Shapita 21
Milulu
Ntshinyi tshidi bantu baluma ne bansongaluma mua kuenza ne buakuidi?
Ne Buakuidi, Bantu Baluma Badi ne Bukôkeshi bua Momumua ne Buvua Nabu Yezu bua Kukumbaja Milulu
Milulu idi mishinga ya tshijila idi ikumbajibua kudi aba badi bapeshibua bukôkeshi bua buakuidi. Ditambula, dijadikibua, ditenteka dia bianza pa mutu pa babêdi bua kubôndopa, ne dibenesha ne difila dia biakudia bia tshijila, bidi imua ya ku milulu.
Pavua Yezu pa buloba, wakakumbaja milulu bua kuambuluisha bantu. Wakôndopa babêdi ne wakenza bua mpofu imona. Wakenza bua mpata-matshi yumvua ne wakajula bafua ne moyo. Wakapesha balondi benda biakudia bia tshijila.
Yezu wakapesha bantu baluma badi ne buakuidi bukola ne bukôkeshi bua kukumbaja milulu. Bantu baluma ne bansongaluma bakumbana badi ne buakuidi, badi mua kukumbaja milulu. Badi bakumbaja milulu bua kutubenesha ne kutuambuluisha bua kulua bafuanangana ne Tatu wetu wa mu Diûlu. Milulu idi ituambuluisha bua kudilongolola bua kupingana ne kusomba nenda.
Bu mudi Yezu mupesha bantu baluma buakuidi pa buloba, tudi mua kupeta mabenesha a bungi mu mioyo yetu. Tudi mua kutambuishibua, kupeta dipa dia Nyuma wa Tshijila, ne kusuikibua pamua ne mêku etu kashidi.
Balombodi bakulu ba mpuilu badi ne bua kulongesha bidimba bia mpuilu yabu mushindu wa kukumbaja milulu. Bikala muntu udi ne buakuidi ukumbanja mululu ne kayi mumanya mua kuenza, udi ne bua kulomba mulombodi mukulu wa mpuilu wenda bua amulongesha.
Dilejangana
-
Bua tshinyi milulu idi ikumbajibua?
Yezu wakenza biakudia bia tshijila mu Biakudia bia Dilolo ne Bapostolo Benda.
Milulu Idi Mikumbajibua bua Kutuambuluisha
Ditambula
Ditambula didi mululu wa kumpala wa lumu luimpa lua Yezu Kilisto. Kumpala kua kutambuishibua, bantu badi ne bua kuikala ne ditabuija mu Yezu, kukudimuna mitshima ku mibi yabu, ne kusua bua kuenza malu avua Yezu mulongesha.
Amu muntu udi ne buakuidi ki udi mua kutambuisha bakuabu. Bua kutambuisha muntu yonsu, udi ne bua kuikala ne dianyisha dia kudi muepiskopo anyi mulombodi mukulu wa ditamba. Muntu udi utambuisha, udi ubuela mu mâyi ne muntu udi utambuishibua. Muntu udi utambuisha, udi ubikila udi muikala utambuishibua mu dîna, ne wamba disambila dia tshitupa. Nunku udi wela muntu udi utambuishibua mu bujima muinshi mua mâyi ne udi umulopola pambelu pa mâyi kabidi.
Disambila didi muntu wamba didi: “Muikala mukôkeshibua kudi Yezu Kilisto, ndi nkutambuisha mu dîna dia Tatu, ne dia Muana, ne dia Nyuma wa Tshijila. Amena.”
Dilejangana
-
Mululu kayi wakumpala wa lumu luimpa lua Yezu Kilisto?
Kupa Dipa dia Nyuma wa Tshijila
Padi muntu utambuishibua, bantu baluma badi ne Buakuidi bua Melekisedeke badi bateka bianza biabu pa mutu wa muntu, ne umua wa ku bobu udi wamba disambila disunguluka. Mu disambila adi, badi bajadika muntu tshidimba tshia Ekelezia wa Yezu Kilisto wa Bansantu ba Matuku a Ndekelu, ne badi bamuambila ne, “Peta Nyuma wa Tshijila.” Etshi tshidi tshiumvuija ne, muntu udi upeta bunema bua kuikala ne buludiki bua Nyuma wa Tshijila dituku dionsu, pikala muntu uditatshisha mu bulelela bua kutumikila mikenji ya Yezu. Kupa kua dipa dia Nyuma wa Tshijila eku, kudi kuikala mululu muibidi wa lumu luimpa lua Yezu Kilisto. Nunku, muntu udi ukumbaja mululu udi upesha muntu dibenesha didi difuma ku Nyuma wa Tshijila. Bantu baluma badi ne bua kuikala ne dianyisha dia muepiskopo anyi mulombodi mukulu wa ditamba bua kupesha muntu dipa dia Nyuma wa Tshijila.
