Shapita 30
Bujitu Buetu bua Kuambuluisha Bidimba bia Dîku
Mushindu kayi udi tshidimba tshionsu tshia dîku mua kuambuluisha bua dîku dikala dia dimpa?
Tshidimba Tshionsu tshia Dîku Tshidi ne Mushinga
Bidi bilomba mudimu wa bungi bua kuikala ne dîku dia dinanga ne dia disanka. Tatu wetu wa mu Diûlu wakafila majitu kudi muntu yonsu wa mu dîku. Tshidimba tshionsu tshia dîku tshidi ne bua kufila diambuluisha, kusankisha, ne kuikala bimpa ne bakuabu. Patudi tusambila, tuenza mudimu, ne tunaya pamua, mêku etu adi mua kuikala ne disanka.
Kuikala ne dinanga bua bidimba bikuabu bia mu dîku dietu kudi kutupepejela bua tuenza malu adi Tatu wetu wa mu Diûlu musua bua tuenza. Patudi tunanga dîku dietu, tudi tujinga bua kuenza bionsu bitudi mua kuenza kua kubambuluisha. Nansha malu adi makola bua kuenza, adi alua mapepela patudi tu’enza ne dinanga. Bidi bilomba diba ne mudimu bua kuikala tshidimba tshia dîku tshimpa.
Dilejangana
-
Mushindu kayi udi tshidimba tshia dîku tshionsu mua kuambuluisha bua kuenza nzubu muaba wa disanka?
-
Bua tshinyi tshidimba tshionsu tshia dîku tshidi ne mushinga?
Tatu Wetu wa mu Diûlu Wakapesha Baledi Majitu Masunguluka
Tatu ne mamu badi ne bua kuenza mudimu pamua bua kukuba bana babu ne kufila bintu bidibu nabi dijinga. Badi kabidi ne bua kulongesha bana babu lumu luimpa. Badi ne bua kubalongesha bua kusambila ne kutumikila mikenji ya Tatu wetu wa mu Diûlu.
Tatu ne mamu badi ne bua kumvua ne, imua misangu bana nebenza masungula mabi nansha panyima pa babalongesha tshidi tshimpa.
Padi bana benza bualu bubi, baledi kabena ne bua kuimanyika kuidikija bua kubambuluisha to. Baledi badi ne bua kutungunuka bua kunanga ne kulongesha bana babu. Badi kabidi ne bua kuikala bilejilu bimpa buabu ne kujila biakudia ne kusambila buabu.
Baledi badi ne bua kulongesha mêku abu bimua bintu:
-
Badi ne bua kunanga bana babu ne kulongesha bana babu bua kunanga bakuabu.
-
Badi ne bua kulongesha bana babu lumu luimpa.
-
Badi ne bua kulongesha bidimba bia dîku bua kusambila.
-
Badi ne bua kulongesha bana babu bua kufuta tshia dikumi ne milambu pa kufuta tshia dikumi tshiabu ne milambu yabu.
-
Badi ne bua kulongesha bana babu bua kuenza mudimu.
-
Badi ne bua kubapesha nzubu, bilamba, ne biakudia bimpa.
-
Badi ne bua kuenza bua bana babu balonga bua kubala, kufunda, ne benza makumi a mateketa mu kubatuma mu kalasa anyi kubalongesha ku nzubu.
-
Badi ne bua kuenza monsu muabu bua bana babu balonga mudimu mushidimuka bua bikala badilongolola bua kupeta makuta a bungi a kusumba bidibu nabi dijinga.
-
Badi ne bua kuleja bana babu mushindu wa kutula makuta ne lungenyi ne kulama makuta mu tshibutshilu bua majinga a matuku alualua.
-
Badi ne bua kuambuluisha bana babu bua kuakaja mamanya abu ne makumbana abu. Ebi bidi mua kuikala dikumbana dia kulongesha, kuimbisha lunzenze, kuimba, kulongolola bintu, anyi kuikala ne lumvu lua bakuabu.
Baledi badi ne bua kuikala ne disua dia kudienzeja bikola bua kuambuluisha bana babu. Tatu wetu wa mu Diûlu wakamba ne, baledi badi ne bua kumanya ne bana babu badi ne bua kuenzelangana bimpa, ne badi ne biakudia ne bilamba.
Baledi badi ne bua kulongolola kumpala bua bikala bakumbana bua kufila bintu ebi nansha bobu basama, bajimija mudimu wabu, anyi bikala ne ntatu mikuabu. Badi mua kuenza nunku mu kulama makuta mu tshibutshilu ne kuteka biakudia, bilamba, ne kasolonyi bidi bipita mu miaba idibi bitabibua.
Dilejangana
-
Ntshinyi tshidi baledi mua kuenza bua kuandamuna ku majinga a mêku abu?
-
Ntshinyi tshidi baledi mua kuenza bua kulongolola bikondu bikalabu ne ntatu?
