Milulu ne Mamanyisha
Shapita 29: Mêku Adi ne Mushinga
dîku dîmana kumpala kua ntempelo

Mêku adi mua kuikala pamua bua kashidi.

Shapita 29

Mêku Adi ne Mushinga

Bua tshinyi Tatu wetu wa mu Diûlu wakatulongoluela bua tuikala mu mêku panu pa buloba?

Tatu Wetu wa mu Diûlu Wakatulongoluela bua Tuikala mu Mêku

Dîku dietu panu pa buloba didi bu dîku dietu dia mu diûlu. Tuvua ba mu dîku dia mu diûlu kumpala kua kulua pa buloba. Tuvua bana ba nyuma ba Nzambi, udi muikala Tatu wetu wa mu Diûlu. Mmutunanga ne udi utukuba. Mmusua bintu bimpa buetu ne mmusua bua tupingana ne tusomba nenda dimua dituku.

Tatu wetu wa mu Diûlu wakateka dîku dia kumpala pakapeshaye Eva kudi Adama mu dibaka. Wakabambila bua balela bana. Etshi tshivua nunku bua ne bana ba nyuma ba Tatu wetu wa mu Diûlu bavua mua kupeta mibidi ya misunyi ne mifuba. Wakabambila bua bapesha bana babu bintu bidibu nabi dijinga. Wakabambila bua balongesha bana babu lumu luimpa ne babambuluisha bua kupeta milulu ya lumu luimpa.

Tatu wetu wa mu Diûlu wakatuteka mu mêku bua tuipatshila tua bungi.

Tshia kumpala, tudi bapeta mibidi ya misunyi ne mifuba kudi baledi betu. Tudi dijinga ne mibidi ya misunyi ne mifuba bua kulonga malu atudi ne bua kuenza, nunku bua tusomba ne Tatu wetu wa mu Diûlu bua kashidi.

Tshibidi, mêku adi mua kufila bintu bitudi nabi dijinga pa buloba apa. Baledi badi mua kufila biakudia, bilamba, bisombedi, dinanga, ne bikuabu bintu bia mushinga bua bana babu. Ne pashisha, bana badi mua kukuba baledi babu padi baledi bikala bakola menamena bapanga mushingu wa kudikuba nkayabu.

Tshisatu, baledi badi mua kulongesha lumu luimpa lua Yezu Kilisto kudi bana babu. Badi mua kubalongesha bua kutumikila mikenji ya Tatu wetu wa mu Diûlu. Ne badi mua kudijadikila ne bana mbapeta milulu ivua Yezu muamba bua ne tudi ne bua kupeta.

Dilejangana

  • Bua tshinyi Tatu wetu wa mu Diûlu uvua mulongolola bua tulua pa buloba bu mêku?

  • Ndîku kayi dia kumpala divua dilua pa buloba?

  • Ntshinyi tshivua Tatu wetu wa mu Diûlu mulongolola bua mêku etu atuenzela?

Tatu Wetu wa mu Diûlu Mmusua bua Bidimba bia Mêku Binangangana

Dîku dietu panu pa buloba didi mua kuikala bu muvua dîku dietu dia mu diûlu dikala mu diûlu. Dîku didi mua kumvua dinanga didi dibasaka bua kujinga bua kuambuluisha umua ne mukuabu ne kuenza ne kuamba bintu bimpa kudi umua ne mukuabu.

Muluma ne mukaji mu dîku badi ne bua kunangangana. Badi ne bua kuikala bimpa ne bakuabu ne kuambuluishangana. Kabena ne bua kuamba anyi kuenza tshintu tshidi tshiumvuija mukuabu bibi to.

Baledi badi ne bua kunanga bana babu. Badi ne bua kulongesha bana babu bua kunangangana. Badi ne bua kubalongesha bua kuambuluishangana ne kukubangana.

Bana badi ne bua kunanga baledi babu. Badi ne bua kunemeka, kutumikila, ne kuambuluisha baledi babu.

Dilejangana

  • Bala Efeso 4:29–32.

  • Mushindu kayi utudi mua kuambuluisha bidimba bia dîku bua kunangangana?

  • Bua tshinyi Tatu wetu wa mu Diûlu mmusua bua bidimba bia dîku binangangana?

