bidimu Tshinunu. Malu atudi katuyi tumvua mpidiewu neikala matoka buetu. Moyo neikala amu bu mudiye mpindiewu, kadi malu onsu neikala ne bua kuenjibua mu dinanga ne ditalala. Bantu nebatungunuka ne kulela ne kukolesha bana, kukuna ne kupola bikunyibua, ne kuibaka nzubu.
Dilejangana
-
Mushindu kayi wikala buloba mu Tshikondu tshia Bidimu Tshinunu?
Lutatu Lumua lua Ndekelu Nelulua Pabuipi ne ku Ndekelu wa Tshikondu tshia Bidimu Tshinunu
Pabuipi ne ku ndekelu kua Tshikondu tshia Bidimu Tshinunu, Satana neabangisha kuikala ne bukola kabidi pa buloba. Bamua bantu nebamuitabuija. Satana ne aba badi bamulonda nebaluisha aba badi balonda Yezu. Mu mvita eyi, Satana ne aba badi bamulonda nebatshimunyibua bua kashidi. Panyima pa mvita eyi, bantu nebalumbuluishibua, ne nebatumibua bua kusomba mu makalenga avuabu badilongolola bua kuikala.
Dilejangana
-
Ntshinyi tshiafika ku ndekelu kua Tshikondu tshia Bidimu Tshinunu?