Shapita 19
Ekelezia wa Yezu Kilisto Lelu
Muaba kayi utudi mua kupeta lumu luimpa lulelela lua Yezu Kilisto lelu?
Bua Bidimu bia Bungi, Ekelezia wa Yezu Kilisto Kavua pa Buloba To
Yezu wakalongolola Ekelezia wenda pavuaye pa buloba. Ekelezia wenda wakashala pa buloba bua tshikondu tshikesa pakapinganaye ku diûlu. Pakimanyika bantu kulongesha ne kuitabuija malongesha enda malelela, Yezu wakumbusha buakuidi ne Ekelezia wenda pa buloba.
Bua bidimu bia bungi, bantu bakasomba kabayi ne lumu luimpa lulelela ne Ekelezia wa Yezu Kilisto to. Bantu bakalongolola ma’ekelezia a bungi, bashindamena pa ngenyi yabu ne amua malongesha a mu Bibilia. Kadi ma’ekelezia â ka’avua mikala ne buakuidi bua Tatu wetu wa mu Diûlu to. Ka’avua mikala ne malongesha onsu a Yezu to. Ka’avua mikala ne dibuluila ditungunuka dia kudi Yezu to. Ka’avua mikala ne mapa onsu a nyuma to.
Bantu bakabanga kusua kumanya bulelela bitangila Tatu wetu wa mu Diûlu. Bakabanga kukeba bulelela bitangila Tatu wetu wa mu Diûlu ne malongesha enda. Bamua ba ku bobu bakamona ne lumu luimpa lulelela ne Ekelezia wa Yezu Kilisto kabivua kabidi pa buloba to. Tatu wetu wa mu Diûlu uvua mumanya ne diba diakakumbana bua kupinguluja lumu luimpa lulelela ne Ekelezia wa Yezu Kilisto pa buloba.
Dilejangana
-
Bua tshinyi Yezu uvua mumbusha buakuidi pa buloba?
-
Bua tshinyi ma’ekelezia avua bantu balongolola ka’avua mikala Ekelezia wa Yezu Kilisto to?
Tatu wetu wa mu Diûlu ne Yezu bakakumbula Joseph Smith.
Tatu Wetu wa mu Diûlu Wakalama Dilaya Dienda dia Kupingaja Ekelezia Mulelela
Tatu wetu wa mu Diûlu mmunanga bana benda bonsu. Mmusua bua bamanya tshidibu ne bua kuenza bua bobu kusomba nenda padibu bafua ne babika ku lufu. Kumpala kua kumbusha Ekelezia mulelela wa Yezu Kilisto pa buloba, Yezu wakambila bambi ne Bapostolo ne bivua ne bua kufika. Wakalaya kabidi ne neapinguluja dimua dituku Ekelezia pa buloba. Uvua ne bua kuenza nunku pikalaku kabidi bantu bavua pabuipi bua kuakidila lumu luimpa lulelela.
Yezu Wakapinguluja Ekelezia Wenda pa Buloba
Yezu wakapinguluja Ekelezia wenda pa buloba ne bukôkeshi bumua ne mabenesha amua bu muvua Ekelezia wakalongololaye pavuaye musomba pa buloba. Muntu yonsu udi ne disua dia kutumikila mikenji yenda udi mua kulua tshidimba tshia Ekelezia wenda.
Tatu Wetu wa mu Diûlu Wakasungula Joseph Smith bua Ambuluisha bua Kupinguluja Ekelezia
Mu tshidimu tshia 1820, Yezu wakabanga kupinguluja lumu luimpa lulelela ne Ekelezia pa buloba. Nsongaluma ubikidibua ne Joseph Smith uvua musua kumanya ekelezia kayi uvua muikala Ekelezia wa Yezu Kilisto. Wakabala mu Bibilia ne, muntu udi musua kumanya tshintu udi ne bua kulomba Tatu wetu wa mu Diûlu. Wakapangadika bua kulomba Tatu wetu wa mu Diûlu ekelezia kayi uvuaye ne bua kudisangisha. Wakaya mu dîtu pabuipi ne nzubu wenda ne wakakonka Tatu wetu wa mu Diûlu ekelezia kayi uvuaye ne bua kudisangisha. Tatu wetu wa mu Diûlu ne Yezu bakamueneka kudi Joseph Smith. Tatu wetu wa mu Diûlu wakambila Joseph bua ateleja Yezu ne amutumikila. Nunku Yezu wakambila Joseph bua kadisangishi nansha ku umua wa ku ma’ekelezia to. Wakamba ne Ekelezia mulelela kavua pa buloba to.
Dibuluila bu edi dia kudi Tatu wetu wa mu Diûlu kadivua dipetshibua katshia bumbusha pa buloba lumu luimpa lulelela ne Ekelezia wa Yezu Kilisto to. Katshia ku dibuluila adi, mabuluila makuabu a bungi akalua. Tatu wetu wa mu Diûlu wakasungula Joseph Smith bua amuimanyina pa buloba. Yezu wakapinguluja lumu luimpa lulelela ne Ekelezia wa Yezu Kilisto mulelela kupitshila kudi Joseph Smith.
