Shapita 6
Adama ne Eva
Adama ne Eva bavua banganyi? Ntshinyi tshivuabu benza bua kutuambuluisha?
Adama ne Eva Bavua Bantu Bakumpala bua Kulua pa Buloba Ebu
Tatu wetu wa mu Diûlu wakinyika bantu bakumpla pa buloba ne Adama ne Eva. Bavua bikala babidi ba ku bana benda ba bukitu. Bakatupepejela bonsu buetu bua kulua pa buloba.
Mu diûlu, Adama uvua ubikidibua ne Mikaele. Uvua umua wa ku balombodi betu. Wakatulombola mu mvita ne Satana. Mikaele uvua muntu muimpa. Wakenza tshivua Tatu wetu wa mu Diûlu musua bua enza. Wakalua muntu wakumpala bua kuikala pa buloba.
Eva uvua muana wa bakaji muimpa wa Tatu wetu wa mu Diûlu. Tatu wetu wa mu Diûlu wakatuma Eva pa buloba ne Adama bua ikala mukajienda ne bua amuambuluisha. Tatu wetu wa mu Diûlu uvua mumanya ne kabivua bimpa bua Adama ikala nkayenda to. Adama, nkayenda, kavua mua kutupepejela bua tulua pa buloba to. Mudimu wa Eva mu dilongolola uvua ne mushinga bu wa Adama.
Dilejangana
-
Kumpala kua kulua pa buloba, Adama uvua ubikidibua bishi ne tshiakenzaye ntshinyi?
-
Bua tshinyi Tatu wetu wa mu Diûlu wakatuma Eva bua ikala ne Adama?
Budimi bua Edene Buvua Nzubu Wakumpala wa Adama ne Eva
Tatu wetu wa mu Diûlu wakenza muaba muimpa pa buloba bua Adama ne Eva basombamu. Uvua ubikidibua ne Budimi bua Edene. Pavua Adama ne Eva mu Budimi bua Edene, bavua bonsu ne mubidi wa musunyi ne mifuba udi kawuyi mua kufua. Kabavua ne bana to. Kabavua ne bua kukuna ne kupola anyi kuenza mudimu bua kupeta bintu bivuabu nabi dijinga to. Kabakavuluka moyo wabu wa mu diûlu to. Kabakamanya tshivua tshimpa anyi tshivua tshibi to.
Mu Budimi bua Edene, Adama ne Eva bavua bakumbana bua kuenda ne kuakula ne Tatu wetu wa mu Diûlu. Wakabalongesha malu avuabu ne bua kuenza. Wakabambila bua batangila budimi ne babulama bimpa. Wakabambila bua bikala ne bana. Wakabambila kabidi bua ne bavua badikadila mua kudia tshimuma tshia mutshi yonsu mu budimi, pakumbusha tshimua. Tatu wetu wa mu Diûlu wakabambila bua kabadi tshimuma tshia mutshi wa dimanya dia buimpa ne bubi to. Wakabadimuija ne biadiabu tshimuma tshia mutshi awu, nebikala ne bua kufua.
Dilejangana
-
Mushindu kayi uvua moyo wa Adama ne Eva mu Budimi bua Edene mushilangana ne moyo wa lelu?
-
Ntshinyi tshivua Tatu wetu wa mu Diûlu muambila Adama ne Eva bua kuenza?
Adama ne Eva mu Budimi bua Edene.
Adama ne Eva Bakalua Batapuluka ne Tatu Wetu wa mu Diûlu
Satana wakela meji ne udi mua kunyanga dilongolola dia Tatu wetu wa mu Diûlu. Wakalua mu Budimi bua Edene ne kuidikijaye bua kusuisha Eva bua kulabula tshimuma tshia mutshi wa dimanya dia buimpa ne bubi. Wakamuambila ne yeya mudia tshimuma, kakufua to. Wakamuambila ne neamanya dishilangana pankatshi pa buimpa ne bubi, bu mudi Tatu wetu wa mu Diûlu. Eva wakitabuija Satana, ne wakadia tshimuma. Pakadi Eva muambila Adama bua ne uvua mulabula tshimuma, uvua mumanya ne uvua ne, neikala ne bua kumbuka mu budimi. Wakalabula penda tshimuma bua ne badi mua kushala pamua.
