Shapita 27
Dîyi dia Lungenyi
Dimua dia ku mabenesha manena a Tatu wetu wa mu Diûlu didiye mutupesha didi mibidi yetu ya misunyi ne mifuba. Wakatupesha mukenji wa bukola bua mubidi bua kutuambuluisha bua kukuba mibidi yetu. Ntshinyi tshiudi mumanya pa mukenji ewu wa bukola bua mubidi?
Mibidi Yetu Idi ya Tshijila
Kipatshila kamua ka mushinga bua kulua pa buloba, kadi ka kupeta mibidi ya misunyi ne mifuba. Tudi dijinga ne mibidi mu mushindu wa tuetu kulua bu Tatu wetu wa mu Diûlu. Amu ne mibidi ya misunyi ne mifuba ki mutudi mua kulonga malu atudi nawu dijinga bua kumanya bua kulua bu yeya. Tudi mua kulela bana. Tudi mua kupeta milulu ya mushinga bua tuetu kupingana bua kusomba ne Tatu wetu wa mu Diûlu. Kakuyi mibidi katuena bua kuenza malu â.
Bu mudi nyuma yetu mikala mu mibidi yetu, mubidi udi wa tshijila. Patudi ne ditabuija mu Yezu Kilisto ne tuidikija bua kumutumikila, Tatu wetu wa mu Diûlu udi utuma Nyuma wa Tshijila bua ikala netu. Nyuma wa Tshijila kena mua kushala netu bituikala katuyi batumikidi ne katuyi tukuba mibidi yetu.
Patudi tufua, nyuma yetu idi yumbuka mu mibidi yetu. Pakafua Yezu, Nyuma wenda wakumbuka mu mubidi wenda. Panyima pa matuku asatu, nyuma wenda wakabuela mu mubidi wenda kabidi ne wakabika ku lufu. Yezu uvua ne bukola bua kualukila ne moyo; ne kupitshila ku bupikudi buenda, tuetu petu netubika ku lufu panyima pa lufu. Nyuma ne mibidi bietu nebituadibua pamua kabidi. Yezu uvua mumanya ne netuikala dijinga ne kuikala ne mibidi ya musunyi ne mifuba idi kayiyi ifua bua kulua bu Tatu wetu wa mu Diûlu ne kusomba nenda kashidi.
Tatu wetu wa mu Diûlu mmusua bua tukuba bimpa mibidi yetu. Bituakuba bimpa mibidi yetu, tudi mua kulua ne bukola bua mubidi buimpa ne makanda, ne tuenza malu makuabu adiye musua bua tuenza. Bonsu buetu tudi ne bua kupangadika bituikala ne bua kukuba bimpa mibidi yetu anyi kuenza malu adi ayisamisha. Tudi bamanya ne mibidi yetu idi ne mushinga mu moyo ewu ne panyima pa moyo ewu. Tudi ne bua kusua bua kuyikuba. Tatu wetu wa mu Diûlu kena usanka patudi katuyi tukuba mibidi yetu.
Baledi ki badi ne bua kulongesha bana babu ne, mibidi idi dipa dia tshijila dia kudi Tatu wetu wa mu Diûlu ne kubumvuija bua tshinyi mibidi yabu idi ne mushinga. Padi bana bumvua bua tshinyi bidi ne mushinga bua kukuba mibidi yabu, kabakujinga bua kulonda matêta a Satana to.
Dilejangana
-
Bua tshinyi tudi ne mibidi ya misunyi ne mifuba?
-
Bua tshinyi mibidi yetu idi ya tshijila?
-
Bua tshinyi bidi ne mushinga bua tuetu kulongesha bana betu mushinga wa dikuba dia mibidi yabu?
Tatu Wetu wa mu Diûlu Wakatupesha Mukenji wa Bukola bua Mubidi
Tatu wetu wa mu Diûlu wakatuambila bimua bia ku bintu bidi bimpa bua mibidi yetu ne bimua bia ku bintu bidi kabiyi bimpa buayi. Etshi tshidi tshifundibua mu mifundu ne tshibikidibua ne Dîyi dia Lungenyi.
Tatu wetu wa mu Diûlu wakabuluila Dîyi dia Lungenyi kudi Muambi Joseph Smith. Tshidi mukenji. Tudi ne bua kutumikila munkenji ewu bua tuikala ne mibidi ne meji makola.
Dîyi dia Lungenyi didi ditulongesha bidi bimpa bua mibidi yetu. Tudi ne bua kudia ne kunua amu bintu bidi bimpa bua mubidi wetu. Tudi ne bua kudia bimuma, bisosa, ne nteta. Tudi ne bua kudia bungi bukumbana bua biakudia ebi ne katuyi tudia bipita bungi. Katuena ne bua kudia minyinyi ya bungi to.
Dilejangana
-
Mbiakudia kayi bidi bimpa bua mibidi yetu?