Dilejangana
-
Bua tshinyi Joseph Smith uvua mumona tshimônyi?
Buakuidi Buvua Bupingulujibua
Buakuidi buvua bupinguluja pa buloba mu 1829. Yone Mutambuishi wakalua ufuma mu diûlu, ne wakapesha Joseph Smith ndambu wa bukôkeshi bua buakuidi mu kutenteka bianza bienda pa mutu wa Joseph. Bukôkeshi bua buakuidi ebu budi bubikidibua ne Buakuidi bua Alona. Yone Mutambuishi, uvua mupinguluja bukôkeshi bua buakuidi ebu, uvua muntu umua uvua mutambuisha Yezu. Petelo, Yakobo, ne Yone, basatu bavua ku Bapostolo ba Yezu, bakalua pabu ne bakapesha Joseph bukôkeshi bua buakuidi bua bungi. Bukôkeshi bua buakuidi ebu budi bubikidibua ne Buakuidi bua Melekisedeke.
Bambi bakuabu, kukumbaja Mose ne Eliya, bakalua pabu ne bakapesha Joseph Smith bukôkeshi bua kuenza midimu mikuabu ya tshijila. Bukôkeshi bua kudi Tatu wetu wa mu Diûlu bua kulongesha lumu luimpa, bua kuenza midimu ya tshijila, ne kulombola Ekelezia budi pa buloba kabidi.
Dilejangana
-
Mushindu kayi udi Joseph Smith mupeta buakuidi kumpala?
Yezu Wakalongolola Ekelezia Wenda Kabidi
Kupitshila ku dibuluila, Yezu wakaludika Joseph Smith bua kulongolola Ekelezia wenda kabidi, mu matuku 6 a Ngondu Muinayi 1830. Yezu uvua mutu wa Ekelezia pavuaye musomba pa buloba. Yeya udi mutu wa Ekelezia mpindiewu. Bidimba bia Ekelezia wenda bidi bibikidibua amu Bansantu.
Yezu udi ubikila Ekelezia wenda lelu ne, Ekelezia wa Yezu Kilisto wa Bansantu ba Matuku a Ndekelu. Miaku Matuku a Ndekelu idi ileja ne, etshi tshidi Ekelezia wa Yezu Kilisto mu tshikondu tshia ndekelu pa buloba. Yezu wakamba ne, Ekelezia ewu udi Ekelezia umua udi mulelela pa buloba bujima ne, ne udi usanka nenda.
Yezu udi usungula muambi bua kulombola Ekelezia pa buloba. Yezu udi uludika muambi ewu. Udi upesha muambi ewu bukôkeshi bua kulombola Ekelezia. Joseph Smith uvua muambi wa kumpala wa Ekelezia wa Yezu Kilisto wa Bansantu ba Matuku a Ndekelu. Muambi wa Ekelezia udi kabidi ubikidibua ne, Mulombodi Mukulu wa Ekelezia. Mulombodi Mukulu udi ne bantu baluma badi bamuambuluisha. Badi babikidibua ne, Babedi. Padi muambi ufua, Yezu udi usungula muambi mupia-mupia bua kuangataye muaba wenda.
Yezu udi kabidi usungula Bapostolo dikumi ne babidi bua kuambuluisha kulombola kua Ekelezia. Bantu baluma badi basungudibua bua kuikala bidimba bia Mpuilu ya Bayidi Makumi Muanda Muteketa, badi bambuluisha Bapostolo ne Mulombodi Mukulu. Bantu baluma bimpa bakuabu ne bansongaluma, badi pabu bapeta buakuidi ne basadila mu Ekelezia. Badi babikidibua ne, bakuidi banena, bakulu, bepiskopo, bakuidi, balongeshi, ne badiakre, amu bu muvuabu babikidibua mu Ekelezia wa Yezu Kilisto wa kala.
Yezu wakambila Joseph Smith mushindu uvua Ekelezia wenda nebua kulongolodibua. Padi Ekelezia ulongolodibua ne bujima bonsu mu muaba, muaba ewu udi umanyika bu dikunji.* Mulombodi mukulu udi ulombola dikunji. Udi ne babedi babidi bua kumuambuluisha.
Dikunji didi ditapuluka mu miaba mikesa. Miaba eyi idi mimanyika bu bikongu.* Mulombodi wa buakuidi ubikidibua ne muepiskopo udi ulombola tshikongu. Udi ne babedi babidi bua kumuambuluisha.
Mu miaba idi makunji ka’ayi manji kulongolodibua, idi ne bua kuikala distrika,* didi dienza ne matamba. Matamba adi malombola kudi mulombodi mukulu ne babedi babidi. Miaba idi bena bukenji ba bungi balongesha lumu luimpa idi ibikidibua makenji.*
Bantu Baluma Badi ne Buakuidi Badi Balongolodibua Mu Mpuilu
Bantu baluma badi ne buakuidi, badi balongolodibua mu bisumbu bibikidibua ne mpuilu. Mpuilu wa buakuidi udi tshisumbu tshia bantu baluma badi ne mudimu umua mu buakuidi. Badi basangila pamua bua kudiambuluisha bobu ne bakuabu bantu.
