Ntempelo mu Portland, Oregon, Etas Unis.
Shapita 32
Kuikala mu Dîku bua Kashidi
Mushindu kayi udi mêku mua kuikala pamua bua kashidi, nansha panyima pa moyo wa pa buloba?
Nzambi Wakalongolola bua Mêku Ikala Pamua bua Kashidi
Dîku didi tshisumbu tshia bantu tshia mushinga wa bungi pa buloba. Dîku dietu dia pa buloba didi ditentula ku dîku dietu dia mu diûlu. Tuvua bonsu bana ba muntu ba baluma ne bakaji mu diûlu. Tuvua bana ba Nzambi. Nzambi uvua mulombodi wa nzubu wetu wa mu diûlu. Tuakapeta bukubi bua dinanga ne buludiki bua kudi baledi betu ba mu diûlu.
Nzambi wakatuma yonsu wa kutudi mu dîku panu pa buloba. Wakapesha baledi bujitu bua kukuba umua yonsu wa ku bana benda padibu panu pa buloba. Baledi badi ne bua kunanga bana babu ne kubapesha biakudia, bilamba, ne nzubu. Badi ne bua kulongesha bana babu bitangila Nzambi ne mushindu udibu mua kulua bu yeya.
Nzambi wakapepejela mêku bua ikala pamua bua kashidi. Wakapesha balombodi ba Ekelezia wenda bukôkeshi bua kukuatakaja mêku pamua bua kashidi. Dikuatakaja pamua edi didi dibikidibua ne disuikibua. Disuikibua edi didi mua kuenzeka amu mu ntempelo. Ntempelo idi nzubu ya tshijila idi amu bidimba dia lulamatu bia Ekelezia mua kuya. Padi muluma ne mukaji basuikibua mu ntempelo kudi muntu udi ne buakuidi ne bukola busunguluka bua kusuika, dibaka diabu kadiakushikila padibu bafua to. Dibaka diabu nedishala kashidi bialamabu malaya adibu benza mu ntempelo. Esthi tshidi tshibikidibua ne dibaka dia tshiendelela.
Bikala muluma ne mukaji kabayi basuikibua mu ntempelo, dibaka didi dishikila padi umua wa kudibu ufua. Bituikala basukibua mu ntempelo, ne bitualonda ne lulamatu Yezu Kilisto tô ne ku ndekelu kua mioyo yetu, mêku etu adi mua kuikala pamua bua kashidi.
Bantu babidi baselangana badi mua kuya ku ntempelo bua kusuikibua bikalabu balondi ba lulamatu ba Yezu. Aku, muntu udi ne buakuidi muikala ne bukôkeshi busunguluka, udi mua kubasuika kudi umua ne mukuabu. Udi kabidi usuika bana babu kudibu. Padibu basuikibua kudi umua ne mukuabu, badi mua kuikala pamua bua kashidi, amu bu ne bavua baselangana mu ntempelo kumbangilu.
Nzambi mmusua bua bana benda bonsu balongolola bua kusuikibua mu ntempelo ne bua kukolesha dîku didi ditumikila. Baledi badi ne bua kuludika bana babu bua bikala pabuipi bua kuya ku ntempelo bua kusuikibua padibu basedibua. Padi muluma ne mukaji basuikibua mu ntempelo, bana bonsu badi baledibua kudibu panyima pa disuikibua diabu, nebadisuikibua kudibu.
Dilejangana
-
Mushindu kayi udi Nzambi mutupepejela bua tuetu kuikala ne mêku etu kashidi?
-
Bua tshinyi bidi ne mushinga bua tuetu kusuikibua mu ntempelo?
Amu Bidimba bia Ekelezia bia Lulamatu Ki Bidi Mua Kubuela mu Ntempelo
Ntempelo idi miaba ya tshijila. Amu bidimba bia Ekelezia wa Yezu Kilisto wa Bansantu ba Matuku a Ndekelu badi baleja ditabuija diabu mu Yezu Kilisto mu kutumikila mikenji yenda ki bidi bianyishibua kua kuyibuela. Bantu aba bakalua bakumbana bua kuya ku ntempelo. Kumpala kua muntu kubuela mu ntempelo, udi ne bua kuikala tshidimba tshia Ekelezia bua mutantshi ubangishila ku tshidimu tshimua. Bantu baluma badi ne bua kuikala ne Buakuidi bua Melekisedeke.