Tshintu Tshia Mushinga wa Bungi Tshitudi Mua Kuenza Tshidi Tshia Kuenza Mudimu bua Kuikala ne Dîku dia Disanka ne Diakana

Kuenza mudimu bua kuibaka dîku diakana tshidi mudimu wa mushinga wa bungi utudi mua kuenza. Nansha patuikala tulubuluka mu malu makuabu, bituikala katuyi tulongesha dîku dietu bua kunanga ne kutumikila Tatu wetu wa mu Diûlu to, tudi bapangila bua kuandamuna ku bujitu buetu bua mushinga wa bungi. Imua misangu, bana betu badi mua kusungula bua kubenga kunanga ne kutumikila Tatu wetu wa mu Diûlu, kadi tudi mua kuenza mishindu yonsu bua kubalongesha njila yenda. Bikala baledi mua kuenza mushindu yonsu udi ukumbanyina bua kulongesha bana babu, Tatu wetu wa mu Diûlu kakubalama ku bujitu bua malu mabi a bana babu to. Baledi badi bapangila amu diba didibu bimanyika kuidikija bua kuikala baledi bimpa.

Mêku etu adi mua kutupesha disanka ditamba bunena mu moyo. Tudi tuenza bimpa bikola patudi tuenza mudimu ne bukola bua kukolesha bana bua balua bidimba bimpa bia Ekelezia ne balua bena ditunga bimpa mu ditunga didibu bikala.

Dîku didi tshitupa tshia mushinga mukola mu Ekelezia. Tatu wetu wa mu Diûlu wakalongolola Ekelezia wenda bua kuambuluisha mêku bua enza bionsu bidiwu ne dijinga bua kuenza bua kupingana kudiye. Ekelezia mmusua kuambuluisha dîku dionsu bua dikala pamua bua kashidi.

Satana mmumanya mushinga udi nawu mêku mu dilongolola dia Tatu wetu wa mu Diûlu. Udi utêta kutuenzeja malu adi alua kukosolola mêku mu bitupa.

Dilejangana

  • Mushinga kayi udi nawu dîku dieba kûdi?

Tatu Wetu wa mu Diûlu Wakatuambila Mushindu wa Kuikala ne Dîku Dimpa

Tudi bonsu tusua kuikala ne dîku dimpa ne dia disanka. Ebi bimua bia ku bintu biambuluisha dîku:

  1. Dîku didi ne bua kusambila pamua mudinda ne butuku.

  2. Baledi badi ne bua kusambila pamua dituku dionsu.

  3. Baledi badi ne bua kulongesha bana lumu luimpa.

  4. Dîku didi ne bua kubala mifundu pamua dituku dionsu.

  5. Dîku didi ne bua kuya mu bisangilu bia Ekelezia pamua Dialumingu dionsu.

  6. Dîku didi ne bua kujila biakudia pamua musangu umua ku ngondu padi bana balua bakulumpa ne bakumbana kujila biakudia ne bumvua kipatshila ka dijila dia biakudia.

  7. Dîku didi ne bua kusangila pamua lumingu lonsu bua tshisangilu tshia dîku tshibikidibua ne dilolo dia dîku* bua kuakula bua malu mimpa adi dîku dienza. Badi kabidi ne bua kulejangana mushindu wa kusolakaja ntatu yonsu idi muntu nayi. Mu tshisangilu etshi, badi kabidi mua kuimba, kuenza dilongesha, kulonga imua mvesa ya mu mifundu, kuenza manaya, ne kuikala ne tshintu tshisunguluka bua kudia anyi kunua.

  8. Dîku didi ne bua kuenza mudimu pamua ne kubala pamua.

  9. Bidimba bia dîku bidi ne bua kuikala bimpa ne lutulu kudi umua ne mukuabu.

  10. Dîku didi ne bua kulama muyuki wa malu onsu adibu benza.

Bituavuluka bua kusambila nkayetu ne bu dîku, Tatu wetu wa mu Diûlu neasemena pabuipi netu. Neumvua masambila etu ne nea’andamuna mu mushindu udi muimpa buetu.

Dilejangana

  • Mbimua bia ku bintu kayi bitudi mua kuenza bua kuikala ne dîku dimpa?