Milulu ne Mamanyisha
Shapita 17: Balondi ba Yezu Kilisto
Abraham on the Plains of Mamre [Abalahama ku Mpata wa Mamale], kudi Grant Romney Clawson

Abalahama wakenza tshipungidi ne Mukalenga.

Shapita 17

Balondi ba Yezu Kilisto

Balondi ba Yezu Kilisto mbashilangana ne bantu bakuabu. Balondi benda mbanganyi? Mushindu kayi udibu bashilangana?

Balondi ba Yezu Badi Bananga Tatu Wetu wa mu Diûlu

Balondi ba Yezu badi bikala bantu badi bamuitabuija ne bamutumikila. Badi balonga dilongolola dia Tatu wetu wa mu Diûlu bu mudidi dilongesha kudibu kudi Yezu ne basua kudilonga. Badi bananga Tatu wetu wa mu Diûlu ne badi bitabuija ne, udi ujinga bua moyo muimpa abakumbena bonsu. Badi bitabuija ne Yezu udi Muana wa Baluma wa Tatu wetu wa mu Diûlu. Badi bitabuija ne Yezu udi Mupandishi wabu. Badi bitabuija ne Yezu wakabapepejela bua kupingana bua kusomba ne Tatu wetu wa mu Diûlu. Badi bitabuija ne amu ku dilonda dia Yezu ne ditumikila dia mikenji yenda ki kudibu mua kubuikidibua ku mibi yabu ne kupingana kudi Tatu wetu wa mu Diûlu.

Aba badi balonda Yezu badi ne disakidila kudi Nzambi ne Yezu bua bionsu bidi Nzambi ne Yezu babebenzela. Badi basua kutumikila Yezu. Badi bakudimuna mitshima ku mibi yabu. Badi batambuishibua ne bapeshibua dipa dia Nyuma wa Tshijila. Badi bumvua ne bantu bonsu badi ne mushinga kudi Nzambi. Badi bidikija bua kuambuluisha bantu bakuabu mu mushindu yonsu udi ukumbana.

Balondi balelela ba Yezu badi benza malaya a tshijila. Badi balaya kudi Tatu wetu wa mu Diûlu bua kuikala babikidibua mu dîna dia Yezu Kilisto. Etshi tshidi mu dipangadika dia kumanyika bu tshidimba tshia Ekelezia wenda, bua kuitaba ne kulonda malongesha enda onsu, ne bua kumuvuluka dituku dionsu. Badi kabidi balaya bua kunanga bakuabu bantu ne kubambuluisha.

Tatu wetu wa mu Diûlu udi wenza malaya a tshijila ne balondi ba Yezu. Bimua bia ku bintu bidiye ulaya bidi ne:

  1. Neabitaba bu bidimba bia Ekelezia wa Yezu Kilisto.

  2. Neabapesha dipa dia Nyuma wa Tshijila.

  3. Neabambuluisha bua kupeta bintu bidibu bajinga.

  4. Neabapesha bukola buenda bua bobu kuenza mudimu wenda.

  5. Neabapesha mabenesha manena mpindiewu ne kashidi.

  6. Neabanyishila bua kupingana bua kusomba nenda biatungunukabu kutumikila Yezu.

Dilejangana

  • Mushindu kayi udi balondi ba Yezu bashilangana ne bakuabu bantu?

  • Ntshinyi tshidi balondi ba Yezu balaya bua kuenza?

  • Ntshinyi tshidi Tatu wetu wa mu Diûlu ne Yezu balaya balondi ba Yezu?

Moses Calls Aaron to the Ministry [Mose udi ubikila Alona ku Mudimu], kudi Harry Anderson

Mose wakapesha Alona buakuidi ku ditenteka dia bianza.

Yezu Udi Upa Buakuidi kudi Bidimbimba bia Ekelezia bia Baluma Bikumbana

Yezu udi upa bukôkeshi kudi bidimba bia Ekelezia bia baluma bua kumuambuluisha mu mudimu wenda. Bukôkeshi ebu budi bubikidibua ne buakuidi. Tatu wetu wa mu Diûlu wakapa Yezu bukôkeshi ebu.

Kuikala ne buakuidi tshidi dibenesha dinena. Buakuidi budi bukôkeshi bua tshijila. Amu aba badi bikala bidimba bia baluma ne bikala balondi balelela ba Yezu ne bikala badienzeja ne moyo mushindama bua kulama mikenji yenda, ki badi bitabibua bua kuikala ne buakuidi.

Padi muntu muluma muikala ne buakuidi, udi mua kuenza malu makuabu adi Yezu musua bua enza. Udi mua kulongesha bakuabu bantu bitangila Tatu wetu wa mu Diûlu ne Yezu, udi mua kubatambuisha, ne udi mua kubapesha dipa dia Nyuma wa Tshijila. Muntu muluma udi ne buakuidi udi mua kubenesha dîku dienda padibu basama ne padibu bikala ne ntatu mikuabu. Diba dionsu didi bantu bitabuija Yezu ne batumikila mikenji yenda, Yezu udi ubapesha buakuidi ne mabenesha makuabu.

