Yezu Kilisto wakajidila Bapostolo.
Shapita 18
Ekelezia Uvua Yezu Mulongolola
Yezu wakalongolola ekelezia pavuaye pa buloba. Uvua ubikidibua munyi? Nganyi wakalombola Ekelezia wenda?
Yezu Uvua Mutu wa Ekelezia Uvuaye Mulongolola
Pavua Yezu pa buloba wakalongolola ekelezia. Ekelezia ewu uvua ubikidibua ne Ekelezia wa Yezu Kilisto. Bidimba bia Ekelezia wa Yezu bivua bibikidibua ne Bansantu. Yezu nkayenda uvua mutu wa Ekelezia. Wakamulombola. Wakasungula bantu baluma dikubi ne babidi bua bamuambuluisha bua kulombola Ekelezia. Bavua babikidibua ne Bapostolo. Bapostolo aba bavua kabidi bambi. Yezu wakateka bianza bienda pa mitu yabu ne wakapesha yonsu wa kudibu buakuidi. Wakabateka bua kuenza mudimu wenda. Bapostolo ne bambi aba bavua balombodi mu Ekelezia wa Yezu Kilisto.
Mu Ekelezia wa Yezu Kilisto, bantu baluma badi bapeta buakuidi badi bateka bianza biabu pa mitu ya bakuabu bantu bimpa ne babapesha buakuidi. Ewu udi mushindu umua udi buakuidi bupitshishibua kudi muntu umua ne mukuabu. Buakuidi kabuena mua kupanyibua to.
Dilejangana
-
Nganyi uvua mulombodi wa Ekelezia wa Yezu Kilisto?
-
Mbatu baluma kayi babikidibua bavua bambuluisha Yezu?
Ekelezia wa Yezu Kilisto Wakatungunuka pa Buloba Pakapinganaye ku Diûlu
Pakapingana Yezu ku diûlu, Ekelezia wenda wakatungunuka pa buloba. Uvua mulombodibua kudi Bapostolo Dikumi ne Babidi. Pavua Mupostolo ufua, Yezu uvua usungula muntu muluma mukuabu bua kumupingana. Kupitshila ku Nyuma wa Tshijila, Yezu uvua wenza bua Bapostolo bakuabu bamanya nganyi udi ne bua kuikala Mupostolo mupia-mupia. Bapostolo Dikumi ne Babidi bakasungula bakuabu bantu baluma bimpa ne bavua babapesha buakuidi bua bambuluisha mu dienza dia mudimu wa Ekelezia wa Yezu. Bantu baluma aba bavua babikidibua ne Bayidi Makumi Muanda Muteketa, bakuidi banena, bakulu, bepiskopo, bakuidi, balongeshi, ne badiakre. Majitu abu adi mumvuija mu shapita 20.
Yezu Wakalombola Ekelezia Kupitshila ku Dibuluila
Mikenji idi Yezu upesha bantu kupitshila ku Nyuma wa Tshijila pa buloba idi ibikidibua ne mabuluila. Yezu udi ulombola Ekelezia wenda mu kubuluila muambi ne balombodi bakuabu malu adibu ne bua kuenza.
Kumpala kua Yezu kupingana ku diûlu, wakambila Bapostolo ne, neikala nabu dituku dionsu. Yezu uvua musua kumvuija ne, neatungunuka kubaludika kupitshila ku Nyuma wa Tshijila.
Dilejangana
-
Mushindu kayi uvua Yezu mulombola Ekelezia wenda pakapinganaye ku diûlu?
Ekelezia wa Yezu Kilisto Udi ne Malongesha Enda Malelela
Balombodi ba Ekelezia wa Yezu Kilisto bavua bapeta dibuluila dia kudi Yezu kupitshila ku Nyuma wa Tshijila. Bu tshilejilu, Yezu wakambila Mupostolo Petelo ne, lumu luimpa ludi ne bua kulongeshibua kudi bantu bonsu ne kabiyi amu kudi bantu ba mu Isalele to. Yezu wakambila Mupostolo Paulo malu a bungi avuaye ne bua kulongesha bantu. Yezu wakambila Mupostolo Yone malu a bungi adi atangila matuku alua alua.
Pavuaye muikala pa buloba, Yezu wakalongesha bantu bua kumuitabuija, kukudimuna mitshima, ne kutambuishibua. Wakabambila bua bananga Tatu wetu wa mu Diûlu ne bamutumikila. Wakabalongesha bua kunanga bakuabu bantu ne kubambuluisha.
