Milulu ne Mamanyisha
Shapita 31: Bujitu Buetu bua Kuyisha Lumu Luimpa
Go Ye Therefore [Yayi bienu], kudi Harry Anderson

Yezu wakelela Bapostolo benda mukenji bua kulongesha lumu luimpa mu buloba bujima.

Shapita 31

Bujitu Buetu bua Kuyisha Lumu Luimpa

Mushindu kayi utudi mua kuambuluisha bana bonsu ba Tatu wetu wa mu Diûlu bua kuteleja lumu luimpa?

Tatu Wetu wa mu Diûlu Mmusua bua Bana Benda Bonsu Bamanya Lumu Luimpa

Tatu wetu wa mu Diûlu mmunanga bana benda bonsu. Yonsu wa kutudi udi ne mushinga kudiye, ne yonsu udi mua kulua bu yeya. Mmusua bua tupingana bua kusomba nenda ne tuikala ne disanka ne butumbi bimua ne bidiye nabi.

Tatu wetu wa mu Diûlu udi ne dilongolola bua kuambuluisha yonsu wa kutudi bua kupingana ne kusomba nenda. Dilongolola edi didi dibikidibua ne lumu luimpa lua Yezu Kilisto. Patudi tulonga lumu luimpa, tudi tulonga bunena bua mushinga utudi nawu. Tudi tulonga bua tshinyi tudi apa pa buloba ebu. Tudi kabidi tulonga muaba utuaya patudi tufua. Tudi tulonga tshitudi ne bua kuenza bua kupingana kudi Tatu wetu wa mu Diûlu.

Yezu Kilisto udi muanetu wa mu nyuma. Udi muana’abuta wa nyuma wa Tatu wetu wa mu Diûlu. Wakalua pa buloba bu Muana Umuepela wa Tatu wetu wa mu Diûlu mu musunyi. Mmutunanga bikola ne wakakenga ne kufua buetu. Wakalongesha tshidi Tatu wetu wa mu Diûlu musua bua tumanya ne tuenza. Wakalongolola Ekelezia wenda bua kutuambuluisha. Wakapesha bantu baluma buakuidi pa buloba bua benza mudimu wenda.

Ekelezia wa Yezu Kilisto wa Bansantu ba Matuku a Ndekelu udi ekelezia umuepela udi ne buakuidi bua Tatu wetu wa mu Diûlu ne dilongolola dilelela dienda. Tatu wetu wa mu Diûlu mmusua bua bantu bonsu balonga pa dilongolola dienda ne baditaba. Milulu ya Ekelezia mulelela idi ne mushinga bua tuetu kupingana bua kusomba ne Tatu wetu wa mu Diûlu.

Tatu wetu wa mu Diûlu wakambila tshidimba tshionsu tshia Ekelezia wenda bua tshiambila bakuabu lumu luimpa. Bambi bonsu katshia ku Adama, bakapitshisha diba diabu dia bungi mu kulongesha lumu luimpa kudi bakuabu. Bakatuambila ne, tshidimba tshionsu tshia Ekelezia tshidi ne bua kuikala muena bukenji. Etshi tshidi tshitupa tshia ku dilaya dituvua benza patuvua batambuishibua. Tuakalaya bua kuambila bantu bua Yezu diba dionsu.

Dilejangana

  • Bua tshinyi bantu bonsu badi ne bua kuteleja lumu luimpa?

  • Nganyi udi ne bujitu bua kulongesha lumu luimpa kudi bantu bonsu?

Dîku dionsu mu Ekelezia didi ne bua kumvua mushinga wa kulongesha lumu luimpa. Tudi bamanya mushinga udi nawu dilongolola. Tudi mua kutamba kukuba bakuabu bua kuenza tshionsu tshidi tshilombibua bua kubambuluisha bumvua dilongolola dia Tatu wetu wa mu Diûlu.