Tatu Udi ne Majitu Masunguluka
Tatu udi mulombodi wa buakuidi mu dîku. Tatu udi ne bua kulombola dîku dienda ne dinanga ne buimpa. Udi ne bua kuleja dîku dienda mushindu wa kuteka mikenji ya Tatu wetu wa mu Diûlu mu tshienzedi mu kuyiteka nkayenda mu tshienzedi. Udi kabidi ne bua kulongesha dîku dienda lumu luimpa. Udi ne bua kubikila dîku pamua bua disambila dia dîku mudinda ne mu dilolo. Mukajienda udi ne bua kumuambuluisha bua kuenza bintu ebi.
Tatu udi ne bua kuenza mudimu ne buakuidi bua kubenesha bidimba bia dîku dienda. Udi upesha bana benda bakesa dibenesha ne dîna. Udi mua kubatambuisha padibu ne bidimu muandamukulu. Udi mua kujidila bana benda ba baluma ku buakuidi ne kupesha bana benda mabenesha masunguluka padibu nawu dijinga. Udi mua kubabenesha padibu basama.
Tatu udi ne bua kupitshisha diba nkayenda ne muanenda yonsu. Udi ne bua kuakula nabu ne kulonga bua kumvua majinga ne malu abu. Udi ne bua kubakankamika ne kubambila ne, mmubananga. Udi ne bua kubambila ne, badi mua kuikala kulua kudiye bua kupeta diambuluisha ku lutatu lonsu ludibu bapeta.
Dilejangana
-
Majitu kayi adi mikala a tatu?
-
Mushindu kayi udiye mua kuenza mudimu ne buakuidi budiye nabu bua kuambuluisha dîku dienda?
Mamu Udi ne Majitu Masunguluka
Bujitu bunena bua mushinga budi nabu mamu mbua kulela bana, kubakuba ne kubalongesha. Kufila mibidi ya misunyi ne mifuba kudi bana ba nyuma ba Tatu wetu wa mu Diûlu, tshidi bujitu bua tshijila. Padi mamu wenza nunku, yeya udi muenenda wa Tatu wetu wa mu Diûlu. Kulela bana kudi kuikala dimua dia ku mabenesha manena onsu.
Mamu udi ne bua kuikala ne dinanga. Udi ne bua kuambuluisha bua kulongesha muana yonsu lumu luimpa. Udi ne bua kuambuluisha ne kuenza mudimu ne muana yonsu. Mamu udi ne bua kuenza bua yonsu wa ku bana benda adiumvua ne mushinga, ne udi ne bua kubambuluisha bua kumvua malu adi mabanyunguluka. Udi ne bua kuenza mudimu bu muenenda ne muluma wenda bua kuenza malu â.
Mukanda wa Molomo udi wakula bua tshisumbu tshia bansongaluma bakana bavua batumikila malongesha a ba mamuabu. Bamamuenda wa bansongaluma aba bakabalongesha bua kuikala balulama, ne dikima, ne bakana. Bamamuabu bakabalongesha kabidi ne, Tatu wetu wa mu Diûlu neabakuba bikalabu ne ditabuija mu Yezu. Bansongaluma aba bavua ne bua kulua masalayi bua kulama bulaba buabu. Bu muvua bansongaluma aba bateka mu tshienzedi malongesha a bamamuabu ne bikala ne ditabuija, bakapeta dikima bua kuandamuna ku bujitu buabu kumpala kua njiwu munena. Mamu yonsu udi mua kuikala ne bukola bunena pa mioyo ya bana benda.
Dilejangana
-
Majitu kayi adi mikala a mamu?
-
Bua tshinyi buledi budi bubikidibua ne buenanyi ne Tatu wetu wa mu Diûlu?
Padiku Muledi Amu Umua
Imua misangu, tatu anyi mamu udi ushala nkayenda bua kukolesha dîku ne muikala ne bua kuenza mudimu wa tatu ne mamu. Tatu wetu wa mu Diûlu mmumanya ne etshi tshidi tshikola bua kuenza. Bikala muntu ewu, utudi tubikila ne muledi wa nkaya, yeya mulomba Tatu wetu wa mu Diûlu, Tatu wetu wa mu Diûlu neambuluisha muntu awu bua akuba dîku.
Muledi wa nkaya udi kabidi mua kupeta diambuluisha dia batatu bakubi* ne bamamu bakubi* (bidimba bia Ekelezia bidi bitekibua bua kutangila bikuabu bidimba bia Ekelezia).
Dilejangana
-
Nganyi udi mua kuambuluisha baledi ba nkaya?
Bana Badi Pabu ne Majitu Masunguluka
Bana badi ne bua kuambuluisha baledi babu bua benza nzubu wabu muaba wa disanka. Bana badi ne bua kuambuluisha baledi babu bua kusukula nzubu ne miaba idi mimunyunguluka. Badi mua kuambuluisha bua kulongolola biakudia bia dîku, kusukula malongu, ne kusukula bilamba. Badi kabidi mua kuambuluisha bua kukuba bakunyi babu baluma ne bakaji.
Bana badi ne bua kudienzeja muabu monsu bua kulonga malu adi baledi babu babalongesha. Badi ne bua kulonga kua kuenza mudimu bikola ne kukumbaja midimu bimpa. Badi ne bua kulonga bua kukumbaja majitu adibu babapesha bua kuenza.