Dilejangana

  • Buakuidi Ntshinyi?

  • Bua tshinyi Yezu udi upa buakuidi kudi bidimba bienda bia Ekelezia bia baluma bikumbana?

Bantu ba Bungi Bakitabuija Yezu ne Bakalonda Mikenji Yenda Kumpala Kua Kuluaye pa Buloba

Adama ne Eva ne Bamua ba ku Bana Babu, Bakitabuija Yezu ne Kulondabu Mikenji Yenda Kumpala kua Kuluaye pa Buloba

Tatu wetu wa mu Diûlu wakambila Adama ne Eva bua bitabuija Yezu Kilisto ne batumikila mikenji yenda. Bavua bambidibua ne nealua pa buloba dimua dituku. Adama ne Eva bakalaya ne nebatumikila. Bakalama dilaya diabu. Bakatambuishibua, ne bakapeta dipa dia Nyuma wa Tshijila.

Kumpala kua Yezu kulua pa buloba, wakapesha Adama buakuidi. Wakitabila Adama bua apa buakuidi kudi bana benda ba baluma bavua batumikila Yezu. Adama wakateka bianza bienda pa mutu wa umua yonsu wa ku bana benda ba baluma batumikidi ne kumupeshaye buakuidi. Kunyima, bana ba baluma ba Adama bakapesha bana babu ba baluma buakuidi mu mushindu umua.

Dilejangana

  • Ntshinyi tshivua Adama ne Eva benza bua kuikala balondi ba Yezu?

  • Mushindu kayi uvua balondi ba Yezu bapeta buakuidi?

Abalahama Wakabenesha Yezu ne Wakalonda Mikenji Yenda

Abalahama ne dîku dienda bakitabuija Yezu. Bakitabuija ne nealua pa buloba dimua dituku. Abalahama wakalaya Tatu wetu wa mu Diûlu ne, neatumikila Yezu ne ne’enza mudimu wenda. Tatu wetu wa mu Diûlu wakalaya Abalahama ne, bikalaye mutumikidi, Tatu wetu wa mu Diûlu neamubenesha yeya ne ndelanganyi yenda. Ebi bidi bimua bia ku bintu biakalaya Tatu wetu wa mu Diûlu:

  1. Neapesha Abalahama ne ndelanganyi yenda buakuidi.

  2. Neapesha Abalahama ne ndelanganyi yenda bulaba bua kusomba.

  3. Neapesha Abalahama ndelanganyi ya bungi.

  4. Babungi ba ku ndelanganyi ya Abalahama nebikala balondi ba Yezu.

  5. Babungi ba ku ndelanganyi ya Abalahama nebasungula bua kuenza mudimu wa Yezu ne kulongesha bakuabu bantu bitangila Tatu wetu wa mu Diûlu ne Yezu.

Abalahama wakalongesha bana benda bua kuitabuija Yezu ne kutumikila mikenji yenda. Abalahama wakapa buakuidi kudi muanenda wa baluma ubikidibua ne Isaka. Isaka wakapa buakuidi kudi muanenda wa baluma ubikidibua ne Yakoba. Kunyima, Tatu wetu wa mu Diûlu wakashintulula dîna dia Yakoba mu Isalele. Isalele uvua ne bana ba baluma dikumi ne babidi. Wakabalongesha bua kuitabuija Yezu ne kutumikila mikenji yenda. Bavua ne buakuidi. Ndelanganyi ya bana ba baluma ba Isalele yakabikidibua ne bisamba dikumi ne bibidi bia Isalele.

Dilejangana

  • Ntshinyi tshivua Tatu wetu wa mu Diûlu mulaya Abalahama?

  • Isalele uvua nganyi?

Bantu ba Isalele Bakitabuija Yezu ne Kutumikilabu Mikenji Yenda

Bu muvua kakuyi biakudia bia bungi mu bulaba buabu, Isalele ne bana benda ba baluma bakaya kusomba mu bulaba bubikidibua ne Ejipitu. Mu tshikondu atshi, bantu bavua basomba mu Ejipitu bakenzeja ndelanganyi ya Isalele midimu mikola. Bakabenzeja ku bukola bua bashala mu Ejipitu bua bikala bapika babu. Kabakabanyishila bua bapingana ku bulaba buvua Yezu mulaya bua kubapesha to.