Bidimba bia dîku bidi mua kuenza bintu bia bungi bua kuambuluisha bakuabu bua balonga lumu luimpa. Bimua bia ku bintu ebi bidi:

  1. Kuenzela bakuabu malu mimpa.

  2. Kuambila bakuabu ne udi ne disanka bualu udi utumikila malongesha a lumu luimpa.

  3. Kumvuija lumu luimpa kudi balunda ne bena mutumba. Kubabikila bua baya neba mu bisangilu bia Ekelezia.

  4. Kubikila bantu bua balua ku nzubu weba bua bikala neba mu dilolo dia mu dîku anyi padi bena bukenji mua kubalongesha.

  5. Kupesha bena bukenji mena ne miaba ya balunda beba anyi malela eba badi mua kuikala basua kulonga lumu luimpa.

  6. Kulongesha bana mushinga wa kusadila bu bena bukenji. Kubambuluisha bua kulama makuta bua kuya mu bukenji.

  7. Kufuta tshia dikumi tshieba.

  8. Kufila makuta bua lupetu lua muena bukenji.

Dilejangana

  • Ela meji ku mushindu wa kuamba lumu luimpa kudi muntu udi kayi tshidimba tshia Ekelezia.

  • Ntshinyi tshidi dîku dieba mua kuenza bua kuambuluisha bakuabu bantu bua kulonga lumu luimpa?

Dîku Dieba Didi Mua Kuikala Tshitupa tshia Mudimu wa Bukenji wa Mushinga mu Ekelezia

Ekelezia wetu mmutuma binunu bia bena bukenji bua kulongesha lumu luimpa mu malaba a bungi. Babungi ba ku bobu badi bansonga badi ne bidimu munkatshi mua 18 ne 25. Bantu bakulumpa badi pabu basadila bu bena bukenji. Badi bikala bidimba bia Ekelezia bia lulamatu ne bitumikidi bikala ne dijinga dia kusadila Tatu wetu wa mu Diûlu.

Bena bukenji bakuabu ba bungi badi bakengedibua. Dîku dieba didi mua kuikala tshitupa tshia mudimu ewu wa mushinga mu kulongolola bidimba bia dîku bua kuya mu makenji. Baledi badi mua kuambuluisha bana babu bua kupeta majadiki a lumu luimpa ne kulonga mushindu wa kumvuija lumu luimpa kudi bakuabu. Badi mua kulongesha bana babu bua kunanga bantu ba nsombelu ya bungi. Baledi badi kabidi ne bua kudilongolola bua kuya mu bukenji padi bana babu bakola.

Bantu ba bungi kabena banji kuteleja lumu luimpa to. Bamua ba ku bobu badi basombela mu matunga adi bena bukenji kabayi nansha banji kukumbana bua kuya. Bantu aba badi ne bua kupeta mushindu wa kuteleja ne kuitaba lumu luimpa. Tatu wetu wa mu Diûlu neafila mushindu bua etshi tshienzeka. Tudi ne bua kusambila kudiye bua balombodi ba matunga â banyishila bena bukenji bua kubuela ne kulongesha bantu babu.

Dilejangana

  • Mushindu kayi udi mêku mu Ekelezia muwuja bujitu buawu bua kulongesha lumu luimpa kubi bantu bonsu?

  • Bua tshinyi bena bukenji ba bungi badi amu bakengedibua lelu?

Mabenesha Manena Adi Alua kudi Aba Badi Bambila Bakuabu Lumu Luimpa

Tatu wetu wa mu Diûlu neatubenesha bituikala tutamba kukuba bakuabu bua kubambila lumu luimpa. Neatubenesha bua kutumikila kuetu kua mikenji yenda ne bua disanka ditudi tutuadila aba badi bitaba lumu luimpa. Mmutuambila ne neikala ne disanka bituambuluisha nansha umua wa ku bana benda bua kulonga lumu luimpa ne kupingana kudiye. Disanka dietu ne dikala kabidi dinena bituambuluisha bana benda ba bungi bua kualukila kudiye.

Dilejangana

  • Mabenesha kayi adi alua ku dituala dia lumu luimpa kudi bakuabu?

  • Ukatuku mupeta dimua dia ku mabenesha â anyi?