Dilejangana
-
Nganyi udi muikala mutu wa Ekelezia wa Yezu Kilisto lelu?
-
Mbantu kayi badi babikidibua bua kuambuluisha kulombola Ekelezia?
Ekelezia Lelu Udi Mulongolodibua Momumua ne Ekelezia Uvua Yezu Mulongolola Pavuaye pa Buloba
Yezu Utshidi Ulombola Ekelezia Wenda Kupitshila ku Dibuluila
Kupitshila ku Nyuma wa Tshijila, Yezu udi wambila muambi mushindu udiye ne bua kulombola Ekelezia. Udi kabidi ubuluila Bapostolo ne balombodi bakuabu ba Ekelezia tshidiye musua bua benza. Kupitshila ku dibuluila, Yezu udi utungunuka kuludika bidimba bia Ekelezia wenda.
Muntu Yonsu Udi Mua Kulua Tshidimba tshia Ekelezia
Muntu yonsu udi mua kulua tshidimba tshia Ekelezia wa Yezu Kilisto mpindiewu mu mushindu umua uvua bantu badisanga ku Ekelezia wenda pavuaye pa buloba. Muntu udi ne bua kuikala ne ditabuija mu Yezu ne kukudimuna mutshima. Muntu udi ne bua kutambuishibua. Padi muntu utambuishibua, yeya udi upeta dipa dia Nyuma wa Tshijila.
Dilejangana
-
Ntshinyi tshitudi ne bua kuenza bua kudisanga ku Ekelezia wa Yezu Kilisto mpindiewu?
Bidimba bia Ekelezia Lelu Bidi Bipeta Mapa a Nyuma
Yezu utu amu upesha bidimba bia Ekelezia wenda mapa a nyuma. Makola onsu a nyuma â adi mu Ekelezia lelu.
Dilejangana
-
Amua a ku mapa kayi a nyuma? (Tangila shapita 16.)
Yezu Wakapinguluja Malongesha Enda Malelela
Yezu wakapinguluja malongesha avua yeya ne Bapostolo balongesha. Malongesha a nshindamenu adi ditabuija mu Yezu Kilisto, dikudimuna dia mutshima, ditambula, ne dipa dia Nyuma wa Tshijila. Amua malelela a mushinga adi Yezu mupesha Ekelezia wenda adi:
-
Tatu wetu wa mu Diûlu udi ne mubidi wa musunyi ne mifuba.
-
Tudi bana ba nyuma ba Tatu wetu wa mu Diûlu. Tuvua basomba nenda mu diûlu bu nyumba kumpala kua tuetu kuledibua pa buloba.
-
Netunyokibua amu bua mibi yetu nkayetu ne kabiyi bua ivua Adama muenza to. Bantu ba bungi badi bitabuija ne, bualu Adama ne Eva bakalabula tshimuma tshikandikibua, tuetu bana babu, tudi ne mibi patudi tuledibua. Etshi katshiena bulelela to. Bana kabena ne mibi padibu baledibua to. Badi bakezuka. Ki bualu kayi, kabena dijinga ne kutambuishibua to tô ne padibu bakumbaja bidimu muanda mukulu.
-
Muntu muluma udi ne bua kuikala ne buakuidi mu mushindu wa kukumbaja milulu* (tangila shapita 21) ya Ekelezia wa Yezu Kilisto.
Dilejangana
-
Amua a ku malongesha kayi a Yezu adiye mupesha bantu kabidi?
Ekelezia wa Yezu Kilisto Kakumbushibua Kabidi pa Buloba Nansha
Mpindiewu mudi Ekelezia wa Yezu Kilisto mulelela, bukôkeshi bua buakuidi, ne lumu luimpa bikala bipingulujibua pa buloba, kabia kumbushibua kabidi pa buloba to. Tatu wetu wa mu Diûlu wakamba ne, ne’enza bukalenga budi kabuyi bubutudibua nansha. Bukalenga ebu budi Ekelezia wa Yezu Kilisto wa Bansantu ba Matuku a Ndekelu. Neatungunuka kashidi.
Bantu ba bungi mbadisangisha ku Ekelezia wa Yezu Kilisto wa Bansantu ba Matuku a Ndekelu. Kudi bidimba bia Ekelezia mu matunga a bungi mu buloba bujima. Babungi ne babungi nebatungunuka kudisangisha ku Ekelezia. Bana bonsu ba Tatu wetu wa mu Diûlu nebumvua lumu luimpa ne nebapeta diakalenga dia kuluitaba.
Dilejangana
-
Ntshinyi tshiwudi mua kuenza bua kuambuluisha bakuabu bua bumvua lumu luimpa lua Yezu Kilisto bua ne badi bua kudisangisha ku Ekelezia wenda?