Pakapingana Yezu ku diûlu, Bapostolo bakalongesha bintu bimua bivua Yezu mulongesha. Bonsu bavua basua kuikala bidimba bia Ekelezia wa Yezu Kilisto bavua ne bua kuikala ne ditabuija mu Yezu Kilisto, kukudimuna mitshima ku mibi yabu, ne kutambuishibua. Bakapeta dipa dia Nyuma wa Tshijila, bu muvua Yezu mulaya. Bakalonga bua kunanga Tatu wetu wa mu Diûlu ne kumutumikila. Bakalonga bua kunanga ne kusadila bakuabu bantu.
Dilejangana
-
Ntshinyi tshivua bantu ne bua kuenza bua kudisanga ku Ekelezia wa Yezu Kilisto?
Aba Bavua Bikala mu Ekelezia wa Yezu Kilisto Bakapeta Mapa a Nyuma
Aba bavua bikala mu Ekelezia wa Yezu Kilisto bakapeta mapa a nyuma. Amua a ku mapa avua mikala ditabuija dia kuenza bua bantu badi basama bumvua bimpa, dikumbana dia kuamba malu a matuku adi alua, ne bukola bua kumona bimônyi.
Dilejangana
-
Amua a ku mapa kayi a nyuma?
Ekelezia wa Yezu Kavua Kabidi pa Buloba to
Pakapingana Yezu ku diûlu, Bapostolo benda bakalombola Ekelezia. Bantu ba bungi bakalua bidimba bia Ekelezia. Kadi bimua bia ku bidimba biakabanga kulongesha ne kuitabuija malu a mashimi, pamutu pa malu avua Yezu ne Bapostolo balongesha. Bu tshilejilu, bamua bantu bakalongesha ne Tatu wetu wa mu Diûlu kena ne mubidi wa musunyi ne mifuba to.
Bantu babi bakabanga kukengesha balombodi ne bidimba bikuabu bia Ekelezia. Bantu babi bakashipa Bapostolo ne balombodi bakuabu bavua ne buakuidi. Bakashipa kabidi bidimba bikuabu bia bungi bia Ekelezia wa Yezu Kilisto.
Bantu bakalongesha malongesha mapita bungi a mashimi tô ne muvua nansha umua kayi mua kuitabuija malongesha malelela a Yezu to. Nansha umua kavua ne buakuidi to, nunku nansha umua kavua mua kuenza mudimu wa Yezu pa buloba anyi kupeta maludiki a kudi Yezu bua bana bonsu ba Tatu wetu wa mu Diûlu to. Tshikondu tshivua nansha umua kayi witabuija malongesha malelela a Yezu ne nansha umua kayi ne bukôkeshi, tshidi tshibikidibua ne Dipambuka.
Mu Dipambuka, bantu bakalongolola ma’ekelezia avua mashilangana ne Ekelezia uvua Yezu mulongolola. Bakalongesha bintu bivua Yezu kayi mulongesha to. Kabavua ne buakuidi to. Bakenza milulu ivua mishilangana ne milulu ivua mienjibua mu Ekelezia wa Yezu. Kabavua ne dibuluila dia kudi Yezu to. Kabavua balongesha mikenji yonsu ya lumu luimpa bu muvua Yezu ne Bapostolo benda babalongesha to. Bambi bavua bamba ne bionsu ebi bivua ne bua kufika.
Dilejangana
-
Mushindu kayi udi Dipambuka mufika?
Yezu Wakalaya ne Neapinguluja Ekelezia Wenda pa Buloba
Yezu uvua mumanya ne bantu nebajimija bukola buenda ne malongesha malelela enda. Nunku, wakalongolola njila bua Ekelezia mulelela alongolodibua kabidi pa buloba.
Mupostolo Yone wakamona mu tshimônyi, tshikondu tshivua lumu luimpa nebua kupingajibua pa buloba. Wakamona ne Yezu neatuma banjelu bua kulongesha bantu bulelela bitangila Tatu wetu wa mu Diûlu. Yezu neadijadikila ne bana bonsu ba Tatu wetu wa mu Diûlu badi mua kupeta lumu luimpa, buakuidi, mabenesha, ne bintu bikuabu bionsu bia mushinga bua bikala bakumbana bua kupingana kudi Tatu wetu wa mu Diûlu.
Dilejangana
-
Bua tshinyi Yezu uvua mulongolola njila wa kulongolola kabidi Ekelezia wenda pa buloba?