Dilejangana
-
Nganyi udi mua kupa dipa dia Nyuma wa Tshijila?
Dijidila ku Buakuidi
Kupa muntu muluma buakuidi, tshidi tshikala mululu. Kudi ne bua kuenjibua kudi bantu baluma bakuabu badi ne buakuidi. Badi ne bua kuikala ne dianyisha dia muepiskopo anyi mulombodi mukulu wa ditamba bua kupa Buakuidi bua Alona, ne dia mulombodi mukulu wa dikunji bua kupa Buakuidi bua Melekisedeke. Tshidi tshikala kanemu kanena kudi muntu muluma bua kupeta buakuidi. Aba badi balama malaya adibu benza padibu bapeta buakuidi, nebikala ne buakuidi kashidi.
Dilejangana
-
Nganyi udi mua kupesha bakuabu buakuidi?
Biakudia bia Tshijila
Muntu udi ne buakuidi udi wamba disambila bua kubenesha diampa ne mâyi. Nunku yeya anyi mukuabu muntu udi ne buakuidi, udi upesha bidimba bia Ekelezia tshipesa tshia diampa bua kudia ne ndambu ya mâyi bua kunua. Esthi tshidi tshibidikibua ne biakudia bia tshijila. Biakudia bia tshijila bidi bikala mululu.
Diampa ne mâyi bidi bikala bimanyinu bia musunyi ne mashi bia Yezu. Bidi bituambuluisha bua kuvuluka ne wakalambula* moyo wenda buetu. Tudi ne bua kuvuluka dinanga dienda buetu. Tudi ne bua kuikala ne kusakidila bua mudiye mutupepejela bua tubuikidibua mibi yetu ne tusomba kabidi ne Tatu wetu mu Diûlu.
Musangu yonsu utudi tuangata biakudia bia tshijila, tudi tuenza kabidi dilaya dituvua benzela Tatu wetu wa mu Diûlu patuvua batambuishibua. Tudi tulaya kabidi ne, netuikala tuvuluka Yezu, ne tudi basua kubikidibua mu dîna dienda, kabidi ne netutumikila mikenji yenda dituku dionsu. Kumpala kua kuangata biakudia bia tshijila, tudi ne bua kukudimuna mutshima bua malu mabi atudi benza, ne tuela meji ku malaya atudi benza.
Tatu wetu wa mu Diûlu udi utulaya ne, bituenza malu atudi balaya bua kuenza, yeya neatuma Nyuma wa Tshijila bua kuikala netu dituku dionsu.
Dibenesha dia Diampa
Yezu wakatupesha masambila masunguluka bua biakudia bia tshijila. Etshi tshidi disambila dia diampa:
“Ô Nzambi, Tatu wa Tshiendelela, tudi tukulomba mu dîna dia Muaneba, Yezu Kilisto, ubenesha ne ujidila diampa edi, bua anyima ya bonsu badi badiangata, bua ne badia mu divuluka dia mubidi wa Muaneba, ne bajadika kûdi, Ô Nzambi, Tatu wa Tshiendelela, ne badi bikala ne moyo muimpa bua kuangata dîna dia Muaneba pa mutu pabu, ne kumuvuluka diba dionsu ne kulama mikenji yenda idiye mubapesha; bua bikala ne Nyuma wenda muikala nabu diba dionsu. Amena.”
Dibenesha dia Mâyi
Etshi tshidi disambila dia mâyi:
“Ô Nzambi, Tatu wa Tshiendelela, tudi tukulomba mu dîna dia Muaneba, Yezu Kilisto, ubenesha ne ujidila mâyi â bua anyima ya bonsu badi ba’anua, bua ne benza nanku mu divuluka dia mashi a Muaneba, avua mamatshishibua buabu; bua ne bajadika kûdi, Ô Nzambi, Tatu wa Tshiendelela, ne badi bamuvuluka diba dionsu, bua bikala ne Nyuma wenda muikala nabu. Amena.”
Dilejangana
-
Biakudia bia tshijila Ntshinyi?
-
Ntshinyi tshitudi ne bua kuelela meji padi badi ne buakuidi babenesha ne babanya biakudia bia tshijila?
-
Malaya kayi atudi tuenza patudi tuangata biadidia bia tshijila?