Bua kumona ne badi bakumbana bua kuya ku ntempelo, baluma ne bakaji badi ne bua kuakula ne muepiskopo anyi mulombodi mukulu wa ditamba. Padi muepiskopo anyi mulombodi mukulu wa ditamba upeta ne muntu udi ukumbana, neapesha muntu dibeji ditua tshiala dibikidibua ne dianyisha dia kubuela mu ntempelo. Pashisha, tshidimba dia bulombodi bukulu bua dikunji anyi mulombodi mukulu wa bukenji, badi pabu ne bua kuyukila ne muntu. Neatua tshiala ku dianyisha dia kubuela mu ntempelo bikalaye mupeta muntu mukumbana. Muntu udi ne bua kuya ku ntempelo ne dianyisha dia kubuela mu ntempelo bua yeya kubuelamu.
Eyi idi nkonku mifuanangana ne yakonka muepiskopo anyi mulombodi mukulu wa ditamba bua kupangadika pikala tshidimba tshia Ekelezia tshidi tshikumbana bua kuya ku ntempelo:
-
Udi witabuija Nzambi; Muanenda wa Baluma, Yezu Kilisto; ne Nyuma wa Tshijila anyi?
-
Udi witaba Mulombodi Mukulu wa Ekelezia wa Yezu Kilisto wa Bansantu ba Matuku a Ndekelu bu muambi, mumonyi, ne mubuluidi anyi? Udi umuitaba bu muntu umuepela pa buloba udi ne bukôkeshi bua kuenza mudimu ne nsapi yonsu ya buakuidi anyi?
-
Udi ufila tshimua tshia pa dikumi tshia bipeta bieba mu Ekelezia anyi?
-
Udi utumikila Dîyi dia Lungenyi anyi?
-
Udi widikija bua kuikala mululama ne bakuabu bantu anyi?
-
Udi udienzeja bikola bua kukumpaja bujitu bueba mu Ekelezia mu kuya mu bisangilu bieba ne mu kutumikila mikenji anyi?
-
Udi unemeka mukenji wa bunonoka anyi?
-
Ukatu muenza bubi bunena ne kuyi mubutonda kudi balombodi ba buakuidi bakumbanyina anyi?
Kubuela mu ntempelo kudi kuikala dianyisha dia tshijila. Tudi ne bua kuikala bakumbana ne disua dia kutumikila dilaya dionsu dia tshijila ditudi tuenza ne Nzambi mu ntempelo. Tudi ne bua kuvuluka ne disuikibua dia tshiendelela dienza mu ntempelo didi dia tshijila. Didi mushindu umuepela utudi mua kuikala pamua bu mêku bua kashidi. Didi mushindu umuepela wa tuetu kupetela mabenesha onsu adi Nzambi muikala nawu buetu. Kuya ku ntempelo bua kusuikibua bidi ne mushinga wa bungi bua disanka dietu dia tshiendelela.
Dilejangana
-
Nganyi udi mua kubuela mu ntempelo?
-
Malu kayi adi muntu ne bua kuenza bua kuikala mukumbana bua kubuela mu ntempelo?
-
Bua tshinyi bidi ne mushinga bua tuetu kuya ku ntempelo ne kusuikibua?
Kulongolola Dîku Dieba bua Kuikala Pamua bua Kashidi
Kusuikibua mu ntempelo kudi kupepeja bua kuikala pamua bua kashidi bu dîku, kadi kudi malu makuabu atudi ne bua kuenza bituasua kupeta dibenesha dinena edi. Tudi ne bua kutungunuka bua kulonda Yezu ne lulamatu. Tudi ne bua kulama malaya atudi benza mu ntempelo. Tudi ne bua kulonga bua kuikala bidimba bia dîku bidi binangangana ne bisadilangana. Tudi ne bua kusambila Nzambi bua Nyuma wa Tshijila atuambuluisha bua kuenza masungula makumbanyina mu bionsu bitudi tuenza. Tudi ne bua kuikala kuidikija bua kuambuluisha mêku etu bua ikala makumbana bua kusomba ne Nzambi.
Dilejangana
-
Ku luseka lua disuikibua mu ntempelo, ntshinyi tshidi dîku ne bua kuenza bua kuikala pamua kashidi?
Nzambi Wakatupepejela bua Tupandisha Bankambua Betu
Bana ba Nzambi binunu bakafua kabayi bateleja lumu luimpa luenda to. Kabavua bapeta milulu idi ikengedibua bua bobu kubuikidibua ku mibi yabu ne bua kuikala bakumbana bua kusomba kabidi ne Nzambi. Nzambi mmunanga bana benda bonsu, ne mmusua bua bonsu bapingana kudiye, nunku wakafila mushindu wa kubakumbajila milulu ya lumu luimpa. Mudimu ewu udi ne bua kuenjibua mu ntempelo.