Tatu Wetu wa mu Diûlu Wakatuambila Bidi Bibi bua Mibidi Yetu
Tatu wetu wa mu Diûlu mmumanya ne, Satana neidikija bua kutusuisha bua tuenza mudimu bibi ne mibidi yetu. Tatu wetu wa mu Diûlu wakatuambila bimua bia ku bintu bidi kabiyi bimpa bua mubidi wetu. Kunua kua maluvu kakuena kuimpa bua mibidi yetu to. Tatu wetu wa mu Diûlu wakatuelela mukenji bua katunu maluvu makola, mala a kapia, ne bia kunua bikuabu bidi bikala ne maluvu to. Bintu ebi bidi mua kufila masama ne kukeba dibungama mu nzubu. Padi bantu banua bintu ebi, kabena mua kuela meji mimpa to. Misangu ya bungi bia kunua ebi bidi bituma bantu bua kusungula malu mabi, kushima, kujikija makuta abu onsu, ne kunyanga mukenji wa bunonoka. Padi mamu muimita unua bia kunua bia maluvu, udi ukengesha muana udi kayi muanji kuledibua. Bantu badi banua bia kunua bia maluvu, badi benza ntantu mikola.
Tatu wetu wa mu Diûlu wakatuambila kabidi ne, mfuanka udi mubi bua mubidi wetu. Katuena ne bua kunua anyi kudia mfuanka to. Bena mamanya bakajadika ne mfuanka udi ukeba masama ne udi mua kuenzela bana badi kabayi banji kuledibua bibi.
Tatu wetu wa mu Diûlu wakatuambila kabidi bua katunu café ne tshiayi to. Katuena bua kunua café ne tshiayi to bualu bidi ne manga mabi adi ashipa. Katuena bua kuangata manga, amu bikala minganga mitufundila.
Tatu wetu wa mu Diûlu wakatuambila ne maluvu, mfuaka, ne manga bidi mua kutuambuluisha bituikala bamanya mushindu mukumbanyina wa kubiangata. Wakamba ne maluvu adi ne bua kuangatshibua bua kusukula mibidi yetu. Mfuanka udi mua kuangatshibua bua kôndopa mputa ya tshimuna tshisama. Manga adi mua kutuambuluisha misangu mikuabu bua kutôndopa patudi tusama. Kadi kumpala kua tuetu kuangata bintu ebi, tudi ne bua kulonga kudi bantu ba lungenyi bua kumanya tshia kuenza ne bintu ebi ne mushindu wa kubiangata. Patudi tubiangata mu mushindu mubi, bidi mua kutuenzela bibi.
Katuena bua kuela tshintu tshidi katshiyi tshimpa mu mibidi yetu to. Dîyi dia Lungenyi didi dituambila bimua bia ku bintu bidi bitamba kuikala bibi. Didi mukenji wa mushinga.
Dîyi dia Lungenyi kadiena dituambila bionsu bitudi ne bua kubenga kuangata to. Tudi ne bua kumvua ne tshintu tshionsu tshidi tshibi bua mubidi anyi meji etu, nansha tshiotshi katshiyi tshifunda mu Dîyi dia Lungenyi, katshiena ne bua kuangatshibua to. Tudi ne bua kukuba mibidi yetu mu mishindu mikuabu, bu mudi kuwowesha mâyi misangu ya bungi bua yikala misukula ne kuibijija mubidi ne kuikisha.
Dilejangana
-
Mushindu kayi utudi tumanya ne bimua bintu kabiena bimpa bua mibidi yetu?
-
Mbimua bia ku bintu kayi bitudi katuyi ne bua kuangata mu mibidi yetu?
-
Ntshinyi tshidi kuikisha ne kuibidija mubidi bienza mu mukenji wa bukola bua mubidi wa Tatu wetu wa mu Diûlu?
-
Mushindu kayi wa tuetu kulama mibidi yetu misukula?
Mabenesha Manena Adi Alua Ku Ditumukila dia Dîyi dia Lungenyi
Bituikala tunemeka Dîyi dia Lungenyi, Tatu wetu wa mu Diûlu neabenesha mibidi yetu bua ikala mikola mipita bu muvuayi mua kuikala bu tuetu katuyi batumikila mukenji. Netuikala bakumbana bimpa bua kuenza mudimu wenda apa pa buloba. Wakamba ne, bituikala tutumikila mukenji, netuikala bakumbana bua kunyema katuyi tutshioka ne tuenda katuyi tupungila. Etshi tshidi dibenesha dinena.
Tatu wetu wa mu Diûlu wakalaya kabidi bua kutubenesha ne lungenyi ne dimanya bia bungi bituikala tutumikila Dîyi dia Lungenyi. Nyuma wa Tshijila neatubuluila bintu bia mushinga bia bungi bitudi katuyi mua kumanya mu mushindu mukuabu. Satana kakuikala ne bukola pa mutu petu to. Bituikala tunemeka Dîyi dia Lungenyi, netuikala mu bukola bua mubidi buimpa, ne netuikala tuenda tudilongolola bua moyo wa tshiendelela* ne Tatu wetu wa mu Diûlu.
Dilejangana
-
Mmabenesha kayi adi alua kutudi ku ditumikila dia Dîyi dia Lungenyi?