Shapita 3
Mupandishi Wetu
Muntu kayi umua udi mua kutuludika bua kualukila kudi Tatu wetu wa mu Diûlu? Bua tshinyi tudi ne bua kumulonda?
Tuvua Dijinga ne Mulombodi
Tatu wetu wa mu Diûlu uvua mumanya ne patuikala pa buloba, katua kuvuluka moyo wetu nenda to. Katua kumanya malu atuikala nawu dijinga ne bua kuenza bua kupingana kudiye to. Uvua kabidi mumanya ne netuenza mibi. Bualu bua mibi yetu, netunyokibua mu kuikala batapulukibua nenda kashidi. Ne patudi tufua, katua kuikala ne mibidi yetu ya misunyi ne mifuba kabidi to.
Netuikala dijinga ne muntu bua kutuambuluisha ne ntatu eyi. Muntu ewu neatulongesha tshitudi ne bua kuenza bua kupingana kudi Tatu wetu wa mu Diûlu. Neatuambuluisha bua kutamba malu mabi atuenza. Neatuenzela kabidi njila bua tupeta mibidi yetu ya misunyi ne mifuba kabidi panyima pa kufua kuetu. Muntu ewu neabikidibua Mupandishi wetu. Amu yeya ki uvua mua kutupandisha ku dinyoka dia malu mabi atuenza. Amu yeya ki uvua mua kutuambuluisha bua kulonga bua kutumikila Tatu wetu wa mu Diûlu. Amu yeya ki uvua mua kutupepejela bua tuikala ne mibidi yetu ya misunyi ne mifuba kabidi panyima pa lufu.
Dilejangana
-
Imua ya ntantu kayi ivua Tatu wetu wa mu Diûlu mumanya ne netupeta pa buloba?
-
Bua tshinyi tudi dijinga ne Mupandishi bua kutuambuluisha?
Tatu Wetu wa mu Diûlu Wakasungula Yezu bua Ikala Mupandishi Wetu
Tatu wetu wa mu Diûlu mmutunanga, ne uvua mumanya ne netuikala dijinga ne diambuluisha. Uvua mumanya ne netuikala ne dibungama dikola bituikala katuyi mua kupeta mibidi ya misunyi ne mifuba ne mua kupingana bua kusomba nenda kashidi. Tuvua dijinga ne muntu bua kutuambuluisha. Tatu wetu wa mu Diûlu wakasua bua muntu ikala Mupandishi wetu. Babidi ba ku bana betu baluma bakadifila bua kuikala Mupandishi wetu.
Muana wa buta wetu, Yezu, wakalomba Tatu wetu wa mu Diûlu bua amutuma. Wakamba ne nealonda dilongolola dia Tatu wetu wa mu Diûlu. Uvua ne bua kulua pa buloba ne kutulongesha malu atuikala ne bua kuenza bua kupingana kudi Tatu wetu wa mu Diûlu. Uvua ne bua kufua bua kufuta malu mabi atudi benza. Uvua kabidi ne bua kutupepejela bua tuikala ne moyo kabidi panyima pa lufu luetu. Uvua ne bua kutuanyishila bua tudisunguila bua kutumikila anyi kubenga kutumikila Tatu wetu wa mu Diûlu.
Yezu uvua mumanya ne bivua ne mushinga buetu bua tudisunguila malu atuvua ne bua kuenza. Bu muntu mutuenzeja bua kutumikila, katuvua mua kulonga ne kulua bu Tatu wetu wa mu Diûlu to. Yezu uvua musua bua Tatu wetu wa mu Diûlu ikala ne butumbi ne bunema bonsu.
Satana, uvua ubikidibua ne Lusifele, wakalomba penda Tatu wetu wa mu Diûlu bua amusungula bua ikala Mupandishi wetu. Wakamba ne nealua pa buloba ne kutuenzeja tshituvua ne bua kuenza. Wakamba ne nansha umua wa kutudi kakujimina. Kakutuanyishila bua tudisunguila to. Bu difutu dienda, wakasua butumbi ne bunema bonsu buvua nabu Tatu wetu wa mu Diûlu.
Bu mudi Tatu wetu wa mu Diûlu mutunanga, wakasungula Yezu bua ikala Mupandishi wetu. Bua kabingila aka, Yezu udi ubikidibua misangu ne misangu Yezu Kilisto. Kilisto udi umvuija musungula kudi Tatu wetu wa mu Diûlu bua kuikala Mupandishi. Tatu wetu wa mu Diûlu wakasungula Yezu pamutu pa Satana bualu Tatu wetu wa mu Diûlu kavua musua bua tujimija bunema buetu bua kudisunguila to. Uvua mumanya ne tudi ne bua kuenza malu mimpa patudi basua kuenza, kabiyi bualu muntu udi utuenzeja to.
Dilejangana
-
Ntshinyi tshivua Yezu musua kutuenzela?
-
Ntshinyi tshivua Satana muasua kuenza?
-
Bua tshinyi Tatu wetu wa mu Diûlu wakasungula Yezu bua ikala Mupandishi wetu?
Tatu wetu wa mu Diûlu wakasungula Yezu bua ikala Mupandishi wetu.
Yezu Udi Mupandishi ne Mulombodi Wetu
Pakasungula Tatu wetu wa mu Diûlu Yezu, Satana wakalua ne tshiji tshikola. Wakasuisha tshitupa tshimua tshia pa bisatu tshia nyuma mu diûlu bua kumulonda. Pamua bakaluangisha Yezu ne balondi benda. Bavua basua kuenzeja Tatu wetu wa mu Diûlu bua itaba dilongolola dia Satana. Tatu wetu wa mu Diûlu wakipata Satana ne balondi benda ku diûlu.
Satana ne balondi benda kabakupeta mibidi ya misunyi ne mifuba to. Kabakukumbana bua kupingana ne kusomba ne Tatu wetu wa mu Diûlu to. Amu aba bakitaba Yezu bua kuikala Mupandishi wabu ki badi mua kupeta mibidi ya misunyi ne mifuba.
Tudi bamanya, bualu tudi ne mibidi ya misunyi ne mifuba, ne tuakitaba Yezu bua ikala Mupandishi wetu. Tuakasungula malu mimpa mu diûlu. Tudi ne bua kutungunuka kusungula malu mimpa apa pa buloba. Tudi ne bua kulonda Yezu. Amu yeya ki udi mua kutulongesha mushindu wa kupingana kudi Tatu wetu wa mu Diûlu. Udi mua kutuambuluisha bua kutamba malu mabi atudi tuenza ne kutuambuluisha bua kulonga bua kuenza malu mimpa tô ne mutudi tulua bu Tatu wetu wa mu Diûlu.
Tatu wetu wa mu Diûlu mmusua bua tulonda ne tutumikila Yezu. Mmumanya ne Yezu neatulongesha misangu yonsu mushindu wa Tatu wetu wa kuenza malu, nunku patudi tutumikila Yezu, tudi tutumikila kabidi Tatu wetu wa mu Diûlu. Mukenji anyi dimanyisha dia kudi Yezu udi mukenji anyi dimanyisha dia kudi Tatu wetu wa mu Diûlu kabidi.
Dilejangana
-
Mushindu kayi utudi tumanya ne tuakasungula Yezu bua ikala Mupandishi wetu?
-
Nganyi udi muikala muntu umua udi mua kutuleja mushindu wa kupingana kudi Tatu wetu wa mu Diûlu?
-
Bua tshinyi tudi ne bua kulonda Yezu?