Aba badi balamata tô ne ku ndekelu nebazanjikibua ne Tatu wetu wa mu Diûlu ne Yezu Kilisto.

Shapita 36

Moyo wa Tshiendelela

Muaba kayi utuaya panyima pa Tshilumbuluilu tshia Ndekelu?

Netuya Bonsu mu Muaba Utuvua Balongolodibua bua Kuya

Yezu wakatuambila ne, Tatu wetu wa mu Diûlu mmulongolola miaba ya bungi ya tuetu kosomba. Yonsu wa kutudi neatumibua muaba umua wa ku miaba inayi, bilondeshela mushindu uvua lulamatu luetu kudi Yezu Kilisto. Netuya mu bukalenga butuvua balongolodibua bua kuya kupitshila ku masungula atuvua benza. Miaba inayi eyi idi, bukalenga bua selestiya, bukalenga bua terestiya, bukalenga bua telestiya, ne mu mîdima ya pambelu.

Bukalenga bua Selestiya

Ewu udi muaba udi Tatu wetu wa mu Diûlu ne Yezu basombela. Udi muaba wikala bantu ne disanka, ne newikala mulenga bipita mutudi katuyi mua kuela meji. Bantu basomba mu bukalenga ebu, nebikala ne bua kunanga Tatu wetu wa mu Diûlu ne Yezu, ne nebasungula bua kubatumikila. Badi ne bua kuikala bakudimuna mitshima ku mibi yabu ne bikala bitaba Yezu bu Mupandishi wabu. Badi ne bua kuikala batambuishibua ne bapeshibua dipa dia Nyuma wa Tshijila. Badi ne bua kuikala ne bujadiki bua kudi Nyuma wa Tshijila ne Yezu udi Mupandishi.

Kuikala mu muaba wa ku mutu wa bukalenga bua selestiya kudi kubikidibua ne dizanjikibua* anyi moyo wa tshiendelela. Bua kukumbana bua kuikala mu tshitupa etshi tshia bukalenga bua selestiya, bantu badi ne bua kuikala baselangana mu ntempelo ne badi ne bua kuikala balama malaya uvuabu benza mu ntempelo. Bobu nebikala ne bintu bionsu bidi Tatu wetu wa mu Diûlu muikala nabi ne nebikala bu yeya. Nebikala kabidi bakumbana bua kulela bana ba nyuma ne kuenza miaba mipia-mipia ya yoyi kusomba, ne kuenza malu onsu avua Tatu wetu wa mu Diûlu muenza. Bantu badi kabayi baselangana mu ntempelo nebikala mu bitupa bikuabu bia bukalenga bua selestiya, kadi kabakuikala bazanjikibua to.

Bukalenga bua Terestiya

Bukalenga ebu kabuena buimpa bu mudi bukalenga bua selestiya to. Nansha muakumbula Yezu bukalenga bua terestiya, aba badimu kabakuikala ne Tatu wetu wa mu Diûlu to, ne kabakuikala ne bionsu bidiye nabi to. Aba badi baya mu bukalenga bua terestiya nebikala bantu bakunemekibua. Bamua ba ku bobu nebikala bidimba bia Ekelezia, ne bakuabu kabakuikala to. Nebikala bantu bavua kabayi bitaba Yezu pa buloba to, kadi balua kumuitaba pashisha mu muaba wa nyuma. Bantu balua kusombamu, kabakuikala tshitupa tshia dîku dia tshiendelela to, kadi nebasombela pa bula, kabayi mêku to. Tatu wetu wa mu Diûlu neapesha bantu aba disanka divuabu badilongolola bua kupeta.

Bukalenga bua Telestiya

Bukalenga ebu kabuena buimpa bu mudi bukalenga bua selestiya anyi bukalenga bua terestiya to. Nansha Tatu wetu wa mu Diûlu anyi Yezu kabakukumbula aba badi basombamu to. Banjelu nebakumbula bantu aba, ne nebapeta bukola bua Nyuma wa Tshijila. Bantu badi mu bukalenga bua telestiya badi aba bavua kabayi bitaba lumu luimpa anyi bujadiki bua Yezu, pa buloba anyi mu muaba wa nyuma. Nebakenga bua mibi yabu nkayabu kubangila mu nzubu wa lukanu wa nyuma tô ne panyima pa Tshikondu tshia Bidimu Tshinunu. Nunku, nebalua kubika ku lufu ku ndekelu.

Patshivuabu pa buloba, bavua bena mafi, bivi, bashipinganyi, bambi ba mashimi, bendi ba masandi, ne aba bavua baseka bintu bia tshijila. Badi bantu bavua bitaba ntendelelu ya pa buloba pamutu pa malongesha a Yezu. Bantu ba bungi nebasomba mu bukalenga ebu. Tatu wetu wa mu Diûlu neapesha bantu aba disanka divuabu badilongolola bua kupeta.