Mioyo wa Adama ne Eva wakakudimuka pakadiabu tshimuma tshivua Tatu wetu wa mu Diûlu mubambila bua kabadi. Tatu wetu wa mu Diûlu wakabatuma pambelu pa Budimi bua Edene. Kabavua mua kuenda ne kuakula nenda kabidi to. Kumbukila musangu awu, bukua bantu buakatapuluka ne kumpala kua Tatu wetu wa mu Diûlu. Kubenga kukumbana bua kuikala ne Tatu wetu wa mu Diûlu kudi kubikidibua ne lufu lua nyuma.* Adama ne Eva bavua ne bua kusomba mu buloba pambelu pa budimi buimpa. Bavua ne bua kuenza mudimu bua kupeta bintu bivuabu nabi dijinga.
Mibidi yabu yakashintuluka. Mpindiewu, bavua mua kulela bana. Bavua mua kusama ne kumvua busâmi ne dibungama, ne dimua dituku bavua ne bua kufua. Mashintuluka akafikila Adama ne Eva adi abikidibua ne Dipona dia Adama.
Mashintuluka â adi akuata ndelanganyi yonsu ya Adama ne Eva. Bu bobu, tudi petu ne bukola bua kulela bana; ne kusama, busâmi, dibungama, ne lufu bidi kabidi bilua kutudi.
Dilejangana
-
Ntshinyi tshivua Satana muenza bua kuidikija kunyanga dilongolola dia Tatu wetu wa mu Diûlu?
-
Mushindu kayi uvua moyo wa Adama ne Eva mushintuluka pakadiabu tshimuma tshia mutshi wa dimanya dia buimpa ne bubi?
-
Lufu lua nyuma ntshinyi?
-
Dipona dia Adama ntshinyi?
Dipona dia Adama Divua Tshitupa Tshia Mushinga mu Dilongolola dia Tatu Wetu wa mu Diûlu
Tatu wetu wa mu Diûlu wakalongolola bua bana benda balua pa buloba ne bapeta mibidi ya misunyi ne mifuba. Pakatumaye Adama ne Eva pambelu pa Budimi bua Edene, bakabangisha kulela bana. Pashisha bana babu bakasela ne kulelabu bana. Mu mushindu ewu bana ba nyuma ba Tatu wetu wa mu Diûlu bavua bikala nenda, bakabangisha kulua pa buloba bu muvuaye mulongolola. Bua bualu bua tshivua Adama ne Eva benza, yonsu wa kutudi uvua mua kupeta mubidi wa musunyi ne mifuba.
Tatu wetu wa mu Diûlu wakalongolola kabidi bua bana benda benza mudimu bua kupeta bintu bivuabu basua ne bivuabu nabi dijinga. Katshia musangu uvua Adama ne Eva bumbuka mu Budimi bua Edene, bana ba Tatu wetu wa mu Diûlu pa buloba badi ne bua kuenza mudimu bua kupeta bintu bidibu basua ne bidibu nabi dijinga.
Pakadia Adama ne Eva tshimuma tshivua Tatu wetu wa mu Diûlu mubambila bua kabadi, bakalonga dishilangana pankatshi pa buimpa ne bubi. Mpindiewu, yonsu wa kutudi pa buloba udi mua kulonga dishilangana pankatshi pa buimpa ne bubi ne udi mua kudisunguila bua kuenza malu mimpa anyi malu mabi.
Pakadi Tatu wetu wa mu Diûlu mutuma Adama ne Eva pambelu pa Budimi bua Edene, bakidikija bua kulonga malu avuaye musua bua benza. Bakamutumikila ne bakalongesha bana babu bua kumutumikila. Yonsu wa kutudi udi ne bua kulonga malu adi Tatu wetu wa mu Diûlu musua bua tuenza, ne tudi ne bua kumutumikila ne kulongesha bana betu bua kumutumikila.
Dilejangana
-
Satana uvua munyanga dilongolola dia Tatu wetu wa mu Diûlu anyi?
-
Bua tshinyi tudi ne bua kuikala ne kusakidila bua malu avua Adama ne Eva benza?