Shapita 2
Moyo Wetu mu Diûlu
Tuvua bikala penyi kumpala kua tuetu kuledibua pa buloba? Ntshinyi tshituakenza kuaka?
Yonsu wa ku tudi udi muana wa Tatu wetu wa mu Diûlu
Kumpala kua tuetu kuledibua pa buloba apa, tuvua mu diûlu. Dîku dietu dia mu diûlu divua ditamba buimpa dipita ditutu katuyi banji kumona pa buloba. Tuvua ba mu dîku kuaka. Tuvua banangangana umua ne umua ne tuvua ne disanka. Tatu wetu wa mu Diûlu uvua Tatu wa nyuma yetu, ne ki bua kabingila aka tudi tumubikila diba dionsu Tatu wa mu Diûlu. Bu mudiye Tatu wetu, mmutunanga ne udi ututangila buetu.
Muntu yonsu udi pa buloba apa uvua muanetu wa baluma ne wa bakaji mu diûlu. Muana buta wa mu dîku dietu dia mu diûlu uvua Yezu Kilisto.* Udi tutuetu mukulumpa.
Patuvua mu diûlu. katuvua ne mubidi wa misunyi ne mifuba mufuanangana ne utudi nawu katataka to. Tuvua nyuma. Nyuma udi ne mushindu umua bu muntu. Bu nyuma, tuvua bakumbana bua kuakuishangana, kuenda, kuenza masungula ne kumanya dishilangana pankatshi pa buimpa ne bubi.
Katuvua bafuanangana mu diûlu to. Tuvua bashilangana, bu mutudi katataka. Tuvua ne majinga ne makumbana mashilangana. Tuakalonga bua kuenza mudimu ne makumbana etu mu mishindu mishilangana.
Dilejangana
-
Dîku dietu dia mu diûlu divua difuanangana ne tshinyi?
-
Nganyi uvua Tatu wetu?
-
Nganyi uvua tutuetu?
Tatu wetu wa mu Diûlu uvua Mumanya ne Tuvua mua Kuikala bu Mudiye
Bu muvua Tatu wetu wa mu Diûlu muikala Tatu wa nyuma yetu, wakatumanya bikola. Uvua mutunanga. Uvua mumanya ne tuakapeta kudiye dikumbana dia kulonga malu adiye mumanya ne kulua bu mudiye. Udi musua bua tuikala diba dionsu bimpa, bu mudiye. Udi musua kutuambuluisha bua kuleja dikumbana dietu bua kulua bu mudiye.
Dilejangana
-
Munyi mudi Tatu wetu wa mu Diûlu utumvuila, ne tshinyi tshidiye musua buetu?
-
Munyi mûdi udiumvua pawudi umanya ne udi ne Tatu mu Diûlu?
Kumpala kua tuetu kulua pa buloba, tuvua ne moyo mu diûlu.
Tatu Wetu wa mu Diûlu Wakenza Dilongolola bua Kutuambuluisha
Mu diûlu tuakalonga malu a bungi ne tuakadiakaja nkayetu mu mushindu wetu onsu, kadi kuvua malu atuvua katuyi ne bua kulonga ne kumanya kuakua to. Tatu wetu wa mu Diûlu wakatuenzela dilongolola bua kulonga bia bungi.
Wakatubikila mu tshisangilu mu diûlu. Tuvua bonsu kuakua. Wakumvuija dilongolola dienda bua kutuambuluisha bua kulonga ne kutuambila ne, bitualonda dilongolola dienda ne tuikala bu mudiye.
Tatu wetu wa mu Diûlu wakamba ne ne’enza bua buloba bufukibua, butuasomba bua tshitupa tshia diba. Pa buloba, katuvua mua kuvuluka moyo wetu nenda mu diûlu to. Tuvua ne bua kuikala bakumbana bua kusungula malu mimpa anyi mabi. Etshi tshivua ne bua kuikala ditêta bua kumona bituikala ne bua kunemeka Tatu wetu wa mu Diûlu patuikala katuyi nenda mu diûlu.
Pabidi bitangila dilongolola dia Tatu wetu wa mu Diûlu, tuvua ne bua kupeta bonsu mubidi wa musunyi ne mifuba. Tuvua ne bua kuikala dijinga ne mubidi wa mushindu ewu bua kulonga malu adiye mumanya ne kuenza malu adiye wenza. Kunyima, tuvua ne bua kufua, ne nyuma yetu idi ne bua kumbuka mibidi yetu ya misunyi ne mifuba. Kadi nyuma yetu idi ne bua kusangila kabidi ne mibidi yetu, ne katuena mua kufua kashidi ne tshiendelela nansha. Aba bonsu bavua benza malu avua Tatu wetu wetu wa mu Diûlu mutuambila bua tuenza badi ne bua kupingana bua kusomba nenda bua tshiendelela.
Tuakalonga ne, muntu yonsu udi ne bua kupeta malu pa buloba, bu mudi masama, busâmi, dibungama ne lufu. Kadi tuvua bumvua ne tuvua ne bua kulonga ku malu â. Malu â adi ne bua kutulongesha bua kunanga ne kuambuluisha umua ne mukuabu.
Tatu wetu wa mu Diûlu uvua ne bua kusungula diba ne muaba bua yonsu wa kutudi aledibua pa buloba. Uvua mumanya muaba pa buloba wa kutuma yonsu wa kutudi bua kulonga malu atuvua mua kujinga kumanya. Tuvua ne bua kupeta mishindu ya kuenza malu mashilangana a bungi. Tatu wetu wa mu Diûlu uvua musua bua tuenza malu mimpa ne bua tuikala bakumbana bua kupingana kudiye. Mu mishindu yonsu, kena mua kutuenzeja bua kuenza bualu nansha bumua to.
Umua yonsu wa kutudi udi ne bua kusungula bua kumutumikila. Bituamutumikila, ne tuikala ne bua kuikala bu mudiye ne kupingana kudiye. Bamua ba kutudi nebajinga kusungula bua kubenga kumutumikila. Bituikala katuvua bamutumikila, katuakukumbana bua kuikala bu mudiye ne katuakukumbana bua kupingana kusomba nenda to.
Patuvua bumvua dilongolola dietu dia Tatu wetu wa mu Diûlu, tuvua ne disanka dia bungi. Tuvua basua bua kuikala bakumbana bua kulonga ne kutanta. Muntu yonsu udi pa buloba uvua muitaba bua kusomba pa dilongolola dienda.
Dilejangana
-
Tshinyi tshivua bulongolodi bua Tatu wetu wa mu diûlu buetu?
-
Bua tshinyi tuvua ne dijinga dia kumbuka dîku dietu dia mu diûlu?
-
Tshinyi tshidi Tatu wetu wa mu Diûlu musua bua tuenza pa buloba?