Panyima pa bidimu bia bungi, Tatu wetu wa mu Diûlu wakasungula muntu ubikidibua ne Mose, bua kulombola ndelanganyi ya Isalele pambelu pa Ejipitu. Mose wakenza mudimu ne bukola bua buakuidi bua kubambuluisha banyema kumpala kua bantu ba mu Ejipitu. Wakabalombola ku bulaba buvua Yezu mulaya bua kubapesha. Bulaba ebu buvua bubikidibua ne Kanâna. Buvua buikala ku wesete wa Musulu wa Yadene ne Mbuwa wa Mukela.

Dilejangana

  • Mbukola kayi buvua Mose muenza nabu mudimu bua kuambuluisha bantu ba Yezu bua banyema kumpala kua bena Ejipitu?

Bantu ba Isalele Bakimanyika Kuitabuija Yezu

Pakasomba bantu ba Isalele mu bulaba bua Kanâna panyima pa bidimu bia bungi, bakimanyika kuitabuija Yezu ne kutumikila mikenji yenda. Yezu wakatuma bambi bua kumbambila bakudimuna mitshima ne batumikila mikenji yenda. Yeshaya, Eliya, ne Yelemiya bavua bamua ba ku bambi bavua Yezu mutuma. Kuvua bakuabu bambi ba bungi.

Kadi bantu ba Isalele kabakakudimuna mitshima to. Ki bualu kayi Tatu wetu wa mu Diûlu wakanyishila bakuabu bantu bua balua ne babalombola ne bangata bulaba buabu ne batangalaja babungi ba ku bobu ku malaba makuabu. Etshi tshia kenza bua bantu badipuekesha ne tshiakabatuma bua kuvuluka Yezu ne kumutumikila. Kadi bidimu bia bungi kumpala, Yezu wakaledibua mu Beteleheme, bantu ba Isalele bakalua bantu babi kabidi, ne Tatu wetu wa mu Diûlu wakanyishila bantu babikidibua ne Bena Lomo bua kukuata bantu ba Isalele. Bakatangila bimenga biabu ne bibambalu bia tshijila biabu.

Dilejangana

  • Ntshinyi tshiakafika pavua bantu bapua moyo malaya abu ne Tatu wetu wa mu Diûlu ne bimanyika kutumikila Yezu?

Yezu Wakalua pa Buloba bua Kulongolola Balondi Benda

Pakalua Yezu pa buloba, wakalongesha bantu ne uvua Muana wa Baluma wa Nzambi. Wakalongesha ne bikalabu batumikila malongesha enda, bobu kabakuikala ne bua kukenga kashidi bua mibi yabu to. Wakabambila bua bamuitabuija ne bakudimuna mitshima. Wakamba ne, badi ne bua kutambuishibua. Wakalaya bua kutuma Nyuma wa Tshijila. Wakabambila bua kunanga ne kutumikila Nzambi. Wakabalongesha bua kunanga bakuabu bantu ne kubambuluisha.

Bantu bavua bitabuija Yezu ne bamutumikila bakalua balondi benda. Wakalongolola bantu benda mu tshisumbu tshibikidibua ne Ekelezia wa Yezu Kilisto. Wakapa buakuidi kudi bantu baluma bavua bikala balombodi ne balongeshi mu Ekelezia wenda.

Dilejangana

  • Mushindu kayi uvua Yezu muambuluisha bantu bua bamulonda?

  • Ntshinyi tshivua bantu ne bua kuenza mu mushindu wa kulua balondi ba Yezu?

Kuikala Umua wa ku Balondi ba Yezu Ndianyisha Dinena

Aba badi balonda Yezu badi ne disanka. Mbamanya dilongolola dia Tatu wetu wa mu Diûlu buabu. Mbamanya ne Tatu wetu wa mu Diûlu mmubananga. Mbamanya ne mmusua bua bobu balonda Yezu bua ne Yezu udi mua kubambuluisha bua kupingana kudiye. Mbamanya malu adibu ne bua kuenza bua kuikala ne disanka. Dipa dia Nyuma wa Tshijila didi dibambuluisha ne dibakolesha. Padibu ne ntatu, mbamanya ne Yezu neabambuluisha. Mbamanya ne Nzambi neababenesha bua kuikala ne ditabuija dia kulonda Yezu.

Aba badi balonda Yezu badi ne kusakidila bua mabenesha a bungi adi Tatu wetu wa mu Diûlu ubapesha. Badi basakidila Tatu wetu wa mu Diûlu bua mabenesha â padibu basambila.

Bantu badi kabayi balondi ba Yezu badi mua kulua pabu balondi benda. Badi mua kulonga buenda ku dibala dia mifundu ne ku diteleja dia balombodi ba Ekelezia wenda. Badi mua kumuitabuija, kukudimuna mitshima, ne kutambuishibua. Bikalabu batumikila Yezu, badi mua kupeta bintu bimua bitu Nzambi mulaya kudi balondi ba Yezu.

Dilejangana

  • Bua tshinyi bidi dianyisha dinena bua kuikala umua wa ku balondi ba Yezu?