Dibenesha dia Bana
Bantu baluma badi ne buakuidi badi mua kubenesha bana bakesa, pa tshibidilu, panyima pa mbingu mikesa ilonda kuledibua kua bana bakesa. Badi ne bua kuikala ne dianyisha dia muepiskopo anyi mulombodi mukulu wa ditamba bua kuenza. Tatuenda wa muana mukesa, udi mua kubenesha muana mukesa bikalaye ne Buakuidi bua Melekisedeke. Bikalaye kayi ne Buakuidi bua Melekisedeke, kena mua kubenesha muana mukesa anyi kuikala mu tshijengu ne bantu baluma badi babenesha muana to. Udi mua kulomba muntu udi ne Buakuidi bua Melekisedeke bua kubenesha muana mukesa. Tatu, bikalaye ne Buakuidi bua Melekisedeke ne muikala mukumbana, anyi mukuabu muntu udi ne Buakuidi bua Melekisedeke, udi wambula muana mukesa mu maboku enda, muambuluisha kudi bakuabu badi ne bua kuikala pabu ne Buakuidi bua Melekisedeke, ne udi wamba disambila. Mu disambila, udi wakula kudi Tatu wetu wa mu Diûlu, wamba ne udi ukumbaja mululu ku bukôkeshi bua Buakuidi bua Melekisedeke, ne udi upesha muana mukesa dîna didi disungula kudi baledi. Pashisha, udi ubenesha muana mukesa bu mudi Nyuma wa Tshijila umuambila.
Dilejangana
-
Ntshinyi tshidi muntu udi ne Buakuidi bua Melekisedeke wenza padiye ubenesha muana mukesa?
Dibenesha dia Bantu Badi Basama
Padi bantu basama, badi mua kulomba bantu baluma badi ne Buakuidi bua Melekisedeke bua kubabenesha. Kumpala, umua wa ku badi ne buakuidi udi wela muntu udi usama manyi. Udi wenza nunku mu kuteka ndambu wa manyi majidila pa mutu wa muntu, pashisha, udi uteka bianza pa mutu wa muntu ne wamba disambila disunguluka. Panyima pa etshi, badi ne buakuidi badi bateka bianza biabu pa mutu pa muntu, ne umua wa kudibu udi usuika diela dia manyi ne ubenesha bu mudi Nyuma wa Tshijila umuambila. Bantu ba bungi bakumvua bimpa anyi bakôndopibua ku disâma diabu pakapetabu dibenesha dia buakuidi. Dibenesha dia bantu basama didi mululu.
Manyi adibu benza nawu mudimu wa kulâba bantu badi basama, adi majidila bua kipatshila aka mu mululu mukuabu. Bua kujidila manyi, muntu udi ne Buakuidi bua Melekisedeke udi wambula ndambu wawu mu kakopu kakangula ne wamba disambila disunguluka.
Muntu udi ne Buakuidi bua Melekisedeke kena dijinga ne dianyisha dia kudi muepiskopo, mulombodi mukulu wa ditamba, anyi mulombodi mukulu wa dikunji bua kukumbaja milulu eyi to.
Dilejangana
-
Nganyi udi mua kubenesha bantu padibu basama?
Tatu Udi Mua Kubenesha Bidimba bia Dîku Dienda
Tatu udi ne Buakuidi bua Melekisedeke udi mua kubenesha bidimba bia dîku dienda. Udi mua kuenza nunku padi tshidimba tshia dîku tshisama anyi kabidi mu dijinga dia diambuluisha disunguluka. Kena dijinga ne dianyisha dia kudi muepiskopo, mulombodi mukulu wa ditamba, anyi mulombodi mukulu wa dikunji bua kutshienza to. Tatu udi uteka bianza bienda pa mutu wa muntu ne wamba disambila. Mu disambila, udi upesha muntu dibenesha didi Nyuma wa Tshijila umuambila mu meji bua kufila. Dibenesha dia bidimba bia dîku didi mululu.
Dilejangana
-
Ndiba kayi didi tatu mua kubenesha bidimba bia dîku dienda?
Imua Milulu Idi ne Mushinga wa Bungi ne Bantu Bonsu Badi ne Bua Kuyipeta
Imua milulu ya buakuidi idi ne mushinga udi wambuluisha muntu bua kupingana ne kusomba ne Tatu wetu wa mu Diûlu. Ibidi ya ku milulu eyi idi, ditambula ne dipeta dipa dia Nyuma wa Tshijila. Bantu baluma ne bansongaluma badi pabu ne bua kupeta buakuidi. Milulu mikuabu, bu mudi mabenesha adi tatu upesha bidimba bia dîku dienda, idi ikumbajibua diba ditudi dijinga ne diambuluisha ne bukola.
Dilejangana
-
Imua milulu kayi idiku?
-
Ndibenesha kayi didi umua yonsu utuala?