Shapita 7
Nyuma wa Tshijila
Tatu wetu wa mu Diûlu wakasungula muntu bua kutuambila malu adiye musua bua tumanya. Muntu ewu nganyi, ne mushindu kayi utudi mua kulonga bua kumvua mikenji ya Tatu wetu wa mu Diûlu?
Nyuma wa Tshijila udi Wenza Mudimu ne Tatu Wetu wa mu Diûlu ne Yezu bua Kutuambuluisha
Nyuma wa Tshijila udi wenza mudimu ne Tatu Wetu wa mu Diûlu ne Yezu. Udi utujadikila ne badi ne moyo ne mbatunanga. Udi ubambuluisha bua kutulongesha malu atudi ne bua kumanya ne kuenza ne udi utuambuluisha bua kutumikila mikenji yabu. Kena ne mubidi wa musunga ne mifuba bu wa Tatu wetu wa mu Diûlu ne Yezu to. Yeya udi nyuma. Udi mufuanangana ne muntu.
Tatu wetu wa mu Diûlu, Yezu Kilisto, ne Nyuma wa Tshijila badi bantu basatu bashilangana. Badi benza mudimu pamua bua kutuambuluisha tulonga malu atudi ne bua kumanya ne kuenza. Patudi tupeta mikenji ya kudi Tatu wetu wa mu Diûlu anyi Yezu, pa tshibidilu Nyuma wa Tshijila ki udi uyituala kutudi. Udi kabidi utuambuluisha bua kutumikila mikenji yabu.
Dilejangana
-
Nganyi udi Nyuma wa Tshijila wenza nenda mudimu?
-
Mushindu kayi udi Nyuma wa Tshijila mushilangana ne Tatu wetu wa mu Diûlu ne Yezu?
Mudimu wa Nyuma wa Tshijila
Nyuma wa Tshijila udi utulongesha bitangila Tatu wetu wa mu Diûlu ne Yezu. Udi utuambila ne badi ne moyo ne mbatunanga. Udi utuambila ne Tatu wetu wa mu Diûlu udi Tatuenda wa nyuma yetu. Udi kabidi utuambila ne Yezu udi Mupandishi wetu.
Nyuma wa Tshijila udi utuambuluisha bua kumvua bitangila Tatu wetu wa mu Diûlu ne Yezu ne malu atudi ne bua kuenza bua kupingana ku diûlu. Udi kabidi utuambuluisha bua kulonga ne kumvua malelela onsu.
Nyuma wa Tshijila udi kabidi utupesha makanda a kutumikila mikenji ya Tatu wetu wa mu Diûlu ne Yezu. Udi mua kutuambuluisha bua kuangata dipangadika dijalama patudi ne bua kusungula pankatshi pa bia kuenza bibidi. Udi mua kutupesha ditalala mu bikondo bia dipampakana.
Dilejangana
-
Nyuma wa Tshijila udi ne mudimu kayi?
-
Ntshinyi tshidi Nyuma wa Tshijila mua kutuambuluisha bua kumanya?
-
Ntshinyi tshidi Nyuma wa Tshijila mua kutuambuluisha bua kuenza?
Nyuma wa Tshijila Udi Utulongesha mu Mushindu wa Bukola
Nyuma wa Tshijila udi utulongesha tshidi tshimpa ne tshidi tshibi. Dilongesha edi didi ne dikanda ditudi katuyi kupua moyo. Nyuma wa Tshijila katu amu wakula kutudi mu mushindu utudi mua kumvua ne matshi etu to. Pamutu pa nanku, udi wenza bua tuela meji anyi tumvua pikala bitudi tubala ne tuteleja bidi bilelela. Ngumvuilu eyi idi mikola menamena.
Bukola bua Nyuma wa Tshijila budi mua kumvuika kudi bantu ba bungi musangu umua. Bua kumvua tshiotshi etshi bimpa, ela meji bua diba. Kudi amu diba dimua, kadi bukenka ne luya luadi bidi biumvuika kudi bantu mu miaba ya bungi musangu umua. Nyuma wa Tshijila udi penda mua kumvuijibua mu mushindu ewu umua. Bukola ebu budi mua kumvuika kudi bantu mu miaba ya bungi musangu umua nansha mudiye nkayenda muikala muaba umua ku musangu.
Dilejangana
-
Mushindu kayi udi Nyuma wa Tshijila utuambila malu atudi dijinga ne kumanya?
-
Mushindu kayi udi Nyuma wa Tshijila mua kuambuluisha bantu ba bungi mu musangu umua?
Nyuma wa Tshijila Neambuluisha Umua Yonsu wa Kutudi
Pakatuma Tatu wetu wa mu Diûlu Adama ne Eva pambelu pa Budimi bua Edene, bakasambila ne kumulombabu tshivuabu ne bua kuenza. Tatu wetu wa mu Diûlu wakatuma Nyuma wa Tshijila bua kubalongesha pa bidi bitangila Yeya ne Yezu ne bua malu avua Adama ne Eva ne bua kuenza. Nyuma wa Tshijila wakabambila ne. malongesha a Tatu wetu wa mu Diûlu avua malelela. Wakabapesha bukola bua kuenza malu avua Tatu wetu wa mu Diûlu musua bua benza.
Wakabambuluisha kabidi bua bikala badipuekesha ne bikala ne kusakidila bua malu uvua Tatu wetu wa mu Diûlu mubenzela.
Kupitshila ku buludiki bua Nyuma wa Tshijila, Adama ne Eva bakalonga ne; badi mua kusomba dituku dikuabu ne Tatu wetu wa mu Diûlu kabidi bikalabu bajinga kulonda amu Yezu ne batumikila mikenji yenda. Buludiki bua Nyuma wa Tshijila buakabapesha disanka.
Tatu wetu wa mu Diûlu mmunanga umua yonsu wa kutudi. Udi utuma Nyuma wa Tshijila bua kutuludika ne kutulongesha bulelela. Kadi, Nyuma wa Tshijila neatuambuluisha amu bituikala ne moyo mushindama bua kuidikija kulonda mikenji ne maludiki a kudi Tatu wetu wa mu Diûlu ne Yezu adiye ututumina. Bituikala katuyi ne moyo mushindama bua kuidikija kutumikila mikenji yabu, anyi bituikala katuyi basua bua Nyuma wa Tshijila atulongesha, kakutuambila bualu to. Netuikala ne nsombelu muimpa bituikala tulonda malongesha a Nyuma wa Tshijila.
Dilejangana
-
Mushindu kayi uvua Nyuma wa Tshijila muambuluisha Adama ne Eva?
-
Ntshinyi tshitudi ne bua kuenza bua kupeta diambuluisha dia kudi Nyuma wa Tshijila?