Shapita 15
Ditambula
Kuikala mutambuishibua tshidi tshimua tshia ku bintu bia mushinga mukola tshiudi mua kuenza pa buloba apa. Bua tshinyi ditambula didi ne mushinga mukola? Mushindu kayi muakana wa kutambuishibua?
Tatu Wetu wa mu Diûlu Wakatuelela Mukenji Bua Tutambuishibua
Kuikala mutambuishibua kudi kumvuija kuikala muedibua mu bujima muinshi mua mâyi bua mutantshi ne kuikala mujula kabidi kudi muntu udi ne bukôkeshi bua kuenza ditambula. Ditambula didi tshitupa tshia dilongolola dia Tatu wetu wa mu Diûlu buetu. Wakatuelela mukenji bua kutambuishibua bua kuleja ne tudi tuitabuija mu Yezu Kilisto, ne tudi bamunanga ne basua bua kumutumikila, ne kabidi tudi bakudimuna mitshima ku mibi yetu.
Yezu uvua mumanya ne Tatu wetu wa mu Diûlu wakelela bana benda bonsu mukenji bua kutambuishibua. Pavua Yezu pa buloba, wakatambuishibua. Wakenza nunku bualu uvua musua kutumikila Tatu wetu wa mu Diûlu. Uvua kabidi musua kutuleja ne, tudi ne bua kutumikila Tatu wetu wa mu Diûlu ne kuikala batambuishibua.
Muntu yonsu udi mufikisha bidimu muanda mukulu, udi umvua budi buimpa ne budi bubi, ne udi muikala ne ditabuija mu Yezu ne muikala mukudimuna mutshima, udi ne bua kutambuishibua. Bana badi bateketa ne bidimu muinshi mua muanda mukulu, kabena dijinga ne kutambuishibua to. Tatu wetu wa mu Diûlu kena ubalumbuluisha bua bidibu benza to. Kabidi, bantu badi ne lungenyi kaluyi lukumbana bua kumvua buimpa anyi bubi, kabena dijinga ne kutambuishibua to. Bakuabu bantu bonsu badi ne bua kutambuishibua bikalabu basua kupingana bua kusomba ne Tatu wetu wa mu Diûlu.
Yezu wakatuambila diba ditudi nebua kutambuishibua. Wakambila balondi benda bua batambuisha bantu badi balonga buenda, bamuitabuija, ne bakudimuna mitshima. Wakapesha bamua ba ku bantu baluma mu Ekelezia bukôkeshi bua kutambuisha bantu.
Dilejangana
-
Bua tshinyi Tatu wetu wa mu Diûlu mmusua bua tutambuishibua?
-
Bua tshinyi Yezu wakatambuishibua?
-
Nganyi udi mulombibua bua kutambuishibua?
Kilisto wakatambuishibua kudi Yone Mutambuishi.
Kuikala Mutambuishibua Mbumua bua ku Malu a Mushinga Munena Butudi Mua Kuenza
Mu kuikala mutambuishibua, tudi tuleja Tatu wetu wa mu Diûlu ne, tudi basua kulonda dilongolola dienda buetu. Tudi tulaya bua kuitaba Yezu bu mulombodi wetu ne tutumikila ku bionsu bidiye utuambila bua kuenza. Tudi tulaya bua kuikala amu kumuvuluka yeya ne malu adiye mutuenzela.
Patudi tuteka ditabuija mu Yezu Kilisto, tukudimuna mitshima ku mibi yetu, ne tutambuishibua, Tatu wetu wa mu Diûlu udi utubuikidila mibi yetu. Udi utulaya bua ne, tudi mua kupingana bua kusomba nenda. Udi utuitaba bu bidimba bia Ekelezia wa Yezu. Udi utuma Nyuma wa Tshijila bua kutuambuluisha bua tulonga biabungi buenda ne bua kutuambuluisha bua tuenza malu mimpa. Tudi tupeta mabenesha onsu â, bituikala tutungunuka kuenza malu atudi tulaya bua kuenza patudi tutambuishibua.
Tudi mua kupeta mabenesha â amu bituikala batambuishibua. Ewu udi mushindu umua utudi nawu bua kupingana bua kusomba ne Tatu wetu wa mu Diûlu. Ewu udi mushindu umua utudi nawu bua kulua bidimba bia Ekelezia wa Yezu Kilisto. Ewu udi mushindu umua utudi nawu bua kupeta dipa dia Nyuma wa Tshijila, tshidi tshikala bunema bua kuikala ne diambuluisha dia Nyuma wa Tshijila mu mioyo yetu. Dipa edi didi dipeshibua kutudi patudi tutambuishibua. Malu onsu â adi akengedibua bua tuetu kupingana bua kusomba ne Tatu wetu wa mu Diûlu.
Dilejangana
-
Dilaya kayi ditudi tuenzela Tatu wetu wa mu Diûlu patudi tutambuishibua?
-
Dilaya kayi didi Tatu wetu wa mu Diûlu utuenzela patudi tutambuishibua?
-
Bua tshinyi ditambula didi ne mushinga mukola?
Tudi Ne Bua Kudilongolola Bua Kutambuishibua
Tudi ne bua kuenza amua malu kumpala kua tuetu kuikala pabuipi bua kutambuishibua. Tudi ne bua kulonga bitangila Yezu Kilisto ne kumuitabuija, kukudimuna mitshima ku mibi yetu, ne kuenza malu adi Yezu utuelela mukenji bua kuenza.
Dilejangana
-
Ntshinyi tshitudi ne bua kuenza bua kudilongolola bua ditambula?
Tudi bua kutambuishibua ku dinyisha mu mâyi bua kubuikidibua mibi yetu.
Ditambula Didi Ditupesha Ntuadijilu Mupia-mupia
Ditambula didi dienza bua tubangisha moyo mupia-mupia, basukula ku bubi. Yezu wakamba dimua ne, didi bu kuledibua kuetu kabidi. Wakamba ne, katuakupingana bua kusomba ne Tatu wetu wa mu Diûlu to, amu tuetu baledibua kabidi mu nyuma.
Umua wa ku balondi ba Yezu, uvua ne dîna ne Paulo, wakamba ne tudi ne bua kubangisha moyo mupia-mupia patudi tutambuishibua. Wakamba ne, patudi tuedibua muinshi mua mâyi bua ditambula, tshidi bu kujîka mibi yetu yonsu. Patudi tulopoka mu mâyi, tshidi bu kulua musukudibua, muntu mupia-mupia, muikala pabuipi ne kutuadija moyo mupia-mupia. Ditambula didi ditubangishisha mu njila wa kupingana kudi Tatu wetu wa mu Diûlu.