Shapita 1

Nzambi Udiku

Misangu mikuabu bantu badi badiebeja ne: Nzambi udiku anyi? Pikalaku Nzambi, mmufuanangana ne nganyi? Munyi mundi mua kumumanya?

Bintu bia Bungi Bidi Bituleja ne Nzambi Udiku

Patudi tutangila bintu bia bungi bia mushinga pa buloba, tudi bamanya ne muntu umua wa lungenyi ne muimpa wakabilongolola ne wakabifuka. Butuku, patudi tumona mitoto ya bungi ne mabulunga anyunguluka pa miaba yawu, tudi bamanya muntu umua udi ne bukola bunena wakabifuka ne udi ubitangila. Nzambi ki muntu wakafuka bintu bionsu ebi.

Kudi bamua bantu bimpa bakamona ne kuakula ne Nzambi. Bakatuambila mushindu udi Nzambi muikala. ne tshidiye musua bua tuenza. Bakatuambila ne udi Tatu wetu wa mu Diûlu. Bakafunda mikanda ya tshijila bua tumulonga.

Yonsu wa kutudi udi mua kumanya ne Nzambi udiku ne udi Tatu wetu wa mu Diûlu. Neatuambuluisha bua kumanya ne udi mulelela ne tudi mua kumumanya bia bungi.

Dilejangana

Bimua bia ku bintu kayi bidi bileja ne Nzambi udiku?

Tatu Wetu wa mu Diûlu Udi Muntu Mujalama

Bantu bimpa bakamona Tatu wetu wa mu Diûlu bakamba ne udi mulelela. Udi ne moyo. Udi mufuanangana ne muntu.

Tatu wetu wa mu Diûlu kena lupingu anyi nyama to. Udi ne mubidi wa misunyi ne mifuba. Mubidi wenda mmufuanangana ne mubidi wa muntu, kadi udi mushilangana.

Mubidi wenda kena mua kufua to. Mubidi wenda kena umvua busâmi ne kena mua kusâma to.

Udi ne lumvu. Udi mua kumvua disanka anyi dibungama. Mmunanga bantu bonsu ne mmusua bua bikala ne disanka. Mmuimpa ne mmujalama. Udi wenza amu malu mimpa, ne udi wakula amu bulelela. Mmumanya malu onsu. Udi mua kuenza malu onsu. Butoka budi ku nyunguluilu wenda. Bukenka buenda ne buimpa buenda budi bunena bututu katuyi banji kumona.

Tatu wetu wa mu Diûlu udi muntu umua utudi mua kukukuila. Mmusomba mu muaba ubikidibua diûlu. Udi muaba mupita buimpa ku buloba.

Dilejangana

Nzambi udi muntu wa ngikadilu kayi?
Nzambi udi mushilangana netu ku tshinyi?

Tatu wetu wa mu Diûlu udi Utuleja Dinanga Dienda mu Mishindu ya Bungi

Tatu wetu wa mu Diûlu udi wenza mudimu ne bukola buenda bua kutuambuluisha. Muanenda wa Baluma, Yezu, wakafuka tshibuashibuashi ne buloba. Yezu wakafuka diba, ngondu ne mitoto. Wakaludika Yezu bua ela bikunyibua ne nyama pa buloba. Tatu wetu wa mu Diûlu wakatuenzela bintu bionsu ebi bualu udi mutunanga. Mmusua kutuambuluisha bua kuikala bimpa ne diakalenga.

Tatu wetu wa mu Diûlu udi wenza mudimu ne dimanya dienda bua kutuambuluisha. Mmumanya malu onsu akapita mu bikondu bia kala. Mmumanya malu onsu adi apita katataka. Ne mmumanya adi alua kupita mu matuku âlua. Mmumanya meji a yonsu wa kutudi. Bu mudiye mumanya malu onsu, udi mumanya tshitudi natshi dijinga bua kuikala ne disanka. Mmumanya ne bua kuikala ne disanka dilelela, tudi ne bua kuikala bantu bimpa. Mmusua kutuambuluisha bua tuikala bantu bimpa bualu mmutunanga.

Dilejangana

Munyi mudi Tatu wetu wa mu Diûlu uleja dinanga dienda kutudi?

Tatu Wetu wa mu Diûlu Mmusua bua Tumumanya

Bualu Tatu wetu wa mu Diûlu mmutunanga, wakatupesha moyo ne buloba buimpa bua tusomba. Mmusua bua tumanya malu atudi ne bua kuenza. Wakatulaya ne tudi mua kumumanya.

Kuenza kua malu â kudi mua kutuambuluisha bua kulonga bia bungi pa bidi bitangila Tatu wetu wa mu Diûlu:

Tudi mua kutangila buloba buakafukaye ne kuikala ne disakidila.
Tudi mua kuitabuija ne Tatu wetu wa mu Diûlu udi mulelela ne mmutunanga.
Tudi mua kubala malu avua bantu bimpa bafunda pa bidi bitangila Tatu wetu wa mu Diûlu.
Tudi mua kulonga ne kuenza malu adiye musua bua tulonga ne tuenza.
Tudi mua kuakula ne Tatu wetu wa mu Diûlu ne tumulomba bua atuambuluisha bua tumumanya.

Dimanya dia Tatu wetu wa mu Diûlu didi mua kutuambuluisha mu moyo wetu. Dimumanya didi mua kutuambuluisha bua kumvua disanka anyi bakubibua. Mmuimpa ne kakutuenzela malu adi mabi to. Tudi mua kulonga malu adiye musua bua tuenza. Tudi mua kulonga mushindu wa kulomba diambuluisha dienda. Tudi mua kulua bantu bimpa ne ba disanka.

Dilejangana

Tshitudi mua kuenza ntshinyi bua kumanya ne kumvua Tatu wetu wa mu Diûlu?
Munyi mua tuambuluisha dimanya dia Tatu wetu wa mu Diûlu?