Imua ya ku milulu idi mienza mu ntempelo bua aba badi bafua idi: Ditambula, difila dia dipa dia Nyuma wa Tshijila, ne disuikibua dia mêku bua tshiendelela. Bu mudi milulu eyi mikala ikengedibua bua ewu yonsu udi musua kuikala ne Nzambi kabidi, tudi mua kuenza mudimu ewu bua bankambua betu.
Dilejangana
-
Mushindu kayi udi aba badi bafua kabayi bateleja lumu luimpa mua kupeta milulu idi ikengedibua bua kupingana kudi Nzambi?
-
Nganyi udi ne bujitu bua kumona padi milulu idi ikengedibua mienza bua aba badi bafua?
Badi ne Moyo Badi Benza Milulu bua Badi Bafua
Kudi bimua bintu bitudi mua kuenza bua milulu ikumbajibua bua malela etu adi mafua. Tudi ne bua kubamanya ku dîna diabu ne ku dituku ne muaba wa kuledibua ne kufua kuabu. Tuetu katuyi bapeta mamanyisha â, tudi mua kubamanya mu kuangata bionsu bitudi mua kumanya mu dîku (tatu, mamu, ne bana babu).
Mudimu wa kupeta mena a bankambua betu badi bafua ne mamanyisha makuabu pa bobu udi ubikidibua ne dilondangana dia bankambua, anyi muyuki wa dîku.
Kudi mabeji abidi, abikidibua ne mutshi wa mulongu wa bankambua ne dibeji dia dikunguija dia dîku, miaba iwudi mua kufunda mamanyisha â. Udi mua kupeta nkopi ya mabeji â kudi mulombodi wa buakuidi weba. Neakupesha muntu bua akuambuluisha bua kufunda mamanyisha â. Nunku udi mua kuya anyi kutuma mamanyisha ku ntempelo, muaba wakumbajibua milulu.
Pikalaku kakuyi umua wa ku malela etu udi ne moyo kayi ne mamanyisha atudi tukeba, tudi mua kuapeta mu miandiku ya mbula matadi, mu miandiku ya ekelezia uvua bankambua betu bikala, mu nkita, anyi mu miaba mikuabu idi mamanyisha mikalaku.
Bituikala bakumbana, tudi mua kuya ku ntempelo bua kuenza milulu bua malela etu. Bituikala katuyi tukumbana bua kuya ku ntempelo, bakuabu nebenza milulu buabu. Tudi ne bua kuya ku ntempelo misangu ya bungi bua kuenza milulu ya bafua.
Dilejangana
-
Ntshinyi tshitudi ne bua kuenza kumpala kua kukumbaja milulu mu ntempelo bua bankambua betu badi bafua?
-
Mmamanyisha kayi adi malombibua bua milulu eyi kuenzeka?
-
Nganyi udi mua kukumbaja milulu bua bankambua betu badi bafua?
Miyuki ya Nkaya Idi ne Mushinga
Patudi tubala bidi tshidimba tshia dîku dietu tshifunda buatshi, tudi tumanya ne tunanga muntu awu bimpa. Ku luseka lua kulonga bua malela etu mafua ne kuenza milulu buabu, tudi ne bua kulama miandiku ya moyo wetu nkayetu. Tudi ne bua kufunda pa baledi betu, diledibua dietu, ne pa malu avua matufikila mu moyo wetu. Tudi kabidi ne bua kufunda meji etu bua bana betu ne bankana betu bamanya bia bungi pa tuetu ne bua bikala bakankamana bua kuenza malu amua mimpa atudi benza.
Nzambi wakambila Adama bua afunda miandiku ya moyo wenda bua bana benda. Bambi bakafunda pabu miandiku ya nunku, ne tudi petu ne bua kuyenza. Mu kubala miandiku idi Adama ne bambi bakuabu bafunda, tudi tulonga mabenesha ne mikenji yakapetabu kudi Nzambi. Etshi tshidi tshituambuluisha bua kuenza malu mimpa. Tudi ne bua kuambuluisha bana betu mu kuenza miandiku ya mioyo yetu.
Dilejangana
-
Bua tshinyi Nzambi wakambila bantu benda bua benza miandiku ya mioyo yabu?
-
Mabenesha kayi adi mua kuluila bana beba ne bankana beba kupitshila ku miandiku ya nkaya yeba?