Muntu mpofu uvua ne ditabuija ne Kilisto neamôndopa.
Shapita 13
Ditabuija mu Yezu Kilisto
Mushindu kayi utudi mua kuitabuija Yezu Kilisto nansha mutudi katuyi bamumona?
Tudi mua Kuitabuija Yezu Kilisto ne Kumueyemena
Kuikala ne ditabuija kudi kumvuija ne; tudi tuitabuija muntu anyi tshintu tshitudi katuyi bamona, ne tudi tutumika bipitshila ku ditabuija adi. Bu tshilejilu, tshidima udi ne ditabuija dia ne bikunyibua nebikola bikalaye mukuna mamînu ne uatangila. Nunku udi ukuna mamînu, uamiamina mâyi ne uatangila. Padiye wenza nunku, bikunyibua bidi bikola ne bimupesha biakudia.
Kuikala ne ditabuija mu Yezu kudi kumvuija ne; tudi tuitabuija ne udi ne moyo ne tumutumikila, nansha bituikala katuyi tumumona. Ebi bidi bimua bia ku bintu bitudi tuitabuijila Yezu patudi ne ditabuija mu yeya:
-
Tudi tuitabuija ne Tatu wetu wa mu Diûlu wakasungula Yezu bua kutuambuluisha bua tulonda dilongolola dia Tatu wetu wa mu Diûlu.
-
Tudi tuitabuija ne Yezu udi Mupandishi wetu.
-
Tudi tuitabuija ne wakaledibua mu buloba ebu bu Muana wa Baluma wa Tatu wetu wa mu Diûlu.
-
Tudi tuitabuija ne wakalua pa buloba bua kutuleja mushindu wa kupingana kudi Tatu wetu wa mu Diûlu.
-
Tudi tuitabuija ne mmutunanga.
-
Tudi tuitabuija ne wakakenga bua mibi yetu bua ne tudi mua kukudimuna mutshima ne bua katunyokibua buayi to.
-
Tudi tuitabuija ne wakafua ne wakabika ku lufu.
-
Tudi tuitabuija ne malongesha enda adi malelela.
-
Tudi tuitabuija ne tuetu batumikila Yezu, tudi mua kupingana bua kusomba ne Tatu wetu wa mu Diûlu.
Kuikala ne Ditabuija mu Yezu Kilisto kudi ne mushinga ku dipingana dietu dia kudi Tatu wetu wa mu Diûlu. Patudi ne ditabuija mu yeya, tudi tumueyemena ne tusua kulonga buenda. Yezu udi muntu umua udi mua kutulombola bua kualukila kudi Tatu wetu wa mu Diûlu. Amu aba badi bitabuija Yezu ne bamutumikila ki badi mua kupingana ne kusomba ne Tatu wetu wa mu Diûlu.
Dilejangana
-
Ditabuija ntshinyi?
-
Ditabuija mu Yezu ntshinyi?
-
Bimua bia ku bintu kayi bitudi tuitabuijila Yezu?
-
Bua tshinyi tudi dijinga ne kuikala ne ditabuija mu Yezu Kilisto?
Yezu Wakatupesha Mushindu wa Kutantshisha Ditabuija mu Yeya
Yezu wakatuambila mushindu utudi mua kulonga buenda ne kuikala ne ditabuija mu yeya. Wakatuambila bua kubala mifundu ne kulonga bivua bambi bafunda buenda. Wakatulomba bua tuteleja muambi udi ne moyo lelu. Patudi tuenza malu â, tudi tulonga biabungi pa Yezu.
Patudi tulonga pa Yezu, tudi ne bua kusambila. Tudi ne bua kulomba Tatu wetu wa mu Diûlu bua kutuambuluisha tumvua bitudi tubala ne tuteleja pa Yezu. Tatu wetu wa mu Diûlu neatuma Nyuma wa Tshijila bua kutuambuluisha bua tumvua bintu bitudi tubala. Nyuma wa Tshijila neatuambila ne, Yezu udi Muana wa Baluma wa Tatu wetu wa mu Diûlu, ne udi Mupandishi wetu, ne malongesha enda adi malelela.
Muambi uvua ubikidibua ne Alama wakamba ne, bituikala basua kumanya pikala tshintu ntshilelela, tudi ne bua kutshitêta. Wakatshifuanyikija ne dikuna dia dimînu. Patudi tukuna dimînu ne tuditangila, nedikola, ne netumanya bua ne divua dimînu dimpa. Pikala dimînu kadiyi dikola, netumanya ne divua dimînu dibi. Patuikala basua kumanya pikala malongesha a Yezu neadi malelela, tudi ne bua ku’alonga ne ku’anemeka.
