Shapita 14
Dikudimuna dia Mutshima
Kuenza kua malu mabi kudi kutubungamija. Mushindu kayi utudi mua kulua ne disanka kabidi panyima pa benza bualu bubi?
Tatu Wetu wa mu Diûlu Wakalongolola Njila Bua Tutamba Bubi
Tatu wetu wa mu Diûlu uvua mumanya ne bonsu buetu netuikala ne bua kuenza malu mabi pa buloba. Malu mabi atudi tuenza adi bubi. Tudi tuenza bubi patudi tuenza malu avua Nzambi mutuambila bua katuenji to. Tudi kabidi tuenza bubi patudi katuyi tuenza malu avua Nzambi mutuambila bua tuenza.
Tatu wetu wa mu Diûlu kena wenza bubi to, ne kena wanyishila bantu badi benza bubi bua kusomba nenda to. Bua kusomba nenda, tudi ne bua kukudimuna mutshima ku mibi yetu. Kukudimuna mutshima kudi kumvuija ne, kumvua dibungama bua mibi yetu ne kuimanyika kuyenza.
Tatu wetu wa mu Diûlu mmutunanga. Kena musua bua mibi yetu itupangisha bua kupingana kudiye to. Nunku wakalongolola njila bua kutuambuluisha.
Tatu wetu wa mu Diûlu wakatuma Yezu bua kutuambuluisha bua tukudimuna mitshima ku mibi yetu. Yezu udi utulongesha malu atudi ne bua kuenza bua kuepuka bubi. Udi kabidi utupesha makanda a kuenza malu â. Patudi tumuitabuija ne tumulonda, udi ukudimuna mioyo yetu bua katuikadi nansha ne disua dia kuenza bubi to, kadi amu disua dia kuenza buimpa. Bituikala katuyi basua kukenga bua mibi yetu, tudi ne bua kuitabuija Yezu. Aba badi bitabuija Yezu bushuwa, badi bakudimuna mitshima ku mibi yabu.
Patudi tuitabuija Yezu ne tukudimuna mitshima, kukenga kua Yezu kudi kufuta bua mibi yetu ne tudi tulua basukudibua. Tudi bikala bakumbana bua kupingana kudi Tatu wetu wa mu Diûlu bualu tudi basukudibua.
Dilejangana
-
Kukudimuna mutshima kudi kumvuija tshinyi?
-
Bua tshinyi Tatu wetu wa mu Diûlu mmusua bua tukudimuna mitshima ku mibi yetu?
-
Bua tshinyi bidi ne, aba badi bushuwa ne ditabuija mu Yezu badi bakudimuna mitshima ku mibi yabu?
Tatu Wetu wa mu Diûlu Wakatuambila Tshitudi ne Bua Kuenza Bua Kukudimuna Mutshima
Bua kukudimuna mutshima, tudi ne bua kuitabuija Yezu ne malu akatulongeshaye. Tudi ne bua kuitabuija ne, wakakenga bua mibi yetu. Tudi ne bua kuitabuija ne, amu yeya ki udi mua kufuta bua mibi yetu. Tudi ne bua kuitabuija ne, mmusua bua tutamba mibi yetu ne neatuambuluisha bua kutshienza. Tudi ne bua kuenza mudimu bikola, bua kuenza tshivuaye mutuelela mukendi bua kuenza.
Patudi tukudimuna mitshima, tudi tulekela Yezu utushintulula bua tuikala mu mushindu udiye musua bua tuikala. Tudi tuimanyika kuenza malu mabi ne tubangisha kuenza malu mimpa. Bituikala tuvua bakula malu adi ka’ayi malelela, tudi tuimanyika ne tuamba amu malu adi malelela. Bituikala tuvua biba tshintu, tudi tutshipingaja kudi muenatshi ne katuyi kabidi tuiba tshintu nansha. Bituikala katuvua bimpa ne bakuabu, tudi tuimanyika ne tubenzela malu mimpa.