Mîdima ya Pambelu

Mîdima ya pambelu idi muaba wikala Satana ne aba bavua bamulonda kusombela. Bantu aba badi aba bavua basungula bua kuikala ne Satana. Kabakubuikidibua to. Bantu aba nebasomba kashidi mu mîdima, dibungama, ne dikenga pamua ne Satana ne nyuma ivua mimulonda.

Dilejangana

Mbukalenga kayi butudi ne bua kudilongolola bua kuya mu mushindu wa kulua bu mudi Tatu wetu wa mu Diûlu?
Amua a ku malu kayi atudi ne bua kuenza panu pa buloba bua kukumbana bua kusomba bu Tatu wetu wa mu Diûlu?

Tatu Wetu wa mu Diûlu Wakatupesha Lumu Luimpa bua Tudilongolola bua Moyo wa Tshiendelela mu Bukalenga bua Selestiya

Tatu wetu wa mu Diûlu udi upesha yonsu wa kutudi mushindu wa kupeta moyo wa tshiendelela pabuipi nenda. Moyo wa tshiendelela udi ngikadilu wa moyo udi Tatu wetu wa mu Diûlu ne Yezu bikala nawu. Tatu wetu wa mu Diûlu udi muntu mujalama. Mmumanya malu onsu. Udi ne bukola ku mutu kua bionsu. Udi ulombola bionsu. Udi ne moyo bilondeshela ku malelela ne mikenji bia tshiendelela.

Yezu wakatumikila Tatu wetu wa mu Diûlu, ki bualu kayi udi musomba ne Tatu wetu wa mu Diûlu. Bituenza malu adi Yezu mutulongesha bua kuenza, netukumbana bua kusomba bu mudi yeya ne Tatu wetu wa mu Diûlu basomba. Bua kupeta moyo wa tshiendelela ne Tatu wetu wa mu Diûlu kudi kuikala dipa ditamba bunena didiye mua kutupesha. Neditutuadila disanka dia bungi dipita tshintu tshibua tshionsu.

Lumu luimpa ludi lutuambila bionsu bitudi ne bua kumanya ne bionsu bitudi ne bua kuenza bua kupeta moyo wa tshiendelela. Ludi lutuambuluisha bua kumanya Tatu wetu wa mu Diûlu ne Yezu. Ludi lutuambuluisha ne mushindu kuikala bu mudibu bikala. Kupitshila ku disambila ne dilonga dia mifundu, tudi mua kubamanya bimpa. Patudi tubamanya ne tubananga, netujinga bua kutumikila mêyi abu. Bituatumikila, netukumbana bua kuikala mudibu ne netukumbana bua kusomba nabu bua kashidi.

Dilejangana

Moyo wa tshiendelela ntshinyi? Nganyi wawupeta?
Mushindu kayi udi lumu luimpa luambuluisha bua kutulongolola bua moyo wa tshiendelela?

Tatu Wetu wa mu Diûlu Neatuambuluisha Patudi Tusungula bua Kutumikila Lumu Luimpa

Tatu wetu wa mu Diûlu mmumanya ne bidi bikumbana bua tuetu bonsu kuteka lumu luimpa mu tshiendedi ne kupeta moyo wa tshiendelela. Bu mutudi bana benda, tudi ne bukola bua kulua budiye. Mmumanya mateketa adi yonsu wa kutudi nawu, ne malu adi alua kututêta. Wakatuanyishila bua kulua pa buloba mu diba ne mu muaba udi utupesha mishindu ya kuenza malu mimpa ne kulonga.

Mpindiewu udi tshikondu tshia kuenza bionsu bitudi mua kuenza bua kupeta moyo wa tshiendelela. Tatu wetu wa mu Diûlu mmutunanga ne mmusua bua tukuata. Wakenza bionsu bidiye mua kuenza buetu. Wakatupesha buloba, muaba utudi mua kulonga ne kukola. Wakatuma Muanenda wa Baluma, Yezu Kilisto, bua kuikala Mupandishi wetu ne bua kutulongesha lumu luimpa. Wakatulomba bua tumusambila. Wakatupepejela bua Nyuma wa Tshijila ikala muludiki wetu. Mpindiewu tudi ne bua kuenza malu mimpa. Bituasungula bua kuikala ne ditabuija mu Yezu Kilisto ne kumutumikila, neatuambuluisha ne neatupesha makanda bua kutamba matêta ne ntantu mikuabu idi itufikila mu mioyo yetu.