Kuikala ne ditabuija mu Yezu kudi kumvuija biabungi kabiyi amu kuamba ne; tudi tuitabuija mu yeya. Kudi kumvuija kumueyemena bikola menamena mu ngikadilu wa kumutumikila, ku bionsu bidiye utuelela mukenji bua kuenza. Amu aba badi batumikila Yezu ki badi bulelela ne ditabuija mu yeya. Ne patudi tumutumikila, ditabuija dietu mu yeya didi dilua dikola. Tudi tulonga ne malongeshi enda adi afuma kudi Tatu wetu wa mu Diûlu, ne ka’ena a kudi muntu to.
Bituikala katuyi tutumikila Yezu, ditabuija dietu didi dilua diteketa. Patudi tuenza malu adiye utuelela mukenji bua kuenza, ditabuija dietu didi ditanta bikola. Ditabuija dietu didi bua kutungunuka ne kulua dikola tô ne mutudi tupeta dimanya dishuwa ne udi ne moyo, dia bushuwa bu bua tuetu mua kumumona.
Dilejangana
-
Mushindu kayi utudi mua kuikala ne ditabuija mu Yezu nansha bituikala katuyi bamumona?
-
Bua tshinyi tudi ne bua kulonda Yezu bua tuikala ne ditabuija?
Tudi mua Kupeta Dimanya Dinena ne Bukola Patudi Ne Ditabuija mu Yezu
Bambi batudi tubala mu mifundu bavua ne ditabuija dikola mu Yezu. Ditabuija edi diakabapesha bukola bua kuambuluisha bantu babu. Bu muvuabu ne ditabuija mu Yezu, bavua ne bukola bua kuenza malu avuabu kabayi mua kudienzela.
Kumpala kua Yezu kuledibua pa buloba, Tatu wetu wa mu Diûlu wakamuludika bua kuambila muambi ubikidibua ne Noa bua ibaka buatu, bualu Tatu wetu wa mu Diûlu uvua utuma mvula munena biabenga bantu ba tshikondu tshia Noa kukudimuna mitshima. Bantu kabakakudimuna mitshima to. Noa wakitabuija Yezu ne wakibaka buatu. Pakalua mvula munena, bantu bonsu bavua kabayi bakudimuna mitshima, bakashipibua, kadi Noa ne dîku dienda bavua bakubibua mu buatu bualu bavua bitabuija Yezu ne benza tshivuaye muamba.
Mose avua muambi wakalopola bantu benda mu bupika. Tatu wetu wa mu Diûlu wakatuma Mose bualu Mose uvua muitabuija Yezu ne uvua wenza malu avua Yezu umuambila bua kuenza.
Pavua Yezu ne moyo pa buloba, mamu umua uvua ne ditabuija dinena mu yeya. Uvua muikala usâma bua ntanta mula, ne uvua muitabuija ne, bikalaye mua kulenga amu bilamba bia Yezu, uvua ne bua kôndopibua. Yezu uvua wenda munkatshi mua musumba wa bantu. Wakadisaka munkatshi mua musumba tô ne kudiye, ne wakalenga bilamba bienda. Wakôndopibua musangu umua. Yezu wakamuambila ne ditabuija dienda diakamôndopa.
Muambi Joseph Smith uvua ne ditabuija mu Yezu Kilisto. Wakabala mu Bibilia ne, Tatu wetu wa mu Diûlu neandamuna masambila etu bituitabuija ne neenza. Joseph wakasambila kudi Tatu wetu wa mu Diûlu. Tatu wetu wa mu Diûlu ne Yezu bakamueneka kudi Joseph. Tatu wetu wa mu Diûlu wakambila Joseph bua ateleja Yezu ne atumikila ku tshivua Yezu umuambila. Joseph wakatumikila Yezu, ne nunku wakakumbana bua kupeta Mukanda wa Molomo ne kuambuluisha mu dipinguluja dia Ekelezia wa Yezu Kilisto.
Yezu neatuambuluisha petu bituikala ne ditabuija mu yeya. Neatuambuluisha ne ntatu yetu. Neatuambuluisha bituikala bateketa moyo. Neatuambuluisha bua kutamba bubi. Netuikala bakumbana bua kuambuluisha mêku etu ne bantu bakuabu.
Patudi ne ditabuija mu Yezu, tudi tubanga kulonda dilongolola dia Tatu wetu wa mu Diûlu. Tudi tubanga kusomba ne kuenza malu adi alua kutupingaja kudi Tatu wetu wa mu Diûlu. Bituikala tutungunuka, dimua dituku, ne tuikala bakumbana bua kusomba nenda kashidi.
Dilejangana
-
Dimanya ne bukola bia mushindu kayi bitudi mua kupeta patudi ne ditabuija mu Yezu?