Patudi tukudimuna mitshima tudi tuenza malu adi alonda â:
Tudi tuditabila bua ne tudi benza bubi. Tudi tumanya ne tudi tuenza bubi, patudi katuyi tutumikila Tatu wetu wa mu Diûlu to. Patudi tukudimuna mitshima, tudi tulomba lusa bua malu mabi atudi benza. Tudi tuitaba ne tudi benza bibi, ne tudi basua kushintuluka.
Tudi tumvua dibungama bua malu mabi atudi benza. Patudi tukudimuna mutshima, tudi tubungama ne moyo mujima bua malu mabi atudi benza. Katuena amu tuamba ne tudi ne dibungama bua mibi yetu to. Tudi tumvua bushuwa dibungama bua ku’enza ne tujinga bua kubenga ku’enza. Tudi kabidi tusua bua kuenza tshidi Tatu wetu wa mu Diûlu utuelela mukenji bua kuenza.
Tudi tuimanyika kuenza malu mabi. Bituaditabila amu ne tudi benza bubi, ne bituamba amu ne tudi bumvua dibungama, katuena bakudimuna mitshima bushuwa to. Bua kukudimuna mitshima bushuwa, tudi ne bua kuimanyika kabidi kuenza kua malu mabi. Imua misangu kabiena biteketa bua kuimanyika to, kadi Yezu wakalua pa buloba bua kutupesha diambuluisha ditudi nadi dijinga. Tatu wetu wa mu Diûlu mmusua bua tulekela Yezu atuambuluisha, bualu ki mushindu umua utudi mua kulua bajalama ne kupingana bua kusomba ne Tatu wetu wa mu Diûlu.
Tudi tutonda mibi yetu. Mu Ekelezia wa Yezu Kilisto wa Bansantu ba Matuku a Ndekelu, kutonda kudi kumvuija kuambila Tatu wetu wa mu Diûlu ne mulombodi wa Ekelezia tshituvua benza tshibi. Imua mibi itudi tuenza idi itusamisha amu tuetu nkayetu. Patudi tusambila kudi Tatu wetu wa mu Diûlu, tudi ne bua kumuambila bua mibi eyi ne tumulomba bua atubuikidila ne atuambuluisha bua kuyitamba. Bikala bubi buetu busâmisha muntu mukuabu, tudi ne bua kubutonda kudi muntu awu ne kudi Nzambi. Tudi ne bua kutonda mibi ya mikola mitamba, bu mudi kuenda masandi, kudi mulombodi wetu wa Ekelezia, udi muikala muepiskopo* wetu anyi mulombodi mukulu wa ditamba.*
Tudi tuenza tshitudi mua kuenza bua kuakaja tshituvua benza tshibi. Patudi tukudimuna mitshima, tudi tuakaja malu mabi atuvua benza. Bu tshilejilu, bituikala tuvua biba kua muena mutumba, tudi tualuja tshintu tshituvua bangata. Bituikala katuyi kabidi ne tshintu tshituvua bangata, tudi tupingaja anyi tufuta tshikuabu.
Tudi tubuikidila mibi ya bakuabu. Tatu wetu wa mu Diûlu wakatuelela mukenji bua kubuikidila bakuabu. Bituikala basua bua atubuikidila, tudi ne bua kubuikidila bakuabu. Bituakina bantu bakuabu bua malu mabi adibu benza ne katuyi tubabuikidila, Tatu wetu wa mu Diûlu kakutubuikidila ku mibi yetu to.
Tudi tuidikija ne moyo mujima bua kutumikila mikenji yonsu ya Yezu mu mioyo yetu yonsu. Tudi tutungunuka kushintulula bituvua benza bibi tô ne mutudi tuenza malu mimpa. Tudi tuenza bitudi mua kuenza dituku dionsu bua kuakaja malu mabi atudi tuenza.