Tatu wetu wa mu Diûlu wakatulomba bua tuitaba lumu luimpa. Bua kuenza nunku tudi ne bua kuikala ne ditabuija mu Yezu Kilisto kumpala. Pashisha, tudi ne bua kukudimuna mitshima ku mibi yetu bua tutambuishibua ne tujadikibua bu tshidimba tshia Ekelezia wa Yezu Kilisto wa Bansantu ba Matuku a Ndekelu. Patudi tujadikibua, tudi tupeta dipa dia Nyuma wa Tshijila kudi muntu udi ne buakuidi. Nyuma wa Tshijila udi wambila yonsu wa kutudi tshidi Yezu musua bua tuenza, ne bua kupeta moyo wa tshiendelela, tudi ne bua kupita tshitupa tshidi tshishala tshia moyo wetu mu kumutumikila ne kumusadila.

Yezu udi ulomba bonsu buetu bua kutumikila mikenji bua ituambuluisha bua kudilongolola bua kupingana ne kusomba ne Tatu wetu wa mu Diûlu. Ebi bidi biangata kutumikila kua mukenji wa bunonoka, kufuta kua tshia dikumi ne kufila kua milambu, kutumikila kua Dîyi dia Lungenyi, kuikala mululama diba dionsu, ne kulama kua dituku dia sabata dia tshijila.

Bua kulua bu Tatu wetu wa mu Diûlu, tudi ne bua kupeta kabidi milulu idi mikumbajibua mu ntempelo, mimanyika bu diambika.* Tudi ne bua kusuikibua koku aku bua tuikala pamua ne mêku etu bua tshiendelela. Ne tudi ne bua kukeba mena ne mamanyisha adi atangila malela etu adi mafua, ne kufila bitudi bapeta kudi Ekelezia, bua tubakumbanjila milulu idi ikengedibua mu ntempelo.

Yezu wakatuelela mukenji bua kuenza malu a bungi. Ebi bidi biangata kuambila bakuabu lumu luimpa, kubananga ne kubambuluisha, ne kuikala tshilejilu tshimpa kudibu.

Tudi kabidi ne bua kulama malaya atudi tuenzela Tatu wetu wa mu Diûlu, Kuya mu bisangilu bietu bia Ekelezia misangu yonsu, kulongesha dîku dietu lumu luimpa mu kulonga mifundu dituku dionsu, ne kusambila nkayetu ne ne dîku dietu dituku dionsu.

Bituikala ne ditabuija mu Yezu Kilisto ne tuidikija bua kutumikila mikenji yenda, netupeta moyo wa tshiendelela, ne netulua bu Tatu wetu wa mu Diûlu.

Kulua bu Tatu wetu wa mu Diûlu nkuenza bu kubanda ku tshibandilu. Tudi ne bua kubangishila kuinshi tuenda tubanda ku dikasa ne dikasa tô ne mutudi tufika ku mutu. Muambi Joseph Smith wakamba ne bituikala basua kulua bu Tatu wetu wa mu Diûlu, tudi ne bua kulonga mushindu udiye umvua, wela meji, ne wenza malu. Patudi tumvua bintu ebi buenda, nunku tudi mua kulonga bintu bikuabu bionsu pa yeya, tô ne mutudi tumanya mushindu wa kulua bu mudiye.

Bidi bituambuluisha bua kuvuluka ne, Tatu wetu wa mu Diûlu uvua muntu uvua musomba pa buloba, bu mutudi petu. Wakalua Tatu wetu wa mu Diûlu ku ditamba ntantu, amu bu mutudi petu ne bua kuenza pa buloba ebu. Kadi, Muambi Joseph Smith wakamba ne, katuakulonga bintu bionsu bitudi tujinga bua kulonga patutshidi pa buloba ebu to. Nebituangata mutantshi mula panyima pa tuetu bakumbaja moyo ewu bua kumanya bintu bionsu bitudi tujinga kumanya bua tuetu kulua bu Tatu wetu wa mu Diûlu.

Patudi tulonga bua kulama mikenji yonsu ya Tatu wetu wa mu Diûlu, ela meji mushindu wikalaye ne disanka patuapingana kudiye ne utuambila ne udi ne disanka bua moyo utuvua nawu ne netuikala bu yeya ne netusomba nenda bua kashidi.

Dilejangana

Bua tshinyi bidi bipepela bua muntu yonsu wa kutudi bua kulua bu Tatu wetu wa mu Diûlu?
Bintu kayi bitudi ne bua kuenza bua kuikala ne ngikadilu wa moyo udi nawu Tatu wetu wa mu Diûlu?
Mushindu kayi udi Tatu wetu wa mu Diûlu utuambuluisha bua tulua bu yeya?
Lejaku mushindu ûdi ne bua kumvua pawudi uteleja Tatu wetu wa mu Diûlu ukuambila ne, udi mutumika bimpa ne mmukunanga.