Bana badi ne bua kutumikila mikenji ya Yezu. Badi ne bua kuambuluisha bidimba bikuabu bia dîku. Tatu wetu wa mu Diûlu kena usanka padi bana bakokangana to. Tatu wetu wa mu Diûlu wakambila bana bua kutumikila ne kuleja kanemu kudi baledi babu.
Bana badi ne bua kunanga baledi babu. Badi ne bua kubatumikila ne kubanemeka. Bana badi kabidi ne bua kubakuba padibu basama anyi padibu bakulakaja ne kabayi mua kudikuba nkayabu.
Dilejangana
-
Ntshinyi tshidi Tatu wetu wa mu Diûlu muindila bua bana benza?
-
Ntshinyi tshidi bana ne bua kuenzela baledi babu padibu bakulakaja?
-
Ntshinyi tshidi bana ne bua kuenza bua kutumikila ne kunemeka baledi babu?
Dijinga dia Kukankamika Dîku
Mu buloba bujima lelu, bantu babi ba bungi badi bidikija bua kushintulula ngenyi yetu pa dîku. Television, bindidimbi, ne makazina bidi bileja ngenyi mipia-mipia ne mibi pa bantu baluma ne bakaji ne mushindu udibu benzejibua kudi umua ne mukuabu. Ngenyi mibi idi ilongeshibua kupitshila ku ndongamu idi mienza bua kumueka ya tuseku ne manaya. Dinyanga dia bunonoka didi dilejibua bu tshintu tshia disanka ne tshisuibua. Bana badi bakuatshibua baleja kabayi banemeka baledi babu to. Mêku mimpa adi anayidibua. Imua misangu bana betu kabatu bamona mu bindidimbi ne ku television tshidi nsombelu muimpa wa nzubu muikala menamena nansha.
Baledi badi ne bua kukuba bana babu ku dimona bindidimbi ne ndongamu ya television ya mushindu ewu. Badi ne bua kulongesha bana babu bua tshinyi kabena ne bua kubandila ndongamu anyi bindidimbi bibi. Tshia mushinga mukola ku bionsu, baledi badi ne bua kuikala kuleja tshilejilu tshimpa mu nzubu wabu. Bikala bana bamona tshilejilu tshimpa dituku dionsu mu nzubu, nebikala bana bimpa ne, ku ndekelu, nebikala baledi bimpa. Biamonabu baledi babu balejangana dinanga, nebasua bua kuikala baledi ba mushindu awu.
Dilejangana
-
Bua tshinyi tudi ne bua kusungula ne budimu bintu bidi bana betu bitabibua bua kumona ku television anyi mu bindidimbi?
Tatu Wetu wa mu Diûlu Mmusua bua Tuambuluishangana
Tshidimba tshionsu tshia dîku tshidi ne bua kunanga ne kuambuluisha umua ne mukuabu. Tudi tulonga bua kuambuluisha bakuabu mu kuambuluisha kumpala baledi betu ne bana betu baluma ne bakaji. Tudi kabidi ne bua kuambuluisha malela etu padibu dijinga ne diambuluisha. Katuena mua kulomba bakuabu diambuluisha bituikala bakumbana bua kudiambuluisha. Bituenza, Tatu wetu wa mu Diûlu kena usanka netu to.
Yezu uvua munanga muntu yonsu, ne wakalua pa buloba bua kutuambuluisha. Wakatulongesha bua kunanga ne kuambuluisha muntu yonsu. Patudi tunanga bakuabu bu muvua Yezu muenza, tudi tuenza muetu monsu bua kubambuluisha.
Bamua ba kutudi badi balomba Tatu wetu wa mu Diûlu bua ambuluisha aba badi dijinga ne diambuluisha, ne nunku tuetu nkayetu katuena tuenza tshintu bua kubambuluisha. Etshi katshiena tshiakana to. Tudi ne bua kuvuluka ne Tatu wetu wa mu Diûlu udi wambuluisha bakuabu kupitshila ku tuetu. Tshia kumpala tudi ne bua kusambila bua aba badi dijinga ne diambuluisha ne pashisha, kubambuluisha mu mushindu utudi mua kukumbana mua kuenza.
Tuetu bonsu tudi dijinga ne diambuluisha dia kudi bantu bakuabu. Patudi bikala bana, baledi betu badi batudisha, batuluatshika, ne batukuba. Patudi tukola, bantu bakuabu badi batulongesha malu atudi dijinga ne kumanya ne kuenza. Babungi ba kutudi tudi dijinga ne diambuluisha dia bakuabu patudi tusama.
Patudi tuambuluisha bakuabu bantu, tudi tupeta mabenesha. Dikumbana dietu dia kunanga didi didiunda, tudi tubenga kutamba kuikala badinangi, ne ntatu yetu nkayetu idi imueka miteketa. Tatu wetu wa mu Diûlu wakamba ne, aba badi basua kusomba nenda badi ne bua kunanga ne kuambuluisha bana benda bonsu.
Dilejangana
-
Bua tshinyi Tatu wetu wa mu Diûlu mmusua ne udi ujinga bua tuambuluisha bakuabu?
-
Nganyi udi upeta diambuluisha dietu?