Tudi ne bua kukudimuna mutshima patudi benza bualu bubi. Tudi mua kuela meji ne, kukudimuna kua mutshima mpindiewu kudi kukola. Tudi mua kuela meji ne, kukudimuna kua mutshima nekuikala kupepela pashisha, kadi kakua kuikala to. Kukudimuna kua mutshima kudi kulua kukola, patudi tuindila bua kukuenza. Kuindila bua kukudimuna mutshima, kudi kabidi kutupingaja panyima mu nyuma, bualu Yezu kena mua kutuambuluisha bua kulonga bia bungi bitangila Tatu wetu wa mu Diûlu ne kulongolola bua kusomba ne Tatu wetu wa mu Diûlu bituabenga kukudimuna mitshima ku malu mabi atudi tuenza. Diba ditudi tumanya ne tudi tuenza malu mabi, tudi ne bua kukudimuna mitshima mpindiewu.
Dilejangana
-
Ntshinyi tshitudi ne bua kuenza bua kukudimuna mitshima?
Yonsu wa Kutudi Udi Mua Kukudimuna Mutshima
Yonsu wa kutudi udi mua kukudimuna mutshima. Imua misangu dikudimuna dia mutshima didi mua kuikala dikola menamena buetu. Tudi mua kumvua ne, katuakukumbana bua kutamba mateketa etu. Satana mmusua bua tuitabuija nunku bua tutungunuka kuenza malu mabi. Tudi ne mua kuvuluka ne, tudi mua kukudimuna mitshima. Katuena bua kutshienza nkayetu to. Tudi dijinga ne diambuluisha. Yonsu wa kutudi udi muana wa Tatu wetu wa mu Diûlu, ne wakatuma Yezu bua kutuambuluisha. Ne diambuluisha dia Yezu, tudi mua kuenza malu onsu adi Tatu wetu wa mu Diûlu mutuelela mukenji bua kuenza.
Yezu neatuambuluisha bua kukudimuna mitshima bituikala tusambila Tatu wetu wa mu Diûlu bua diambuluisha dia Yezu. Yeya ne Tatu wetu wa mu Diûlu badi basua bua tuenza malu mimpa. Kabena bananga malu mabi atudi tuenza to. Kadi badianu batunanga, nansha patudi tuenza malu mabi. Badi basua bua tukudimuna mitshima nunku Tatu wetu wa mu Diûlu udi mua kutubuikidila ne tudi mua kuikala ne disanka.
Dilejangana
-
Bua tshinyi tudi ne bua kukudimuna mitshima nansha mudi kukudimuna kua mutshima kumueka kukola?
-
Nganyi watuambuluisha bua kukudimuna mitshima?
Tatu Wetu wa mu Diûlu Udi Utupesha Tshia Lumbandi Patudi Tukudimuna Mitshima
Patudi tuteka ditabuija dietu mu Yezu ne tukudimuna mitshima, Tatu wetu wa mu Diûlu udi utubuikidila mu bujima bonsu. Katuena ne bua kudiabakena bua kuikala banyokibua buayi to. Kena amu utubuikidila to; udi kabidi utupesha diambuluisha bua ne katusua nansha kuenza bubi kabidi to, kadi tuikala tuenza amu malu mimpa. Yezu udi utupesha diambuluisha edi.
Tudi ne bua kuvuluka ne, katua kulua bafuanangana ne Tatu wetu wa mu Diûlu musangu umua to. Kadi patudi tutungunuka ne kuikala ne ditabuija mu Yezu, ne tukudimuna mitshima ku mibi yetu, ne tuenza bua kutumikila Yezu, Tatu wetu wa mu Diûlu udi utungunuka kutubuikidila mibi yetu. Yezu udi utungunuka kutuambuluisha. Tudi tulua bafuanangana bia bungi ne Tatu wetu wa mu Diûlu. Ku ndekelu, tudi mua kupingana bua kusomba ne Tatu wetu wa mu Diûlu.
Patudi tukudimuna mitshima, tudi tumvua disanka. Katuena tubungama bua malu mabi atudi benza to, kadi tudi tumvua disanka bualu tudi batamba mateketa etu kupitshila ku diambuluisha dia Yezu. Nunku tudi tumanya ne, tudi ne bukola bua kukandamena matêta ne kuenza malu mimpa.
Dilejangana
-
Tshia lumbandi kayi tshitudi tupeta patudi tukudimuna mitshima?